Kathleen H. Hughes
Tauturu matamua i roto i te peresideniraa rahi o te Sotaiete Tauturu
“Ua vehi te Metua i te Ao ra i te mau vahine i te mau horoʻa maitataʻi e te mau paari e te mau ite,” o ta Kathleen H. Hughes ia i parau, o tei pii-apî-hia ei tauturu matamua i roto i te peresideniraa rahi o te Sotaiete Tauturu. “Na roto i Ta’na tauturu, e na roto i te tauturu o te mau tuahine, eita tatou e aʻe.”
Ua parau te Tuahine Hughes e, na roto i te mau parau o te papaʻiraa moʻa, amui-atoa-hia mai e to’na ite e, e tamahine oia na te Atua, o tei taamu e o tei tauturu ia’na i te imiraa i te hau, tae noa’tu i roto i te mau taime hepohepo o to’na oraraa. I te hoê taime, ei hiʻoraa, a aro ai oia i muri mai i te tau o teie faaearaa ohipa rahi o te ao atoa nei, ua tere ori haere oia e ta’na tane i te fare tapeʻaraa no Liberty i Missouri. Ua mataʻitaʻi raua i te mau ohipa i ravehia e Iosepha Semita e ua taiʻo i te heheuraa o ta’na i farii i reira, o tei papaʻihia i roto i te buka Te Mau Parau Haapii e te Mau Parau Fafau i te tufaa 121. Ua naʻo ihora te tuahine Hughes e, mai ta te Fatu i paturu ia Iosepha Semita, ua na reira atoa ïa Oia i te tautururaa ia’u i te faaoromaʻi i to’u mau tamataraa. “I roto i te hoê o taua mau taime ra oe e haamanaʻo ai e—te hoê taime taa ê mau i ite ai au i te Fatu i pihai iho iaʻu i roto i toʻu oraraa e i manaʻo ai au i te mea o ta te mau papaʻiraa moʻa e hopoi mai no te tamahanahana e no te horoʻa mai i te hau,” o ta’na ïa i parau.
Ua fanauhia te Tuahine Hughes i te 19 no atopa 1944 i Tooele, Utah ia William Daly e Emma Johanson Hurst. Ua faaipoipohia oia i te taata papaʻi parau Dean T. Hughes i te 23 no novema 1966 i roto i te hiero no Roto Miti; e toru a raua tamarii e e pae mootua.
Ua roaa ta’na parau tuʻite Tuatoru no te reo peretane i te fare haapiiraa tuarua no Weber State i te matahiti 1966, e ua roaa atoa ia’na te parau aiihi tuatoru no te mau haapiiraa taa ê i te Fare haapiiraa tuatoru no Central Missouri State i te matahiti 1974. Ua haapii oia no na matahiti e rave rahi e ua rave atoa i te ohipa ei vahine faatere no te Provo (Utah) School District mai te matahiti 1985 mai â.
Ua tavini aʻe nei o te Tuahine Hughes ei peresideni no te Feia Apî Tamahine no te paroita. Ua pii-atoa-hia oia i roto i te Sotaiete Tauturu, te Paraimere, e te Haapiiraa Sabati e ua tavini atoa i roto i te apooraa faatere rahi no te Feia Apî Tamahine.
“Te tumu o te Sotaite Tauturu, o te tautururaa ïa i te mau tuahine e to ratou mau utuafare, e na roto i te tautururaa a te autahuʻaraa atoa, ia haere mai i te Mesia,” o ta’na ïa i parau. “Te ite nei au i te hau no niʻa i teie nei piiraa e ua ite au e raveʻa maitai roa teie no te ohiparaa i pihai iho i teie nei mau tuahine o te peresideniraa.”