SOIFUA MALOLOINA FAALETINO
Ia tausia le Upu o le Poto. ‘Ai meaai e maua ai le soifua maloloina, ia faia e le aunoa faamalosi tino, ma ia lava lau moe. Aua le faaaogaina fualaau faasaina, o ava malolosi, kofe, lauti, po o mea e gaosia mai tapaa. Aua le faaaogaina ma le le tatau ia fualaau ma vai e tusia mai e fomai po o vai foi e mafai ona faatau e aunoa ma se pepa mai le fomai.
O le tausia o lou tino ia maloloina o le a fesoasoani lea ia te oe e taulimaina ai popolega o le olaga. Afai tatou te usiusitai i le Upu o le Poto, ua folafola mai e le Tama Faalelagi ia i tatou faamanuiaga matagofie.
“O le au paia uma lava foi o e manatua e tausia ma faia nei mea uma, ma savavali i le usiusitai i poloaiga, o le a maua le malosi i o latou pute ma le gao i o latou ivi;
“O le a maua foi le poto ma oa sili o le malamalama, e oo lava i oa natia;
“Latou te taufetuli foi a e le vaivai, ma savavali a e le matapogia.
“O au foi, le Alii, ou te avatua ia i latou le folafolaga, o le a laaloa ia i latou le agelu o le faafanoga, e pei o le fanauga a Isaraelu, a e le fasia i latou” (MFF 89:18–21).