Ua Ofo Atu E le Ekalesia le Fesoasoani i e na Aafia i Faalavelave i le Lalolagi Atoa

O tausaga taitasi, e faitau miliona e aafia i taua, lologa, mafuie, asiosio, afa, ma isi faalavelave matautia. I nei tulaga uma e faapopoleina ai, e masani lava ona faia e le vave ona tali atu se eseesega i le va o le ola ma le oti.

O loo faaauau pea ona aoina mai e le Ekalesia ia foai o meaai, lavalava, sapalai faafomai, ma isi mea e faaaoga mo fesoasoaniga. Ona tuuvaevae lea o punaoa i nofoaga autu mo le auina atu pe a vave ona manaomia. Ona o lenei nofo saunia, ua mafai ai e le Ekalesia ona tali vave atu i taimi o faalavelave faafuasei.

Afai ua matuai taua lava le vave ona tali atu, ua faalagolago ia fesoasoaniga faavaomalo i le Ekalesia mo meaai ma mea e faaaogaina. E le gata i le tuuina atu o mea e faaaogaina, ae ua fesoasoani foi le Ekalesia i tupe ma tagata volenitia. O tagata volenitia e masani ona faia se eseesega tele i le toefuataiina o le faamoemoe i olaga o i latou o loo mafatia.

Mai le 1985 e oo i le 2006, ua auina atu e le Ekalesia le 54,905 tone (50,000 tane) o meaai ma le 107,061 tone (96,000 tane) o isi sapalai i le silia ma le 150 atunuu. I le 2006, na tuuina atu ai e le Ekalesia le tinoitupe e $14.9 miliona tālā Amerika ma mea e faaaoga e tali atu ai i feteenaiga i Lepanona, o le mafuie i Initonesia, mo tagata sulufai i Burundi, Sudan ma Uganda, ma isi faalavelave e 76.

Ua Tali Atu Tagata o le Ekalesia i Egelani i Lologa Matautia

Ina ua mavae lologa tetele i vaega uma o Egelani tutotonu ma sisifo lea na tuua ai le silia ma le 15,000 fale i Gloucestershire e aunoa ma se eletise ma le latalata i le 350,000 tagata e leai ni vai ia Iulai, sa faia loa e Elder Kenneth Johnson o le Au Fitugafulu, o le Peresitene o le Eria a Europa i Sisifo, se foai e 25,000 Pauni Peretania i taumafaiga faaola totoga a le Koluse Mumu i Gloucestershire e fai ai ma sui o le Ekalesia. Sa galulue foi taitai o le Ekalesia e lata atu i Sheffield ma taitai o le malo e tufatufa atu mea e faaaoga mo le faamamaina o fale ma isi sapalai mo faalavelave faafuasei ia i latou sa aafia. Sa fesoasoani ai foi tagata o le Ekalesia faapea o latou tuaoi i le faamamaina o le alalafaga ina ua mavae lenei mea na tupu o se lologa matautia ua faamaumauina i le talafaasolopito o Peretania.

O eria sa sili ona popole i ai o eria ia sa i autafa o Vaitafe o le Severn, Avon, ma le Thames. Sa laveaiina e helikopa ma le aufaigaluega a le Neivi ia tagatanuu i eria sa lofia i le ono futu (1.8 m) o le vai ma sili atu.

E le itiiti ifo ma le vaiaso sa faaalu e taitai e toe sosoo ai le 80 pasene o fale na motusia mai le suavai, e ui e le’i mama le vai mo le taumafaina mo sina taimi, e tusa lava pe faapunaina, ona o le faaleagaina o se nofoaga sa togafitia ai le suavai.

E toatele ni aiga lotu sa aafia i le lologa, ae sa saogalemu uma tagata o le Ekalesia ma faifeautalai sa saogalemu uma. O le faleautu o le Siteki o Hull Egelani sa sili ona tele mea na faatamaia e le vai.

O le sooupu o le Vaega o le Siosiomaga o Anthony Perry sa ta’uina atu i le BBC e faapea e le’i vaaia muamua lava i lenei itu ni lologa faapenei le malolosi. O Mati o le 1947 sa papa ai vaitafe i le itu i saute o Egelani, Midlands, Anglia i Sasae, ma Yorkshire i Matu, na mafua ai le tele o mea na faaleagaina, ae o le lologa lenei ua sili atu, o le saunoaga lea a Uso Perry.

Ua Tali Atu le Ekalesia i le Mafuie, Afa Fulifao i Iapani

Sa mafatia Iapani ina ua mavae ona taia e le Afa Fulifao o Man-Yi mai le itu i saute ma luluina e se mafuie e 6.8 i le itu i matu.

E tusa ma le 11 tagata na maliliu ma le silia ma le 1,990 na manunua i le Aso 16 o Iulai, 2007, ina ua lipotia mai le mafuie e 6.8 le malosi sa luluina ai le talafatai i sisifo o Iapani e lata i Kashiwazaki, lea sa iloaina ai le 300 o le tusa ma le 800 o fale na faatamaia pe na faaleagaina.

E tusa ma le 9,000 tagata sa nonofo i nofoaga le tumau na faamautu i ai, ma le silia ma le sefulu afe i latou na leai se eletise, kesi, po o le vai mo ni aso.

Sa faaleagaina le fale o se tasi aiga lotu e le mafuie. Sa i ai i totonu se tagata matua ina ua pau i lalo le fale, ae sa faasaoina ma ni nai maosiosia laiti. Sa lipotia mai le saogalemu uma o faifeautalai ma tagata o le Ekalesia.

Sa mafai ona lagonaina le mafuie i Tokyo, e silia ma le 125 maila (201 km) i le itu i saute o le ogatotonu o le mafuie.

O Man-Yi, o se afa fulifao e oo atu ona matagi i le 100 maila i le itula (160 km i le itula), sa agi i motu i saute o Kyushu ma Shikoku i le aso 15 o Iulai, 2007, na maliliu ai tagata e toatolu ma manunua ai le silia ma le 79. E tusa ma le 30,000 tagata na aveesea mai o latou fale. Na maua mai lipoti e tusa ma le 15 fale na faaleagaina ma le isi 1,500 na lolovaia. E tasi le fale o se aiga lotu sa faatamaia muamua ina ua sopoia e le afa fulifao ia Okinawa, ae leai ni tagata o le Ekalesia po o ni faifeautalai na lipotia mai na manunu’a, e leai foi ni meatotino a le Ekalesia na faaleagaina.

Ina ua mavae ia nei faalavelave, sa galulue faatasi loa ia taitai perisitua ma taitai o le malo e fuafuaina pe mafai faapefea ona fesoasoani atu le Ekalesia.

Ua Tuuina atu e le Ekalesia le Faaolatotoga i Nuu na Aafia i le Malaia

Na auina atu e le Ekalesia ia foai mai le Tupe o Fesoasoaniga Alofa i le vaega o le Koluse Mumu ia Iuni, e tali atu ai i se malaia lea na faamalosia ai le o ese o le faitau selau o tagata mai o latou fale i Meyers, Kalefonia, e latalata i le Vaituloto o Tahoe.

O se vaega o la latou fuafuaga e tali atu ai i faalavelave faafuasei, sa faamatuu atu ai e taitai o le Siteki o Fallon Nevada ia sapalai mo faalavelave faafuasei i tagata na faamalosia ona aveesea mai o latou fale ma i latou sa moomia le fesoasoani. Sa aofia ai mea e faaaogaina mo le tumama ma palanikeke mo tagata o le Ekalesia. O le toatele o tagata na o ese mai o latou fale sa faamautu i faletalimalo, ma sa ofo atu e le Ekalesia ia falelotu i le lotoifale e avea ma malutaga pe a manaomia.

Sa faatamaia e le malaia ia fale e 276, sa feauauai le faamisi o nisi fale ae faatamaia isi. O vaiaai sa aafia sa aofia ai tamai fale ogalaau, o fale mautu lelei lava, ma nisi o mataaga e malolo ai e ta’i miliona tala le tau.

E silia ma le 1,800 le au tineimu, sa fesoasoani i ai helikopa e fitu, sa aofia ai i taumafaiga e tuuitiitia le afi lea sa taufaamatau i isi fale e 500.

E toatasi se aiga lotu sa aafia ai lo latou fale ma afaina ai le tele o a latou meatotino. E le itiiti ifo ma le 17 isi fale o tagata o le Ekalesia sa faamatauina ma sa faamalosia foi ona o ese aiga mai o latou fale.

Ua Luluina Kuatemala ma El Salvador e se Mafuie

O se mafuie malosi e 6.8 sa luluina ai Kuatemala ma El Salvador, i le aso 13 o Iuni, 2007, sa luluina ai fale mo le 30 sekone ae leai se maliu na tulai mai ai.

O le mafuie sa lulu i le Vasa Pasefika, e 70 maila (112 km) mai le Aai o Kuatemala i se loloto e tusa ma le 40 maila (64 km). Sa leai se taufaamatau mai o se galulolo.

E ui i le malosi o le mafuie, ae leai ma se mea na afaina o nei atunuu—e le pei o mafuie e lua na luluina ai El Salvador i le 2001 na maliliu ai le silia ma le 1,150 tagata, o le toatele lava na mafua mai i ogaeleele ua solo e latalata i San Salvador, le laumua.

O lipoti mai le Ofisa o le Eria i Amerika Tutotonu sa faailoa mai ai e leai ni tagata o le Ekalesia po o ni faifeautalai na maliliu pe na manunua ona o lenei mafuie. Sa fesoasoani taitai perisitua i le lotoifale e fuafua po o a mea e sili ona manaomia na aliae mai.

Ua Fesoasoani le Ekalesia e Faatupe Taumafaiga Laveai mo Tagata na Aafia i Lologa i Colombia

Na auina atu e le Ekalesia ni tupe mo faalavelave faafuasei e faasaoina ai le tele o itu o Colombia lea e silia ma le 50 tagata na maliliu ai ma le fia afe na leai ni fale e nonofo ai ina ua mavae ni lologa mamafa i vaiaso muamua o Iuni.

Na aafia le tele o vaega o le atunuu i timuga mamafa, aemaise lava o le itu i matu sa sili ona faaleagaina. O timuga na mafua ai ona solo ogaeleele ma faaleagaina ai pe faatamaiaina ai fale e 270,000 ma pisinisi talu ona amata le vaitau o timuga ia Mati 2007.

Ua Fesoasoani Tagata o le Ekalesia e Faamama Ausetalia ina ua Mavae Lologa

Na tuua e tagata o le Ekalesia ma faifeautalai le lotu ina ua maea ia sauniga faamanatuga i le Aso Sa, 10 o Iuni, 2007, e auai atu i le utuina o taga oneone ma taumafaiga e faamama ai le lotoifale sa aafia o New South Wales, i Ausetalia i se lologa lea na mafua ai le maliliu o ni tagata e toaiva ma tuua ai kamupani inisiua e faatalitalia ni pili e oo atu lea e mafai ona sili atu ma le $300 miliona tala Ausetalia.

O lologa na mafua ai ona faamalosia le o ese o le 1,700 o aiga mai o latou fale. Sa faamaumauina e le Auaunaga a le Setete mo Faalavelave Faafuasei se aofaiga e 13,830 o telefoni mo se fesoasoani i le gasologa o le faaiuga o le vaiaso o le lologa.

O nisi o pisinisi i le eria o Wallsend ma le itu o fale gaosimea i Cardiff atonu e le mafai ona toe faagaoioia, o le saunoaga lea a le taitai o le Vaega o Pisinisi a Hunter i le nusipepa o le The Australian.

O le aso 12 o Iuni, e silia ma le 30,000 fale sa leai se eletise, ua pau ifo i lalo mai le 130,000 fale sa leai se eletise i le faaiuga o le vaiaso.

O lologa i le Vaifagaloa o Chittaway, e lata i le Vaituloto o Tuggerah, na iu ina maui ma mafai ai ona toe foi atu i o latou fale le silia ma le 400 tagatanuu.