O Tusi o Talaaga a Iosefa Samita
O tusi o talaaga e fitu a le Perofeta o Iosefa Samita lava ia ua aofia i faamaumauga ua sili ona taua lea e fesoasoani ia i tatou ina ia tatou malamalama ai ia te ia ma le atiina ae o le Ekalesia i le faagasologa o lona soifuaga.
O faatonu o lomiga o le Faasologa o Tusi o Talaaga lea o le a maua o Pepa a Iosefa Samita, o se galuega o lomiga e tele o loo faagasolo nei i le Matagaluega o Talafaasolopito o Aiga ma le Ekalesia. I le faagasologa o isi tausaga o loo lumanai nei, o le a lomia ma faasalalauina ai e le matagaluega tusi, talafaamaumau, talafaasolopito, faaaliga, ma isi lava faamaumauga tusitusia uma a Iosefa Samita.
Na faatauina mai e le Perofeta o Iosefa Samita lana tusi o talaaga muamua ia Novema 27, 1832—masalo o se tali atu lea i se faaaliga na ia maua i le aso lava lea e tasi e faatatau i le tatau ona tausia faamaumauga a le Ekalesia (tagai i le MFF 85:1–5). O se tamai api laitiiti lava e ofi i le taga o le ofu e 104 itulau lea na ia taua o se “Tusi mo Faamaumauga.”
O uluai upu lava na ia tusia o loo faailoa mai ai lona faamoemoe faamaoni “ina ia tausia se tala auiliili o mea uma lava e [maua] i [lana] matau.“ Ae ui i lea, sa sili atu ona maua e Iosefa Samita le to’a i le saunoa atu i upu ma ta’u atu lona le fiafia nai lo le tusitusi.1 O se taunuuga la, na i ai taimi na lelei tele ai le tausia o tusitalafaamaumau, ae sa i ai foi nai avanoa ia e tai masina e oo lava i le tai tausaga e le’i toe tusitusia ai lava e Iosefa Samita se mea. E ui i lea, sa fai lava ma toe foi o ia i le tausiga o tusitalafaamaumau, a le o lena foi ua ia faatulagaina mo se tasi e faia le galuega o le tusitusi o talafaamaumau mo ia. I le fesoasoani a le tusiupu faatuatuaina ma le faamoemoeina o Elder Uiliata Risati, na iu ai lava ina faamanuiaina le Perofeta i le faatulagaina lea o se faiga e tausisia ai le tausia o tusi o talaaga.
O faasologa o tusi o talaaga na tusia e le perofeta mo ia lava o loo maua ai nisi o kopi muamua o loo i ai nei o ana faaaliga, ma o loo aumaia ai foi, ma na o le pau lea o tala auiliili e uiga i nisi o ana lauga. O na lauga o nisi ia o faamaumauga sili ona taua mo le malamalama ai e uiga ia Iosefa Samita ma le atiina ae o le Ekalesia i le taimi o lona soifuaga.
O loo mulimuli mai ni faamatalaga pupuu e faatatau i tusi o talaaga taitasi e fitu a le Perofeta ma faamatalaga e uiga i nisi o le au tusiupu o e na fesoasoani ia te ia ina ia tausia.
Tusi o Talaaga Muamua i Ohio: 1832–34
Na tusia ma le faamaoni e le Perofeta o Iosefa lana tusitalafaamaumau muamua lava i aso uma taitasi mo le iva aso, ona le toe tusia lea mo le toeitiiti lava 10 masina. Na ia toe amata ona toe tusia ia Oketopa 1833, ina ua ia tuua lona aiga mo se misiona talai i le Pito i Luga o Kanata. O faamaumauga e uiga i le taimi o lana misiona lenei e matua tamaoaiga lava le punaoa o malamalamaaga loloto i le tele o lona loto faamaoni ma lona tulaga faaleagaga ma le tulaga faalelagona o ona uiga. Mo se faataitaiga, na faamaumauina e Iosefa ia Oketopa aso 12: “Na manuia la’u faalogo i lo’u mafaufau. O le Alii o loo faatasi ma i matou, ae peitai o loo [ou] popole tele lava mo lo’u aiga.” Mulimuli ane i lena lava aso na ia maua ai se faaaliga na faamautuina atu ai ia Sidney Rigdon ma ia le tulaga o o laua aiga (tagai MFF 100:1). I lona toe taliu atu i Katelani, Ohio, i le aso 4 o Novema, 1833, na faamatala atu ai e Iosefa se faamaumauga ae tusi i lalo e Oliva Kaotui, o le toeaina lona lua lea o le Ekalesia. “Na ou maua atu o loo manuia uma lo’u aiga e tusa ma le folafolaga a le Alii, ma o ia faamanuiaga ou te lagona ai e faafetai atu i lona suafa paia.”
E le’i leva lena, ae liliu atu o ia i isi tusiupu mo se fesoasoani. E faaopoopo atu i le faaaogaina o Oliva Kaotui o se tusiupu, na valaau foi e le Perofeta ia Elder Sidney Rigdon ma Elder Frederick G. Williams e avea ma ona fesoasoani i le Au Peresitene Sili. Ia Mati o le 1834, a o i ai o ia i se isi foi misiona, na talosaga atu ai foi Iosefa Samita i lana soa sa la malaga faatasi o Elder Parley P. Pratt, ina ia fesoasoani atu ia te ia e tausia le tusi o talaaga.
E le o faasoloina faamaumauga uma i totonu o le tusitalafaamaumau i aso na tutupu ai. I nisi o taimi e toe fefoifoiai ai o ia i tua ina ia faamaumauina se mea na tupu muamua atu. Na faaaogaina foi e ia le tusitalafaamaumau e tusia ai faamaumauga o mea tau tupe ma isi lava faamatalaga pupuu, o loo tusitusi solo i le tusi atoa.
O faamaumauga sili ona mautu o faamaumauga ia i le va o le faaiuga o Fepuari ma Aperila o le 1834, a o sailia e le Perofeta fesoasoani ma sailia ni tupe mo se faigamalaga e o atu e fesoasoani i le Au Paia o Aso e Gata Ai o e ua tuliesea mai o latou aiga i Jackson County, Misuri.
Tusi o Talaaga Lona Lua i Ohio: 1835–36
O le tusi o talaaga lona lua a le Perofeta o se api faaleogalua e 220 itulau na taua o se “Api Tusitusi.” O loo i ai gaoioiga a Iosefa na faia i totonu ma faataamilo i Katelani mai le taufaaiuiuga o le masina o Setema 1835 e oo atu i le tau amataga o le masina o Aperila 1836. Na amata e Iosefa ma Oliva le faamaumauga ona tuuina atu lea i se taimi vave lava ia Frederick G. Williams. E le’i umi lena, ae talosagaina e le Perofeta ia Warren Parrish e galue o se tusiupu faasolo atoa. E ui lava o Warren na tusia le tele o le tusitalafaamaumau, ae o le tele lava o mea na tusia na faalauina atu e Iosefa Samita ae tusia e ia. O faamaumauga ia na faalau atu ae tusia i lalo e le isi e sili atu ona uumi nai lo faamaumauga na tusia e Iosefa lava ia. Ma, e ui lava ina le patino tele ia te ia, ae o faamaumauga na tusi ae faalauina atu o loo tumau pea ona i ai faailoga o le ituaiga tusitusi a Iosefa Samita. O faamaumauga na faamaumauina e Warren Parrish ma isi tusiupu o loo maua ai aso uma lava o lena vaitaimi na aofia ai i le tusitalafaamaumau.
O le tusi o talaaga lona lua lenei o loo maua ai le tala i le Uluai Faaaliga a Iosefa, lea na afio ifo ai le Atua le Tama ma Lona Alo, o Iesu Keriso, ia Iosefa i le vao e latalata ane i lona aiga. O loo faamatalaina ai foi asiasiga a le agelu o Moronae ia Iosefa Samita i le 1823. O loo tusia ai foi uluai taumafaiga a le Perofeta e faaliliu le tusi a Aperaamo. E patino lava lona tulaga taua i mataupu faaleAtua, le faaaliga vaaia lea na maua ia Ianuari 21, 1836 e uiga i le malo selesitila o le lagi ma le faaaliga e faapea “o i latou uma o e na maliliu e aunoa ma se malamalamaaga e uiga i lenei talalelei, o e na semanu latou te mauaina pe ana faapea e faatagaina e ola pea, o le a avea i latou ma suli o le malo selesitila o le Atua” (MFF 137:7)—lea ua muai faaataata mai ai le mataupu faavae o le faaolaina o e maliliu e ala i le faia e tagata o loo soifua o sauniga e sui ai mo e ua maliliu.
Ae peitai, o le mea loo tulimatai e le tusitalafaamaumau, o le sauniuniga lea mo le potopotoga paia lea e faia mo le tolu aso pe a mavae le faapaiaina o le Malumalu i Katelani. I lena potopotoga, o le au mautofi o le Ekalesia o le a “faaeeina [ia i latou] le mana mai luga” (MFF 105:11) ina ia talai atu ai le talalelei i le lalolagi uma. O lea, o le au mautofi o le perisitua na manaomia ina ia saunia. O loo lipotia mai e le tusitalafaamaumau nisi o aufono ma fonotaga e le faalauaiteleina na faia ina ia ausia ai le lotogatasitasi ma faaleleia ai ni eseesega faaletagata lava ia i le va o le usoga.
Na faaaluina e le Perofeta se taimi tele i le toe faatulagaina o korama a le perisitua ma aufono ina ia mafai ona faatulagaina lelei mo le potopotoga paia. Na ia tausisi ina ia aoaoina uma le usoga i le Aoga a Toeaina ma le aoga faaEperu. O loo faamatala mai i le tusitalafaamaumau e uiga i le naunautai ma le fiafia o Iosefa e aoaoina le gagana Eperu i lona vaitaimi. O loo tuliloaina foi e le tusi o talaaga ia taumafaiga a le Perofeta i nei faamoemoega ma faaiuina ai lenei tusi o talaaga i le faamatalaina lea o le faapaiaga o le malumalu, o le potopotoga paia, ma le sauniga i le aso Sa, aso 3 o Aperila, 1836. I lenei taeao o le Eseta, na faaali ifo ai le Keriso toetu i le Perofeta o Iosefa Samita ma Oliva Kaotui. Ona oo ifo ai lea o Mose, Elaia, ma Elia ma faaeeina atu ki o le perisitua i luga o le Perofeta o Iosefa ma Oliva Kaotui. O le faamaumauga lenei o loo maua nei i le Mataupu Faavae ma Feagaiga 110.
Tusi o Talaaga Muamua i Misuri: Mati–Setema 1838
O le tusi o talaaga muamua a Iosefa Samita i Misuri sa faamaumauina i se api lapoa e 69 ona itulau. O lenei tusi ma isi tusitalafaamaumau o loo totoe, na tofia ai e Iosefa le au tusiupu ina ia latou mataituina ana gaoioiga uma ma faamaumauina e i latou lava ia. E ui lava o le aafia ai o Iosefa Samita lava ia i le faamaumauina ua faaitiitia, o vaaiga a le au tusiupu o loo maua ai ni vaaiga eseese i le soifuaga o le Perofeta lea semanu tatou te le maua.
O lenei tusi o talaaga o loo amataina lea i se tala puupuu o se mea na tupu i le taimi ua tuanai, na manino mai na faapaiaina e Iosefa Samita, e uiga i lona toai taunuu i le nuu o le Au Paia o Aso e Gata Ai i Sisifo Mamao i Caldwell County, Misuri. Na faatoa mavae lava lona sola ese mai le siosiomaga matautia o le liliuese ma le faiga faasoesa faaletulafono i totonu o Katelani ina ua gau le Sosaiete o le Saogalemu o Katelani (Kirtland Safety Society).
Ae peitai, o faamaumauga o loo mulimuli mai, o ni tusi, faaaliga, ma isi faamatalaga tusitusia na kopiina i totonu o le tusitalafaamaumau ma se tala puupuu pe aunoa foi ma se faiā i ai. O le tusi o talaaga na faaautuina “O Le Tusi o Tusitusiga,” o le pogai ina ia faailoa mai ai o se tusi e teu ai “faamatalaga,” eseese po o ni faamatalaga tusitusia.2 O le tele lava o tusi ma isi mea o loo faamaumauina ia Aperila 1838 o faamatalaga ia o mea na tutupu na tau atu ai i le tapeina o igoa o Oliva Kaotui ma Tavita Uitimera mai le Ekalesia.
Se’i vagana ai se faaaliga e tasi, o le tusi o talaaga na tusia e le failautusi ma o le tusitalafaamaumau foi lea a le Ekalesia aoao, o George Robinson. Ina ua maea le tala tusitusia a Uso Robinson, na amata ona ia tusia faamaumauga i se faiga faaonaponei i tusitalafaamaumau. O le taimi lea ua tofia Uso Robinson e avea na tagata tusiupu a le Au Peresitene Sili, ma o le tusi o talaaga ua le gata ina taulai atu i le Perofeta ae ua faapea foi i ona fesoasoani—Sidney Rigdon ma Ailama Samita.
I le va o Aperila ma Iuni o le 1838, na tausia ai e Uso Robinson e le aunoa le tusi o talaaga ma faamaumauina taumafaiga a le Au Peresitene Sili e fuafua le nuu o le Au Paia o Aso e Gata ai i Atamu-onai-Amani e tuaoi ma Daviess County. Na faamaumauina foi e Uso Robinson nisi o faaaliga na maua e le Perofeta, e aofia ai le faaaliga e uiga i le sefuluai (tagai i le MFF 119).
Sa le’i femoumouai faamaumauga ma sa auiliili mai le taufaaiuiuga o le masina o Iulai e oo i le tau amataga o le masina o Setema. O faamaumauga nei o loo faamatalaina ai le amataga o sauaga matautia na oo i le Au Paia i le itu i matu i sisifo o Misuri. I le aso 2 o Setema, 1838, na faamatalaina ai e George Robinson ia siosiomaga i lena vaega: “Na foliga mai o se pulega sili atu a tagata leaga; ua faailoa mamao mai ai nisi o faamoemoega leaga; o le vaega pito i luga ua vevesi ma ua le mautonu.” I le faaiuga o le tusi o talaaga, o tagata o le Au Paia i Sisifo Mamao ma isi vaega o Caldwell County, Misuri, ua amata ona agai atu i le itu i Matu e puipuia i latou i totonu o Daviess County mai tagata ua latou faamalosia le tofia o i latou lava e fai ma pulega a o loo i ai taitai filifilia.
Tusi o Talaaga Lona Lua i Misuri: Setema–Oketopa 1838
O le tusiupu o James Mulholland o se tasi o tuaoi e tele o le aiga o le Perofeta i le tele o tausaga. Sa ia tausia le tusi o talaaga lona lua i Misuri i ni itulau se tolu o se tamai tusi na gaosia i lima. O faamaumauga e aofia ai le na o le tasi le masina—mai le amataga o Setema e oo i le amataga o Oketopa. O le tusi o talaaga na faaautuina o le “Memorandum Etcetera,” e aofia ai faamatalaga pupuu e faatatau i le aluese atu ma le toe foi mai o Iosefa Samita, e masani lava ona matauina o nei gaoioiga e i totonu o le tai afa itula. Na tusia i le taimi o le faateteleina o feteenaiga i totonu o Misuri, o le tusi o talaaga lenei atonu na poloaiina e le Perofeta ina ia maua ai se faamaumauga e mafai ona faaaogaina i se faamasinoga faaletulafono e tusitusia ai mea e fealuai i ai o ia i aso taitasi.
O James Mulholland e le o ia o se tasi e aofia i faamoemoega ma gaoioiga a le Perofeta, e le pei o le tusiupu a le Au Peresitene Sili o George Robinson. O le faamaumauga mulimuli i le aso 5 o Oketopa, 1838, na faaiuina i se faamatalaga faapenei “Ou te le’i vaai ia te ia i lenei aoauli atoa; ou te malamalama na alu ese o ia mai lona aiga.” O le mea moni, o Iosefa Samita ua malaga atu o ia i De Witt, i Misuri, e fesoasoani i le Au Paia o e ua ave faamalosia e tagata ua latou faamalosia le puleaina o le malo a o loo i ai le pulega aloaia.
Tusi o Talaaga Muamua i Ilinoi: 1839
Ina ua mavae se faafalepuipuiina mataga i le taumalulu atoa i totonu o le Falepuipui o Liperate, na tuuina atu ai i le Perofeta o Iosefa Samita ma isi ona uso a pagota o le Au Paia o Aso e Gata Ai se isi nofoaga e faia ai lo latou faamasinoga. O le mea manino lava ina ia faasaoina le setete mai i le faalauiloaina o se faamasinoga, na faataga ai e leoleo pagota e sosola a o latou o atu i le nofoaga fou e faia ai le faamasinoga. Na latou sopoia le Vaitafe o le Misisipi e agai atu i Ilinoi i le aso 22 o Aperila, 1839, lea na latou faatasia ai ma le Au Paia mai Misuri, o e na latou maua se faafeiloaiga mafanafana mai tagatanuu o Quincy, i Ilinoi. O le aso lava lena e tasi na totogi ai e le Perofeta ia James Mulholland e toe tusia le tusi o talaaga mo ia. Mai ia Aperila e oo ia Oketopa 1839, na tusitusia ai e Uso Mulholland gaoioiga a le Perofeta i ni itulau e 15 o se tamaitusi na gaosia na faaautuina “Tusi o Minute.”
O le tusitalafaamaumau o loo mulimulitai i se isi toe taumafaiga a le Perofeta ina ia faapotopotoina le Au Paia e fausia le malo o le Atua. Na ia faatauina se fanua i luga atu o le vaitafe i le nofoaga e taua o Commerce, Ilinoi, ma faatonuina le Au Paia e o i ai iina. E ui lava o lea nofoaga o loo tetele ai le namu lea e feaveaia le faamai o le mumu, ae sa amata e le Au Paia ona eli ia alavai e faatafe ai le vai i lea nofoaga faataufusi maualalalo ma suia le nuu o Commerce i se aai matagofie lava, lea na mulimuli ane toe faaigoaina o Navu.
I le taufaaiuiuga o le masina o Oketopa 1839, na tuua ai e Iosefa ia Ilinoi mo Uosigitone, D.C., i le sailia lea o se fesoasoani ma toe foia le faaletonu mai le malo tele ona o le tulaga faaesea na mafatia ai le Au Paia o Aso e Gata Ai i totonu o Misuri. I le lua vaiaso ae le’i malaga ese ia Iosefa, na le toe tausia ai e James Mulholland le tusi o talaaga. Atonu na le toe tusia e ia le tusi, e pei lava o le toatele o isi, na mamai, masalo i le faamai o le mumu. Na maliu o ia a o loo toesea le Perofeta.
Tusi o Talaaga Lona Lua i Ilinoi: 1841–42
Ia Tesema o le 1841, i ni nai masina talu ona toe taliu mai o ia mai galuega faafaifeautalai i totonu o Egelani, na amata tusia ai e Elder Uiliata Risati le tusitalafaamaumau aupito sili ona umi ma le le fefoifoiai e uiga i le soifuaga o le Perofeta. O le tusi o talaaga lenei ma lea na sosoo mai ai i Ilinoi o loo maua ai faamaumauga mo aso uma lava taitasi e afua mai i le ogatotonu o le masina o Tesema 1841 seia oo atu i le maliu o le Perofeta ia Iuni 1844. Na amata e Elder Risati lenei tusitalafaamaumau i se api tele na faaautuina “O Le Tusi o le Tulafono a le Alii.” O lenei talafaamaumau na foliga mai na faia ina ia faataunuuina ai le poloaiga o le “tausia lea o se tala faasolo, ma se tala tusia aoao a le ekalesia i mea uma e tupu i Siona, ma i latou uma o e faapaiaina mea totino” (MFF 85:1). O tusitusiga e uiga i nisi o faaaliga na muamua mai i le 89 itulau o faamaumau i le tusi o talaaga, ia o loo faamaumauina solo i se talafaamaumau o le anoanoai o le mau foai na tuuina atu i le Ekalesia.
O le tusi o talaaga lenei o loo faamatalaina ai le tele o mea taua na tutupu i le soifuaga o le Perofeta e pei o le faavaeina o le Aualofa ma le fausia o le Malumalu i Navu. O faamaumauga o loo faamatala ai mea sa faia e Iosefa i le avea ai o ia ma Peresitene o le Ekalesia, pulenuu o le aai, fai faleoloa, faamasino sili, faatonu o le nusipepa, alii taitai i le Vaegaau a Navu, ma isi lava tofiga. O loo maua ai foi i faamaumauga o le tusitalafaamaumau lenei ia faaaliga, faamaumauga o faamasinoga, ma fetusiaiga ma le faletua o Iosefa, o Ema, ma isi.
Ia Iuni o le 1842, ina ua malaga ese atu Uiliata Risati mo Massachusetts ina ia aumai lona aiga i Navu, na ia tuuina atu ai lenei tusitalafaamaumau ia William Clayton. I le fesoasoani mai o Eliza R. Snow ma se tasi tusiupu e le o mailoa mai lea taimi i lea taimi, na tausia ai e Uso Clayton le tusitalafaamaumau ma le talafaamaumau o foai. O mea na tutupu i le masina o Tesema i le aso 20, 1842, o faamaumauga mulimuli ia na tusia i le talafaamaumau.
Tusi o Talaaga Lona Tolu i Ilinoi: 1842–44
E ui lava o le afa o itulau o le tusi o talaaga e le o i ai ni mea ua tusia ai talu ai, ae o se tusi o talaaga fou, na faaautuina “O Le Tusi o Talaaga a Peresitene Iosefa Samita,” na amata tusia e afua mai i le aso 21 o Tesema, 1842, ma o Uiliata Risati na toe galue foi o le tusiupu. O lenei taumafaiga na oo atu lava i ni voluma se fa, o se tusi o talaaga e 1,045-itulau. E toetoe lava o aso uma o loo maua ai faamaumauga seia oo ia Iuni 22, 1844—ae toe lima lena o aso a o le’i faamaturoina le Perofeta ma lona uso o Ailama.
O le tusi o talaaga o loo faaalia ai le ituaiga tusitusi a le tusiupu lava ia, o Uso Risati, ae o loo atagia ai foi uiga ma amioga o le Perofeta lava ia e ono le mafai ona faaalia pe ana faapea e tusia e le perofeta lava ia mo ia. O faamaumauga e faasolo mai lava i nai tala mama faafiafia loto seia oo atu lava i tala auiliili o faamasinoga faalemalo ia na pulefaamalumalu ai Iosefa Samita i potu faamasino a Navu. O le lautele o nei faamatalaga e fesoasoani ai ia i tatou ia malamalama lelei i le Perofeta o Iosefa Samita. O nisi o faamaumauga o loo maua ai foi lagona loloto e faatatau i mea e manao ma faamoemoe i ai o ia i le tusia o faamaumauga i lana tusitalafaamaumau. Mo se faataitaiga, ia Mati i le aso 4, 1843, na fai atu ai le Perofeta ia Uso Risati, “E i ai se mea e tasi o loo pa’ū ai lau galuega o se tausi talafaasolopito—o le faaigoaina po o le matauina lea o mea o le siosiomaga, e pei o le tau, ma isi lava mea.” O le iloiloga a Iosefa o le tusi o talaaga lenei, e ui lava e le faia soo, ua faailoa mai ai le taua ua ia tuuina atu i le mauaina lea o faamatalaga faatalafaasolopito i mea na tutupu i lona soifuaga ma le Ekalesia i ona popofou.
E ui lava o taumafaiga a le Perofeta ina ia tausia se talafaamaumau o lona lava olaga faaletagata lava ia ma lona olaga faalelotu na malosi i nisi o taimi ae vaivai foi i nisi o taimi, ae na iu lava ina faamanuiaina, i le fesoasoani mai o isi, le tausia faifaipea o se talafaamaumau o mea na ia faia. O lana tusi o talaaga ua le gata ina avea o se faavae o le talafaasolopito amata o le Ekalesia ae ua avea foi o se faataitaiga mo i tatou e uiga i le taua o se talafaamaumau o o tatou lava olaga e mafai ona aafia ai olaga o i latou e tutupu mai ia i tatou.
O le sipelaga ma le faaaogaina o faailoga tusitusi ua faaaogaina i ai faiga faaonapo nei i upu sii uma i totonu o le tusi o talaaga; o tusi o talaaga o loo i ai nei i le tausiga a le Faletusi o Talafaasolopito a le Ekalesia i le Aai o Sate Leki, Iuta.