iSakisaki ni Kosipeli
Na Sakaramede—kei na kena Solibula
E a sucu o David B. Haight ena ika 2 ni Sepiteba, 1906, mai Oakley e Idaho, ka luvei Hector C. kei Clara Tuttle Haight. E a vakamautaki Ruby Olson ena Valetabu e Salt Lake ena ika 4 ni Sepiteba, 1930. Ni se bera ni kacivi me dua na Vakaitutu Raraba, e a toso vinaka sara na nona cakacaka vakadauveivoli vakabisinisi; e a Meya kei Palo Alto e California; ka a iliuliu vakatulewa ena Tabana ni Kaulotu e Sikoteladi. E a tabaki me iApositolo ena ika 8 ni Janueri, 1976. E a mate ena ika 31 ni Julai, 2004, ni sa yabaki 97.
Ena ono na vula sa oti ena koniferedi raraba ni Epereli, au a kerei meu kakua ni vunau me vaka ga ni se qai vakayacori oti ga vei au e dua na veisele levu. Au a vakabulai, ka sa noqu madigi talei oqo meu vakavinavinakataka na veivakalougatataki, veivakacegui, kei na nodra maqusa ena veivuke o ira na Veitacini vakalotu ena Mataveiliutaki Taumada kei na Kuoramu ni Le Tinikarua kei ira tale eso na ilawalawa vakalotu kei na itokani vinaka kau sa dinau tu vei ira ka ra dau tokoni Ruby na marama watiqu, kei na noqu matavuvale ena nodra gauna, veikaroni, kei na masu… .
Ena yakavi ni siga sa torosobu kina na noqu bula, au sa kidava kina ni sa dua na leqa bibi sa yacovi au. Sa veisemasemati ga na veika e yaco—sa mosi kaukauwa sara na yagoqu, sa veiqiriyaki o noqu Ruby kivei vuniwai kei ira na neitou matavuvale, ia kau sa tu ka tautauri yani vakamalua ki na tavu ni sili meu kune vakacegu kina. Au sa masu tiko vua na Tamaqu Vakalomalagi me vakabulai au tale mada vakalailai meu vakayacora na Nona cakacaka, kevaka sa lewa o Koya.
Niu se masu tiko, sa tekivu meu boiri. Na domo ni lori ni valenibula sai koya na iotioti ni ka e a voqa vei au ni bera ni yali na yaloqu, ka vaka tu o ya me vica na siga.
Sa oti na mosi vakaitamera o ya ka sa cegu na nodra veimaqusayaki na tamata. Au sa mai tu oqo ena dua na vanua talei, ka veivakacegui; sa lagilagi ka vakanomodi totoka. Au raica rawa sara e rua na tamata ena dua na delana, e dua e tu ena yasana e cecere cake mai vua na kena ikarua. E sega ni matata na veika tale eso. O koya e toka e cake a dusia tiko e dua na ka au sega ni raica rawa.
Au sega ni rogoca e dua na domo ia au kila niu tiko ena dua na vanua ka ituvaki vakalou. Ena veiauwa kei na siga e tarava, sa vakavotui tikoga mai ki na noqu vakasama na ilesilesi tawamudu kei na itutu vakalou nei Koya na Luve ni Tamata. Au sa vakadinadinataka vei kemuni ni sai Koya ga o Jisu na Karisito, na Luve ni Kalou, iVakabula ni tamata kecega, Dauveivueti ni kawatamata kecega, iVurevure ni loloma tawayalani, loloma veivueti, kei na veivosoti, na Rarama kei na vu-ni-Bula kei vuravura. Au a kila tu na veika dina oqo—au a sega ni cakitaka se lomalomarua kina. Ia oqo au sa mai kila, me baleta ga na veivakauqeti ni Yalotabu ki yaloqu kei na lomaqu, na veika dina vakalou oqo ena dua na sala e duatani sara.
Ea vakaraitaki vei au e dua na ituvaki vakaiyaloyalo ni Nona cakacaka e vuravura: na Nona papitaiso, na Nona ivakavuvuli, na Nona vakabulai ira na tauvimate kei na lokiloki, na veilewai veivakacacani, na Nona Lauvako ena Kauveilatai, na Nona Tucaketale kei na Nona Lako Cake. E a vakavotui vakamatata talega mai vei au na Nona veicakacaka kece sara e vuravura, vakadinadinataki mai vei ira na tamata ena ivolanikalou. Au sa mai vakavulici oqo, ka sa tadola na noqu vakasama mai na Yalo Tabu ni Kalou meu na raica kina e vuqa na ka.
Na imatai ni ka e laurai au a raica kina na iVakabula kei ira na Nona iapositolo ena tikina cecere ena yakavi ni bera na Nona soli yani. Ni oti toka na kanavata ni Lakosivia, e a vakarota ka vakarautaka na ivakayakavi ni Turaga me baleti ira na Nona itokani lomani me vakananumi kina na Nona solibula sa roro tiko mai. E a totoka na kena vakaraitaki na ka oqo vei au—na loloma uasivi ni iVakabula ki na tamata yadua. Au sa vakadinadinataka eke na nona rokova vakabibi na veicakacaka kece sara—na vui ni yavadratou wadravusa na iApositolo yadudua, na Nona dovia ka masulaka na madrai damu kei na masulaki ni waini, kei na nona vakaraitaka ena rarawa ni dua vei ira ena soli Koya yani.
E a tukuna ni na lako tani yani o Jutasa ka tukuna vei ira na kena vo me baleta na veika sa na vakarau yaco.
Ni oti na Nona vunau vakalou oqo a qai kaya kina na iVakabula vei iratou na lewe Tinikadua: “A veika oqo kau sa tukuna vei kemudou, mo dou rawata na vakacegu ena vukuqu. Dou na kunea e vuravura na rarawa; ia mo dou vakacegu; au sa vakamalumalumutaki vuravura” (Joni 16:33).
E a masu na noda iVakabula kivua na Tamana ka vakarokorokotaka na Tamana ni sai koya na ivurevure ni Nona lewa kei na kaukauwa—ka yacova sara yani ki na kena soli na bula tawamudu vei ira era sa kilikili kaya.
E a masu vakaoqo, “Ia sai koya oqo na bula tawamudu, me ra kilai kemuni na Kalou dina duadua ga, kei Jisu Karisito ko koya ko ni a tala mai.”
Ena vosa vakarokoroko a tomana tale o Jisu:
“Au sa vakarokorokotaki kemuni e vuravura: niu sa vakaotia na cakacaka ko ni a solia mai vei au meu kitaka.
“Ia oqo, Tamaqu, ni vakarokorokotaki au me daru tiko vata, ena vakarokoroko sa tu vei au ni daru a tiko vata ni sa sega ni caka ko vuravura” (Joni 17:3–5).
E a sega walega ni masulaki ira na tisaipeli era a kacivi e vuravura ka ra dinata tu na nodra ivakadinadina baleti Koya, “ia ena vukudra talega era na vakabauti au ena vuku ni nodra vosa” (Joni 17:20).
Ni ratou sa lagasere oti, eratou sa qai gole yani o Jisu kei iratou na lewe Tinikadua ki na Ulunivanua ni Veiolive. E kea, ena were, mai na dua na ituvaki e sega ni vakamacalataki rawa, a colata kina o Jisu na icolacola ni ivalavala ca ni kawatamata vakatekivu mai vei Atama ki na icavacava kei vuravura. Mai na nona vutugu ena loma ni were, e a vola vakaoqo vei keda o Luke ni sa yaluma sara “ia na nona buno sa vaka na titiri ni dra … ni sa lutu ki na qele” (Luke 22:44). E a yacovi Koya na yaluma kei na bibi ni icolacola ka sa sega ni rawa vua e dua na tamata me colata rawa. Ena auwa ni vutugu o ya sa vorata rawa kina na iVakabula na kaukauwa taucoko nei Setani.
E a vakaraitaka na Turaga lagilagi kivei Josefa Simici na veivakasalataki oqo kivei ira na kawatamata kecega:
“A ka oqo au sa vakarota kina mo veivutuni… .
“Raica … koi Au, na Kalou, … au sa vosota oti … me ra bula kina, ko ira era sa veivutuni; …
“Raica koi au na Kalou sa Kaukauwa Sara, au sa sautaninini ena mosi ni veivakararawataki ko ya, au a bunotaka na dra, …
“Raica au sa vakaroti iko tale oqo mo veivutuni, kevaka e sega ena tau vei iko na noqu cudru, mo tusanaka na nomu ivalavala ca, kevaka e sega ena tau vei iko na itotogi kau tukuna tiko” (V&V 19:15–16, 18, 20).
Ena veisiga taucoko au a lecavi au tu kina, e a soli vei au, ena isolisoli kei na kaukauwa ni Yalo Tabu, e dua na veivakavukui uasivi ni Nona cakacaka. E a soli talega vei au e dua na kila meu raica kina vakavinaka na ibalebale ni noda cakacaka, ena vuku ni Yacana, na lewa ni kena dolavi na veika vuni ni matanitu ni lomalagi me baleta na nodra vakabulai o ira sa yalodina tiko. E vakavulici vakaveitarataravi na yaloqu ena veika a yaco ena nona soli yani, na veilewai veivakacacani, na vakanakuitataki ni yagona e dua vei iratou na Lewetolu Vakalou. Au a raica na Nona sa sasaga cake yani ki na delana ni sa malumalumu sara na Yagona ka colata na Nona kauveilatai ka vakamavoataka na Yagona ka sa vakadavori ki ra, me na tuki laubasika mada na ivako ki Ligana kei na ilokiloki me tabei rawa kina na Yagona ena kena sa rube toka ena kauveilatai me ra sarava na tamata kecega.
Lauvako ena kauveilatai—na mate vakararawa kei na vutugu a yaco Vua—sa digitaki sara mai na gauna e liu. Mai na mate vakaloloma oqo, sa yaco kina me lolovira ena veika kecega, me vaka sa volai, mai na Nona Veisorovaki ga ena yaco me cecere cake ki na veika kecega (raica na V&V 88:6).
E a mate o Jisu Karisito me vaka ni da mate vakakina koi keda kece sara. E a laki vakotori na yagona ena ibulubulu. Na yalo tawamate rawa i Jisu, o koya sa digitaki me iVakabula ni kawatamata kecega, a gole yani ki na dua na iwiliwili vakaitamera ni yalo ka ra sa biuta yani na bula oqo ena dui ivakatagedegede ni ivalavala dodonu ena lawa ni Kalou. A vakavulica vei ira na “itukutuku lagilagi ni veisereki mai na ivesu ni mate, kei na veivakabulai talega … [o ya sa] tiki ni ilesilesi taumada ni [noda] iVakabula kei na veiqaravi cecere ki na matavuvale ni kawatamata.”1
Sa sega ni rawa vei au meu vakaraitaka vei kemuni na titobu ni veika au a raica oqo ka sa vakadeitaki oqo e yaloqu. Au sa vakila rawa na kena inaki tawamudu kau sa kila kina ni sa “sega ni dua na ka e tiko ena ituvatuva taucoko ni veivakabulai e rairai bibi me vaka na kena sa cecere duadua, o ya na solibula ni veisorovaki ni noda Turaga. Sai koya ga oqo na ka bibi duadua e yaco ena itukutuku taucoko ni veigauna ni nodra bula na veika buli; sai koya oqo na yavu vatu ka sa vakayavutaki tiko kina na kosipeli kei na veika kece tale eso,”2 ka sa vakatakilai oti.
E vakavulica o Liai na tamada edaidai vei Jekope na luvena vata kei keda:
“Ia sa yaco na bula ena vuku i koya na Mesaia Yalosavasava, ni sa sinai ena loloma kei na dina.
“A sa vakayacori Koya me isoro ni ivalavala ca, me vakayacori kina na ka sa tukuni ena ivunau vei ira sa yalo raramusumusu ka bibivoro; raica sa sega ni duatani tale sa rawa me vakayacora na ka sa tukuni ena vunau.
“Ia sa kilikili me tukuni yani na veika oqo vei ira na kai vuravura, me ra kila ni sa sega ni rawa vua na tamata me tiko ena mata ni Kalou, ia sa rawa duadua ga ena vuku ni nona yalovinaka kei na nona loloma kei na nona lomasoli na Mesaia Yalosavasava, raica sai koya sa solia na nona bula ka taura tale ena kaukauwa ni Yalotabu, me yaco kina na tucaketale mai na mate; ia sa isevu ni tucake tale mai na mate ko Koya.
“Ia sa isevu ko Koya vua na Kalou me vakayacora na nona veimasulaki ena vukudra kecega na luve ni tamata; ia ko ira sa vakabauti Koya, era na bula” (2 Nifai 2:6–9).
Na sokalou bibi duadua eda na dau vakayacora ena soqoni ni sakaramede sai koya na cakacakatabu vakalotu ni sakaramede, ni sa dau vakanamata kina vakatabakidua na noda vakasama kei na yaloda ki vua na iVakabula kei na Nona solibula.
E a veivunauci o Paula na iApositolo vei ira na yalododonu taumada me ra dau doka ka kilikili kaya ni ra vakayagataka na madrai kei na waini ni Turaga (raica na 1 Korinica 11:27–30).
Ea vakarota sara ga na noda iVakabula vei ira na Nifai, “Ni sa kania ka gunuva na nona cudruvi ko koya sa kania ka gunuva ka sega ni doka” (3 Nifai 18:29).
O ira sa kilikili kaya me ra vakaivotavota ena sakaramede era sa duavata kei na Turaga ka vakadeitaki ira ena veiyalayalati kei Koya me ra nanumi Koya tikoga kei na Nona solibula me baleta na ivalavala ca kei vuravura, me ra taura na yaca i Karisito, ka me ra dau nanumi Koya, ka muria na Nona ivakaro. Sa yalataka kina na iVakabula ni oi keda eda sa vakayacora vakakina ena tiko vata kei keda na Nona Yalotabu, kevaka me da qai yalodina tiko me yacova na ivakataotioti, eda na vakaivotavota ena bula tawamudu.
E a vakatakila na Turaga vei Josefa Simici ni sa “isolisoli levu duadua ni Kalou na bula tawamudu” (V&V 6:13), ni sa ituvatuva e okati kina na cakacakatabu vakalotu ni sakaramede me ivakananumi tikoga ni Nona solibula na iVakabula. E a vakasalataka vakaoqo me ra “dausoqoni vakawasoma na lewe ni lotu me ra kana madrai ka gunu waini; io me ra vakananuma kina na Turaga ko Jisu Karisito” (V&V 20:75).
Na tawamate rawa ena yaco vei keda ni sa isolisoli walega ni nona loloma vakalou na Kalou, ka sega ni cakacaka ni ivalavala dodonu. Ia, na bula tawamudu, sai koya ga na isau ni kena bulataki na lawa kei na cakacakatabu vakalotu ni Nona kosipeli.
Au vakadinadinataka oqo vei kemuni kece ni sa dau rogoca na Tamada Vakalomalagi na noda vakatakekere dodonu. Na ikuri ni veivakavukui sa yaco vei au oqo e sa curuma na noqu uto kei na ivi. Na isolisoli ni Yalo Tabu sa iyau talei duadua ka sa tadolava na katuba ni noda sa na vakavukui tikoga me baleta na Kalou kei na marau tawamudu.
Mai na vosa ni koniferedi raraba ni Okotova 1989; sa vakavoutaki na matanivola lelevu kei na pagitueti.