ការស្រឡាញ់ជីវិត

ដោយអែលឌើរ នែល អិល អាន់ឌើរសិន

ក្នុងកូរ៉ុមនៃពួកសាវកដប់ពីរនាក់

ជីវិតគឺជាផ្នែកមួយដ៏មានតម្លៃបំផុតនៃផែនការដ៏ឥតខ្ចោះរបស់ព្រះវរបិតា ហើយដោយតាមបញ្ជារបស់ទ្រង់ នោះយើងស្រឡាញ់ និងថែរក្សាជីវិត ។

ព្រះអង្គសង្រ្គោះ ព្រះយេស៊ូវគ្រីស្ទបង្រៀនយើង « គេនឹងដឹងថា អ្នករាល់គ្នាជាសិស្សរបស់ខ្ញុំ ដោយសារសេចក្តីនេះឯង គឺដោយអ្នករាល់គ្នាមានសេចក្តីស្រឡាញ់ដល់គ្នាទៅវិញទៅមក » ។

ថ្មីៗនេះ ប៊ីស្សពម្នាក់នៅរដ្ឋយូថាហ៍បានចែកចាយជាមួយខ្ញុំអំពីការផ្ដល់សេចក្តីស្រឡាញ់ដ៏កក់ក្ដៅដល់យុវនារីម្នាក់ និងគ្រួសាររបស់នាងនៅក្នុងវួដរបស់គាត់ ។ តាមរយៈព្រឹត្តិការណ៍ដ៏ស្រស់ស្អាតជាបន្តបន្ទាប់ ឪពុកម្តាយបានប្តេជ្ញាចិត្តត្រឡប់ទៅរកព្រះអង្គសង្គ្រោះ និងសាសនាចក្ររបស់ទ្រង់វិញ ។ អំឡុងពេលដែលពួកគេនៅឆ្ងាយពីសាសនាចក្រ កូនស្រីវ័យជំទង់របស់ពួកគេបានមានទំនាក់ទំនងជាមួយយុវជនម្នាក់ ។ ជាមួយការត្រឡប់មកវិញនេះ កូនស្រីដ៏មានតម្លៃរូបនេះទទួលអារម្មណ៍នៃក្តីស្រឡាញ់ដ៏ធំធេងពីព្រះវរបិតាសួគ៌របស់នាងក្នុងអំឡុងពេលប្រជុំថ្លែងទីបន្ទាល់របស់ក្រុមយុវនារី ។ នាងបានតាំងចិត្ដដើម្បីរស់នៅតាមបទបញ្ញត្ដិនេះឲ្យកាន់តែពេញលេញ ។ នាងបានសរសេរថា « ខ្ញុំបានចាប់ផ្ដើមដំណើរការនៃការប្រែចិត្តជាមួយប៊ីស្សពរបស់ខ្ញុំ » ។

មិនយូរប៉ុន្មាន នាងបានធ្លាក់ខ្លួនឈឺ ។ តាមពាក្យសម្តីរបស់នាងគឺ ៖ « [ ការ ] ធ្វើតេស្តបានបង្ហាញថា … ខ្ញុំមានផ្ទៃពោះ ។ ខ្ញុំ … បានចាប់ផ្ដើមយំ ។ … ឪពុករបស់ខ្ញុំឱបខ្ញុំ ហើយលួងលោមខ្ញុំថា អ្វីៗ[ នឹង ]ប្រសើរឡើង ។ … មិត្តប្រុសរបស់ខ្ញុំ … បានសុំឲ្យខ្ញុំរម្លូតកូន ។ … ខ្ញុំបានបដិសេធ » ។

ការមើលថែដល់អ្នកខ្វះខាត

នាងបានបន្តថា ៖ « ខ្ញុំបានទទួលសេចក្តីស្រឡាញ់ និងការគាំទ្រយ៉ាងច្រើនពីគ្រួសារវួដរបស់យើង ។ វាជារឿងដ៏លើសលប់ ។ ប៊ីស្សព និងប្រធានយុវនារី[ របស់ខ្ញុំ ] បាន ខិតខំយ៉ាងខ្លាំងដើម្បីបង្ហាញសេចក្តីស្រឡាញ់ និងការគាំទ្ររបស់ពួកគេ ។ … ខ្ញុំបានឃើញព្រះហស្ដរបស់ព្រះអម្ចាស់ … ដឹកនាំខ្ញុំ និងគ្រួសាររបស់ខ្ញុំ ។ … វួដដូចជាគ្រួសារវួដរបស់ខ្ញុំនេះ គឺជាគ្រួសារដែលមនុស្សគ្រប់គ្នាត្រូវការ ជាពិសេស យុវនារីក្នុងស្ថានភាពរបស់ខ្ញុំ » ។

នាង និងគ្រួសារនាង និងគ្រួសារវួដនាងបានស្វាគមន៍កូនប្រុសរបស់នាងដោយក្តីស្រឡាញ់នៅក្នុងខែកុម្ភៈកន្លងទៅនេះ ។

ប្រធាន រ័សុល អិម ណិលសុន បានមានប្រសាសន៍ថា « សញ្ញាសម្គាល់នៃសាសនាចក្រពិត និងសកម្មរបស់ព្រះអម្ចាស់ ជានិច្ចកាល នឹងត្រូវបានរៀបចំ … ការខិតខំទៅរកការបម្រើដល់បុត្រាបុត្រីរបស់ព្រះ … [ ផ្ដល់ការងារបម្រើដោយសណ្ដានចិត្ដល្អ ដែលពោរពេញដោយក្ដីស្រឡាញ់ ] ដល់មនុស្សម្នាក់ៗដូចជាទ្រង់បានធ្វើ » ។

ការជួយដល់ជម្រើសសុចរិតនានា

នៅពេលដែលស្ត្រីនៅលីវម្នាក់បានដឹងថានាងមានកូនដោយមិនបានរំពឹងទុក ការព្រួយបារម្ភផ្នែកសុខភាព ភាពចលាចលខាងវិញ្ញាណ សេចក្តីខ្មាសអៀន ការព្រួយបារម្ភផ្នែកហិរញ្ញវត្ថុ សំណួរផ្នែកការអប់រំ ភាពមិនច្បាស់លាស់នៃអាពាហ៍ពិពាហ៍ និងភាពសោកសៅនៃការបាត់បង់ក្តីសុបិនក្នុងគ្រានៃការឈឺចាប់ និងភាពវង្វេងស្មារតីនេះ អាចនាំឲ្យស្រ្តីដែលចេះគិតគូររូបនេះជ្រើសនូវជម្រើសដែលនាំមកនូវការឈឺចាប់ និងការសោកស្ដាយ ។

សម្រាប់អ្នកស្តាប់រូបណាដែលបានដកពិសោធន៍នូវការឈឺចាប់ និងសោកស្ដាយយ៉ាងខ្លាំងពីការបាន ឬការចូលរួមក្នុងការរម្លូតកូន សូមចងចាំថា ៖ ទោះជាយើងមិនអាចផ្លាស់ប្តូរអតីតកាលក្តី ព្រះអាចព្យាបាលអតីតកាលបាន ។ ការអភ័យទោសអាចមកតាមរយៈអព្ភូតហេតុនៃព្រះគុណដ៏ធួនរបស់ទ្រង់ នៅពេលបងប្អូនងាកទៅរកទ្រង់ដោយដួងចិត្ដនៃការប្រែចិត្ដ និងមានភាពរាបសា ។

មានពាក្យពីរពាក្យបានភ្ជាប់ជាញឹកញាប់ទៅនឹងភាពបរិសុទ្ធនៃកំណើតនៃជីវិតរមែងស្លាប់ ៖ ជីវិត និងការជ្រើសរើស ។ ជីវិតគឺជាផ្នែកមួយដ៏មានតម្លៃបំផុតនៃផែនការដ៏ឥតខ្ចោះរបស់ព្រះវរបិតា ហើយដោយតាមបញ្ជារបស់ទ្រង់ នោះយើងស្រឡាញ់ និងថែរក្សាជីវិត ហើយយើងជ្រើសរើសការបន្តជីវិតនៅពេលមានគភ៌ ។ យើងក៏ឲ្យតម្លៃចំពោះអំណោយទាននៃជម្រើស នៃសិទ្ធិជ្រើសរើសខាងសីលធម៌ដែរ—ដោយការជួយពង្រឹងជម្រើសដ៏សុចរិត ដែលនាំមកនូវសុភមង្គលដ៏នៅអស់កល្បជានិច្ច ដែលព្រះបានអនុម័តឲ្យ ។

នៅពេលស្ត្រី និងបុរសស្ថិតនៅក្នុងពេលដ៏ផុយស្រួយបែបនេះ ដោយការប្រឈមនឹងជម្រើសដ៏សំខាន់មួយ នោះសូមឲ្យពាក្យសម្ដីយើង ដៃយើង ដួងចិត្តយើង—ខាងវិញ្ញាណ ខាងសតិអារម្មណ៍ និងខាងហិរញ្ញវត្ថុ—អាចផ្ដល់ពរឲ្យពួកគេទទួលអារម្មណ៍នៃក្តីស្រឡាញ់របស់ព្រះអង្គសង្គ្រោះ ហើយដូចដែលប្រធាន ហែនរី ប៊ី អាវរិង បានមានប្រសាសន៍ ដែលនាំមកនូវការយល់ដឹងកាន់តែច្បាស់ចំពោះកែវភ្នែកខាងវិញ្ញាណរបស់ពួកគេ ចេញពី « អ្វីដែលពួកគេគិតថាពួកគេមើលឃើញ » ទៅជា « អ្វីដែលពួកគេមិនទាន់ឃើញទៅវិញ » ។

គោលលទ្ធិនៃជីវិត រមែង ស្លាប់

ប្រធាន ដាល្លិន អេក អូក បានមានប្រសាសន៍ ៖ « អាកប្បកិរិយារបស់យើងចំពោះការរម្លូតកូន គឺមិនផ្អែកលើចំណេះដឹងដែលបានបើកសម្តែងអំពីពេលដែលជីវិតរមែងស្លាប់ចាប់ផ្តើមនោះទេ ។ … វាត្រូវបានកំណត់ដោយចំណេះដឹងរបស់យើងថា … បុត្រាបុត្រីជាវិញ្ញាណរបស់ព្រះទាំងអស់ត្រូវមកផែនដីនេះក្នុងគោលបំណងដ៏រុងរឿង ហើយអត្តសញ្ញាណបុគ្គលនោះបានចាប់ផ្ដើមជាយូរមុនការមានគភ៌ ហើយនឹងបន្តរហូតដល់អស់កល្បជានិច្ចខាងមុខ » ។

ព្រះបន្ទូលនៃព្រះអម្ចាស់ទាក់ទងនឹងទារកដែលមិនទាន់កើត ដែលបានថ្លែងតាមរយៈគណៈប្រធានទីមួយ និងកូរ៉ុមនៃពួកសាវកដប់ពីរនាក់ មិនដែលប្រែប្រួលឡើយ ហើយបានថ្លែងឡើងវិញនូវពាក្យសម្តីរបស់ព្យាការីគ្រប់សម័យកាល ដែលផ្តល់ឲ្យនូវភាពច្បាស់លាស់ចំពោះអ្វីដែលព្រះអម្ចាស់បានបង្គាប់ដល់យើង ។

« សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ជឿលើភាពបរិសុទ្ធនៃជីវិតមនុស្សលោក ។ ហេតុដូច្នេះហើយ សាសនាចក្រប្រឆាំងនឹងការជ្រើសយកឲ្យមានការរម្លូតកូនសម្រាប់ភាពងាយស្រួលផ្ទាល់ខ្លួន ឬសង្គម ហើយសូមទូន្មានដល់សមាជិកខ្លួនកុំឲ្យដាក់ស្នើ ប្រព្រឹត្ត លើកទឹកចិត្ត បង់ប្រាក់ ឬចាត់ចែងឲ្យមានការរម្លូតកូនឡើយ ។

« [ ព្រះអម្ចាស់ ] អនុញ្ញាតឲ្យមានករណីលើកលែងដែលអាចធ្វើទៅបាន … នៅពេល ៖

ការមានផ្ទៃពោះដែលជាលទ្ធផលមកពីការចាប់រំលោភ ឬការរួមភេទជាមួយសាច់ញាតិជិតដិតដោយបង្ខំ ឬ
គ្រូពេទ្យមានសមត្ថភាពកំណត់ថា ជីវិត និងសុខភាពរបស់ម្តាយស្ថិតនៅក្នុងគ្រោះថ្នាក់ធ្ងន់ធ្ងរ ឬ
គ្រូពេទ្យជំនាញសម្រេចថា គភ៌មានបញ្ហាធ្ងន់ធ្ងរដែលនឹងធ្វើឲ្យទារកមិនអាចរស់បានពេលកើតមក » ។

គណៈប្រធានទីមួយបន្តថា ៖ « ការរម្លូតកូនគឺជារឿងដ៏ធ្ងន់ធ្ងរបំផុត ។ [ ទោះបីជាក្នុងស្ថានភាពដ៏កម្រទាំងនេះក្តី ] វាគួរតែត្រូវបានពិចារណាតែបន្ទាប់ពីបុគ្គលដែលទទួលខុសត្រូវនោះ បានទទួលការបញ្ជាក់តាមរយៈការអធិស្ឋានប៉ុណ្ណោះ »ហើយបានប្រឹក្សាជាមួយអ្នកដទៃ ។

សាមសិបឆ្នាំមុន ព្យាការីរបស់ព្រះអម្ចាស់បានចេញសេចក្តីប្រកាសដល់ពិភពលោក ។ សេចក្តីប្រកាសនេះរួមមានពាក្យទាំងនេះ ៖

« យើង … សូមប្រកាសថែមទៀតថា ព្រះបានបញ្ជាថា អំណាចពិសិដ្ឋនៃការបង្កើតកូន គឺត្រូវបានប្រើរវាងតែបុរស និង ស្ត្រី ដែលបានរៀបអាពិហ៍ពិពាហ៍ស្របច្បាប់ ជាប្តី និងប្រពន្ធប៉ុណ្ណោះ ។

« យើងសូមប្រកាសថា មធ្យោបាយដើម្បីបង្កើតជីវិតរមែងស្លាប់នេះគឺត្រូវបានតែងតាំងឡើងដោយព្រះ ។ យើងសូមបញ្ជាក់នូវភាពបរិសុទ្ធនៃជីវិត និងសារៈសំខាន់នៃជីវិតនៅក្នុងផែនការដ៏អស់កល្បជានិច្ចរបស់ព្រះ » ។

ការចិញ្ចឹមបីបាច់ និងការការពារជីវិតដែលមិនទាន់កើតមិនមែនជាជំហរខាងនយោបាយនោះទេ។ វាគឺជាច្បាប់ខាងសីលធម៌ដែលបានបញ្ជាក់ដោយព្រះអម្ចាស់ តាមរយៈពួកព្យាការីរបស់ទ្រង់ ។

ការប្រាស្រ័យទាក់ទងគ្នាកាន់តែបើកចំហរ ។

សេចក្ដីថ្លែងការណ៍ដោយប្រធាន ជេ រ៉ូប៊ីន ក្លាក ជុញ្ញ័រ ដែលបានបម្រើនៅក្នុងគណៈប្រធានទីមួយ បានពិពណ៌នាយ៉ាងល្អអំពីយុវវ័យនៅសព្វថ្ងៃនេះថា ៖ « យុវវ័យនៃសាសនាចក្រស្រេកឃ្លាននូវអ្វីៗខាងវិញ្ញាណ ពួកគេចង់រៀនដំណឹងល្អ ហើយពួកគេចង់បានឲ្យវាច្បាស់លាស់ បរិសុទ្ធ ។ ពួកគេចង់ដឹងអំពី … ជំនឿរបស់យើង ពួកគេចង់ទទួលបានទីបន្ទាល់អំពី[ សេ ]ចក្តីពិត ។ ពួកគេ … ជាអ្នកស៊ើប អ្នកស្វែងរកសេចក្ដីពិត » ។ សូមឲ្យយើងនិយាយឲ្យបានញឹកញាប់ដោយសេចក្តីជំនឿ និងដោយក្ដីអាណិតអាសូរទៅកាន់យុវវ័យនៅក្នុងផ្ទះរបស់យើង និងជាមួយគ្នាទៅវិញទៅមកនៅក្នុងការប្រជុំសមាគមសង្គ្រោះ និងកូរ៉ុមអែលឌើររបស់យើងអំពីច្បាប់ព្រហ្មចារីភាពរបស់ព្រះអម្ចាស់ ភាពបរិសុទ្ធនៃជីវិត និងការមើលថែទារកដែលមិនទាន់កើត និងម្តាយរបស់ពួកគេ ។

កាលពីជាង ២០ ឆ្នាំមុន មានប្អូនស្រីម្នាក់បានសរសេរនូវបទពិសោធន៍របស់នាងមកកាន់ខ្ញុំ ៖ « កាលនៅអាយុ១៧ឆ្នាំ … ខ្ញុំបានមានផ្ទៃពោះ ហើយមានការគាំទ្រតិចតួចបំផុតពីមិត្តប្រុសរបស់ខ្ញុំ ។ ខ្ញុំមានអារម្មណ៍ខ្មាសអៀន និងឯកោ [ ប៉ុន្តែ ខ្ញុំ ]មិនដែលគិតចង់[ រម្លូតកូន ]នោះទេ ។ … ខ្ញុំ [ មាន ] គ្រួសារជាទីស្រឡាញ់របស់ខ្ញុំ និងប៊ីស្សពរបស់ខ្ញុំ ដែលខ្ញុំបានជួបជាប្រចាំដើម្បីទទួលបានការណែនាំ ។ … ខ្ញុំងាកទៅរកព្រះ ។ ខ្ញុំបានសិក្សាព្រះគម្ពីរ … និងបានអធិស្ឋាន [ និង ] ទទួលបានកម្លាំងមកពីព្រះអង្គសង្រ្គោះ និងដំណើរការនៃការប្រែចិត្ត ។ … ខ្ញុំបានទទួលចម្លើយ[ ចំពោះការអធិស្ឋានរបស់ខ្ញុំ ]ដែលខ្ញុំមិនអាចបដិសេធបានទេ ។ … វាជារឿងដ៏សោកសៅ ប៉ុន្តែខ្ញុំបានដឹងថា ខ្ញុំនឹងអាចឲ្យកូនស្រីខ្ញុំទៅគេចិញ្ចឹម ។ … ខ្ញុំបានអធិស្ឋានសូមសេចក្តីក្លាហាន [ ហើយ ] ទទួលអារម្មណ៍នៃសេចក្តីស្រឡាញ់របស់ព្រះអង្គសង្រ្គោះយ៉ាងច្បាស់ តាមរយៈការប្រែចិត្ត ខ្ញុំបានដឹងថាព្រះ … ឆ្លើយការអធិស្ឋាន និងពង្រឹងយើង » ។

គូស្វាមីភរិយាដ៏គួរឲ្យស្រឡាញ់មួយគូបានសុំទារិកាតូចដ៏មានតម្លៃនោះទៅចិញ្ញឹម និងបានបង្រៀនដំណឹងល្អដល់នាង ។ ឥឡូវនេះ នាងបានរៀបការរស់នៅជាមួយគ្រួសារដ៏ស្រស់ស្អាតរបស់នាងផ្ទាល់ ។

ពេលខ្លះ ការលំបាកដ៏ខ្លាំងក្លា និងទុក្ខព្រួយជាទម្ងន់ដែលមកពីភាពមិនច្បាស់លាស់ អាចជាការអមនឹងការការពារជីវិតផងដែរ ។

ថ្មីៗនេះ គូស្វាមីភរិយាវ័យក្មេងមួយគូ ដែលខាធី និងខ្ញុំស្រឡាញ់បានសរសេរសំបុត្រប្រាប់ខ្ញុំ អំពីកូនតូចដែលនៅក្នុងផ្ទៃរបស់ពួកគេ ។

ឪពុកបានសរសេរថា ៖ « [ នៅពេលភរិយារបស់ខ្ញុំ ] មានផ្ទៃពោះ ១០ សប្តាហ៍ យើងបានដឹងថា ទារកដ៏អព្ភូតហេតុរបស់យើងមាននូវបញ្ហាហ្សែនពីកំណើតដែលមានឈ្មោះថា ត្រេសូមី ២១ ដែលជាទូទៅត្រូវបានហៅថាជាជម្ងឺ ដោនស៊ីនដ្រូម ។ យើងមានអារម្មណ៍ថាមានសម្ពាធ … ពីផ្នែកវេជ្ជសាស្រ្តដើម្បីពិចារណាពីការរម្លូតនេះ ។ ប៉ុន្មានសប្តាហ៍ក្រោយមក យើងបានរកឃើញថា … កូនដែលមិនទាន់កើតរបស់យើង … នឹងត្រូវការការវះកាត់បេះដូងជាច្រើនដងនៅពេលកើតមកនៅមួយខួបដំបូង ។ នៅក្នុងដំណើរការនេះទាំងមូល យើងបានអធិស្ឋានជាញឹកញាប់ទូលសូមជំនួយដ៏ទេវភាព … យើងបានទទួលអារម្មណ៍លួងលោមពីព្រះវិញ្ញាណ ។ យើងបានទទួលវិវរណៈ និងការយល់ដឹងថា កូនស្រីរបស់យើងគឺជាកូនដ៏ពិសេសរបស់ព្រះវរបិតាសួគ៌ ហើយមានបំណងប្រាថ្នាដ៏ធំធេងចង់ស្ថិតនៅក្នុងគ្រួសាររបស់យើង និងមកកាន់ផែនដី » ។

ម្តាយរបស់ទារករូបនេះបានសរសេរថា ៖ « [ យើង ]មានការតក់ស្លុត ច្របូកច្របល់ និងនិយាយដោយត្រង់ ភ័យរន្ធត់ជាខ្លាំងដោយដំណឹងនេះ ។ … នៅពេលដែលខ្ញុំមានផ្ទៃពោះ ១៤ សប្តាហ៍ យើងបានដឹងថាទារករបស់យើងមានពិការភាពបេះដូងពីកំណើតជាច្រើន ដែលអាចបណ្តាលឲ្យស្លាប់ ។ យើងបានជួបវេជ្ជបណ្ឌិត និងអ្នកឯកទេសរាប់មិនអស់ចាប់ពីមានផ្ទៃពោះ ១០–១៨ សប្តាហ៍ ។ … នៅរាល់ការណាត់ជួបម្តងៗរបស់យើង យើងត្រូវបានសួរថាតើយើងចង់បន្តរក្សាគភ៌ ឬរម្លូតចោល ។ … ព្រះអង្គសង្គ្រោះបានព្យាបាលដួងចិត្តរបស់ខ្ញុំ ហើយបានផ្តល់ឲ្យខ្ញុំនូវអារម្មណ៍នៃភាពសុខសាន្ត និងភាពរំភើបរីករាយអំពីកូនស្រីរបស់យើង ។ … [ ព្រះវរបិតាសួគ៌ ] បានបង្ហាញខ្ញុំម្តងហើយម្តងទៀតថា ទ្រង់មានផែនការដ៏ឥតខ្ចោះសម្រាប់ខ្ញុំ [ ហើយ ]ខ្ញុំជឿជាក់លើទ្រង់ » ។

ពួកគេរំភើបក្នុងការស្វាគមន៍កំណើតកូនស្រីតូចរបស់ពួកគេនៅសប្ដាហ៍មុននេះ ។ នាងជារបស់ពួកគេ ហើយពួកគេជារបស់នាងជារៀងរហូត ។

ជំនឿដែលមិនរុញរា និងភាពក្លាហានដ៏អស្ចារ្យគឺជាលក្ខណសម្បត្តិនៃសិស្សរបស់ព្រះយេស៊ូវគ្រីស្ទ ។

គំរូនៃសេចក្ដីជំនឿដ៏អស្ចារ្យមួយ

ឆ្លងកាត់ប៉ុន្មានឆ្នាំមកនេះ ខ្ញុំមានអភ័យឯកសិទ្ធិជួបនឹងបុរស និងស្រ្តីដែលបានប្រឹងប្រែងយ៉ាងរាបទាបដើម្បីត្រឡប់ទៅកាន់ផ្លូវនៃសេចក្ដីសញ្ញា និងពរជ័យនៃព្រះវិហារបរិសុទ្ធរបស់ពួកគេវិញ បន្ទាប់ពីការបាត់បង់សមាជិកភាពរបស់ពួកគេអស់ជាច្រើនឆ្នាំ ។

នៅក្នុងឱកាសមួយ ខ្ញុំបានសម្ភាសបុរសម្នាក់ជំនួសឲ្យគណៈប្រធានទីមួយសម្រាប់ការស្តារឡើងវិញនៃបព្វជិតភាព និងពរជ័យនៃព្រះវិហារបរិសុទ្ធ ។

បន្ទាប់ពីការរៀបអាពាហ៍ពិពាហ៍របស់គាត់នៅក្នុងព្រះវិហារបរិសុទ្ធ ហើយមានកូនដ៏អស្ចារ្យបីនាក់ បុរសរូបនោះមិនស្មោះត្រង់ចំពោះភរិយារបស់គាត់ និងសេចក្តីសញ្ញាដ៏ពិសិដ្ឋរបស់គាត់ទេ ។ ស្ត្រីនៅលីវម្នាក់មានផ្ទៃពោះ និងចង់រម្លូតកូនចោល ។

ភរិយាដ៏មានគុណធម៌របស់ស្វាមីមួយរូប បានអង្វរស្រ្តីម្នាក់នោះឲ្យទុកទារកនោះ ហើយបានសន្យាថា នាងនឹងចិញ្ចឹមកូននោះជាមួយកូនៗរបស់នាងនៅពេលកូននោះកើតមក ។

ស្រ្តីដែលនៅលីវរូបនោះបានយល់ព្រមមិនទម្លាក់គភ៌ក្នុងផ្ទៃទេ ។

ឥឡូវនេះ វាមានរយៈពេល ១០ឆ្នាំហើយ ។ ប្អូនស្រីដ៏រាបទាបដែលអង្គុយនៅខាងមុខខ្ញុំនោះ ស្រឡាញ់ក្មេងប្រុសម្នាក់នេះដូចជាកូនបង្កើតរបស់គាត់ ហើយបានប្រាប់ខ្ញុំអំពីការខិតខំប្រឹងប្រែងរបស់ស្វាមីរបស់គាត់ក្នុងការកែប្រែ និងស្រឡាញ់ ហើយថែទាំគាត់ និងគ្រួសារ ។ ឪពុកបានហូរទឹកភ្នែកខណៈដែលគាត់និយាយ ។

តើស្ត្រីដ៏ថ្លៃថ្នូររបស់ព្រះរូបនេះអាចយកកូននេះធ្វើដូចជាកូនរបស់គាត់ផ្ទាល់ ខណៈដែលកូននេះអាចរំឭកគាត់ពីស្វាមីដែលមិនស្មោះត្រង់របស់គាត់ជារៀងរាល់ថ្ងៃដោយរបៀបណាទៅ ? ដោយរបៀបណាទៅ ? ដោយសារនាងទទួលបានកម្លាំងតាមរយៈព្រះយេស៊ូវគ្រីស្ទ ហើយនាងជឿលើភាពពិសិដ្ឋនៃជីវិត ភាពបរិសុទ្ធនៃជីវិត ។ នាងបានដឹងថា កូនដែលមិនទាន់កើតគឺជាបុត្ររបស់ព្រះ ស្លូតត្រង់ និងបរិសុទ្ធ ។

បងប្អូនប្រុសស្រីជាទីស្រឡាញ់របស់ខ្ញុំ ការចុះថយសេចក្តីស្រឡាញ់ចំពោះទារកដែលមិនទាន់កើតនៅទូទាំងពិភពលោកគឺជាក្តីព្រួយបារម្ភយ៉ាងខ្លាំង ។ ព្រះស្រឡាញ់ជីវិត ។ នេះគឺជាកិច្ចការរបស់ទ្រង់ និងសិរីរុងរឿងរបស់ទ្រង់ដើម្បីនាំមកនូវអមតភាព និងជីវិតដ៏នៅអស់កល្បជានិច្ចដល់បុត្រាបុត្រីរបស់ទ្រង់ ។ ក្នុងនាមជាសិស្សរបស់ព្រះយេស៊ូវគ្រីស្ទ យើងស្រឡាញ់ជីវិត ។ « គេនឹងដឹងថា អ្នករាល់គ្នាជាសិស្សរបស់ខ្ញុំ ដោយសារសេចក្តីនេះឯងគឺ ដោយអ្នករាល់គ្នាមានសេចក្តីស្រឡាញ់ដល់គ្នាទៅវិញទៅមក » ។ សូមឲ្យយើងចែកចាយសេចក្តីស្រឡាញ់របស់យើងកាន់តែច្រើនជាមួយអ្នកដែលត្រូវការយើងយ៉ាងខ្លាំង ។ ខ្ញុំសូមបង្ហាញពីក្តីស្រឡាញ់របស់ខ្ញុំចំពោះបងប្អូន និងសេចក្តីស្រឡាញ់របស់ព្រះវរបិតាសួគ៌របស់យើងចំពោះបុត្រាបុត្រីរបស់ទ្រង់ដែលមកកាន់ផែនដី ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕