I Le Fuafuaga Paia
Tatou te talitonu o le aiga ua faauuina e le Atua. O lo tatou malamalamaaga e uiga i le aiga ua tautino atu i le taiala faaperofeta “O Le Aiga: O Se Folafolaga i le Lalolagi.”
Faatasi ai ma le tele naua o le atamai ua faapea e moni, ma le tele naua o le taufaavalea i tulaga ma mea e faatauaina, atoa ma le tele o faatosinaga ua faaleagaina ai le lalolagi, ua matou lagona ai e tatau ona lapata’ia ma toe tima’i outou. O le faapupulaina o lenei mea, o i matou o le Au Peresitene Sili ma le Aufono o Aposetolo e Toasefululua, ua tuuina atu nei se folafolaga i le Ekalesia ma le lalolagi o se faamaumauga aloaia ma se toe faamautuina o tulaga, mataupu faavae, ma mea tau i le aiga lea sa sautualasi ona tauina atu e perofeta, tagatavaai, ma tali faaaliga o lenei Ekalesia i lona talafaasolopito.”1
Faatasi ai ma nei upu, na faasilasila mai ai e Peresitene Gordon B. Hinckley (1910–2008) le “O Le Aiga: O Se Folafolaga i le Lalolagi”2 i le sauniga aoao a le Aualofa na faia i le aso 23 o Setema, 1995, i le Aai o Sate Leki, Iuta.
“Matou te fautua atu i tagata uma le faitauina ma le faaeteete, mafaufau atoa, ma le tatalo o lenei folafolaga,” na ia uunai mai ai. “O le malosiaga o soo se malo, e totoina lava i totonu o puipui o ona aiga. Matou te uunaia o tatou tagata i soo se mea, ina ia faamalosia o latou aiga i le ola ai lea i nei mea taua ua faamamaluina.”3
O ata nei o tagata Asia, o la latou aganuu ua lauiloa mo lo latou “naunautai ma le faamaoni i le va faaleaiga,” lea e aofia ai le “faaaloalo mo tagata matutua ma tulaga faavae maualuluga mo fanau.”4 O nei ata o ni sui o le Au Paia o Aso e Gata Ai i le lalolagi atoa o loo faaalia mai ai le taua o aoaoga o loo maua i le folafolaga i le aiga.