O Feagaiga ma Tiutetauave
O le Ekalesia a Iesu Keriso ua iloaina o se ekalesia lea e faamamafa ai le osiaina o feagaiga ma le Atua.
“E faapefea ona ese la outou Ekalesia mai i isi? O la’u tali i lenei fesili taua e eseese lava a o ou faasolo matua ma ua tuputupu a’e foi le Ekalesia. Ina ua ou fanau mai Iuta i le 1932, sa na o le 700,000 pe ā tagata auai o le tatou Ekalesia sa tele ina potopoto i Iuta ma setete lata ane. I lena taimi, sa na o le 7 a tatou malumalu. O le asō o le aofai o tagata o Le Ekalesia a Iesu Keriso o le Au Paia o Aso e Gata Ai ua silia ma le 17 miliona i atunuu pe tusa e 170. E oo mai i lenei aso 1 o Aperila ua 189 a tatou malumalu ua faapaiaina i le tele o malo ma le isi 146 i tulaga eseese o le fuafuaina ma le fausiaina. Na lagona le talanoa atu e uiga i le faamoemoega o nei malumalu ma le talafaasolopito ma matafaioi o feagaiga i la tatou tapuaiga. O le a faaopoopo atu lenei mea i aoaoga musuia a failauga na muamua atu.
I.
O se feagaiga o se tautinoga e faataunuu ni tiutetauave patino. O tautinoga patino e taua i le faatonutonuina o o tatou olaga taitoatasi ma le faagaoioiga o sosaiete. O lenei manatu o loo luitauina i le taimi nei. O se vaega toalaiti faaali manatu ua tetee i pulega faalefaalapotopotoga ma tausisi lava e tatau ona saoloto tagata mai soo se tapu e faatapulaaina ai o latou saolotoga faaletagata. Ae ua tatou iloa mai le faitau afe o aafiaga lea ua tatou lafoaia ai nisi saolotoga faaletagata ia maua ai manuia o le ola ai i ni alalafaga ua faatulagaina. O sea lafoaia o saolotoga faaletagata ua faavae tonu i tautinoga po o feagaiga, ua faaalia pe faaātaāta mai.
O nisi nei o faataitaiga o tiutetauave o feagaiga i totonu o o tatou sosaiete: (1) faamasino, (2) militeli, (3) aufaigaluega a le falemai ma le (4) tineimu. O i latou uma e aofia i nei galuega masani e faia se tautinoga—e tele ina faamamaluina e se tautoga po o se feagaiga—e faatino o latou tiute ua tofia i ai. E moni foi lena mea i a tatou faifeautalai faamisiona. O lavalava tulagaese po o pine o igoa ua faamoemoe e faailoa atu ai o lē o loo laeiina o loo i lalo o le feagaiga ma o lea ua i ai se tiute e a’oa’o atu ma auauna atu ma e tatau ona lagolagoina i lena auaunaga. O le faamoemoega e fesootai i ai, o le faamanatu lea i ē o laeiina, o latou tiutetauave o le feagaiga. E leai se maneta i o latou lavalava tulagaese po o ni faatusa, ua na o se faamanatu manaomia pe aoga o tiutetauave faapitoa ua tauaveina e e laeiina. E moni foi lenei mea i faatusa o mama faamau po o mama faaipoipo ma o latou matafaioi i le tuuina atu o se faaaliga i tagata maitau po o le faamanatu i tagata e laeiina o a latou tiutetauave faafeagaiga.
II.
O le mea sa ou fai atu ai e uiga i feagaiga o se faavae mo le faatonutonuina o olaga o tagata taitoatasi e faatatau patino i feagaiga faalelotu. O le faavae ma le talafaasolopito o le tele o sootaga faalelotu ma tulaga manaomia e faavae i feagaiga. Mo se faataitaiga, o le feagaiga FaaAperaamo e taua tele i nisi o tu masani maoae faalelotu. E folasia atu ai le manatu paia o folafolaga o feagaiga a le Atua mo Ana fanau. E faasino soo le Feagaiga Tuai i feagaiga a le Atua ma Aperaamo ma lana fanau.1
O le vaega muamua o le Tusi a Mamona, lea sa tusiaina i le vaitau o le Feagaiga Tuai, o loo faaali manino mai ai le matafaioi o feagaiga i le talafaasolopito ma tapuaiga a Isaraelu. Sa ta’u atu ia Nifae e faapea o tusitusiga a Isaraelu o lena vaitau “o se talafaamaumau lea o tagata Iutaia, ua i ai i totonu feagaiga a le Alii, na ia faia i le aiga o Isaraelu.”2 O le tusi a Nifae o loo faasino soo atu foi i le feagaiga FaaAperaamo3 ma ia Isaraelu “o le nuu o le feagaiga a le Alii.”4 O le tu masani o le osifeagaiga ma le Atua po o taitai faalelotu o loo tusia foi i le Tusi a Mamona e uiga ia Nifae, Iosefa i Aikupito, Tupu o Peniamina, Alema, ma Kapeteni Moronae.5
III.
Ina ua oo mai le taimi mo le toefuataiga o le atoaga o le talalelei a Iesu Keriso, sa valaauina ai e le Atua se perofeta, o Iosefa Samita. Tatou te le iloa le anotusi atoatoa o uluai faatonuga a le agelu o Moronae i lenei perofeta talavou faatagata matua. Tatou te iloa sa ia ta’u atu ia Iosefa “sa i ai i le Atua se galuega mo [ia] e fai” ma “o le atoaga o le Talalelei e faavavau” e tatau ona aumai, e aofia ai “folafolaga na faia i tamā.”6 Tatou te iloa foi o tusitusiga paia sa faitau malosi i ai le taulealea o Iosefa—e oo lava ae le’i faatonuina o ia e faatulaga se ekalesia—o aoaoga e tele e uiga i feagaiga sa ia faaliliuina i le Tusi a Mamona. O lena tusi o le punavai sili o le Toefuataiga mo le atoaga o le talalelei, e aofia ai le fuafuaga a le Atua mo Ana fanau, ma ua tumu le Tusi a Mamona i maufaasino i feagaiga.
I le faitau lelei ai i le Tusi Paia, masalo sa iloa e Iosefa le maufaasino a le tusi o Eperu i le finagalo o le Faaola e “osi se feagaiga fou ma le aiga o Isaraelu atoa ma le aiga o Iuta.”7 O loo faasino foi Eperu ia Iesu o “le puluvaga o le feagaiga fou.”8 O le mea taua, o le tala faatusipaia o le galuega a le Faaola i la le tino ua faaulutalaina “O le Molimau Fou,” o se uiga tutusa mo le “O Le Feagaiga Fou.”
O feagaiga o ni faavae i le toefuataiga o le talalelei. Ua manino lava lenei mea i uluai laasaga na faatonuina ai e le Alii le Perofeta e faia i le faatulagaina o Lana Ekalesia. O le taimi lava na mae’a ona lolomiina ai le Tusi a Mamona, sa faatonu ai e le Alii le faatulagaina o Lana Ekalesia toefuataiina, sa le’i pine ae faaigoa i le Ekalesia a Iesu Keriso o le Au Paia o Aso e Gata Ai.9 O le faaaliga na tusia ia Aperila 1830 ua faatonuina ai e faapea, a mae’a le “molimau” a tagata (o lona uiga e molimau ma le faamaoni) “ua latou salamo moni ia latou agasala uma, ma ua loto e ave i o latou luga le suafa o Iesu Keriso, ua i ai se naunautai e auauna atu ia te ia e oo i le iuga.”10
O lenei faaaliga lava e tasi na faatonu ai le Ekalesia ia “potopoto soo faatasi … e taumamafa i le areto ma le uaina [vai] i le faamanatuina o le Alii o Iesu.” O le taua o lenei sauniga ua manino i upu ua faamaoti mai mo le toeaina po o le ositaulaga o loo faatautaiina. Na te faamanuia i faatusa o le areto mo “agaga o i latou uma o e fetagofi i ai, ina ia latou … molimau atu ia te oe, le Atua e, le Tama Faavavau, latou te loto ina ave i o latou luga le suafa o lou Alo, ma manatua pea o ia ma tausi i ana poloaiga ua ia tuuina mai ia te i latou.”11
O le matafaioi autu o feagaiga i le Ekalesia faatoa toefuataiina sa toe faamautuina i le faatomuaga na tuuina mai e le Alii mo le uluai lomiga o Ana faaaliga. O iina o loo folafola mai ai e le Alii ua Ia valaauina Iosefa Samita ona o e o loo nonofo i le lalolagi ua “se ese mai a’u sauniga, ma soli la’u feagaiga tumau e faavavau”12 Ua faamanino atili mai e lenei faaaliga na tuuina mai Ana poloaiga “ina ia mafai ona faatuina o la’u feagaiga tumau e faavavau.”13
I le asō ua i ai so tatou malamalamaaga sili atu e uiga i le matafaioi o feagaiga i le Ekalesia toefuataiina ma tapuaiga a ona tagata. Na tuuina mai e Peresitene Gordon B Hinckley lenei aotelega o aafiaga o o tatou papatisoga ma le ‘aai ma feinu i le faamanatuga i vaiaso taitasi: “O tagata uma o lenei ekalesia o e ua ulu ifo i vai o le papatisoga ua avea ma vaega o se feagaiga paia. O taimi taitasi tatou te aai ma feinu ai i le faamanatuga o le talisuaga a le Alii, tatou te faafouina ai lena feagaiga.”14
Ua toe faamanatu mai ia i tatou e le tele o failauga i lenei konafesi faapea o loo faasino soo atu Peresitene Russell M. Nelson i le ata o le faaolataga o le “ala o feagaiga” lea e “toe taitai atu ai i tatou i le [Atua]” ma e “faatatau uma lava i lo tatou sootaga ma le Atua.”15 Ua ia aoao mai e uiga i le taua o feagaiga i a tatou sauniga o le malumalu ma uunaia i tatou e tagai i le taunuuga mai le amataga ma ia “mafaufau faaselesitila.”16
IV.
Ia, ou te tautala atili atu i feagaiga o le malumalu. I le faataunuuga o lona tiutetauave e toefuatai mai le atoaga o le talalelei a Iesu Keriso, sa faaalu ai e le Perofeta o Iosefa Samita le tele o ona tausaga faaiu i le faatonuina o le fausiaina o se malumalu i Navu, Ilinoi. Na auala mai ia te ia na faaali mai i ai e le Alii aoaoga paia, aoaoga faavae, ma feagaiga mo ē suia o ia e faatautaia i totonu o le malumalu. O iina sa tatau ai i tagata ua maua faaeega paia ona aoaoina i le ata o le faaolataga a le Atua ma valaaulia ia osia feagaiga paia. O i latou na ola faamaoni i na feagaiga sa folafola i ai le ola e faavavau, o lea “o mea uma e ā i latou” ma o i latou ia “o le a nonofo i luma o le Atua ma lana Keriso e faavavau faavavau lava.”17
O sauniga o le faaeega paia i le Malumalu i Navu sa faatautaia ae tuliesea loa o tatou uluai paionia e amata le latou malaga faasolopito i atumauga mamao i Sisifo. E tele a tatou molimau mai na paionia e faapea o le mana sa latou mauaina mai le noatia ia Keriso i o latou faaeega paia i le Malumalu o Navu na latou maua ai le malosi e fai ai la latou malaga maoae ma faamautu ai i latou lava i Sisifo.18
O tagata ua maua faaeega paia i totonu o se malumalu paia e tatau ona laeiina se ofusa o le malumalu, o se ofu e le vaaia ona e ofuina i lalo ifo o lavalava i fafo. E faamanatu atu ai i tagata ua maua faaeega paia feagaiga paia ua latou osia atoa ai ma faamanuiaga ua folafola atu ia i latou i totonu o malumalu paia. Ina ia ausia na faamoemoega paia, ua faatonuina ai i tatou ia ofuina i taimi uma ofusa o le malumalu, ae na o le pau lava ni tuusaunoaga e fai, e mo tulaga e tatau ai. Ona o feagaiga e leai se “aso malolo,” o le aveesea o ofusa o se tasi e mafai ona malamalama i ai, o se faafitia o tiutetauave ma faamanuiaga e faatatau i ai. I se eseesega, o tagata e laeiina o latou ofusa ma le faamaoni ma tausia pea a latou feagaiga o le malumalu, ua faamautuina lo latou avea ma soo o le Alii o Iesu Keriso.
O loo fausiaina e Le Ekalesia a Iesu Keriso o le Au Paia o Aso e Gata Ai ia malumalu i le lalolagi atoa. O lo latou faamoemoega o le faamanuiaina lea o fanau o le feagaiga a le Atua i tapuaiga i malumalu ma faatasi ai ma tiutetauave ma mana paia ma faamanuiaga tulagaese o le noatia ia Keriso latou te mauaina e ala i feagaiga.
O le Ekalesia a Iesu Keriso ua iloaina o se ekalesia lea e faamamafa ai le osiaina o feagaiga ma le Atua. O feagaiga o loo i totonu o sauniga taitasi o le faaolataga ma le faaeaga lea o loo faatautaia e lenei Ekalesia toefuataiina. O le sauniga o le papatisoga ma ona feagaiga e fesootai ai o mea taua ia e manaomia mo le ulufale atu i le malo selesitila. O sauniga ma feagaiga e fesootai o le malumalu o mea taua ia e manaomia mo le faaeaga i le malo selesitila, o le ola e faavavau lea, “o le meaalofa silisili lea o meaalofa uma a le Atua.”19 O le taulaiga lena a Le Ekalesia a Iesu Keriso o le Au Paia o Aso e Gata Ai.
Ou te molimau atu o Iesu Keriso, o le ao o lena Ekalesia, ma tuuina atu Ana faamanuiaga ia i latou uma o e saili e tausia a latou feagaiga paia. I le suafa o Iesu Keriso, amene.