Ua Fofogaina Mai se Malumalu Fou mo El Salvador
I le aso 18 o Novema, 2007, sa fofogaina mai ai e le Au Peresitene Sili ia fuafuaga e fausia se malumalu i le atunuu o Amerika Tutotonu o El Salvador.
O lea faasilasilaga o se talafou fiafia mo le au paia i El Salvador, o e ua le gata ina feagai ma le malaga mamao i le Malumalu o le Aai o Kuatemala i Kuatemala, ae ua feagai nei foi ma le faatupulaia o le au faomea i luga o alatanu.
“Matou te o, ma se tatalo i o matou loto,” o le tala lea a Peresitene Manuel Ernesto López o le Siteki a San Salvador El Salvador. “E tatau ona matou o e faataunuu na sauniga.”
E ui i na faigata, ae ua faateleina le aofai o tagata o le Siteki a San Salvador El Salvador e malaga e le aunoa i le malumalu.
O le toatele o tagata o le au paia i El Salvador, o le malaga masani o le alu ma le toe foi mai e 32-itula, o le a faaitiitia i le 6 i le 7 itula lea o le a sili atu ona gafatia.
O le faasilasilaga o le Malumalu o San Salvador El Salvador e atoa i ai le ono o malumalu, a le ua faaaoga, pe ua fofogaina mai, po o fausia foi i le Eria o Amerika Tutotonu, lea e aofia ai atunuu e fitu i le va o Mekisiko i matusisifo ma Kolumipia i sautesasae.
O malumalu o loo faaaoga i le taimi nei i le eria o le Malumalu o le Aai o Kuatemala i Kuatemala, na faapaia ia Tesema 1984, ma le Malumalu o San Jose Costa Rica, na faapaia ia Iuni 2000. O le galuega o le Malumalu o le Aai o Panama i Panama, na amata ia Oketopa 2005.
O isi malumalu e lua, o le Malumalu o Quetzaltenango i Kuatemala, o le malumalu lona lua i lena atunuu, ma le Malumalu o Tegucigalpa Honduras ua uma ona fofogaina mai ma o loo faatalitali nei mo le suatiaina o le eleele.
A mae’a, o nei malumalu e ono i Amerika Tutotonu, o le a tautuaina ai pe tusa ma le 600,000 tagata o le ekalesia i siteki e 100 ma misiona e 12.
Sii mai le Church News, 24 Novema, 2007.