Fesili & Tali

“E faapefea ona ou tali atu pe a fai mai au uo o Iesu Keriso o se faiaoga maoae o mea lelei, ae e le o le Faaola po o le Alo o le Atua?”

Liahona

E mafai ona e amata i le faasoa atu o lau lava molimau puupuu e uiga ia Iesu Keriso. Ia tau atu i au uo e te ioe o le Alii o se faiaoga maoae o mea lelei, ae e te talitonu foi i tusitusiga paia, lea o loo molimau mai o Ia o le Faaola ma le Alo o le Atua. Ia faamalamalama atu o lau molimau e aumaia ai ia te oe le toafilemu ma le mautinoa. Ia faailoa atu i au uo, e mafai foi ona latou maua lena lava malamalama pe afai latou te mananao i ai. Afai latou te le mananao i ai, e le tele la sau tala e fai atu e faatalitonuina ai i latou. Ia se’e atu ma le fiafia i se isi mataupu.

Afai latou te fia iloa le mea moni, o lau molimau e ono maua mai ai lo latou fiafia ma e maua ai se avanoa e aoao ai i latou i le auala e maua ai ni a latou lava molimau. O le a manaomia ona latou suesue i tusitusiga paia, faalogo i molimau a isi, ma tatalo ma le faamaoni e uiga i mea ua latou aoaoina, ina ia mafai ona faaali atu e le Agaga Paia ia i latou le mea moni. E mafai ona e fesoasoani atu ia i latou ia amata [ona maua ni a latou molimau] i le faasoa atu i ai o molimau nei:

1. Sa molimau mai le Tama Faalelagi lava Ia o Iesu Keriso o Lona Alo (tagai Mataio 3:17; 17:5; 3 Nifae 11:7; Mose 6:52, 57). O le aafiaga aupito lata mai na oo mai i le 1820 ina ua faalogo Iosefa Samita i le Tama Faalelagi o fetalai mai, “O Lou Atalii Pele lenei. Faalogo ia te Ia!” (Talafaasolopito—Iosefa Samita 2:17).

2. Afai e talitonu au uo o Iesu o se faiaoga maoae o mea lelei, ia valaaulia i latou e vaai i Ana aoaoga ma molimau. Sa Ia fetalai i mea e na o le Faaola e mafai ona fetalai ai, e pei o le, “O Au nei o le toetu, ma le ola: o le faatuatua mai ia te au, e ui lava ina oti, ae ola lava ia” (Ioane 11:25). Ina ia avea ma se faiaoga lelei, e tatau ona Ia aoaoina le upumoni, ma na molimau mai foi le Alii lava Ia, “O Au o Iesu Keriso, le Atalii o le Atua” (3 Nifae 9:15).

3. Ua molimau mai foi perofeta e uiga i le Faaola. Mo se faataitaiga, na molimau mai le Aposetolo o Peteru: “O oe o le Keriso, o le Alo o le Atua soifua” (Mataio 16:16). Ia valaaulia au uo e faalogologo i le konafesi aoao, pe tuu atu ia i latou se kopi o le lomiga o le Liahona o Mati 2008. O lena lomiga ma le konafesi, o loo molimau mai ai aposetolo ma perofeta—o molimau faapitoa ia Iesu Keriso—o Ia o le Faaola ma le Alo o le Atua.

Ma le vaega mulimuli, e mafai ona e tauina atu i au uo le mafuaaga tatou te manaomia ai se Faaola. Ia faamalamalama atu o le agasala ma le oti e taofia ai i tatou mai le toe foi atu i le Tama Faalelagi. E na o le Alo o le Atua e mafai ona faataunuuina le Togiola, ua mafai ai ona maua le faamagaloga ma le Toetu. Ia molimau atu a aunoa ma le Togiola a Iesu Keriso, e le mafai ona tatou olioli i le filemu ma le ola faavavau i le olaga a sau. “E leai lava se isi igoa i lalo o le lagi ua foaiina mai i tagata e mafaia ona faaolaina ai i tatou” (Galuega 4:12).

Au faitau

Ou te tauina atu i au uo o Iesu o se faiaoga maoae o mea lelei. O le tasi o mea aupito taua sa Ia aoaoina o le, o Ia o le Faaola na folafolaina mai ma o le Alo o le Atua. Ou te le manatu o se tagata e pepelo ma faatupu se tala faapena e mafai ona avea ma se faiaoga maoae o mea lelei. E tatau ona filifili au uo pe o Ia o se tagata faamaoni. Ou te talitonu o Iesu o Ia lava e pei ona Ia tautino mai ai, o le Alo o le Atua. Ua ou aoaoina lena mea mo au lava e ala i le tatalo ma le suesue i tusitusiga paia, ma o le a ou valaaulia foi au uo e faia foi faapea.

Jacob J., 13, Arisona, ISA

I se tasi taimi sa matou i ai ma au uo, na faapea mai ai se tasi o i latou e le talitonu ia Iesu Keriso ma mea uma o loo fai mai ai tagata e uiga ia te Ia, ma atonu na mafai lava e soo se tagata ona tusia le Tusi Paia. E leai se taimi na ou lagonaina ai le malosi o le Agaga nai lo le taimi na ou fai atu ai, “Ou te iloa ua moni. Ou te iloa.” Sa filemu tagata uma. Na fai mai lau uo, maimau pe ana ia te ia lena lava malamalama e tasi. O le avanoa tonu lenei e faasoa atu ai ia te ia le auala e maua ai se molimau. Ia tatalo i le Tama Faalelagi e taialaina oe, ina ia avea oe ma se meafaigaluega i Ona aao. Aua le fefe e faasoa atu lau molimau.

Laura R., 20, Asunción, Parakuei

Tuu atu e matamata o ia i le DVD a le Ekalesia Finding Faith in Christ. Ua ou vaai i le toatele o tagata o e ua iloa o Iesu Keriso o le Alo o le Atua, ma sa Ia faataunuuina le Togiola e le iu. Ma le isi, ia faasoa atu lau molimau aua o le a tuuina atu ai le molimau faapea e ala i le Agaga Paia.

Elder Mahunray Ada, 22, Misiona a Filipaina Manila

I le tulaga lenei, e le aoga le taumafai e tetee ma finau atu e moni lava o Iesu Keriso o le Faaola. Ou te taumafai e faamalamalama e ala i le faasoaina atu o mea moni ma, i le taimi lava lena, e ala i le molimau atu o Iesu o le Faaola ma le Alo o le Atua. Ou te mautinoa o le a tuuina atu e le Atua le lagolago ia te oe, ma o le a mautinoa lava le fesoasoani atu o le Agaga ia e maua mafaufauga ma upu talafeagai e fai atu (tagai Eperu 10:15–16; 3 Nifae 28:11).

Elena F., 19, Ulianovsk, Rusia

E mafai ona faasoa atu lau molimau e uiga ia Keriso. E mafai ona e tauina atu ia i latou mea ua e talitonu i ai ma faasoa atu fuaitau mai le Tusi Paia. Afai latou te le fiafia i ai, ona tatau lea ona tuu ai pea faapena ma aua nei avea ma mea e faavaivai ai lau molimau.

Cortney C., 16, Arisona, ISA

Ou te le finau, ae ou te faasoaina atu lau molimau e uiga i le Faaola, ma o le auala lenei e fesoasoani ai ia i latou ia malamalama e le gata ina sa maliu o Ia ma toetu mai, ae sa puapuagatia foi o ia mo i tatou ina ia mafai ona tatou salamo. Na Ia tuuina mai ia i tatou le faataitaiga o le auala e mafai ona tatou toe foi atu ai i le mea o loo afio ai o Ia ma nonofo e faavavau faatasi ma Ia. Ia fesoasoani foi ia i latou ia iloa o le Tusi a Mamona o se tasi molimau ia Iesu Keriso.

Cristopher F., 18, Talagante, Chile

Aua lava le fefe e faasoa atu lau molimau e uiga i le Faaola. Molimau atu ia i latou ua e iloa o Iesu Keriso o le Alo o le Atua, ma sa maliu moni o Ia mo a tatou agasala. O le a molimau atu le Agaga ia i latou o Ia o le Keriso, le Faaola ma le Togiola o le lalolagi. Atonu lava o lau molimau o le a faatalitonuina ai i latou pe o ai moni o Ia.

Chelsea N., 18, Nevada, ISA

O tali o loo faamoemoe o se fesoasoani ma ni manatu, ae le o se faasilasilaina atu o ni aoaoga faavae a le Ekalesia.

• Ia uunaia au uo ia maua se molimau e ala i le suesue i tusitusiga paia, tatalo ma le faatuatua, ma taumafai e ola i aoaoga a le Alii.

• Ia faatepa au uo i mau o loo aoao mai ma molimau mai i le Faaola.

• Faaaloalo i o latou manatu—“e faitalia i latou pe faapefea, po o fea, po o le a foi latou te tapuai atu i ai” (Mataupu Faavae o le Faatuatua 1:11)—ae ia faailoa atu foi ia i latou ia lau molimau e uiga ia Iesu Keriso.

• O le DVD a le Ekalesia Finding Faith in Christ (aitema nu. 54041) o loo maua i le faletusi i le lotoifale pe maua mai foi i le www.ldscatalog.com.

President Thomas S. Monson

“Ou te molimau atu o Ia o le faiaoga o le upu moni—ae ua le na o se faiaoga o Ia. O ia o le faataitaiga o le olaga ua atoatoa—ae e sili atu o Ia nai lo na o se faataitaiga. O Ia o le Fomai Sili—ae ua le na o se fomai foi o Ia. O Ia o le Faaola moni o le lalolagi, le Alo o le Atua, le Alii o le Filemu, ma Le Paia o Isaraelu, o le Alii toetu.”

Peresitene Thomas S. Monson, “O Lau Faatosinaga Patino,” Liahona, Me 2004, 23.