Faamaoni i le Faatuatua: Ofoina Atu Manatu Faigofie i Mataupu Faavae o le Talalelei

Saunia e Karianne Salisbury, Mekasini a le Ekalesia

Pe a fetaiai Robert Lund, o se epikopo i Kaysville, Iuta, ISA, ma soo se fesili po o se atugaluga e faatatau i le talalelei, e tasi le punaoa e masani lava ona ia liliu atu i ai o le Faamaoni i le Faatuatua.

“A sau se tagata ia te au ma se fesili, ou te faapea atu i ai, ‘sei o ta vaai pe fai mai e a le Faamaoni i le Faatuatua’,” o le saunoaga lea a Epikopo Lund, e uiga i le paaga o se tusi mo le suesueina o tusitusiga paia ma aoaoga a perofeta o aso e gata ai.

O le Faamaoni i le Faatuatua, na uluai lolomiina i le 2004, o loo faaaogaina i se faiga o le autu-i le-autu i ni faamalamalamaga faigofie o mataupu o le talalelei. E ui o le tusi na fuafuaina ina ia taulai faapitoa atu i le autalavou laiti, autalavou matutua nofofua, ma tagata faatoa liliu mai, ae o le faamoemoega autu lava o le Faamaoni i le Faatuatua o le fesoasoani lea i tagata faitau uma e faamalolosia a latou taumafaiga “e faalatalata atu i le Faaola ma mulimuli i Ana faataitaiga,” e pei ona taua i le folasaga a le Au Peresitene Sili.

E le o toatasi Epikopo Lund i lona manatu naunautai e uiga i le tusi. O loo saili foi e tagata o le Ekalesia i le lalolagi ia auala e faaaoga ai le Faamaoni i le Faatuatua e faaleleia ai a latou suesuega patino o le talalelei, fausia ni faavae malolosi atu o le malamalama i le talalelei, faaaoga mataupu faavae o le talalelei i o latou olaga, ma saunia e fetufaai atu pe aoao atu le talalelei.

Faaleleia le Suesueina o le Talalelei

E faaaoga e Donna Heßling, mai le Paranesi a Münster, o le Siteki a Dortmund Siamani le Faamaoni i le Faatuatua e maua ai se malamalamaaga lautele e uiga i le Ekalesia toefuataiina ma ana aoaoga.

“O tusiga e manino ma o’oo’o, ma o autu taitasi ua faateleina ma lagolagoina ai la’u molimau e uiga i le moni O Le Ekalesia a Iesu Keriso o le Au Paia o Aso e Gata Ai,” o le faamatalaga lea a Sister Heßling.

O le Faamaoni i le Faatuatua o loo i ai pe a ma le 170 tusitusiga e uiga i autu ua lisiina faalafapeta mai le Perisitua Arona e oo i le Siona. E faaopoopo atu i le aoaoina o mataupu faavae o le talalelei i se auala faigofie ae musuia, o tusiga taitasi foi o loo i ai mau e faatatau i ai mo le faalauteleina o le suesuega o soo se autu.

E masani ona faaaoga e Mark Ellison ma lona aiga, mai Saratoga Springs, Iuta, ISA, le Faamaoni i le Faatuatua e taulai atu ai i se autu a o suesueina le talalelei i le aiga.

“A auai le ma fanau i afiafi faaleaiga e ala i le faia o le lesona, latou te filifilia se autu ma faaaoga le Faamaoni i le Faatuatua mo se aotelega lelei,” o le saunoaga lea a Brother Ellison. “O nisi taimi matou te filifilia ai se autu ma fai atu i tagata taitasi o lo matou aiga e ta’u mai se mea se tasi latou te iloa e uiga i lena autu. Ona matou sailia lea i le Faamaoni i le Faatuatua e iloa ai le faamatalaga o loo i ai, ma pe o a foi ni mea ua matou le maua.”

O le matutua o lana fanau e mai le 7 tausaga e oo i le 18, ae fai mai Brother Ellison o le Faamaoni i le Faatuatua o loo aumaia ai faamatalaga e fetaui ma le fiafia ma le maualuga o le atamai i le talalelei o tagata taitoatasi o lona aiga.

“E faatauvaa ae o loo i ai faamatalaga e sili ona taua,” na fai mai ai Brother Ellison. “Ou te manatu e matuai malamalama lelei lo’u aiga, o lea tusi o se punaoa o le talalelei e mafai ona latou o i ai pe afai e i ai soo sa latou fesili pe manaomia foi ona saunia e aoao atu pe faasoa atu manatu e uiga i soo se autu.”

Fausia o Faavae o le Malamalama

I le faagasologa o le 2007, na auai ai Jake McKell e 17 ona tausaga mai le Uarota a Grandview 21, o le Siteki a Provo Iuta Grandview (ISA), faatasi ai ma ana uo ma ona taitai, i se lu’i na tuuina atu i ai e lo latou epikopo ina ia faitau le Faamaoni i le Faatuatua mai le amataga e oo i le faaiuga i lena tausaga. Fai mai David Tueller, o le peresiene o Alii Talavou a le uarota e faapea, na vaaia e le uarota se tali lelei i le Faamaoni i le Faatuatua.

“O se faamanuiaga matagofie le faitau i aoaoga faavae o loo aoaoina i lena tusi i se ala tuusao, mama, ma faigofie ona malamalama i ai,” o le tala lea a Brother Tueller. “O loo i ai se silafia tele i le uarota atoa, i le mana ma le aoga o lena tusi mo tautalaga, suesuega faaletagata lava ia i tusitusiga paia, ma fesoasoani e faasoa atu le talalelei i isi.”

I le Paranesi a Allentown, i le Siteki a Reading Pennsylvania (ISA), na faaaoga ai e Tracy Norton, o le peresitene o Tamaitai Talavou, ma tamaitai talavou o lana uarota le Faamaoni i le Faatuatua a o suesueina ia Mataupu Faavae o le Faatuatua, o se galuega faatino latou te faamoemoe o le a latou maua ai le lototele e faasoa atu le talalelei e ala i le malamalama atili i vaega autu o talitonuga o le Ekalesia.

“Ou te taumafai e faaaoga le Faamaoni i le Faatuatua mo au lesona i le tele e mafai ai ma uunaia ia tamaitai talavou e faaaoga i a latou fesili,” na fai mai ai Sister Norton. “O le Faamaoni i le Faatuatua o loo aofia ai le tele o autu e faatatau i luitau o loo feagai ma le autalavou ma faailoa mai ai le tulaga o le Ekalesia e uiga i na autu ma isi autu taua. Ou te talitonu e taua le faailoa atu o se punavai e mafai ona latou liliu atu i ai mo ni tali.”

E talitonu Sister Norton e talu ai ona sa mafai ona latou taulai atu i autu taitasi, sa sili atu ona malamalama lelei ia tamaitai talavou o loo ia aoaoina i mataupu faavae taitasi.

“O le faaaogaina o le Faamaoni i le Faatuatua na fesoasoani e faalautele ai lo’u malamalama i le talalelei ma na fesoasoani ia te au na ou maua ai se molimau malosi atu,” o le tala lea a Genesis Felix, e 14 tausaga le matua, o se tasi o le Paranesi a Allentown. “O le taimi nei, ou te teuina faatasi le tusi ma a’u tusitusiga paia ma e masani ona ou faaaogaina e sue ai autu ou te le malamalama lelei i ai.”

Faatatau Mataupu Faavae o le Talalelei

O le faitauina, aoaoina, ona ola lea i le talalelei ua avea o se faiga masani mo Daniel Jauslin o le Uarota a Pratteln, i le Siteki a Bern Suitiselani, o le na faapea mai o le Faamaoni i le Faatuatua o se tasi lea o tusi e sili ona fiafia i ai o ia.

“Ua ou iloa le aoga tele o lenei tusi,” na fai mai ai Brother Jauslin. “E te faitau i ai, e te maua ai pe faamalosia ai se molimau i mea o loo tau mai ai, ma e te maua mai ai se mea aoga. O se taiala moni lenei o le auala e ola ai i le talalelei.”

Mo se faataitaiga, na taua e Brother Jauslin le vaega i mau ma le fautuaga ina ia suesue i ai faaletagata lava ia faapea ma tagata o le aiga.

“Ou te iloa o le faitauina o tusitusiga paia i aso uma atonu o le a faigata mo le toatele o tagata i le lalolagi atoa, ae … o loo tau mai i le Faamaoni i le Faatuatua e tatau ona tatou faia i aso uma, e tatau ona fai sa tatou fuafuaga, ma e tatau ona faaauau ona tatou sailia le uiga o mea tatou te faitauina,” o lana tala lea.

Fai mai Legrand Laing, o se faiaoga seminare i Springville, Iuta, ISA, sa ia vaaia le Faamaoni i le Faatuatua o faatinoina se tiute taua i le fesoasoani lea i tagata e aoao ona faatatau lea o le talalelei i o latou olaga.

“O le Faamaoni i le Faatuatua e ofoina mai ai mafaufauga ma faamalosiauga i faatatauga moni o le olaga o aoaoga ma mataupu faavae na aoaoina,” o le tala lea a Brother Laing. “E moni e mafai ona maua lenei mea i le tele o isi punaoa ua saunia e le Ekalesia ma tusitusiga paia lava ia, ae o le Faamaoni i le Faatuatua ua tuuina mai ai nei mea i le vave, faigofie, ma le manino—e i ai uma i le mea e tasi.”

Saunia e Faasoa Atu

O le 2004 na avea ai le Faamaoni i le Faatuatua ma se vaega aloaia o le fatatusi a le faifeautalai, faatasi ai ma le Talai La’u Talalelei.

“I le agai i luma o le Talai La’u Talalelei, na iloiloina ai o le fatatusi a le faifeautalai e tatau ona faigofie ma ia faafou pea,” o le saunoaga lea a Greg Droubay mai le Matagaluega o Faifeautalai a le Ekalesia. “O le Faamaoni i le Faatuatua sa filifilia o se tusi faatauvaa, puupuu, ma faigofie ona faaaoga o le a faapea ona fesoasoani i se faifeautalai i ana suesuega.”

E ui o le Faamaoni i le Faatuatua o loo faamamafaina o se punaoa e lona lua i tusitusiga paia ma le Talai La’u Talalelei, ae ua iloa e faifeautalai i le lalolagi atoa lona aoga i le suesueina ma le faasoaina atu o le talalelei.

“O la’u misiona sa masani ona ou faaaogaina le Faamaoni i le Faatuatua ou te aoao ai mo tautalaga po o lesona,” na fai mai ai Paul Epperson mai Woodbridge, Virginia, ISA, o le sa auauna atu i le misiona a Belgium Brussels/Netherlands. “Na saunia e le Talai La’u Talalelei se amataga maoae i le suesueina o autu, ae sa ou sue foi i le Faamaoni i le Faatuatua mo nisi faamatalaga, o faamalamalamaga faigofie o faaupuga eseese ma manatu.”

Ua i ai foi se nofoaga faapitoa o le Faamaoni i le Faatuatua i tusi lesona a tamaiti aoga e faaaoga mo le inisitituti ma vasega faalelotu.

“O loo faaauau pea ona matou faafouina ia tusi lesona a le inisitituti ma le seminare, ma e talitonu o le Faamaoni i le Faatuatua o se punavai sili lea aua e le gata ua faamaonia ae ua fautuaina foi ma e ese le faapitoa,” o le saunoaga lea a Brian Garner, o le pule o le kolisi o mataupu aoaoina mo le Ekalesia.

A o tuufaatasia ia tusi lesona mo inisitituti ma vasega faalelotu, fai mai Brother Garner o le mea e tasi o loo galulue agai i ai ia tagata tusi lesona o se vaaiga lea a le lalolagi atoa—ua fatuina ai se mea e mafai e soo se tasi ona maua ma liliu atu i ai.

“E toetoe lava o tagata uma e mafai ona faaaogaina le Faamaoni i le Faatuatua,” na ia saunoa ai. “E mafai ona iloa e tagata le faatatauga, sue i le tusi, ma faitau le faamatalaga. E faigofie ma e faatuatuaina.”

O le Faamaoni i le Faatuatua na lolomiina i gagana e 46, ua oo atu i tagata o le Ekalesia mai Sepania i Finelani i Kemupotia. O loo maua ia kopi i faletusi a le Ekalesia i le ldscatalog.com pe ala atu foi i taitai perisitua i le lotoifale. E mafai foi ona maua le lomiga faaPeretania i le lds.org e ala i le filifilia o le Gospel Library, Media Formats, PDF, ona filifili lea o le True to the Faith.

O Le Tumau i le Faamaoni i le Faatuatua

E ui ina sa talasua ia Epikopo Lund ina ua ia saunoa mai faapea, maimau pe ana pipii le Faamaoni i le Faatuatua i le pito i tua o tusitusiga faavae, ae ua ia mautinoa o le punaoa e mafai ona faaaogaina i ni auala eseese ma ua ofoina mai ai le fesoasoani i fesili po o atugaluga a tagata uma.

“O le papatisoga, mauaina o le perisitua, tauagafau, faamagalo atu, salamo—o loo i ai uma lava iina,” na saunoa ai Epikopo Lund, i le lisiina o nisi o autu o loo aofia i le Faamaoni i le Faatuatua.

E pei ona taua i le folasaga, ua faamoemoe le Au Peresitene Sili e faapea, a o suesue ia tagata o le Ekalesia, ma faatatau ia mataupu faavae o le talalelei, o le a latou faaaogaina lenei punaoa ma faaauau ai ona maua le malosi.

“A o e aoaoina upu moni o le talalelei, o le a faateleina lou malamalama i le fuafuaga e faavavau a le Tama Faalelagi,” na latou saunoa ai. “O le i ai o lenei malamalamaaga e fai ma faavae o lou olaga o le a mafai ai ona e faia faaiuga poto, ola e tusa ai ma le finagalo o le Atua, ma maua le olioli i le ola ai. O le a faamalosia atili ai lau molimau. O le a e tumau faamaoni i le faatuatua.”