Savali a Faiaoga Asiasi

Avea ma se Tufugaaao o le Atua e ala i le Faatinoina o le Alofa Mama

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia foi i latou o loo e aoaoina ia fapena foi ona fai.

O Le a le Alofa Mama?

Peresitene Howard W. Hunter (1907–95): “‘O le poloaiga fou ou te tuu atu ai ia te outou,’ ua fetalai mai ai [le Faaola], ‘Ia outou fealofani; … O le mea lea e iloa ai e tagata uma lava o ou soo outou, pe afai ua outou fealofani.’ (Ioane 13:34–35.) O le alofa lenei e tatau ona ia i tatou mo o tatou uso ma tuafafine i le aiga tagata, ma ua iā Keriso mo i tatou uma taitoatasi, e ta’u o le alofa moni po o le ‘alofa mama o Keriso.’ (Moronae 7:47.) O le alofa lena na ala ai ona musuia le puapuagatia ma le taulaga o le togiola a Keriso. O se tumutumu pito maualuga lena e mafai e le agaga o se tagata ona ausia, ma o se faaalia pito sili lena ona loloto o le alofa o se tagata… .

“Na poloaiina i tatou e le Faaola ia fealofani e pei ona alofa mai o Ia ia i tatou; ia faaoofu i tatou lava ‘i le fusi o le alofa’ (MFF 88:125), e pei ona faaofuina ai o Ia lava. Ua valaauina i tatou ia faamama o tatou lagona i totonu, ia sui o tatou loto, ma ia tusa a tatou galuega vaaia ma foliga ma mea tatou te fai atu tatou te talitonu i ai… .

“O e ua tumu i le alofa o Keriso, latou te le saili e faamalosia isi e fai le mea lelei; latou te musuia isi e fai le mea lelei, e moni, latou te musuia i latou ia mananao e aoao ia iloa le Atua. E ao ona tatou aapa atu se lima faauo. E manaomia e i tatou ona agalelei atili, agamalu atili, faamagalo atu atili, ma ia faatelegese le ita” (“O Se Ala Sili Ona Lelei,” Liahona, Iulai 1992, 76–78).

E Mafai faapefea e le Alofa ona Fesoasoani ia te Au Ina ia Avea o se Tufugaaao o le Atua?

Eteru 12:28: “O le faatuatua, ma le faamoemoe ma le alofa e taitai mai ai tagata ia te au—o le puna o le amiotonu uma.”

Elder Joseph B. Wirthlin o le Korama a Aposetolo e Toasefululua: “Afai tatou te vaai atu i mata o le faatuatua o i tatou o fanau a se Tama alofa, o lē ua tuuina mai ia te i tatou le meaalofa o Lona Alo e togiolaina i tatou, o lona uiga ua tatou lagona le liliu tele i o tatou loto. Tatou te lagona ‘le fia pepese i le pese o le alofa faaola’ [Alema 5:26], ma ua faatumulia o tatou loto i le alofa. O le iloa o le alofa o le Atua ‘e sili ona manaomia i mea uma … ma le fiafia silisili i le agaga’ [1 Nifae 11:22–23], tatou te fia faasafua atu lo tatou olioli i isi. Tatou te fia auauna atu ia te i latou ma faamanuia i latou” (“O Le Atinaeina o Uiga Paia,” Liahona, Ian. 1999, 31).

Anne C. Pingree, sa avea muamua ma fesoasoani lua i le au peresitene aoao o le Aualofa: “E mafai ona tatou suia le lalolagi ia tasi le aiga, tasi le auaiga i se taimi i nai a tatou faatinoga iti ma le faatauvaa o le alofa mama.

“O le alofa moni, o le alofa mama o Keriso, o le ‘alofa aupito i maualuga, tamalii, ma malosi’ lea tatou te tatalo atu ai ‘i le Tama ma le malosi uma o le loto’ ina ia tatou mauaina. Ua aoao mai i tatou e Elder Dallin H. Oaks o le alofa moni ‘e le o se amioga ae o se tuutuuga po o se tulaga [e avea ai se tasi].’ O lo tatou ofoina atu o le alofa moni i lea aso i lea aso ‘e le o tusia i le vaitusi a o le Agaga o le Atua soifua; … i papatusi maa o o [tatou] loto.’ O sia mea itiiti ma sia mea itiiti o a tatou faatinoga o le alofa moni, e suia ai o tatou natura, e faamanino ai o tatou uiga, ma faaiu ai ina avea i tatou ma tamaitai ua i ai le lotototoa ma le naunautai e faapea atu i le Alii, ‘O Au lenei; auina atu au’” (“O Le Alofa Mama: E Tasi le Aiga, Tasi le Auaiga i le Taimi,” Liahona, Nov. 2002, 108–9).