O Le Togiola ma le Faatuatua
Mai saunoaga na tuuina atu i le semina a peresitene o misiona ia Iuni 2001 i Provo, Iuta.
O le mataupu faavae muamua o le talalelei o le faatuatua i le Alii o Iesu Keriso. A aunoa ma le faatuatua, fai mai le perofeta o Mamona, ua le tatau ona faitaulia i tatou faatasi ma tagata o le Ekalesia a le Alii (tagai Moronae 7:39). O le poloaiga muamua lava na tuuina mai e Ieova i le fanauga a Isaraelu o le “Aua nei e fai mo oe ni atua ese i o’u luma” (Esoto 20:3). E tatau ona tatou faamuamua i taimi uma le Faaola. O lenei manatu mamana—e faapea, e ao ona tatou faatuatua ma faamuamua le Alii i o tatou olaga—e foliga mai e faigofie, ae a faatino e matua faigata lava i le toatele.
Ua aoao mai tusitusiga paia e faapea, o le faatuatua e oo mai i le faalogo i le afioga a le Atua (tagai Roma 10:17). O le afioga a le Atua, lea e oo mai ia i tatou e ala i tusitusiga paia, e ala i aoaoga faaperofeta, ma e ala mai i faaaliga mo le tagata lava ia, ua aoaoina ai i tatou o i tatou o fanau a le Atua le Tama e Faavavau. Ua aoaoina ai i tatou e uiga i le faasinomaga ma le misiona a Lona Alo Pele e Toatasi, o Iesu Keriso, lo tatou Faaola ma le Togiola. E faavae i lo tatou malamalamaaga e uiga i na upumoni, o le faatuatua i le Alii o Iesu Keriso o se tautinoga ma se talitonuga e silafia e le Atua i tatou ma e alofa ia i tatou ma o le a faafofoga mai ia tatou talosaga ma tali mai i le mea e sili ona lelei mo i tatou.
O le faatuatua i le Alii o le faalagolago lea i le Alii. E le mafai ona i ai so tatou faatuatua moni i le Alii e aunoa ma le i ai atoatoa o le faalagolago i le finagalo ma le taimi a le Alii. O le taunuuga, e tusa lava pe o le a le malosi o lo tatou faatuatua, e le mafai ona maua ai se taunuuga e eseese ma le finagalo o Ia o lē o loo tatou faatuatua i ai. Ia manatua lenei mea pe a i ai ni taimi e foliga ai ua le taliina au talosaga i le auala po o le taimi na e manao i ai. O le faaaoga o le faatuatua i le Alii o Iesu Keriso, e avea pea ma mataupu e tusa ma le tulafono o le lagi, ma le agalelei, finagalo, poto ma le taimi a le Alii. A tatou maua lena ituaiga o faatuatua ma le faalagolago i le Alii, ua tatou maua le saogalemu moni ma le toafilemu i o tatou olaga.
Tatou te vaai atu muamua i lo tatou Faaola o Iesu Keriso. O Ia o lo tatou faataitaiga. O lo tatou faataitaiga, e le o se toa tausaafia o taaloga po o faafiafiaga i ona po nei. E faapena foi, o a tatou meatotino e aupito faapelepele e le o meataalo taugata ma faatosinaga sese e uunaia ai i tatou e taulai atu i mea e le tumau ae faagalogalo i mea e faavavau. O lo tatou faataitaiga—o lē tatou te faamuamuaina—o Iesu Keriso. E tatau ona tatou molimau atu ia te Ia ma aoao atu le tasi i le isi i auala e mafai ona tatou faaaogaina ai Ana aoaoga ma Ana faataitaiga i o tatou olaga.
O Le Faaola e Faatupuina i Tatou
Sa tuuina mai e Peresitene Polika Iaga (1801–77) ia i tatou ni nai fautuaga lelei i le ala e iloa ai o Ia lē o loo tatou mulimuli i ai. “O le eseesega i le va o le Atua ma le Tiapolo,” na ia saunoa mai ai, “o le Atua e foafoaina ma faatulagaina, ae o le faamoemoega atoa o le Tiapolo o le faatamaia.”1 I lena eseesega, ua tatou maua ai se faataitaiga taua o le moni o le “faafeagai o mea uma” (2 Nifae 2:11).
Manatua, o lo tatou Faaola o Iesu Keriso, e na te faatupuina ae i tatou ma na te le tosoina i tatou i lalo. E tatau ona tatou faaaogaina le mana o lena faataitaiga i ala tatou te faaaogaina ai o tatou taimi, e aofia ai o tatou taimi o gaoioiga faafiafia ma taimi paganoa. Manatu i autu o tusi, mekasini, tifaga, televise, ma musika ua tatou faalauiloaina e ala i lo tatou lagolagoina. Pe o faatupuina ea pe o tosoina i lalo ia fanau a le Atua i mea ua faaalia i faafiafiaga ua tatou filifilia?
I lo’u olaga ua ou vaaia se suiga malosi e faataatia ese faafiafiaga e faatupu ma faamamaluina ai fanau a le Atua, ae suia ai i faataitaiga ma faiga faamanua loto, toilalo ma le faatautala. O le manatu mamana i lenei faataitaiga e faapea, soo se mea lava e faatupuina ai tagata, e talafeagai ma le faamoemoega o le Matai, ae soo se mea foi e toso ai i lalo tagata, e talafeagai ma le faamoemoega o le fili. Tatou te lagolagoina le faamoemoega e tasi po o le isi i aso uma, e ala i mea tatou te filifili e faitau, matamata pe faalogologo i ai. E tatau ona faamanatu mai ai lo tatou tiutetauave o le lagolagoina o mea lelei ma uunaia i tatou i le faataunuuina i se auala e fiafia i ai o Ia o lē e ona puapuaga ua tatou maua ai le faamoemoe ma lē e ona le faataitaiga lea e tatau ona tatou maua mai ai taitaiga.
O Le Puapuagatia O se Vaega o le Salamo
O le mataupu e totonugalemu i le talalelei a Iesu Keriso—le manatu e aupito mamana, faatasi ai ma le Toetutu o le lalolagi atoa—o le Togiola a lo tatou Faaola. O i tatou o Ana auauna, ma e taua ona tatou malamalama i le matafaioi a le Togiola i o tatou lava olaga faapea ma olaga o tagata tatou te aoaoina. E taua foi i lena malamalama se malamalamaaga o le sootaga i le va o le faamasinoga ma le alofa tunoa ma le Togiola, ma le matafaioi o le puapuagatia ma le salamo i lenei faagasologa paia.
O poloaiga matuia a le faamasinoga i luga o i latou na solia tulafono a le Atua—o le tulaga o le malaia ma le puapuaga e le uma o loo faamatalaina i tusitusiga paia—e mafai ona faasalaveia ma aveesea e le Togiola a Iesu Keriso. O lenei sootaga i le va o le faamasinoga i le tasi itu ma le alofa tunoa ma le Togiola i le isi itu, o le ute lea o le talalelei a Iesu Keriso.
Ua aoao mai le Tusi a Mamona e faapea, e le togiolaina e le Faaola ia tagata i a latou agasala: “O le a tumau ai o e amioleaga e peiseai ua le faia se togiola, ae na ona tatalaina noanoaga o le oti ” (Alema 11:41). Na afio mai le Faaola e togiola tagata mai a latou agasala e faalagolago i tulaga o le salamo (tagai Helamana 5:11).
O se tasi o na tulaga o le salamo o le faatuatua i le Alii o Iesu Keriso, e aofia ai le faatuatua ma le faalagolago i Lana taulaga togiola. E pei ona aoao mai Amoleka, “A o le le faaaoga le faatuatua e oo i le salamo, e oo ia te ia le tulafono uma i luga o le faamasinoga; o lenei, ua na o le faatuatua e oo i le salamo e oo i ai le ala o le faaolataga sili ma le faavavau” (Alema 34:16). E mautinoa lava o le uiga o lenei mea, o le tagata agasala e le salamo e tatau lava puapuaga mo ana lava agasala. O lona uiga la, o se tagata ua salamo e le manaomia lava ona puapuagatia aua ua tauaveina uma e le Faaola ia le faasalaga? E le o lona uiga lena, aua o le a le ogatusa ai ma isi aoaoga a le Faaola.
O le uiga o le Alema 34:16, o le tagata e salamo e le manaomia ona puapuagatia e pei ona puapuagatia ai le Faaola mo lena agasala. O tagata agasala ua salamo o le a oo i sina puapuagatia, ae ona o lo latou salamo ma le Togiola, o le a latou le oo ai i le puapuagatia atoa ma le oona lea na tigaina ai le Faaola mo na agasala.
Na saunoa mai Peresitene Spencer W. Kimball (1895– 1985), o le sa tuuina atu ni aoaoga manino faapena e uiga i le salamo ma le faamagaloina, e faapea, o le puapuaga patino o se vaega taua naua o le salamo. “E le amataina e se tasi ona salamo seiloga ua matua puapuagatia o ia mo ana agasala… . Afai e lei puapuagatia se tagata, sa ia saunoa ai, “e lei salamo o ia.”2
Na aoao mai e le Faaola lenei mataupu faavae ina ua Ia fetalai mai o Lana taulaga togiola ua mo “i latou uma o e o i ai le loto momomo ma le agaga salamo; ae leai se tasi e mafaia ona faaatoatoaina ai iuga o le tulafono” (2 Nifae 2:7). O le tagata agasala ua salamo e sau ia Keriso ma le loto momomo ma le agaga salamo, ua uma ona oo o ia i le faasologa o le tiga patino ma le puapuaga mo agasala. Ua malamalama o ia i lona uiga, o le tala a Alema e faapea, ua na o e salamo faamaoni e faaolaina. Sa malamalama lelei i ai Alema le Itiiti i lenei faamatalaga. Faitau i ana tala i le Mosaea 27 ma le Alema 36.
Na saunoa mai Peresitene Kimball, “E masani lava ona mafaufau tagata ua uma ona latou salamo ma ua agavaa i latou mo se faamagaloga, ae na pau le mea ua latou faia, o le faaali o le faanoanoa po o le faavauvau i se mea le manuia ua tupu.”3
E tele naua se eseesega e i ai i le va o le tiga e tusa i le Atua [lena] e tupu ai le salamo (tagai 2 Korinito 7:10), lea e aofia ai le puapuaga patino, ma le faanoanoa faigofie e leai se tiga ona ua maua, po o le faanoanoa sese lena na faamatala mai e Mamona o le “faanoanoa o e faasalaina ona ua le mafai le Atua ona tuu pea ia te i latou e fiafia i le agasala” (Mamona 2:13).
E Tatau Ona Tatou Faia se Suiga Tele
Aisea e tatau ai mo i tatou ona puapuagatia i le gasologa o le salamo mo agasala mamafa? Ua tatou mafuli atu i le mafaufau i iuga o le salamo o se faamamaina o i tatou mai a tatou agasala, peitai o se vaaiga le atoatoa lena. O le tagata e agasala e pei o se laau e faigofie lava ona lolou i le matagi. I aso matagi ma timuga, e matua lolou ai lava i lalo i le eleele le laau, ua oo ai ina eleelea lau o le laau i le palapala, e pei o le agasala. Afai na ona tatou tulimataia le faamamaina o lau o le laau, o le a mafai ona tumau le vaivaiga i le laau lena na ia tuuina atu o ia e lolou ma faapalapala ona lau. E faapena foi la se tagata ua na ona faanoanoa i le palapala i le agasala, o le a toe agasala foi i le isi matagi malosi o le a sosoo mai. O le a faaauau pea ona faigofie ona faia pea lava pea sei vagana ua faamalosia le laau.
Pe a uma ona uia e se tagata le gasologa lena e iu i le tulaga lea e ta’u e tusitusiga paia o le “loto momomo ma le agaga salamo,” e tele mea e faia e le Faaola i lo le na o le faamama o lena tagata mai agasala. Na te tuuina atu foi ia te ia se malosi fou. O lena faamalosia e taua mo i tatou e iloa ai le faamoemoega o le faamamaina, o le toe foi atu lea i lo tatou Tama Faalelagi. Ina ia faatagaina e ulu atu i Lona afioaga, e tatau ona sili atu i lo le na ona mama o i tatou. E tatau foi ona sui i tatou mai se tagata vaivai faaleamio o lē sa agasala, e avea ma tagata malosi ua i ai se tulaga faaleagaga ina ia mafai ai ona mau i le afioaga o le Atua. E tatau ia i tatou, e pei ona fai mai le mau, ona avea “ma tagata amiotonu ona o le togiola a Keriso le Alii” (Mosaea 3:19). O le uiga lenei o le mau, i lona faamalamalamaina mai o le tagata ua salamo i ana agasala, o ia lea na te lafoaia (tagai MFF 58:43). O le lafoai o agasala o se mea e sili atu i le na o le faia o se faaiuga faapea e le toe faia. O le lafoai e aofia ai se suiga taua e i ai i le tagata.
Na faamatalaina e le nuu o le Tupu o Peniamina lena faaliliuina tele i lo latou fai mai lea ua “le toe i ai so matou manatu e fai amio leaga, ae fia fai pea lava le amio lelei” (Mosaea 5:2). O tagata na oo i lena ituaiga liua i o latou loto, ua latou maua le malosi ma le tulaga e mau faatasi ai ma le Atua. O le mea lena tatou te ta’u o le faaolaina.
Ua avea le salamo ma savali i tisipenisione uma lava. Sa faamamafa mai e le Alii toetu lenei aoaoga i sa Nifae i le faamalamalamaina o le mea na Ia taua “o le talalelei lenei ua ou tuuina atu ia te outou” (3 Nifae 27:13): “O le poloaiga lenei; ina salamo ia outou tuluiga uma o le lalolagi ma o mai ia te au, ma ia papatisoina i lou igoa, ina ia faapaiaina outou i le Agaga Paia tou te talia, ina ia outou tutu ma le le pona i ou luma i le aso gataaga” (3 Nifae 27:20).
I faaaliga i ona po nei, na fetalai mai ai le Alii, “E moni, e moni, ou te fai atu ia te outou, o i latou o e le talitonu i a outou upu, ma le papatisoina i le vai i lou igoa, mo le faamagaloina o a latou agasala, ina ia latou maua le Agaga Paia, o le a tausalaina, o le a le oo mai foi i le malo o lo’u Tama i le mea o i ai lo’u Tama ma au” (MFF 84:74).
E Mautinoa le Faamagaloina
Ou te faaiuina i se savali o le faamoemoe lena e moni mo tagata uma, ae faapitoa lava ona manaomia e i latou ua manatu e faigata tele le salamo. O le salamo o se faagasologa faifai pea e manaomia e tagata uma aua “ua agasala tagata uma lava, ma ua le oo i le viiga mai le Atua” (Roma 3:23). E mafai ona maua le salamo, ma e mautinoa le faamagaloina.
Na saunoa mai Peresitene Kimball: “O nisi taimi … pe a toe tepa i tua le tagata ua salamo ma iloa le mataga, le inosia o le solitulafono, e toetoe a lofituina ai o ia ma faapea ifo, ‘Pe mafai ea e le Alii ona faamagaloina au? Pe mafai ea ona ou faamagaloina au lava?’ Pe a oo ina taunuu se tasi i le loloto o le agasala ma iloa ai le leai o se faamoemoe i le tulaga ua i ai o ia, ma afai ua ia tagi atu ma le faatuatua i le Atua e alofa mai i lona vaivai, ona oo mai ai lea o le leo itiiti ma le toafimalie, ua musumusu mai i lona agaga, ‘Ua faamagaloina au agasala.’”4
Pe a tupu mai lenei mea, ua tatou maua le faataunuuina o le folafolaga taua naua e faapea, o le a aveeseina e le Atua lagona tausalaina mai o tatou loto i le alofa o Lona Alo (tagai Alema 24:10). Matuai faamafanafana loto le folafolaga o loo i le Isaia 1:18 e faapea “e ui lava ina pei o ofu mumu a outou agasala, e sisina ia e pei o le kiona.” Matuai matagofie le folafolaga a le Atua lava ia e faapea, “o le ua salamo i ana agasala, e faamagaloina o ia, ma o au le Alii, ou te le toe manatua lava” (MFF 58:42).
Ou te molimau atu ia te outou, ou uso e ma tuafafine pele, ua moni nei upu, o lenei savali o le aoaoga faavae a Iesu Keriso, le fuafuaga a le Atua lo tatou Tama Faavavau, ua faapea ona avea ai lo tatou Faaola o Iesu Keriso ma amataga ma le gataaga. Ou te molimau atu ia Iesu Keriso ma Ana perofeta ma le Toefuataiga o le talalelei i nei aso e gata ai e ala i le tufugaaao o Iosefa Samita.