Pe Na Alofa Moni Ea Le Tama Faalelagi Ia Te Au?
E masani lava ona ou fiafia i musika, gaoioiga, ma le lagona faaosofia e aumaia e taimi o aso malolo, ae e ese ai lava lenei taimi o aso malolo, ona faatoa uma lava ona see atu lo matou aiga i se isi taulaga fou. Na ou iloa na manaomia ona matou i ai iina i lena taimi, ae sa ou le maua se lagona toafilemu ma le le masani ai i lea nofoaga fou.
Na faaleo atu lo’u le malie i lo’u toalua o Rob. Ua tele taimi o ma femalagaai solo talu ona uma ona ma faaipoipo, ma na ia iloa o loo i ai so’u faafitauli i lagona o le lē saogalemu. Na fesili mai Rob ia te a’u, “O e iloa ea le alofa tele o le Tama Faalelagi ia te oe?”
“Ioe,” o la’u tali atu lea.
“Ae,” o le tausisi mai lea a Rob, “o e lagonaina i lou loto e alofa o Ia ia te oe?”
Na maligi o’u loimata ina ua ou iloa ou te le o lagonaina i lo’u loto e alofa o Ia ia te au. Mo se taimi umi lava e pei ona mafai ona ou manatuaina, na ou lagona ai lava e sili atu tagata uma lava ia te au. Na tuu mai e Rob se lui ina ia ou tatalo ma ole atu i le Tama Faalelagi ina ia ou lagonaina Lona alofa mo au. Sa faapena lava ona ou faia i lena po.
I ni nai aso mulimuli ane na ou alu ai ou te faatau. E le gata i le faatauina o mea masani, ae na ou fuafua foi e faatau mai se fasi povi vili ma se fasipovi e tao. Ae peitai, na ou iloa, e le o lava se ma tupe o i ai e faatau ai ia fasipovi. Toe tasi le vaiaso ona faatoa maua lea o se ma tupe. Na ma manaomia foi se penisini o le taavale ina ia mafai ona matou feoai ai i se pati faaleaiga lea e faia i fafo atu o le taulaga.
E le faapea ua matuai aunoa lava i maua ma se tupe, ae na ou tatalo mo le tulaga o loo feagai nei ma maua, i le tau atu lea i le Tama Faalelagi e manaia foi pe a faapea e mafai ona faatauina mea o loo manaomia.
I le afiafi na sosoo ai a o ou saunia le meaai o le afiafi, na tatagi ai le logo o le faitotoa. Ina ua ou tatalaina atu le faitotoa, na pau lava le mea e tasi na ou maua i le faitotoa o se taga pepa lapoa e fai ai faatau. Na ou punou ifo e sii i luga le taga ma ou vaaia se tupe pepa $20 tala o loo faapipii i le gutu o le taga, faatasi ai ma le faaupuga “Manuia le Kerisimasi!” o loo tusia faalava i se peni vali i le pito i luma.
I totonu o le taga na i ai ni afifi o fasi povi vili o loo malo i le aisa, faapea foi ma ni afifi o fasipovi e falai. Sa ou matua maofa lava. Ou te le’i taua lava i se isi ua leai se ma tupe seiloga e maua le isi a ma siaki, e oo lava i lo’u toalua ou te le’i fai i ai. E mafai faapefea e se tasi ona ia lagonaina gofie le Agaga ua ia foaiina mai ai mo i maua e le gata i fasi povi na manaomia ae faapea foi se tino i tupe e toetoe lava o le aofaiga tonu lea e tumu ai le ma taavale? I le taimi o le sauniga molimau, na ou faailoa atu ai lo’u agaga faafetai tele mo meaalofa ma lo’u faamoemoe o loo auai i le sauniga le tagata na foaiina atu lena meaalofa mo maua.
O lenei mea na tupu o se liliuga tele lea mo au. Na tali mai le Tama Faalelagi i la’u tatalo. Na alofa o Ia ia te au, na Ia silafia ou manaoga, ma na Ia tauina mai i Lona faailoa mai lea ia te au. Talu mai lava lena taimi ou te saili ai lava e faaleleia la’u faalogo ina ia ou lagona musumusuga a le Agaga. Ua ou tatalo soo nei ina ia mafai ona avea a’u o se tufugaaao i le tali atu lea i se tatalo a se isi tagata.