“Pee mai Iaʻu”
O ratou o tei faaroo, o tei faarue i te upeʻa no te pee i te Faaora, e farii ratou i te oaoa hau atu i ta ratou e manaʻo ra.
E feia ravaai raua na mua aʻe raua a faaroo ai i te piiraa. A tuu ai o Petero e o Anederea i ta raua upea i roto i te miti no Galilea, faaea ihora raua i ta raua ohipa i to Iesu no Nazareta haafatataraa mai, ma te hiʻo atu i to raua na mata e parau ihora ia raua, “A pee mai Iaʻu.” Ua papaʻi o Mataio no teie na taata “Faarue ihora raua i ta raua tau upea i reira ra, e ua pee atura Iaʼna.”
I muri iho haere atura te Tamaiti a te Taata nei i pihai iho i na taata ravaai ‘e o tei nia i te poti e to raua metua, tafai ra i ta raua upeʻa. Pii atura Iesu ia raua, “E o Iakobo e o Ioane, faarue ihora raua i te poti i reira ra e to raua metua, pee atura Iaʼna [te Fatu].”1
Aita anei outou i feruri eaha ra te huru no te oraraa i te mau mahana o te Faaora? Ahiri pai outou tei reira, e faaroo anei outou i Taʼna piiraa: “A pee mai Iaʻu”?
Peneiaʻe paha, e ui tatou mai teie te huru, “Ahiri pai te Faaora e pii mai ia outou i teie mahana, e hinaaro anei outou i te faarue i ta outou upeʻa e ia pee Iaʼna?” Ua ite au e mea rahi te na reira.
Area râ te tahi pae, eita paha i te mea ohie ia rave i tera huru faaotiraa. Ua ite te tahi pae, e ere i te mea ohie ia faarue i te upeʻa.
Ua rau te huru o te faito rarahi o te upeʻa. Te upeʻa a Petero, Anederea, Iakobo e ta Ioane i faarue ei ravea te reira no te imiraa i te faufaa no to ratou oraraa.
Te tahi taime te manaʻo ra tatou e aita teie na taata toomaha e faatusia rahi i to ratou faarueraa i ta ratou upeʻa no te apee i te Faaroa. Ua papai o Elder James E. Talmage i roto i te buka Iesu te Mesia e nau taata taiete imi faufaa ratou. “E fatu poti ratou e ua tihepu ratou i te tahi atu mau taata.” Te na ô ra o Elder Talmage, o Simona raua Petero, “e ua maitai roa ta raua faanahoraa materia i to Petero vaiihoraa i te mau mea atoa no te pee atu ia Iesu, ua ite te Fatu i te tusia rahi a Petero i rave no nia i taʼna mau maitai materia.”2
I muri mai, te tamataraa no te hoê taata apî moni o tei parau e ua haapao oia i te mau faaueraa atoa mai toʼna apîraa mai. i toʼna aniraa i te Faaora eaha atu a te mea o te tiʻa iaʼna ia rave no te farii I te ora mure ore, ua parau atu te Fatu, “Ia hinaaro oe ia maitai roa, a tii a hoo i ta oe atoa ra, a hopoi atu na te taata rii, e e taoʻa ta oe i te ao i reira a haere mai ai e pee mai i aʻu.” I to te taata apî faarooraa i te reira, “haere e atura ma te oto: e taoʻa rahi hoi taʼna.”3
Te faanahoraa no te upeʻa no te haruraa mai ïaa i te tahi mea. Ia feruri poto noa anaʻe, te upeʻa o te hoê ïa mea o te faaatea ia tatou i te aperaa i te pii a Iesu Mesia, te Tamaiti a te Atua Ora.
No tatou nei, te ohipa anei, ta tatou faaanaanataeraa, ta tatou mau faaoaoaraa, e hau roaʼtu ta tatou mau faahemaraa e ta tatou mau hara. Ei haapoto-noa-raa, e nehenehe te hoê upeʻa i te faaatea ia tatou i to tatou Metua Here i te Ao ra e aore ra i Taʼna Ekalesia i faahoʻi-hia-mai.
E horoʻa atu vau i te hoê hiʻoraa. E nehenehe te matini roro uira e riro ei taoʻa titau-roa- hia no te ohipa. Area râ, mai te mea e horoʻa tatou i to tatou taime rahi no te reira, e amu ïa oia i to tatou taime e e vavahi noa ia tatou, e riro roaʼtu mai te hoê mea i mau i roto i te upeʻa.
E rave rahi o tatou teie e mataitai nei i te mau tataʻuraa faaetaetaraa tino, e ua mau roa ia tatou te feia hauti e i taua taime atoa râ te moʻe ra ia tatou i te mau mahana fanauraa, te haapaʻo ore ra i te utuafare, e aore râ aita tatou e horoʻa ra i te taime no te rave i te ohipa tavini o te Mesia ra, i reira e riro atoa ra te tataʻuraa faaetaeta tino ei upeʻa e tapea ra ia tatou.
Mai te mau mahana mai a o Adamu, ua fatahe noa te taata i te hou o toʼna rae, no te amu i taʼna faraoa i te mau mahana atoa. Teie râ ia pau roa anaʻe to tatou taime i roto i te ohipa e aita ia te oraraa varua e haapaʻohia, e nehenehe atoa te ohipa e riro ei upeʻa fifi.
Ua mau te tahi pae i roto i te upeʻa tarahu rahi. E titauraa rahi roa to nia ia ratou, e tuu ratou i to ratou mau taime taatoa e te puai no te pahonoraa i tera mau tarahu. Aita ratou e tiʻama faahou, ua riro ratou ei mau titi no to ratou iho mau hinaaro.
Aita e hope i te faaite atu i te tapura no te mau upeʻa e rave rahi o te tapea na ia tatou eiaha ia pee i te Faaora. Teie nei ra mai te mea te vai nei to tatou hinaaro i te pee Iaʼna, e mea titauhia ia faarue tatou i te mau upeʻa o te ao nei e ia pee Iaʼna.
Aita vau i ite a‘enei i te hoê anotau o te aamu o te fenua nei, i te rahiraa o te mau upe‘a fifi. Ua î noa to tatou oraraa i te mau farereiraa, apooraa, e te mau ohiparaa. E mea ohie roa ia mau i roto i te mau upeʻa e rave rahi o te faaere ia tatou e o te vavahi e tae noaʼtu i te faariʻariʻa ia tatou.
Te tahi mau taime te manaʻo nei tatou e ia rahi anaʻe ta tatou ohipa, ua hau atoa ia to tatou faufaa—e au atura na te “imi faufaa” e faateitei ia tatou. E te mau taeae e te mau tuahine, e nehenehe ta tatou e hamani i te mau tapura ohipa e ia tae i te hopea, aita roaʼtu e faufaahia.
Te rahiraa o te ohipa ta tatou e rave, e ere paha i te mea faufaa roa. E mea tiʻa ia tuu tatou i to tatou feruriraa, to tatou aau, e to tatou varua i roto i te mau mea mure ore—te reira te tanoraa.
A tupu noa te oraraa e haaati nei ia tatou, te faaroo nei tatou i te piiraa “A haere mai i o nei e haere atu i o.” E i roto tera manianiaraa e te mau reo faahema o te haru ra i to tatou taime e to tatou anaanatae, te tiʻa noa maira te hoê i te pae tahatai no te Miti o Galilea ma te pii maru noa mai ia tatou: “A pee mai iaʻu.”
E mea ohie roa ia tatou i te faatopa i to tatou mau oraraa. Te haamanaʻo nei au i tau matahiti i mairi aʻenei tei riro ei tamataraa rahi roa noʻu iho nei. Ua roaahia e hitu ta maua tamarii. Ua tavini mai au ei tauturu i roto i te hoê episekoporaa e i muri mai ua piihia vau ei episekopo no te paroita. Te faatere atoa ra vau i ta maua taiete imiraa faufaa e titauhia ia faaea maoro no te mau hora ohipa i te mahana atoa. Te haamauruuru nei iau i toʻu hoa faaipoipoi matai roa, maoti aʻe hoi oia i nehenehe ai au ia tavini tamau i te Fatu.
Mea rahi roa te ohipa no te hoê taime. No toʻu hinaaro eiaha te utuafare ia faatusiahia, ua faaoti au ia ara oioi i te poʻipoʻi no te rave i taʻu imiraa faufaa, e ia oti oioi, ia ravaʻi toʻu taime ei metua tane e ei tane faaipoipo, e ei melo faaroo no te Ekalesia. E ere i te mea ohie. Te vai ra te tahi mau poʻipoʻi ia pohe te uati faaara e araara noa toʻu mata.
Noaʼtu râ, na roto i te aroha o te Fatu e te tauturu iaʻu ia farii i te puai e te taime no te rave i taʻu mau ohipa atoa. Noaʼtu e mea ohipa rahi, aita ra vau i tatarahapa i toʻu na reiraraa no te faaroo i te pii a te Faaora e ia pee Iaʼna.
A feruri na i ta tatou tarahu Iaʼna ra. O Iesu te tiʻa-faahou-raa e te ora. “O te faaroo mai iaʻu ra, pohe noa oia e ora â ïa.”4 Te vai nei o ratou e feia moni, area ra te imi noa nei a ratou ia rahi roaʼtu ta ratou mau taoʻa no te oraraa tahuti nei. Eaha ia ta ratou e horoʻa no te ora mure ore?
Te vai nei o ratou o te hinaaro e horoʻa i te taatoaraa no te hau. “E haere mai outou iaʻu nei, e te feia atoa i haa rahi e tei teiaha i te hopoia.” Ua haapii te Faaora, “e naʻu outou e faaora.”5 E ere o te hau anaʻe ta te Faaora i fafau i te feia o te haapaʻo i Taʼna mau faaueraa e ia haapaʻo e tae noaʼtu i te hopea, maoti râ te ora mure ore “o te horoʻa hau aʻe te reira i te mau horoʻa atoa a te Atua.”6
No te Faaora, e nehenehe ai tatou ia ora e a muri noaʼtu. Te tahuti ore toʼna auraa eita tatou e pohe. Area ra, te ora mure ore o te oraraa ia e amuri noaʼtu i pihai iho i te feia o ta tatou i here rahi, e vai tatou i roto i te here rahi, e te oaoa, e te hanahana.
Aita e moni no te hoo i te faateiteiraa. Te ora mure o te hoê ia horoʻa no o mai i te Metua i te Ao ra i horoʻa hua noa mai i te taatoaraa o te faaroo i te pii a te Taata no Galilea.
Teie ra, e mea rahi te mau mea i roto i te mau upeʻa e aita ratou e faaroo i te pii. Ua faaite te Faaora, “Area outou, aore ia e faaroo, no te mea e ere outou i t aʻu mamoe….E faaroo mai t aʻu ra mamoe i toʻu reo, ua ite au ia ratou, e e pee mai hoi ratou I aʻu.”7
Nahea taotu i te pee i te Faaora? Na roto i te faaohiparaa i te faaroo. Na roto i te tiʻaturiraa Iaʼna. I te tiʻaturiraa e te paraparau noa mai nei te hoê Atua ora i te taata nei i nia iho i te fenua i teie mahana.
E apee tatou i te Faaora na roto i te tatarahaparaa i ta tatou mau hara, na roto i te aau oto no ratou e ia faaore i ta ratou mau hara.
E apee tatou i te Faaora na roto i te tomoraa i roto i te mau pape no te bapetizoraa e te fariiraa i te faaoreraa o ta tatou mau hara, na roto i te fariiraa i te horoʻa o te Varua Maitai e te vaiihoraa i te reira ia haapii mai, ia aratai e ia tamahanahana mai ia tatou.
Nahea tatou ia apee i te Faaora? Na roto i te faarooraa Iaʼna. Ua horoʻa mai Oia e to tatou Metua Here i te Ao ra i te mau faaueraa ia tatou, eiaha no te faautuʻa e aore ia no te haapeʻapeʻa ia tatou—no te tauturu ra ia ratou ia roaa te iraa o te oaoa, i roto i teie nei oraraa e i roto i te oraraa e amuri noaʼtu e haere mai nei te mau ao e aita e hopea.
Area i te tahi aʻe pae, ia topa tatou i roto i ta tatou mau hara, ta tatou mau faaoaoaraa, e te tahi mau taime i roto i te mau faaheporaa, ia ore ia farii i te muhumuhuraa a te Varua Maitai; e ia tuu i te hiti i te mau parau a te mau peropheta, i reira ra te tiʻa ra tatou i te hiti o to tatou iho Galilea, mai te mau i roto i te upeʻa. Eita tatou e vaiiho i te reira mau mea i muri e ia apee i te Mesia Ora.
Area ra, te pii mai na te tiʻai Mamoe ia tatou tataitahi i teie nei mahana. E ite tatou i te reo o te Tamaiti a te Atua? E apee anei tatou Iaʼna?
E parau atu vau i te hoê parau faaara. Te vai nei o ratou o te manaʻo nei e mai te mea e apee tatou i te Faaora, e aita ia to tatou e fifi faahou, mauiui e te taia. Aita ia i tano. Te Fatu iho tei faaitehia ei taata no te mauiui.8 Tera mau pipi matamua i apee i te Mesia, ua farii ratou i te mau hamani-ino-raa e te mau tamataraa. Oia atoa o Iosepha Semita, e tae noaʼtu i te Feia Moʻa i mua mai, i teie tau hopea nei. Aita hoi e taa e atu i teie mahana.
Ua paraparau vau i te hoê vahine o tei faaroo i te pii a te Faaora i te 18 raa o toʼna matahiti. E taata tiʻaraa teitei to toʼna metua tane i roto i te tahi atu ekalesia, ua riri oia iaʼna e ua opani iaʼna eiaha ia bapetizo. E ua faaite oia iaʼna mai te peu e riro mai oia ei melo no Te Ekalesia a Iesu Mesia i te Feia Moʻa i te Mau Mahana Hopea Nei, e tiʻavaru ia oia iaʼna i rapae i te utuafare.
Noaʼtu e faatusiaraa rahi roa te reira, ua farii te tamahine i te pii a te Faaora e ua tomo i roto i te mau pape no te bapetizoraa.
Aita toʼna metua i farii i tera faaotiraa taʼna, e ua tamata i te faahepo ia faaroo oia i tera faaroo apî. O oia e taʼna vahine tei patoʻi iaʼna no taʼna faaotiraa ia riro mai ei melo no Te Ekalesia a Iesu Mesia i te Feia Moʻa i te Mau Mahana Hopea Nei e ia faarue oia i taʼna faaroo apî.
Noaʼtu te faahepo, te riri, e te au ore, ua vai puai noa toʼna faaroo. Ua faaoromaʻi oia i te mau parau teimaha, inaha ua ite oia e ua faaroo oia i te pii a te Faaora e ia apee oia Iaʼna noaʼtu eaha te huru o te ohipa e tupu mai.
Ua nehenehe i teie tamahine i te faarii i te hoê vahi no te hau, te hoê vahi e paruru iaʼna i roto i te hoê melo no te hoê utuafare maitai e aita te faaheporaa a toʼna metua e tae i nia iho iaʼna.
Ua farerei oia i te hoê tamaiti e ua faaipoipohia raua i roto i te hiero, ma te fariiraa i te mau haamaitairaa o te roaa mai roto mai i te hoê faaipoiporaa hiero.
I teie mahana t e tiʻa nei oia i rotopu i te feia o tei faatusia rahi no te apee i te pii a te Faaora.
Oia mau, aita vau e parau atu nei e mea ohie te haereʻa. Teie ra te horoʻaʼtu nei au i toʻu iteraa papu e o ratou o tei faaroo, o tei faarue i te upeʻa no te pee i te Faaora, e farii ratou i te oaoa hau atu i ta ratou e manaʻo ra.
A farerei ai au i te mau melo no teie Ekalesia—te feia apî e te feia paari—ua i au i te itoito e te mauruuru no to ratou faaroo o tei faaroo i te pii a te Faaora e o tei apee Iaʼna.
Te hoê hiʻoraa, te hoê taata o te apee i te Faaora i te mau mahana atoa, hau atu i te toru ahuru matahiti, ua tatara mai oia i taʼna mau papairaa moʻa no te taiʻo i te hora tamaaraa i te avatea e a faaoo ai toʼna mau hoa rave ohipa iaʼna. Te hoê vahine ivi, e 70 matahiti i nia i toʼna pereoo turaʻi raʻi o te parau i te taata atoa o te farerei iaʼna i toʼna oaoa no te faaitoito ia ratou i te maitai, ia apee i te Faaora. Te hoê tamarii o tei ani na roto i te prue ia paraparau i te Fatu o te ao nei, ma te apee ie Faaora. Te mero moni o te horoʻa nei na te Ekalesia e toʼna mau taata tupu, te apee ra ia i te Faaora.
I to Iesu te Mesia tiʻaraa i te tahatai o te Miti no Galilea, e 2000 matahiti i mairi aʻenei, oia atoa i teie mahana, te tiʻa nei Oia ma te pii mai Taʼna i horoʻa i ter amau taata ravaai tei i I te faaroo e i teie nei te pii nei Oia ia ratou o te faaroo i toʼna reo, “A Pee mai I aʻu!”
Te vai nei ta tatou mau upeʻa te titauhia ia faatarere e te mau upeʻa ia tafaifai. Teie ra ia pii mai te Fatu no te moana, no te fenua, e no te raʻi ia tatou, “A pee mai i aʻu,” mea titauhia ia faarue tatou i te mau upeʻa o te ao nei e ia pee i toʼna haerea.
E toʻu mau taeae e te mau tuahine here, te faaite nei au na roto i te reo oaoa e ua faahoʻihia mai te evanelia! Ua iriti te Peropheta Iosepha Semita i te uputa o te mau raʻi e ua ite e ua paraparau Oia i te Atua, te Metua, e te Tamaiti o Iesu Mesia. i raro aʻe i te faatereraa hanahana e te horoaraa no o mai i te feia no te ao tiretiera, i faahoʻihia mai ai te mau parau mure ore i teie nei a i te taata nei.
I to tatou nei mahana, te ora nei te hoê peropheta rahi o te faaite noa mai nei ia tatou i te mau mahana atoa i tera mau parau mau. Te tiʻa nei te Peresideni Gordon B. Hinckley i nia i toʼna tiʻaraa moʻa ei auvaha no te Atua Mure Ore i pihai iho iaʼna toʼna na tauturu maitai roa e te Pupu no te Tino Ahuru ma Piti Aposetolo e te mau Pŭpŭ no te Hitu Ahuru e te mau mirioni melo o tei tauturu iaʼna, o ratou tataitahi te parau nei i te parau apî hanahana e te oaoa, ua faahoʻi-faahou-hia mai te evanelia mure ore i te taata nei!
O Iesu te Mesia te “eʻa, e te parau mau, e te ora, e aore roa te taata e tae i te Metua ra, maori ra [Iaʼna ra].”9 Ei toʻu tiʻaraa ite taa e Noʼna ra, te faaite papu ne au i teie mahana e te vai ra te taime e hiʻo atu te mau taata atoa, te vahine, e te tamarii i roto i te mata here o te Faaora. I taua mahana ra, e ite papu roa tatou i te tanoraa mau o ta tatou faaotiraa no te peeraa Iaʼna.
Ia faaroo tatou paatoa i te pii a te Fatu e ia faarue tatou i te mau upeʻa fifi e ia apee Iaʼna ma te oaoa o taʻu ia pure na roto i te Iʻoa o Iesu Mesia, amene.