O Le Faafesoota’ia o Poloaiga Sili e Lua
O lo tatou tomai e mulimuli ia Iesu Keriso e faalagolago i lo tatou malolosi ma le mana e ola ai i poloaiga muamua ma le lona lua, i le tuuto paleni ma tutusa.
Faatomuaga
A ma malaga ma lo’u toalua o Lesa i tofiga i le lalolagi atoa, ma te fiafia lava i le avanoa e feiloai ai ma outou i potopotoga toatele ma toalaiti. O lo outou tuuto i le galuega a le Alii e uuna’ia ai i ma’ua ma tutu o se molimau i le talalelei a Iesu Keriso. Ma te toe taliu mai i le fale mai malaga taitasi ma mafaufau ai pe na tutusa le tele o mea na ma tuuina atu e faapei o mea na ma mauaina mai.
Pe a [ma] malaga, e itiiti lava ni o ma’ua taimi mo ni matamataga. Peitai, pe a mafai ai, ou te faaaluina sina taimi i se mea e faapitoa ona ou fiafia i ai. Ou te fiafia i le tusiatafale ma le mamanuina o fausaga ma se faamemelo faapitoa i alalaupapa. O alalaupapa faatautau ou te maofa ai. Pe o le Alalaupapa Nuanua i Tokyo, le Alalaupapa Tsing Ma i Hong Kong, le Alalaupapa ’Olo i Lonetona, po o isi ua ou vaai i ai, ou te maofa lava i le atamai tele faaenisinia na fauina ai nei fausaga lavelave. O alalaupapa e avatu ai i tatou i nofoaga semanu e le mafai ona tatou o i ai. (Ae ou te le’i faaauau, ou te faapea atu, talu ona tapenaina lenei savali, sa tupu se faalavelave matautia i le alalaupapa i Baltimore. Tatou te faanoanoa i le faaumatia ai o soifua ma ofoina atu le faamaisega i aiga ua aafia.)
O Se Alalaupapa Faatautau Maoae
Talu ai nei lava, na ave ai au e se tofiga o se konafesi i Kalefonia, lea na ou toe sopoia ai le Alalaupapa lauiloa o le Faitotoa Auro, lea sa manatu i ai o se mea ofoofogia faaenisinia o le lalolagi. O lenei fausaga mata’ina e su’ifefiloi ai elemene matagofie, o faamoemoega aoga, ma le faaenisinia faalematua o faiva. O se alalaupapa faatautau tulaga ese e faafesootai e keipo i ni ‘olo se lua ae lagolagoina e ni uafu tetele. O ‘olo e lua o loo tauaveina le mamafa maoae, matautia, o loo tumatila i luga a’e o le vasatele, o uluai elemene ia na fauina. La te tauaveina faatasi le avega o le falōina o keipo autu i le va o ‘olo ma keipo e faataupe ifo mai keipo autu, ia e taofimau ai le auala i lalo ifo. O le malosiaga mautu tulagaese—o le malolosi o ‘olo—o le maneta lena o i tua atu o le fausaga ma le mamanu faaenisinia o le alalaupapa.
Itu o le Alalaupapa Faitotoa Auro
O uluai ata o le fauga o le alalaupapa o loo molimauina ai lenei mataupu faavae faaenisinia. O elemene taitasi o le alalaupapa, e maua le lagolago e tauave ai le mamafa mai ‘olo tutusa lelei e lua, e tau fai faalagolago le tasi i le isi.
Getty Images/Underwood Archives
Pe a ma’ea le alalaupapa, faatasi ma ‘olo malolosi e lua ua tutū mausali, ma uafu ua taulaina i se faavae o papatū, o se vaaiga lea o le malosiaga ma le matagofie.
O le asō ou te valaaulia outou e tagatagai i lenei alalaupapa matagofie—ma ona ‘olo maualuluga e lua ua fausia i luga o se faavae malosi—e ala i tioata o le talalelei.
I le tau faaiuiuga o le misiona a Iesu Keriso, i le vaitau ua tatou ta’ua nei o le Vaiaso Paia, sa fesili ai se Faresaio, o se loia1 i le Faaola i se fesili sa ia iloa sa toetoe a le mafai ona taliina:2 “Le Matai e, o le fea le poloaiga sili i le tulafono?” Sa “tofotofo o ia” e le loia ma sailia se tali faaletulafono, ma lona faamoemoega e foliga mai e taufaasese, ae na ia maua se tali faamaoni, paia, ma faalelagi.
“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.” Manatu i la tatou talafaatusa i le alalaupapa, o le ‘olo muamua!
“E faapena foi le lona lua, E te alofa atu i le lua te tuaoi, ia pei o oe lava ia te oe.” O le ‘olo lona lua lea!
“O na poloaiga e lua ua autu ai le tulafono uma ma le au perofeta.”3 O elemene o totoe o le alalaupapa!
Sei o tatou iloiloina poloaiga sili ta’itasi e lua, na faaalia ma faamatala atu i le tali a Iesu Keriso. A o tatou faia lena mea, ia vaai faalemafaufau i le ata o le alalaupapa faatautau maoae.
Alofa i le Alii
O le muamua, ia alofa i le Alii ma lou loto atoa, agaga, ma le mafaufau atoa.
I lea tali, o loo aotele ai e Iesu Keriso le ute o le tulafono o loo aofia ai i aoaoga paia o le Feagaiga Tuai. Ia alofa i le Atua e mua’i faatotonugalemu i lou loto—lou lava natura. Na poloai mai le Alii ia e alofa atu ma lou agaga atoa4—lou tagata atoa ua faapaiaina— ma le mea mulimuli, ia alofa atu ma lou mafaufau atoa—lou faautautaga ma le atamai. O le alofa i le Atua e le faatapulaaina pe muta. E le uma ma e faavavau.
Mo a’u, o le faaaogaaga o le poloaiga sili muamua e mafai i nisi taimi ona pei e na o faaupuga, pe e lofituina. O le mea e faafetai ai, pe a ou mafaufau i isi fetalaiga a Iesu, e atili ona faigofie ona malamalama lelei i ai lenei poloaiga: “Afai tou te alolofa mai ia te au, tausi i a’u poloaiga.”5 Ou te mafai ona faia lenei mea. E mafai ona ou alofa i le Tama Faalelagi ma Iesu Keriso, lea e ta’ita’i atu ai i le tatalo, suesue i tusitusiga paia, ma tapuai i le malumalu. Tatou te alolofa i le Tama ma le Alo e ala i le totogiina o sefuluai, tausia ia paia le aso Sapati, ola i se olaga amiolelei ma le mama, ma ia usiusitai.
O le alofa i le Alii e tele ina fuaina i galuega laiti i aso taitasi, o tulagaaao i luga o le ala o feagaiga: mo le autalavou, o le faaaogaina o fesootaiga faaagafesootai e atia’e ai nai lo le tosoina i lalo; tuua o le patī, tifaga, po o se gaoioiga e ono lu’iina ai tulaga faatonuina; faaalia o le migao mo mea e paia.
Mafaufau i le faataitaiga alofa lenei. O le Aso Sa anapogi a o ma tu’itu’i atu ma Vance6 i le faitotoa o se tama’i fale faatauvaa. Sa matou faamoemoe ma isi tiakono i le korama i upu, “Faamolemole sau i totonu,” o valaau mai ma le agalelei i se tautala faa-Siamani e lava le leotele e mafai ona lagona atu i le faitotoa. O Sister Muellar o se tasi o nai tina fāi mai i le uarota ua oti a latou tane. Sa le faigofie ona ia tatalaina le faitotoa, aua sa tauaso o ia. A o ma la’a atu i totonu o le fale e itiiti le malamalama, sa ia faafeiloaia i matou i ni fesili agalelei: O ai o oulua igoa? O a mai oulua? E te lua alolofa i le Alii? Sa ma tali atu ma faasoa atu sa ma o mai e avatu lana taulaga anapogi. E ui lava i lo matou talavou, sa iloagofie ona tulaga faatauvaa, ma o lana tali sa tumu i le faatuatua sa matua’i ootia lava: “Sa ou tuuina se sefulu sene i luga o le fata ananei i le taeao. Ou te matuā faafetai lava e ofo atu la’u taulaga anapogi. E mafai ona e tuuina i totonu o le teutusi ma faatumu la’u lisiti o le taulaga anapogi?” O lona alofa i le Alii na siitia ai o matou faatuatua i taimi taitasi matou te tuua ai lona fale.
Sa folafola mai e le Tupu o Peniamina le mana ofoofogia mo i latou o e mulimuli i le poloaiga sili muamua. “Ou te manao ia outou manatunatu i le tulaga manuia ma le fiafia o i latou o e e tausi i poloaiga. … E faamanuiaina i latou i mea uma, … ma afai latou te tutumau i le faamaoni e oo i le iuga, e talia i latou i le lagi, … i se tulaga o le fiafia e lē gata.”7
O le alofa i le Alii e ta’ita’i atu ai i le fiafia e faavavau!
Alofa i Lou Tuaoi
Ona fetalai atu lea o Iesu, “E faapena foi le lona lua, E te alofa atu i le lua te tuaoi, ia pei o oe lava ia te oe.”8 O le ‘olo lona lua lea o le alalaupapa.
O i lea e faafesoota’i atu ai e Iesu la tatou pulato’a faalelagi i lugā, ia alofa i le Alii, ma la tatou pulato’a faalelalolagi i fafo, ia alofa i o tatou uso o alii ma tamaitai. E faalagolago le tasi [pulato’a] i le isi. E le atoa le alofa i le Alii pe afai tatou te le amanaia o tatou tuaoi. O lea alofa i le lalolagi e aofia ai fanau uma a le Atua e aunoa ma le manatu i le itupa, faavasegaga faaagafesootai, lanu, tulaga feusuai, tupe maua, matua, po o le tagatanuu. Tatou te sailia i latou o ē o tiga ma nutimomoia, o ē ua faaaunu’ua, aua “e tutusa tagata uma i le Atua.”9 Tatou te “fesoasoani i e vaivai, sii i luga lima ua tautau i lalo, ma faamalosi tulivae ua vaivai.”10
Mafaufau i le faataitaiga lenei: Sa faate’ia Uso Evans11 ina ua uuna’ia o ia e faatu lana taavale ae tu’itu’i i se faitotoa na te le iloa o se aiga na te le iloaina. Ina ua tatala mai e se tina ua oti lana tane e to’a 10 le fanau le faitotoa, sa vave ona manino ia te ia o latou tulaga faigata ma tulaga manaomia tele. O le mea muamua sa faigofie, vali lo latou fale, na faapea ona sosoo ai ma le tele o tausaga o le auaunaga faaletino ma faaleagaga i lenei aiga.
Na tusia mulimuli ane e lenei tina lotofaafetai, e uiga i lana uo na auina mai le lagi: “Ua e faaaluina lou soifuaga e aapa mai ai i sē aupito itiiti o i matou. Oka so ta fia faalogo i mea e fetalai atu ai le Alii ia te oe a o Ia faaali atu Lona talisapaia o mea lelei na e faia i tulaga tautupe ma le faaleagaga, mo tagata ia e na o oe lava ma Ia o le a silafiaina. Faafetai atu mo le faamanuiaina o i matou i le anoanoa’i o ala, … mo mea na e tuuina atu mo faifeautalai. … E tele ina ou taumafaufau pe sa filifili ese lava oe e le Alii, pe ona na o oe lava le tagata na faalogo.”
O le alofa i ou tuaoi e aofia ai galuega faaKeriso o le agalelei ma le auauna atu. Pe o le a outou faate‘aeseina ea mea o faafatu’ulu, faamagalo i fili, talileleia ma auauna atu i o outou tuaoi, ma lagolago le au matutua? O le a tofu musuia outou a o outou fausia lau ‘olo o le alofa mo tuaoi.
Na aoao mai Peresitene Russell M. Nelson: “O le tuuina atu o le fesoasoani i isi—i le faia o se taumafaiga lotofuatiaifo e popole mo isi e pei, pe sili atu nai lo le tatou popole ia i tatou lava—o lo tatou olioli lea. Aemaise lava, … pe a le faigofie ma pe a aveesea ai i tatou mai i o tatou tulaga ua masani ai. O le ola ai i lena poloaiga sili lona lua o le ki lea i le avea ai ma se soo moni o Iesu Keriso.”12
O Se Faalagolagomaga
Na toe aoao mai foi Iesu, “O na poloaiga e lua ua autu ai le tulafono uma ma le au perofeta.”13 E ese le manino o lenei mea. O loo i ai se faalagolagomaga taua i le va o le alofa i le Alii ma le alofa o le tasi i le isi. Mo le Alalaupapa Faitotoa Auro ina ia faatino lana galuega na mamanuina ai, e taufai tutusa le malolosi o ‘olo e lua ma e tutusa foi le mamafa la te tauaveina o keipo faatautau, le auala, ma taavale e uia le alalaupapa. A aunoa ma lenei mamanu mautu faaenisinia, e mafai ona le aoga le alalaupapa, ma oo atu ai lava ina malepe. Mo soo se alalaupapa faatautau ia faia le mea na fausia ai e fai, e tatau ona galulue faatasi ona ‘olo i le maopoopoga a’ia’i. E faapena foi, o lo tatou tomai e mulimuli ia Iesu Keriso e faalagolago i lo tatou malolosi ma le mana e ola i poloaiga muamua ma le lona lua, ma le tuuto paleni tutusa i ia poloaiga uma.
O le faateleina o le fefinauai i le lalolagi ua ta’u mai ai, e i ai taimi tatou te le vaai ai pe manatua lenei mea. O ni isi ua matua’i taulai i le tausiga o poloaiga ma ua itiiti ai lo latou amana’ia o i latou ua latou faapea e faalēamiotonu. E faigata i ni isi ona alolofa ia i latou ua filifili e ola i o latou olaga i fafo atu o feagaiga, pe ua filifili foi e le auai lava i soo se mea faalelotu.
I se isi itu, ua i ai foi i latou ua faamamafaina le taua o le alolofa i isi e aunoa ma le faailoaina, tatou te tali uma atu lava i le Atua. O ni isi ua matua’i teena lava le manatu faapea, e i ai se mea faapea o se mea moni a’ia’i, po o le sa’o ma le sese, ma talitonu ai na pau le mea e manaomia mai ia i tatou o le onosa’ia atoatoa ma le taliaina o filifiliga a isi. Soo se tasi o nei tulaga lē paleni e afua ai ona sipa lou ‘olo patino faaleagaga pe pa’ū ai foi.
Na faamatala mai e Peresitene Dallin H. Oaks lenei mea ina ua ia saunoa: “Ua poloaiina i tatou ia alolofa i tagata uma, talu ai ona o le faataoto a Iesu i le Samaria agalelei o loo aoao mai ai o tagata uma o o tatou tuaoi. Ae o lo tatou naunau e tausia lenei poloaiga lona lua e le tatau ona mafua ai ona tatou faagalo le muamua, ia alofa i le Atua ma o tatou loto, agaga, ma mafaufau atoa.”14
Faaiuga
O le fesili la mo i tatou taitoatasi o le, E faapefea ona tatou fauina o tatou lava alalaupapa o le faatuatua ma le tuuto—e faatutu ai ‘olo maualuluga o le alalaupapa o le alolofa i le Atua ma le alolofa i o tatou tuaoi? Ia, o lea faatoa o tatou amata. O a tatou ulua’i taumafaiga e ono foliga i se atafuafua e tusia i tua o se solopepa, po o se tulaga amata o le alalaupapa ua tatou faamoemoe e fau. E ono aofia ai ni nai sini faamaoni e saili ia malamalama atili i le talalelei a le Alii pe tautino foi ia tuuitiitia le faamasino o isi. E leai se tasi ua laitiiti tele pe matua tele foi e amatalia.
E mavae atu taimi, faatasi ai ma fuafuaga ma le lototatalo ma le faautauta lelei, e matua’i faaleleia ai manatu sa soona fai. E avea ma mausa ia faatinoga fou. O uluai auivi e avea ma atatosi faaiu atoatoa. Tatou te fauina o tatou alalaupapa faaleagaga patino faatasi ma loto ma mafaufau e tuuto i le Tama Faalelagi ma Lona Alo Pele e Toatasi, faapea foi i o tatou uso ma tuafafine tatou te galulue, taaalo, ma ola faatasi.
I aso o i luma, pe a e pasia se alalaupapa faatautau maoae, pe e te vaai foi i se ata, ma ona ‘olo tumatila, ou te valaaulia oe ia manatua ia poloaiga sili e lua, na faamatala mai e Iesu Keriso i le Feagaiga Fou. Talosia ia musuia i tatou i aoaoga a le Alii. Talosia ia siitia a’e i luga o tatou loto ma mafaufau ia alolofa i le Alii, ma liliu i fafo atu, ia alolofa i o tatou tuaoi.
Talosia ia faamalolosia e lenei mea lo tatou faatuatua ia Iesu Keriso ma Lana Togiola, ou te molimau atu ai, i le suafa o Iesu Keriso, amene.