Na Serekali
Niu se gone lailai, au a kunea e dua na serekali ka volai toka ena dua na draunipepa ka tu e gaunisala ka a dresuki laivi mai na dua na tikidua. Au a tubu cake ena itikotiko ni veivakavaletaki kau dau lako duadua tu ga, ia e tiko e tolu na noqu ivakawele: na veivola, na iyaloyalo yavala kei Elvis Presley, kei na serekali. Au dau taleitaka na serekali. E a vosa vakatikina vei au na serekali oqo kau sega ni kila rawa se cava. E sega na vosa meu vakamacalataka rawa kina. Ena noqu via kila na serekali oqo, au a tomika cake ka kauta ki vale
Au a wilika na serekali oqo ena veisiga, e dau vakavica toka ena dua na siga, kei na veiyabaki e tarava. Niu dabe ena kalasi, niu lako ena olo ni bera na kalasi, dabe duadua ena gauna ni vakacagicagi, ena dau voqa tikoga vei au na veitiki eso ni serekali oqo. Au se bera mada ni wiligusutaka vakadua e dua na serekali, ia oqo e duidui sara. E dua na ka e tiko kina e vosa tiko vei au ka tarai au sara vakalevu.
Au dau mai kidava lo tu
Niu vulagi tu eke,
Vakila niu lako mai
Na vanua e vakalou.
Au vakila niu duidui mai vei ira na gone tale eso. Ena so na gauna au vakila ni tiko tale e dua na vuvale ena dua na vanua, kevaka meu na tovolea vagumatua sa rawa meu na kila rawa. E veivakauqeti ki na yalo oqo na serekali oqo. Ena veigauna eso au dau taura cake mai ena noqu drowa ka wilika. Au qai dau vakataroga na levu ni tamata era vakataki au era tu beka e kea ka ra tu e liu e vuravura ka na rawa beka meu na sotava e dua vei ira.
Ena nomuni inaki
Au mai bula tu eke
Ko ni qai latia vei au na veika
Mai liu ko ya.
Mo ni vakasamataka mada na levu ni noqu kurabui ena vica na yabaki ka tarava, niu sa mai dabe toka vaka daunivakadidike ena imatai ni noqu soqoni ni sakaramede, au a dolava na serenilotu ki na draunipepa kau raica kina na serekali au a kunea ena vica na veiyabaki sa oti. E duidui toka na kena ituvatuva au a dau lagata voli e liu niu dau sega ni moce rawa se na gauna au dau yadra vakasauri ka tagi ena bogilevu, ia au kila na rorogo e vakatagitaka mai na piano.
I Tamaqu ni sa tiko
E vanua vakalou,
Gauna cava meu na raica
Na matamuni dokai?
Ni ra sa lagata tiko na sere “I Tamaqu” (Serenilotu, naba 42), au sa dabe toka ga ka tagi, niu sa mai kila ni a vakatikora e lomaqu na Kalou na sere oqo niu a se gonelailai.
Ena bula taumada,
Au a tu vei kemuni?
Niu a gonelailai voli,
Susu e tikimuni?
Niu dabe toka ena soqoni ni sakaramede, ka vakarogoca toka na noqu serekali ni ra sa lagata tiko na ivavakoso, au sa kila niu sa tu oqo ena salatu dina. Au sa kila ni sa dina na veika kece erau a vakatavulica vei au na daukaulotu. Au sa kila kina ni Lotu i Jisu Karisito ni Yalododonu Edaidai sai koya na Lotu dina ni Kalou e vuravura oqo. Ia ena gauna au sa tekiduru kina ka kerea vua na Kalou ke sa dodonu Vua meu na papitaiso ka vakadeitaki ki na Lotu, au a kurabui ni sa vakadonui mai.
Ni oti e tolu na macawa ni veituberi mai vei rau o Elder Walker kei Elder Whittaker, e a qai tabadromuci au ena wai ni papitaiso o Elder Walker. Au a vakasavasavataki, kau sa savasava cake mai na kena au a vakila tu e liu kau sega ni nanuma me na vakaoqo. E a tiko talega na imatai ni noqu bisopi ena kedra maliwa na lewe ni matabete era vakavoliti au meu vakadeitaki vakalotu, o noqu bisopi a ciqoma na noqu qiriti rau yani na daukaulotu me rau mai vakatavulici au.
Au sa rogoca rawa na voqa ni noqu serekali lomani me vaka e dua na ivakatagi talei e vuka voli ka curuma yani na tamata yadua au sotava kei na itavi yadua e kauti au mai ki na Lotu—na vosa e sa tara na yalo sa rarawa ka sa gadreva sara me kila tale na Tamana Tawamudu.
Au vulica i Tamaqu,
Meu kacivi kemuni,
Yalo Tabu sa veivuke
Meu kila na ka eso.