ប្រទេសកម្ពុជា ៖ កាលប្រវត្តិរបស់សាសនាចក្រ

ទសវត្សរ៍ឆ្នាំ ១៩៦០–១៩៧០ • ប្រទេសកម្ពុជាគ្រួសារជនបរទេសនៃពួកបរិសុទ្ធថ្ងៃចុងក្រោយមួយចំនួនក្នុងប្រទេសកម្ពុជាបានធ្វើកម្មវិធីនានាម្តងម្កាល ។

ទសវត្សរ៍ឆ្នាំ ១៩៧៥–១៩៨០ • ប្រទេសកម្ពុជាពួកខ្មែរក្រហមបានដណ្ដើមយកទីក្រុងភ្នំពេញ ហើយបានគ្រប់គ្រងប្រទេសកម្ពុជា ។ ប្រជាជនប្រមាណជាពីរលាននាក់ត្រូវបានសម្លាប់ ឬស្លាប់ដោយសារភាពអត់ឃ្លាន ហើយមនុស្សរាប់រយពាន់នាក់បានរត់ភៀសខ្លួនជាជនភៀសខ្លួនទៅប្រទេសថៃ សហរដ្ឋអាមេរិក និងកន្លែងផ្សេងទៀត ។

ខែ សីហា ឆ្នាំ ១៩៨២ • ទីក្រុង សលត៍ លេក រដ្ឋយូថាហ៍ សហរដ្ឋអាមេរិកជម្រើសនានានៃព្រះគម្ពីរមរមនត្រូវបានបោះពុម្ពផ្សាយជាភាសាខ្មែរដើម្បីបំពេញតម្រូវការរបស់អ្នកប្រែចិត្តជឿជាជនជាតិខ្មែរនៅសហរដ្ឋអាមេរិក ។

ថ្ងៃទី ២៦ ខែ កុម្ភៈ ឆ្នាំ ១៩៩៤ • ប្រទេសកម្ពុជាសាសនាចក្រទទួលបានការទទួលស្គាល់ជាផ្លូវការពីរដ្ឋាភិបាលនៅប្រទេសកម្ពុជា ។

ថ្ងៃទី ២៧ ខែ មីនា ឆ្នាំ ១៩៩៤ • ទីក្រុងភ្នំពេញ ប្រទេសកម្ពុជាការប្រជុំជាផ្លូវការលើកទី ១ របស់សាសនាចក្រនៅប្រទេសកម្ពុជាបានធ្វើឡើងនៅឯសណ្ឋាគារហាវៃ ដែលមានអ្នកចូលរួមចំនួន ១៥ នាក់ ។

ថ្ងៃទី ៩ ខែ ឧសភា ឆ្នាំ ១៩៩៤ • ទីក្រុងភ្នំពេញលោកស្រី ម៉ៅ ផល ដែលជាអ្នកប្រែចិត្តជឿដំបូងគេ បានទទួលបុណ្យជ្រមុជទឹក ។

ថ្ងៃទី ១៩ ខែ កញ្ញា ឆ្នាំ ១៩៩៤ • ទីក្រុងភ្នំពេញសាខានៅទីក្រុងភ្នំពេញត្រូវបានរៀបចំឡើង លោក អូយ៉ា ស៊ិចជីយូគី ដែលជាសមាជិកជនជាតិជប៉ុនគឺជាប្រធានសាខា ។ មានសមាជិកជាជនជាតិខ្មែរ និងវៀតណាមប្រមាណ ៦០ នាក់ ។

ខែ កុម្ភៈ ឆ្នាំ ១៩៩៥ • ប្រទេសកម្ពុជាពួកអ្នកផ្សព្វផ្សាយសាសនារៀមច្បងបានចាប់ផ្ដើមបង្រៀនថ្នាក់សិក្ខាសាលា ថ្នាក់វិទ្យាស្ថាន និងថ្នាក់រៀនភាសាអង់គ្លេសនៅទីក្រុងភ្នំពេញ ។ ពួកគាត់ក៏បានធ្វើការជាមួយសាកលវិទ្យាល័យភូមិន្ទកសិកម្ម ដើម្បីបង្រៀនថ្នាក់វិទ្យាសាស្រ្តកសិកម្ម និងបង្កើតរោងម៉ាស៊ីនកិនស្រូវគំរូ និងរោងចក្រធ្វើគ្រឿងកំប៉ុងគំរូ ។

ខែ មករា ឆ្នាំ ១៩៩៥ • ខេត្តស្វាយរៀង ប្រទេសកម្ពុជាពួកអ្នកផ្សព្វផ្សាយសាសនា និងសមាជិកក្នុងមូលដ្ឋានបានធ្វើការជាមួយគ្នាដើម្បីបរិច្ចាគអង្ករចំនួន ១០ តោន ព្រមទាំងសម្លៀកបំពាក់ជជុសដល់ក្រុមគ្រួសារនៅភូមិតាមជនបទដែលទទួលរងគ្រោះរាំងស្ងួត ។

ខែ មីនា ឆ្នាំ១៩៩៦ • ទីក្រុងភ្នំពេញលោក អ៊ុំ បូរិន បានធ្វើជាប្រធានសាខាដំបូងគេនៅក្នុងមូលដ្ឋាន ។

ថ្ងៃទី ២៨–២៩ ខែ ឧសភា ឆ្នាំ ១៩៩៦ • ទីក្រុងភ្នំពេញពួកបរិសុទ្ធថ្ងៃចុងក្រោយជាង ៤០០ នាក់បានប្រមូលផ្ដុំគ្នាដើម្បីជួបប្រជុំជាមួយប្រធានសាសនាចក្រ ប្រធាន ហ្គរដុន ប៊ី ហ៊ិងគ្លី ដែលលោកធ្វើការអធិស្ឋានឧទ្ទិសដល់ដែនដីនេះ ។

ថ្ងៃទី ៣០ ខែ មេសា ឆ្នាំ ១៩៩៧ • ប្រទេសកម្ពុជាបងប្រុស ស៊ុយ ឆៃលាង ជាអ្នកផ្សព្វផ្សាយសាសនាពេញម៉ោងដំបូងគេមកពីប្រទេសកម្ពុជា ត្រូវបានហៅឲ្យបម្រើនៅបេសកកម្មប៉ូកាតេឡូ អៃដាហូ ។

ខែ កក្កដា–ខែ សីហា ឆ្នាំ ១៩៩៧ • ប្រទេសកម្ពុជា និងប្រទេសថៃអំពើហិង្សាផ្នែកនយោបាយនៅទីក្រុងភ្នំពេញនាំឲ្យមានការជម្លៀសពួកអ្នកផ្សព្វផ្សាយសាសនាទៅប្រទេសថៃជាបណ្ដោះអាសន្ន ។ សមាជិកក្នុងមូលដ្ឋានបានបន្តធ្វើកម្មវិធីប្រជុំ ។

ថ្ងៃទី ២២ ខែ កក្កដា ឆ្នាំ ១៩៩៨ • ទីក្រុងភ្នំពេញបងស្រី រ័ត្ន ធានី ជាអ្នកផ្សព្វផ្សាយសាសនាជាស៊ីស្ទើរដំបូងគេមកពីប្រទេសកម្ពុជា ត្រូវបានញែកចេញ និងចាកចេញទៅបម្រើបេសកកម្មនៅសាក្រាម៉ង់តូ កាលីហ្វ័រញ៉ា ។

ឆ្នាំ ១៩៩៩ • ប្រទេសកម្ពុជាទូ អាញ់ គឺជាអ្នកផ្សព្វផ្សាយសាសនាជនជាតិវៀតណាមជាស៊ីស្ទើរដំបូងគេមកពីប្រទេសកម្ពុជា ។ គាត់បានបម្រើនៅមណ្ឌលភាសាវៀតណាមនៃទីក្រុងវ៉ាស៊ីនតោន ឌីស៊ី ។

ថ្ងៃទី ១៩ ខែ កញ្ញា ឆ្នាំ ១៩៩៩ • ទីក្រុងភ្នំពេញអ្នកតំណាងសាសនាចក្របានចូលគាល់ព្រះករុណា ព្រះបាទសម្ដេច ព្រះនរោត្ដម សីហនុ និងព្រះមហាក្សត្រី នរោត្តម មុនីនាថ សីហនុ នៅព្រះបរមរាជវាំង ។

ខែ កុម្ភៈ ខែ មេសា ឆ្នាំ ២០០០ • ក្រុងតាខ្មៅ និងខេត្តកំពង់ចាម ប្រទេសកម្ពុជាសាខាទាំងឡាយបានរៀបចំឡើងនៅក្រុងតាខ្មៅ និងខេត្តកំពង់ចាមដែលជាអង្គភាពដំបូងដែលនៅក្រៅទីក្រុងភ្នំពេញ ។

ថ្ងៃទី ៣ ខែ មេសា ឆ្នាំ ២០០០ • ទីក្រុងភ្នំពេញលោក ប៉ែន វិបុល បានធ្វើជាប្រធានមណ្ឌលដំបូងគេ ដោយបានបម្រើនៅក្នុងមណ្ឌលភ្នំពេញខាងជើង ។

ខែ មិថុនា ឆ្នាំ ២០០០ • ប្រទេសកម្ពុជានៅពេលដែលសាសនាចក្របានរីកចម្រើន ហើយសមាជិកថ្មីជាច្រើនត្រូវបានហៅឲ្យបម្រើក្នុងតំណែងជាអ្នកដឹកនាំក្នុងសាខា គូស្វាមីភរិយាជាអ្នកផ្សព្វផ្សាយសាសនារៀមច្បងបួននាក់ត្រូវបានហៅឲ្យជួយដល់ថ្នាក់ដឹកនាំសាខាក្នុងមូលដ្ឋាន ។

ខែ វិច្ឆិកា ឆ្នាំ ២០០១ • ទីក្រុងសលត៍ លេកព្រះគម្ពីរមរមនត្រូវបានបោះពុម្ពជាភាសាខ្មែរ ។

ថ្ងៃទី ៦ ខែ ឧសភា ឆ្នាំ ២០០២ • ប្រទេសកម្ពុជាលោកស្រី បាបារ៉ា និងលោក ចន ភី ខូលតុន ដែលជាអធិបតីលើបេសកកម្មភ្នំពេញ កម្ពុជា បានចូលគាល់ព្រះករុណា ព្រះបាទសម្តេច ព្រះនរោត្តម សីហនុ និងសម្តេចព្រះមហាក្សត្រី នរោត្តម មុនីនាថ សីហនុ ។

ថ្ងៃទី ១៦ ខែ វិច្ឆិកា ឆ្នាំ ២០០២ • ប្រទេសកម្ពុជាមណ្ឌលសម្រាប់សមាជិកនិយាយភាសាវៀតណាមនៅក្នុងប្រទេសកម្ពុជាត្រូវបានរៀបចំឡើង ដោយគ្របដណ្ដប់ប្រទេសទាំងមូល ។

ថ្ងៃទី ២១ ខែ សីហា ឆ្នាំ ២០០៣ • ប្រទេសកម្ពុជាស៊ីស្ទើរជាជនជាតិខ្មែរបីនាក់ ដែលមាន សួន សុខុម, សួន ចាន់ ម៉ូលីស និងស៊ាន សុដាលីស និងស៊ីស្ទើរជនជាតិអាមេរិកកាំងចំនួនបីរូបគឺជាពួកអ្នកផ្សព្វផ្សាយសាសនាស្រីដំបូងដែលបានហៅបម្រើនៅបេសកកម្មភ្នំពេញ កម្ពុជា ។

ថ្ងៃទី ២៥ ខែ មករា ឆ្នាំ ២០០៤ • ទីក្រុងភ្នំពេញមណ្ឌលភ្នំពេញខាងត្បូង ដែលសាងសង់ឡើងដោយស្ថាបត្យកម្មខ្មែរ ត្រូវបានឧទ្ទិសឆ្លង ។

ខែ កក្កដា ឆ្នាំ ២០០៧ • ទីក្រុង សលត៍ លេកការបកប្រែនៃព្រះគម្ពីរគោលលទ្ធិ និងសេចក្តីសញ្ញា និងព្រះគម្ពីរមុក្ដាដ៏មានតម្លៃមហិមាត្រូវបានបោះពុម្ព ។ បណ្ដុំព្រះគម្ពីរទាំងបីត្រូវបានចេញផ្សាយ រួមទាំងសេចក្តីណែនាំដល់បទគម្ពីរទាំងឡាយ ផែនទី និងរូបថតនានា ។

ឆ្នាំ ២០០៨ • ទីក្រុងភ្នំពេញក្រសួងធម្មការ និងសាសនាបានស្នើសុំជំនួយពីសាសនាចក្រក្នុងការធ្វើជាម្ចាស់ផ្ទះ នៃសន្និសីទអន្តរជំនឿថ្នាក់ជាតិ និងព្រឹត្តិការណ៍ស្រដៀងគ្នានេះសម្រាប់អ្នកតំណាងសាសនាមកពីបណ្តាប្រទេសអាស៊ាន ។ សាសនាចក្របានបរិច្ចាគឧបករណ៍សោតទស្សន៍ ហើយពួកអ្នកផ្សព្វផ្សាយសាសនាបានផ្តល់ការគាំទ្រផ្នែកបច្ចេកទេស និងការរៀបចំ រួមជាមួយនឹងការបកប្រែភាសាជាភាសាខ្មែរ និងវៀតណាម ។

ឆ្នាំ ២០១១ • ទីក្រុងភ្នំពេញសមាជិកសាសនាចក្រមកពីមណ្ឌលខាងជើង ខាងត្បូង និងកណ្តាល បានស្ម័គ្រចិត្តសម្អាតផ្លូវនៅទីក្រុងភ្នំពេញ បន្ទាប់ពីពិធីបុណ្យអុំទូកបានបញ្ចប់ ។

ថ្ងៃទី ២០ ខែ ឧសភា ឆ្នាំ ២០១២ • ទីក្រុងភ្នំពេញពួកបរិសុទ្ធខ្មែរជាង ១,០០០ នាក់ បានចូលរួមក្នុងការប្រជុំធម្មនិដ្ឋានជាមួយអែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ ។

ថ្ងៃទី ៩ ខែ ឧសភា ឆ្នាំ ២០១៤ • ប្រទេសកម្ពុជាស្តេកចំនួនពីរដំបូងនៅក្នុងប្រទេសកម្ពុជាត្រូវបានបង្កើតឡើង ៖ ស្តេកភ្នំពេញ កម្ពុជាខាងជើង ដែលមានប្រធាន អ៊េង ប៊ុនហួច ជាប្រធាន និង ស្តេកភ្នំពេញខាងត្បូង ដែលមាន ប្រធាន អ៊ុក សុផល ជាប្រធាន ។

ខែ មិថុនា ឆ្នាំ ២០១៤ • ទីក្រុងភ្នំពេញយុវមជ្ឈិមវ័យនៅលីវចំនួន ៩០ នាក់មកពីសាខាវៀតណាមចំនួនបីក្នុងទីក្រុងភ្នំពេញ និងទីក្រុងនានាក្នុងប្រទេសវៀតណាម ដូចជាទីក្រុងហាន់ណូយ និងហូជីមិញ បានចូលរួមសន្និសីទយុវមជ្ឈិមវ័យនៅលីវវៀតណាមជាលើកដំបូង ដោយមានអាហាររៀបចំ និងបម្រើដោយសមាជិកក្នុងតំបន់ ។

ខែ សីហា ឆ្នាំ ២០១៤ • ទីក្រុងភ្នំពេញពួកបរិសុទ្ធជាង ៣,០០០ នាក់មកពីទូទាំងប្រទេសបានប្រមូលផ្តុំគ្នានៅមហោស្រពកោះពេជ្រដើម្បីប្រារព្ធខួបលើកទី ២០ ឆ្នាំនៃការបង្កើតសាសនាចក្រនៅប្រទេសកម្ពុជា ។

ថ្ងៃទី ១៤ ខែ ធ្នូ ឆ្នាំ ២០១៥ • ទីក្រុងភ្នំពេញអ្នកដឹកនាំសាសនាចក្រចំនួន ២៥ នាក់បានចូលរួមសន្និសីទទូទាំងប្រទេស ដោយការផ្សព្វផ្សាយទស្សនវិស័យសីលធម៌សាសនាសម្រាប់សុខដុមនីយកម្មនៅប្រទេសកម្ពុជា ដែលបានកោះប្រជុំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃប្រទេសកម្ពុជា និងរដ្ឋមន្ត្រីក្រសួងធម្មការ និងសាសនា ឯកឧត្តមបណ្ឌិត មិន ឃិន ។ ប្រធាន អ៊េង ប៊ុនហួច អ្នកនាំពាក្យរបស់សាសនាចក្រនៅកម្ពុជា និងជាប្រធានស្តេកភ្នំពេញ កម្ពុជា ខាងជើង ទទួលបានគ្រឿងឥស្សរិយយសពីរដ្ឋមន្ត្រីឯកឧត្តមបណ្ឌិត មិន ឃិន ។

ខែ មិថុនា ឆ្នាំ ២០១៦ • ទីក្រុង សលត៍ លេក

ការប្រកួតប្រជែងសិល្បៈអន្តរជាតិលើកទី ១០ ដែលប្រារព្ធធ្វើនៅសារមន្ទីរប្រវត្តិសាស្ត្ររបស់សាសនាចក្រ បង្ហាញពីស្នាដៃសិល្បៈរបស់វិចិត្រករខ្មែរ កញ្ញា ញ៉ែម សុភាព ព្រឹកព្រលឹមជាមួយនឹងព្រះអង្គសង្គ្រោះ ដែលបង្ហាញពីកុមារកម្ពុជានៅជុំវិញព្រះយេស៊ូវ ។

ខែ វិច្ឆិកា ឆ្នាំ ២០១៧ • ទីក្រុងភ្នំពេញសមាជិកយុវមជ្ឈិមវ័យនៅលីវជាង ៣០០ នាក់បានជួយសម្អាតសំណង់ទូទៅសម្រាប់មន្ទីរពេទ្យមហារីកស្ត្រីនគរទេព ជាកន្លែងព្យាបាលជំងឺមហារីក ដែលមានឧបករណ៍ព្យាបាលទាន់សម័យ ។ អតីតអភិបាលរងរាជធានីភ្នំពេញ ឯកឧត្តម ត្រាក់ ថៃសៀង និងរដ្ឋមន្ត្រីក្រសួងកិច្ចការនារី លោកជំទាវបណ្ឌិត អ៊ឹង កន្ថាផាវី នៅទីតាំងជាមួយពួកអ្នកស្ម័គ្រចិត្ត ដោយបង្ហាញអំណរគុណ និងការអរគុណផ្ទាល់ខ្លួន ។

ខែ ធ្នូ ឆ្នាំ ២០១៧ • ទីក្រុងភ្នំពេញយុវមជ្ឈិមវ័យជាង ២០០ នាក់បានចូលរួមសិក្ខាសាលានៅក្នុងសន្និសីទស្តីពីភាពខ្លួនទីពឹងខ្លួន ដែលបានបើកសម្ពោធ ដែលធ្វើឡើងនៅក្នុងសណ្ឋាគារហ្គាឌិន ស៊ីធី និងដឹកនាំដោយលោក យី ផាន់ណា ជាអ្នកគ្រប់គ្រងនៃកម្មវិធីខ្លួនទីពឹងខ្លួនរបស់សាសនាចក្រ ។

ថ្ងៃទី ៧ ខែ តុលា ឆ្នាំ ២០១៨ • ទីក្រុងសលត៍ លេក

ការសាងសង់ព្រះវិហារបរិសុទ្ធនៅទីក្រុងភ្នំពេញត្រូវបានប្រកាស ។

ថ្ងៃទី ១៦ ខែ កុម្ភៈ ឆ្នាំ ២០១៩ • ខេត្តបាត់ដំបង នៃប្រទេសកម្ពុជាក្រុមយុវមជ្ឈិមវ័យនៅលីវ និងបុគ្គលិកសាលាចំនួន ៥០ នាក់បានធ្វើការជាមួយគ្នាដើម្បីជួសជុលអគារសាលា រូង ជ្រៃ ។ ពួកគេបានគូរជញ្ជាំង និងធ្វើតុឈើ ។

ថ្ងៃទី ៤ ខែ មករា ឆ្នាំ ២០២០ • ទីក្រុងភ្នំពេញក្រុមដំបូងនៃនិស្សិតសាកលវិទ្យាល័យ ព្រិកហាំ យ៉ង់–PathwayConnect ដែលមាននិស្សិតសរុបចំនួន ២១ នាក់ បានអបអរពិធីទទួលសញ្ញាបត្ររបស់ពួកគេពីកម្មវិធីនេះ ។

ថ្ងៃទី ២០ ខែ មករា ឆ្នាំ ២០២០ • ខេត្តព្រៃវែង ប្រទេសកម្ពុជាមន្ត្រីរដ្ឋាភិបាល បុគ្គលិកមន្ទីរពេទ្យ អ្នកជំងឺ និងសមាជិកសាសនាចក្រក្នុងតំបន់បានប្រារព្ធពិធីបរិច្ចាគម៉ាស៊ីនភ្លើង និងរថយន្តសង្គ្រោះរបស់សាសនាចក្រដល់មន្ទីរពេទ្យបង្អែកពារាំង ។ ពួកអ្នកផ្សព្វផ្សាយសាសនារៀមច្បងនៅផ្នែកកិច្ចខិតខំលើកកម្ពស់សុខភាពកម្ពុជា បានធ្វើការជាច្រើនខែជាមួយមន្ទីរពេទ្យ និងគ្លីនិកក្នុងស្រុកចំនួនប្រាំបួន ដោយបានរៀបចំការបរិច្ចាគគ្រឿងបរិក្ខារពេទ្យ និងការបណ្តុះបណ្តាល ។

ថ្ងៃទី ៨ ខែ មករា ឆ្នាំ ២០២១ • ទីក្រុងភ្នំពេញស៊ីស្ទើរ ថុល ចន្ធី និងប្រធាន នាង គួនណូវាសនា បានក្លាយជាគូស្វាមីខ្មែរដំបូងគេដែលធ្វើជាអធិបតីលើបេសកកម្មភ្នំពេញ កម្ពុជា ។