Ia Faaeteete i Solofanua Laupapa
Pe o e iloaina le auala e mafai ai e o tatou siosiomaga ona aafia ai a tatou mea e fai ma aafia ai a tatou amioga? Ou te manatua, ao avea ai ma se tama aoga talavou i le kolisi, ma auai ai i se talanoaga ma se faiaoga sa faatatau lana talanoa mai i se suesuega faasaienisi e uiga i aafiaga o le siosiomaga i tulaga o galuega i totonu o fale faigaluega. Sa ia lipotia mai o nisi siosiomaga e faamalosiau i tagata faigaluega ina ia galulue malosi ma lelei ae o nisi siosiomaga ua i ai sona faafeagai tele. O le manatu o nei mea e foliga mai e na o ni mea laiti ma e i ai ni aafiaga faapea ua avea o se mea ua ou manatunatu tele i ai.
Sa ia talanoa foi i se aafiaga sa faatinoina ma se vaega o tagata sa nonofo i le laulau ua sauni e faia se taumafataga ua saunia mo i latou. E ui o nei tagata taitoatasi ua fiaaai ma ua faaalia le mananao e taumamafa i le meaai, ae o o latou lagona fiaaai ua matua aafia lava i le suiga o moli i totonu o le potu. I le maea ai o le suiga i moli, o le toatele e lei aai, o isi sa na o sina meaai sa taumafaina, ae, o le mea e maofa ai, e leai se isi o e na i ai sa fiafia i le taumafataga.
O le mea moni lava ia o ni meaai e faaosofia ai le fiaai o le a leai sona manaia talu ai ona ua suia moli o le potu e faailoa mai ai le mafai ona i ai o se aafiaga ma se faatosinaga o le siosiomaga i a tatou amioga.
I le tele o tausaga mulimuli ane ai, i le taimi o lo’u olaga faigaluega, sa valaaulia ai au e se tasi o paaga ina ia saunia se inisiua e puipuia ai se pisinisi fou sa ia amataina. Ina ua ou taunuu atu i le nofoaga, sa ou iloa ai o se fale kalapu.
Ina ua ma pasia le vaega e ulufale atu ai, ma oo atu i le vaega autu, sa faagaeetia au i tulaga o teuga ma mamanu o le fale. O meaafale ma teuga, o pupuni ma le kapeta sa matua lelei ona faatulagaina, ua aumaia ai se tulaga sili ona faamalieina. E le o se mea lea sa ou mafaufau e oo i ai ina ua maea ona tauina mai le mafuaaga o le a faaaoga i ai le pisinisi. A o ma nonofo ma le e ana le pisinisi, ao faatumu ia faamatalaga manaomia, sa sau se tagata faigaluega ma fesili pe mafai ona ia faataitaia masini faaleotele leo ma moli.
Sa tuuina atu e lau paaga le faatagaga. E lei umi lava, mai le tulaga filemu sa i ai ae suia loa moli sa mu itiiti ua suia i moli feemoemoai o lanu eseese ma le musika ua matua leo tele. Sa vave ona faaleagaina le lagona o le toafilemu sa i ai.
Sa le mafai ona faia ni fesootaiga i lalo o ia ituaiga tulaga, o lea sa ma toe savavali ai i le vaega e ulufale mai ai tagata. I le maea ai o nisi talanoaga ma talu ai ona o le mea sa ou aafia ai, sa ou le lagonaina ai le mafanafana e faaauau, o lea sa ou auina atu ai lau paaga i se tasi e poto faapitoa i lenei ituaiga o inisiua. E oo mai lava i le taimi nei o loo ou manatuaina pea ma le manino le suiga malosi sa tupu faatasi ai ma le emoemo o moli ma le tu’itu’i malosi mai o le leo o musika leo tetele sa faatumulia ai le potu pogisa.
Sa ou aoaoina ai se lesona tumau mai nei aafiaga. O lo tatou siosiomaga e mafai ona i ai se aafiaga malosi i o tatou lagona ma le auala tatou te amio ai.
O se tasi lena o mafuaaga ua fautuaina ai i tatou e o tatou taitai o gaoioiga uma e faia a le Ekalesia e tatau ona faia i se siosiomaga e mafai ona i ai le Agaga o le Alii. Mafaufau e uiga i lenei fautuaga. Ia mafaufau la e uiga ia tatou gaoioiga faale-Ekalesia. O le a le mea e mafai ona tatou faia ina ia faataunuu ai le faamoemoega o le Alii e tusa ai ma gaoioiga tauleleia ma le siitia.
O Le Solofanua Torotana
Talu mai lou talavou sa ou fiafia lava i le talatuu faa-Eleni o le solofanua Torotana. Atonu e tou te manatua o le autau a Eleni sa latou siomiaina le aai o Toroi mo le 10 tausaga e aunoa ma le mafai ona sao atu i totonu ona o le malosi o le puipuiga.
Sa iu lava ina faafoliga mai ua solomuli Eleni, ae tuua ai e i latou se solofanua laupapa tele lava o loo lalafi ai i totonu se autau ua sauni e osofai. O le au Toroi ua latou talitonu o lenei solofanua o se faailoga lelei ma, e ui ina sa fautua tetee i ai nisi i lenei solofanua, ae sa aumaia lava i totonu o pa o le aai. Ina ua oo i le po sa o mai i fafo le autotoa a Eleni mai o latou nofoaga sa lalafi ai ma tatala faitotoa o le aai, ma faatagaina ai le autau a Eleni e ulufale atu ma pulea Toroi.
E tatau foi ona tatou puipui mai autau o loo taupulepule e osofaia la tatou puipuiga ma le faamoemoe e faaleaga lo tatou talita o le faatuatua! O o tatou aiga ma nofoaga o tapuaiga e mafai ona saunia se malutaga mai afa o loo mafua mai elemene le talafeagai faalelalolagi, ma faamalosia ai i tatou e “tutumau ma le le mafaagaeetia, ia fua mai pea i galuega lelei” (Mosaea 5:15) ma ia “tutu pea i mea paia” (MFF 45:32).
O le le mafai ona puipuia mai e ono afaina ai nisi, e aveesea ai manatu popole faaleagaga ao latou faatagaina musika le mama ma gaoioiga le talafeagai. O le faatagaina o ia ituaiga mea e mafai ona faaleagaina ai i tatou mai totonu, e pei o le solofanua laupapa ua aumaia i totonu i le mea sa avea muamua ma se nofoaga malosi e le mafaatoilaloina.
O lo tatou faamoemoega i le fuafuaina ma le sauniuniga o gaoioiga e le tatau ona avea o se mea e faataitai ai pe fia faapei ai o teuga a le lalolagi, ae ina ia saunia ai se siosiomaga e mafai ona mafuta mai i ai le Agaga o le Alii. O lenei mea e faaaogaina e iloilo ai po o afea ae po o fea e faia ai se gaoioiga e lagolagoina e le Ekalesia, ma e tatau ona avea ma a tatou taiala i le filifilia ai po o a tifaga e matamata ai, o polokalama komepiuta e vaavaai i ai, po o isi mea lelei e tuliloaina ina ia aafia ai. E tatau ona tatou tuuina atu se iloiloga patino i mea e tutupu e aafia ai le faaaogaina o falelotu o le Ekalesia, aua ua uma ona faapaiaina ma faamanuiaina mo gaoioiga e “mama, matagofie, logoleleia, ma tauleleia” (Mataupu Faavae o le Faatuatua 1:13).
Afai o le a auai le Faaola i se gaoioiga i se falelotu o le Ekalesia, pe o Lana tali e faatusalia i le mea e pei ona Ia tulieseina le au faatauoloa i fafo o le malumalu i Ierusalema (tagai Mataio 21:12-13)? Pe o le a Ia faaali atu le lagona e pei o Peteru i le Mauga o Liua: “E lelei ona tatou nonofo iinei” (Mataio 17:4)?
Sa fautua mai Peresitene Gordon B. Hinckley (1910–2008) e uiga i agavaa mo le galuega faafaifeautalai o le a aafia ai i lenei ulutala: “Ou te mautinoa o le siitiaina i luga o tulaga faatonuina o le agavaa o le a mafua ai ona faataitaia e o tatou tagata talavou, aemaise lava i alii talavou, le pulea o le tagata lava ia ina ia ola e sili atu nai lo tulaga faatonuina maualalalo a le lalolagi ia aloese mai soligatulafono ma savalia le ala maualuga i mea uma latou te faia.”1
I le i ai o nei upu i le mafaufau, ia tatou taitasi ai ma naunau ia fuafua ma auai i gaoioiga tauleleia e ala i le siitia i luga o le fua ae tulei ese le lalolagi.
Pe o lenei auala e faaitiitia ai fiafiaga ma aveesea ai le faaalia o le fiafia mai a tatou faatasiga faafiafia? E leai lava! O le mea moni, o le tulaga faafeagai o le a moni. E ala i le siitiaina o tulaga faatonuina o le a tatou fiafia ai i aafiaga o le a manatua pea, e o faatasi ma le folafolaga o le fuafuaga sili o le fiafia.