Na iVakaraitaki ni Dua na Tamata

Mai vei Elder Bruce C. Hafen

Ena Vitusagavulu

E dua na itukutuku ni i-meli e a kauta mai vei au na rarawa: “Na Veibulu Vei Wendy Knaupp.” Niu sa qusia na wainimataqu, au nanuma lesu e dua na siga ena 40 na yabaki sa oti ena noqu a sotavi rau o Wendy kei Paul Knaupp vata kei noqu itokani volekata na sitoa ni senikau ena siteseni ni sitimanivanua. Oqo e dua na veiwatini gone mai Amerika ka rau vakailesilesi tiko vakamataivalu e Jamani, erau yawa sara mai na nodrau vanua, ka rau sa nanamaki tiko ki na sucu ni luvedrau ulumatua. Me baleta ga ni sa dau tukuna vei keimami o peresitedi ni kaulotu ni “gauna yadua sa gauna ni kaulotu,” keirau sa laki vosa sara vei rau.

Ni keirau sa vakavulica vei rau na lesoni ni kaulotu, au a kurabui sara ena rarama ni yaloi Wendy. E a mamarau ka kilaka ka qaqaco sara vakayalo. Sa vakila sara vakaidina o koya na ibalebale ni Vakalesuimai. Sa dua na madigi talei me u raica sara ga na kena sa tubucake tiko na nona ivakadinadina ka sa vakararamataki cake na nona bula.

Ni oti e tolusagavulu na yabaki, a nanuma lesu o Wendy na imatai ni neitou sota: “Au na daunanuma tikoga na imatai ni gauna au a rogoca kina na italanoa kei Josefa Simici! Au rawa ni raitayaloyalotaka na neitou tabavale lailai e cake mai Jamani ka vaka toka beka ga na levu ni neitou rumu ni moce edaidai, ka keirau a dabe toka vakaveiwatini ena loga ka idabedabe talega ka [tadravi rau toka yani na daukaulotu]. E a kurabui ka vakacegu na yaloqu. Au dau vakasamataka tiko ni dua na itukutuku vakaoqo ena rairai tu dina e vuravura. Ena sega ni vakaibalebale me na biuti keda na Kalou me da vakayayamo buto tiko me vaka eda sa cakava tiko mai oqo… . Sa vaka e ka dina kau sa vakabauta vakakina.”

Ni oti ga na nodrau sa vakadonuya me rau sa papitaiso, ia, e rau a rogoca kina o Wendy kei Paul mai na dua na lewe ni nodratou matavuvale ka a vosa vakacacataka na ivakavuvuli ni Lotu me baleta na soli ni matabete. Erau a mai veilecayaki ka yalolailai. Erau a qai kaya me keirau kakua tale ni lesu yani—vakavo ga ena veivakamocetaki o ya. Keirau sa sega ni kila me keirau sauma vakacava na nodrau taro ia keirau kila ni se vo tiko e dua na iotioti ni neirau madigi. Ni keitou sa veivosaki au sa vakauqeti meu wilika vei rau e dua na ivolanikalou au a raica ena noqu ivola ni vuli, na kedrau italanoa o Pita kei Konilio ena Cakacaka 10–11. Ena bogi o ya au a raica kina na kena sa yaco na yalayala ni Turaga vei ira na daukaulotu: “Raica ena soli vei kemudrau ena gauna ko ya, io ena tiki ni siga koya na ka mo drau vosataka … [ena ] cakacaka yaco na Yalo Tabu me vakadinadinataka na veika kece drau sa vosataka” (V&V 100:6, 8). Keitou a vakila taucoko na yalo ni vakacegu ni keitou sa masu.

Ni oti e vica na yabaki a kaya vakaoqo o Wendy ena vuku ni siga o ya: “Au sa sega ni nanuma tale na veika erau a tukuna vei keirau se na veika keitou a veivosakitaka, ia na rarama o ya … na Yalotabu … e a sobuti au tale kau sa kila kina ni sa ka dina, ia e dina niu sega ni kila vakavinaka na veika kece o ya, sa ka dina tikoga na itukutuku ka sa gadrevi me keirau na ciqoma, ia na veika oqori ena yaco ga mai na gauna me keirau kila kina vakavinaka.”

Erau a qai papitaiso o Paul kei Wendy. E vakalailai ga erau sa vauci vata ena valetabu. Ena loma ni dredre ni bula vakamatavuvale, erau a susuga cake kina e lima na gone ka ratou yaco sara me ratou lewe ni Lotu gugumatua. E vica a laki kaulotu. E a qasenivuli o Paul. Erau daulagasere totoka taurua ena soqoni ni Lotu o Paul kei Wendy. E a liutaka o Wendy me vica na yabaki na matasere ni nodratou tabanalevu. Erau taleitaka sara na valetabu ka rau sa qai kila ga kina vakairau “na nodra reki na yalododonu” (Inosi 1:3).

Ena dua na gauna au a lotu tiko kina mai Lodoni, keirau a sotava kei Marie na watiqu, e dua na marama na yacana o Libby Casas mai Maine. Me baleta ga ni tamata ga keirau kila e Maine sa iratou na Knaupps, keirau a tarogi koya ke kilai iratou. E a ramase mai na matana: “Kilai iratou? E noqu itau vinaka o Wendy. E a vakatakilaitaka vei au na kosipeli!” E a sotavi Libby o Wendy ena dua na Valenisavaisulu—oqo e rua na marama erau mai savata na isulu ni matavuvale—ka sa mai wasei na kosipeli vei Libby me vaka na kena keirau a cakava vei Wendy ena siteseni ni sitimanivanua. Na veivakauqeti taumada a yaco vei Libby me baleta na Lotu sai koya na kaukauwa ni ivakaraitaki nei Wendy—me vaka ni sa tina, yalewa vakawati, ka dua na tamata. Me baleti Libby, mai na kena itekivu mada ga, sa vakatakarakarataka vakataki koya o Wendy na itukutuku ni Veivakalesuimai.

Eratou a qai mai vakaitikotiko e muri na Knaupps e Oregon. Ia ena yabaki sa oti, ni keitou sa mai rogoca ni sa tauvi kenisa o Wendy, keirau a kalougata ni keirau a raici iratou rawa mai Utah ena gauna ni koniferedi raraba. Keitou a qai masulaki Wendy oi au, na turaga watina, kei na luvedrau tagane sa kaulotu oti. Keirau a wasea na veika keirau a sotava ena vasagavulu na yabaki sa oti. Sa matata vakasigalevu ni sa nodrau iyau sara ga na kosipeli. Sai koya o ya na iusutu ka inaki ni nodrau bula kei na nodratou bula na gone. Erau sa vinakata sara ga vakaukauwa o Paul kei Wendy me tu vinaka na nodrau bula vakayago me rawa kina ni yaco na nodrau inaki me rau laki veiqaravi vakaulotu vakaveiwatini.

Ni bera na nona mate, a volavola mai vei au o Wendy, “Au sa vakila tu oqo na ligana na Turaga. Sa na lewa ga o Koya na ka me na cakava, kau sa tu oqo ena Nona loloma.” Sa qai vakavinavinakataka o koya na kosipeli kei na nona matavuvale, ka qai vola vakaoqo, “Sa totoka la na Turaga se vavei!”

Ia sa mai yali oqo o Wendy, ka ratou sa daunanumi koya vakalevu o iratou na nona matavuvale. Ni sa volavola mai o luvena tagane me baleta na nona mate, a kaya kina, “Vinaka vakalevu na kauti tinaqu ki na rarama ni kosipeli. E a bula voli ena talairawarawa ki na ivakaro.” E a kaya ni dua na gauna a volavola vua o tinana, “Au lomana dina na Turaga kau sa vakavinavinaka tawamudu [ki Vua] ena kena kau mai ki na noqu bula na kosipeli cecere duadua oqo. Au vinakata me sa noqu iyau levu ga meu vakaraitaka na noqu yalodina kau sa saga sara tikoga vakaukauwa meu vakayacora.”

Me baleta ga ni sa nona iyau dina sara ga o Wendy kei na nona matavuvale na kosipeli, kivei keimami na nodrau daukaulotu keimami sa kila vakavinaka ni “sa na vuabale sara na nomudrau marau” (V&V 18:15) vata kei koya ena matanitu nei Tamada. Sa nona iyau ga na kosipeli, o koya gona ni noqu kaulotu vua sa noqu iyau ga. Sa rauta me kaya kina na Turaga ni noda cakava na cakacaka ni kaulotu ni “sa nomu itavi bibi” (V&V 15:6; vakamatatataki).

E a kaya o Peresitedi Gordon B. Hinckley: “Au sa vakamasuti ira na Yalododonu mo ni vakayacora na nomuni igu taucoko ko ni rawata mo ni kauti ira mai na sega ni lewenilotu kivei [ira na daukaulotu] me ra vakavulici ira… . Na tamata yadua ko ni raica sa mai Lotu ena vuku ni nomuni cakacaka ko na kune marau kina ena nomuni bula. Sa noqu iyalayala oqo vei kemuni yadua” (“Inspirational Thoughts,” Liaona, Okot. 2003, 3).

E sa yaco dina ena noqu bula na veika e yalataki tu kina. Au sa kerea vakakina vei kemuni mo ni kauta mai ki na Lotu e dua na tamata ena yabaki oqo—ka kakua ni yalolailai ni sotavi na veisaqasaqa ena yaco mai. Kevaka mo kakavaka me kakua ni cawadru mai vei iko na madigi vakaoqo, ko na qai vakataki Wendy Knaupp, “Sa totoka la na Turaga se vavei!”