Marautaka na Valenivola ni iTukutuku ni Matavuvale na iTovo Vakavanua ni Veiyasai Vuravura
A tali e dua na iukuuku ni Kirisimasi vaka-Scandinavia ka lagati na ivakadewa vaka-Sikote ni “Auld Lang Syne,” oqori e rua ga vei ira na itavi qaravi ni Tiseba ena Valenivola ni iTukutuku ni Matavuvale e Salt Lake City. Era a vulica o ira era tiko rawa ena kalasi ni yakavibogi sega ni saumi ka a vakayacori mai na ika 28 ni Noveba ki na 22 ni Tiseba me baleta na itovo vakavanua ni gauna ni vakacagicagi ena veimatanitu duidui eso kei na veimatatamata.
E vuqa na kalasi leleka oqori era a tuvalaka ka vakavulica na itaukei ni veivanua duidui era dau veivosakitaka na iulutaga eso me vaka na marau ni vula o Tiseba, na kakana, na iukuuku, kei na ivakatagi. A dolavi raraba na veikalasi eso oqori, ka vakarautaki talega na itavi qaravi vakamatavuvale eso.
Era a vakayaloqaqataki na matavuvale me ra cakava e dua na ivola ni kawa ka rauti ira na gone. Era a kerei na gone me ra droinitaki ira, nodra itubutubu, kei ira na tubudra ena ivolakabi. Era a yadua kece na loli, kei ira na matavuvale era rawata me ra vakacavara e dua na ivolakabi ni va na itabatamata era a yadua na peni ka volai kina na vosa “E ka taleitaki na itukutuku ni matavuvale” (“Family history is fun”).
E vakarautaki tu vei ira na veimatavuvale me ra kauta ki nodra veivale na ituvatuva ni vakasama me baleta na lotu vakamatavuvale kei na itukutuku ni matavuvale. E dua na pepa e vakamacalataki kina na sala e rawa kina me ra vakatarogi ira na tubunigone o ira na gone kei ira na itubutubu.
O ira na veimatanitu era vakaraitaki e okati kina ko Nowei, Varanise, Jamani, Sikoteladi, Netherlands, na Czech Republic, Suwiteni, kei Denmark. Era a veivosakitaka talega na itovo vaka-Jiu kei na itovo makawa tale eso.
E kaya kina ko Diane Loosle, na manidia ni veiqaravi vei ira na se qai tekivu, ni oqo na imatai ni gauna me cicivaka kina na valenivola e dua na mataqali soqo vakaoqo.
E vakamacalataka kina ko Sisita Loosle ni inaki ni veiitavi qaravi oqori me kauti ira mai na tamata era sega ni dau lako yani ki na Valenivola ni iTukutuku ni Matavuvale. E kaya kina vakaoqo: “E dua na takete ni valenivola sai koya me rawa ni gauna vinaka cake na gauna ni lako mai ki na valenivola. Eda vinakata me ra lako mai na tamata ka kunea ni sega soti ni dredre sara me vaka na nodra nanuma.”
Na Valenivola Levu ni iTukutuku ni Matavuvale ni Lotu e valenivola levu duadua ena kena mataqali oqo, e dolavi raraba tu ka sega ni saumi. E cakacakataki ni rauta ni 1,900 na petereni era dau sikova na valenivola oqo ena veisiga kece e dola kina.
E soli tu kina na kalasi sega ni saumi vei ira e duidui na nodra kila, ka okati kina o ira era se qai lako sara ga vakadua, ka ra sa tu vakarau me ra veivuke o ira na 125 na kena vakailesilesi vakacakacaka ena gauna taucoko kei ira era cakacaka vagauna. E voleka ni 400 na bole era solia wale na nodra gauna era tuberi me ra veivuke talega. Me baleta na kena itukutuku tale eso, sikova na www.familysearch.org.