« នៅពេលខ្ញុំសម្រេចចិត្តអភ័យទោស ខ្ញុំមានអារម្មណ៍ថាមានសេចក្តីសុខសាន្ត »
« តើសំឡេងនោះជាអ្វី ? » លោក ផាន ផុន បានសួរភរិយារបស់គាត់បន្ទាប់ពីឮសំឡេងផ្ទុះដ៏ខ្លាំងកើតឡើងនៅជិតខាងរបស់ពួកគាត់នៅទីក្រុងភ្នំពេញ ។
គាត់បានឆ្លើយថា « ប្រហែលជាអ្នកជិតខាងកំពុងដុតអ្វីមួយហើយ » ។ សំឡេងផ្ទុះទីពីរក៏បន្លឺឡើងភ្លាមៗ ហើយពួកអ្នកជិតខាងបានរត់ទៅប្រាប់លោក ផាន និងភរិយារបស់គាត់ថា ផ្ទះនៅខាងក្រោយពួកគាត់កំពុងតែឆេះ ។
គូស្វាមីភរិយារូបនេះបានរត់ទៅយកទឹក ប៉ុន្តែមិនអាចពន្លត់អគ្គីភ័យនោះបានទេ ។ វាឆាបឆេះយ៉ាងលឿន ហើយមិនយូរប៉ុន្មានផ្ទះរបស់លោក ផាន ក៏ត្រូវភ្លើងឆាបឆេះផងដែរ ។ លោក ផាន អាចគិតពីរឿងតែមួយគត់គឺការសង្គ្រោះចៅបីនាក់របស់គាត់ដែលនៅខាងក្នុងផ្ទះ ។ ផ្សែងបានចាប់ផ្ដើមហុយចេញតាមបង្អួច ពេលលោក ផាន រត់ចូលផ្ទះរកចៅរបស់គាត់ ហើយយកពួកគេចេញមកក្រៅដោយសុវត្ថិភាព ។
នៅពេល លោក ផាន ឈរជាមួយគ្រួសាររបស់គាត់ ហើយមើលផ្ទះរបស់ពួកគេឆេះដល់ដី គាត់មានអារម្មណ៍អស់សង្ឃឹម ។ ថ្ងៃបន្ទាប់ពីភ្លើងឆេះ ពួកគាត់បានលុតជង្គង់ជាគ្រួសារ ហើយបានអធិស្ឋាន ។ លោក ផាន បានមានប្រសាសន៍ថា ៖ « យើងបានទូលសូមឲ្យព្រះអម្ចាស់បង្ហាញផ្លូវពួកយើង ដើម្បីយើងអាចមានផ្ទះថ្មី ។ ខ្ញុំបានយំនៅពេលអធិស្ឋានទៅកាន់ព្រះអម្ចាស់ តែខ្ញុំជឿជាក់ថា ទ្រង់នឹងជួយខ្ញុំ » ។
លោក ផាន បានខឹងនឹងអ្នកជិតខាងដែលបណ្តាលឲ្យភ្លើងឆេះ ។ គាត់ និងពួកអ្នកជិតខាងផ្សេងទៀតដែលបានទទួលរងផលប៉ះពាល់ពីអគ្គីភ័យនេះបានពិភាក្សាអំពីការដាក់ពាក្យបណ្តឹងជាផ្លូវការទៅកាន់រដ្ឋាភិបាលដែលនឹងបង្ខំបុគ្គលដែលទទួលខុសត្រូវឲ្យសងថ្លៃការខូចខាតទាំងអស់នេះ ។ អ្នកជិតខាងមួយចំនួនបានរៀបលិខិតព្រៀង ហើយបានសុំឲ្យលោក ផាន ចុះហត្ថលេខា ។ « គាត់មិនមានបំណងចង់ឲ្យមានភ្លើងឆេះនោះទេ ។ លោក ផាន បានគិតថា ប្រសិនបើខ្ញុំឲ្យគាត់សងថ្លៃខូចខាត នោះគាត់នឹងមានបញ្ហា ហើយខ្ញុំនៅតែមានអារម្មណ៍ស្អប់ ។ ខ្ញុំចាំព្រះបន្ទូលរបស់ព្រះអម្ចាស់ថា យើងគួរតែស្រឡាញ់អ្នកជិតខាងរបស់យើង ។ ខ្ញុំមានអារម្មណ៍ថា ខ្ញុំគួរតែអភ័យទោស » ។ លោក ផាន បានបដិសេធមិនចុះហត្ថលេខាលើលិខិតនោះទេ ។ លោក ផាន បានមានប្រសាសន៍ថា ៖ « ពេលខ្ញុំសម្រេចចិត្តអភ័យទោស ខ្ញុំមានអារម្មណ៍ថា មានសេចក្តីសុខសាន្ត » ។
លោក ផាន ក៏បានលើកទឹកចិត្តអ្នកជិតខាងផ្សេងទៀតឲ្យអភ័យទោសចំពោះគ្រោះថ្នាក់នេះ ហើយមនុស្សភាគច្រើនបានធ្វើតាម ។ លោក ផាន បានមានប្រសាសន៍ថា « អ្នកជិតខាងរបស់ខ្ញុំសប្បាយចិត្តដែលខ្ញុំបានអភ័យទោសឲ្យគាត់ ។ គ្រួសាររបស់ខ្ញុំក៏កាន់តែសប្បាយចិត្តដែរ » ។
សមាជិកសាសនាចក្រ និងអ្នកជិតខាងផ្សេងទៀតបានរួមចំណែកនូវអ្វីដែលពួកគេអាចធ្វើបានដើម្បីជួយដល់លោក ផាន និងគ្រួសាររបស់គាត់ងើបឡើងវិញ ។ ទោះបីជាគាត់ និងគ្រួសាររបស់គាត់មានការលំបាកក៏ដោយ ក៏លោក ផាន បានផ្តល់នូវអ្វីដែលគាត់អាចធ្វើបានដើម្បីគាំទ្រអ្នកដទៃផងដែរ ។ លោក ផាន បានមានប្រសាសន៍ថា ៖ « ខ្ញុំបានទទួលអង្ករច្រើន ហើយបានចែកចាយជាមួយអ្នកដទៃ ។ នៅពេលដែលអ្នកដទៃបានសួរថាតើគាត់អាចបន្តផ្តល់ឲ្យយ៉ាងដូចម្ដេចក្នុងអំឡុងពេលកាលៈទេសៈដ៏លំបាកបែបនេះ លោក ផាន បានរំឭកពួកគេពីកម្លាំងដែលយើងរកឃើញក្នុងការបម្រើអ្នកដទៃ ។ លោក ផាន មានប្រសាសន៍ថា ៖ « ពេលខ្ញុំបម្រើអ្នកដទៃខ្ញុំបម្រើព្រះអម្ចាស់ ។ ខ្ញុំចង់ថ្វាយទ្រង់ ព្រោះទ្រង់ធ្វើអព្ភូតហេតុជាច្រើនឲ្យកើតឡើងក្នុងជីវិតខ្ញុំ » ។
លោក ផាន និងគ្រួសាររបស់គាត់អាចធ្វើផ្ទះថ្មីវិញបាន ។ លោក ផាន បានមានប្រសាសន៍ថា ៖ « យើងមានផ្ទះដ៏ស្រស់ស្អាតជាងផ្ទះដែលបានឆេះនោះទៅទៀត » ។