Valaau Atu, Aua Ne’i [E] Pa’ū
Afai tatou te valaau atu i le Atua, ou te molimau atu o le a tatou le pa’ū’ū lava.
O le asō, ou te fia amata i le molimau atu ma le mautinoa atoatoa i totonu o lo’u loto e faafofoga le Atua ia tatou tatalo ma tali mai i ai i se auala patino lava.
I le i ai o se lalolagi i taimi o le lemautonu, tiga, le fiafia, ma le lotonutimomoia, atonu tatou te lagona le lilifa e faalagolago tele atu i tomai ma mea patino e fiafia i ai, faapea foi ma le poto ma le saogalemu lea e sau mai le lalolagi. O lenei tulaga e mafua ai ona tatou tulei i tua le punavai moni o le fesoasoani ma le lagolago lea e mafai ona faafetauia luitau o lenei olaga faaletino.
Ou te manatua se mea na tupu a o taofia au i le falemai ona o se ma’i, ma sa faigata ona ou moe. Ina ua ou tapeina moli ma na pogisa le potu, sa ou vaaia se faailo o atagia i luga o le taualuga sa i ou luma, e faapea, “Valaau atu, aua ne’i [e] pa’ū.” I le aso na sosoo ai, sa ou te’i i le vaaia o lenei lava savali sa i ai foi i isi vaega o le potu.
Aisea na matuā taua ai lena savali? Ina ua ou fesili i tausisoifua e uiga i ai, sa ia fai mai, “E mo le taofia o se manu’aga e ono faateteleina ai lou tiga o loo i ai.”
O lenei olaga, e ala i lona natura, e aumaia ai aafiaga tiga, o ni isi sa i ai lava i o tatou tino faaletino, o ni isi ona o o tatou vaivaiga po o puapuaga, o ni isi ona o le auala e faaaoga ai e isi o latou faitalia, ma o ni isi ona o le faaaogaina o o tatou lava faitalia.
E i ai ea se folafolaga e sili atu ona mamana nai lo le folafolaga na faia e le Faaola lava Ia ina ua Ia tautino mai, “Ole atu, ona foaiina mai ai lea ia te outou; saili, ona outou maua ai lea; tu’itu’i atu,” pe valaau atu, “ona toina ai lea ia te outou”?1
O le tatalo o le auala lea o fesootaiga ma lo tatou Tama Faalelagi lea e mafai ai ona tatou “valaau atu, ma aua ne’i [e] pa’ū.” Peitai, e i ai tulaga ia atonu tatou te mafaufau ai e le’i lagona le valaau atu ona tatou te le maua se tali vave po o se tali e tusa ai ma o tatou faamoemoega.
O ni isi taimi, o lenei mea e oo atu ai i le popolevale, faanoanoa, ma le le fiafia. Ae ia manatua le faailoaga o le faatuatua o Nifae i le Alii ina ua ia fetalai mai, “E faapefea la ona lē mafai ona ia a’oa’oina o a’u, ia ‘ou fausia se vaa?”2 O lenei, ou te fesili atu ia te outou, e faapefea ona lē mafai e le Alii ona aoaoina outou, ina ia outou le pa’ū’ū?
O le mautinoa i tali a le Atua e faaalia ai le taliaina o Ona ala e le o o tatou ala ia3 ma “o le a oo mai mea uma i lo latou taimi.”4
O le mautinoa o le iloa o i tatou o fanau a se Tama Faalelagi alofa ma agalelei ma alofa mutimutivale, e tatau ona avea ma faaosofiaga e “valaau atu” i le tatalo tuuto ma se uiga faaalia o le “tatalo e le aunoa, ma ia le faavaivai; … ina ia mafai ona avea a [tatou] galuega mo le manuia o o [tatou] agaga.”5 Vaai faalemafaufau i lagona o le Tama Faalelagi pe afai o tatalo taitasi tatou te faia o se talosaga i le suafa o Lona Alo, o Iesu Keriso. Ou te talitonu, oka se mana ma se agavaivai e faaaliaina pe a tatou faia o lea!
Ua tumu tusitusiga paia i faataitaiga o i latou o e na valaau atu i le Atua ina ia latou le pa’ū’ū. O Helamana ma lana autau, ao fetaiai ma o latou puapuaga, na valaau atu i le Atua, ma sasaa atu o latou loto i le tatalo. Sa latou maua le faamautinoaga, filemu, faatuatua, ma le faamoemoe, maua le lototele ma le naunautai seia oo ina ausiaina la latou sini.6
Manatu i le ala atonu na valaau atu ai Mose ma tagi atu i le Atua ina ua tu o ia i le va o le Sami Ulaula ma le latalata atu o le Au Aikupito e osofai, po o Aperaamo ina ia usitaia le avea’i ia ositaulagaina lona atalii o Isaako.
Ou te mautinoa o outou taitoatasi na maua ma o le a maua foi ni aafiaga e faapea, o le valaau atu o le a avea ma tali e aua ne’i pa’u.
I le tolusefulu tausaga ua mavae, ao ma sauni ma lo’u toalua mo le ma faaipoipoga faalemalo ma le ma faaipoipoga faalemalumalu, sa ma maua ai se valaau na logoina ai i ma’ua ua le oo faaipoipoga faalemalo ona o se solotetee. Na ma maua le valaau ae toe tolu aso oo i le aso na tuupoina mo le sauniga. I le mavae ai o ni taumafaiga i isi ofisa ma sa le maua ai ni avanoa, sa amata ona ma lagona le le fiafia ma masalosalo e mafai moni ona ma faaipoipo e pei ona sa fuafuaina ai.
Sa ma’ua “valaau atu,” ma lau uo ma sasaa atu o ma loto i le Atua e ala i le tatalo. Mulimuli ane, sa ta’u mai e se tasi ia i ma’ua e uiga i se ofisa i se taulaga laitiiti i gauta o le nuu lea sa pulenuu ai se tagata e masani ai. Sa lei toe faatali ae ma o loa e asiasi ia te ia ma talosagaina pe mafai ona faafaaipoipo i ma’ua. I lo ma olioli tele, sa malie mai o ia. Sa faamamafa mai e lana failautusi ia i ma’ua, e tatau ona ma aumaia se tusi faamaonia mai lena nuu ma tiliva atu pepa faamatalaga uma a o lei oo i le aoauli o le aso na sosoo ai.
O le aso na sosoo ai, sa ma o atu ai i le taulaga laititi ma o atu i le ofisa o leoleo e talosaga ia pepa faamatalaga na manaomia. Na faateia i ma’ua, i le faapea mai o le alii ofisa, na te le aumaia ia i ma’ua ona e toatele ulugalii talavou na sosola ese mai o latou aiga e faaipoipo faalilolilo i le taulaga lea, ae o le mea moni e le o le tulaga lea sa ma i ai. Sa toe lofituina foi i ma’ua i le fefe ma le faanoanoa.
Ou te manatua lo’u valaau atu lē leoa i lo’u Tama Faalelagi ina ia ’aua nei ou pa’ū. Sa ou maua se uunaiga manino i lo’u mafaufau, sa faafia ona fai mai, “Pepa faataga o le malumalu, pepa faataga o le malumalu.” Sa vave ona ou aumaia i fafo lo’u pepa faataga o le malumalu ma tuu atu i le alii ofisa, lea sa le mautonu ai la’u uo.
Oka se ma tete’i ina ua ma faalogo atu o fai mai le alii ofisa, “Aisea na lua le fai mai ai o oulua e mai i Le Ekalesia a Iesu Keriso o le Au Paia o Aso e Gata Ai? Ou te iloa lelei le lua ekalesia.” Sa ia amataina loa i le taimi lena le tapenaga o pepa o faamatalaga. Sa atili lo ma tete”i ina ua aluese le alii ofisa mai le ofisa e aunoa ma se tala na fai mai.
Na mavae le limasefulu minute, ae sa le’i foi mai lava o ia. Ua ta le 11:55 i le taeao, ma sa na o le aoauli lava na tatau ona tiliva atu ai ia pepa. Sa faafuasei ona toe tu mai o ia ma se tamai taifau aulelei ma fai mai, o se meaalofa o le faaipoipoga ma tuu mai ia i ma’ua faatasi ma pepa o faamatalaga.
Sa ma taufetuli atu i le ofisa o le pulenuu, faatasi ma a maua pepa o faamatalaga ma le ma taifau fou. Ona ma vaaia lea o se taavale a le malo o sau agai ia i ma’ua. Sa tu i ona luma. Sa tu le taavale, ma sa matou vaaia le failautusi o i totonu. Ina ua vaai mai ia i matou, sa ia fai mai, “Ou te faamalie atu; sa ou fai atu ia te outou o le aoauli. E tatau ona ou alu i se isi fuafuaga.”
Sa ou faamaualalo a’u lava ma le filemu, ma valaau atu ma lo’u loto atoa i lo’u Tama Faalelagi, ma toe ole atu mo se fesoasoani ia “aua ne’i [o’u] pa’ū.” Sa vave ona tupu le vavega. Sa fai mai le failautusi ia i ma’ua, “Tai manaia le lua taifau. O fea ou te maua ai se taifau faapena mo lo’u atalii?”
“E mo oe, sa ma tali faavave atu ai.
Sa tilotilo mai le failautusi ia i ma’ua ma le te’i ma fai mai, “Ia, tatou o i le ofisa e fai feutagaiga.”
O le lua o aso mulimuli ane, sa ma faaipoipo faalemalo ai ma Carol, e pei ona sa fuafuaina, ona faamauina ai lea o i ma’ua i le Malumalu o Lima Peru.
Ioe, e tatau ona tatou manatua o le valaau atu o se tulaga o le faatuatua ma faatinoga—faatuatua e iloa ai, o loo i ai so tatou Tama Faalelagi o le e tali mai ia tatou tatalo e tusa ai ma Lona atamai e le gata, ma sosoo ai ma, faatinoga e ogatasi ma mea na tatou ole atu ai. O le tatalo—valaau atu—e mafai ona avea ma faailoga o lo tatou faamoemoe. Ae o le faia o se faatinoga pe a uma ona tatalo o se faailoga lea e moni lo tatou faatuatua—o le faatuatua e tofotofoina i taimi o tiga, fefe, po o le lē fiafia.
Ou te fautuaina e mafaufau i mea nei:
-
Ia mafaufau i taimi uma o le Alii o lau filifiliga muamua lea mo se fesoasoani.
-
Valaau atu, aua ne’i [e] pa’u. Liliu atu i le Atua i le tatalo faamaoni.
-
A uma ona tatalo, ia fai mea uma e te mafaia ia maua ai faamanuiaga sa e tatalo ai.
-
Faamaualalo outou lava ia talia le tali i Lana taimi ma Lana ala.
-
Aua le tu! Ia agai pea i luma i le ala o feagaiga, a o e faatali mo se tali.
Atonu o i ai se tasi i le taimi lava lenei o le, ona o tulaga, o lagona e pei o le a pa’ū’ū ma ua mananao e valaau atu, e pei ona sa faia e Iosefa Samita ina ua tagi atu, “Le Atua e, o fea ea lau afio? … O le a le umi e taofi ai lou aao?”7
E oo lava i tulaga e pei o nei, ia tatalo ma le “malosiaga faaleagaga,” e pei ona sa aoao mai Peresitene Nelson,8 aua e faafofogaina i taimi uma au tatalo!
Manatua le viiga lenei:
Pe na faia sau tatalo,
I le taeao nei?
I le suafa o Keriso,
Na e valaau ma ifo
Ia puipui mai?
A o tatou tatalo, e mafai ona tatou lagona le opo a lo tatou Tama Faalelagi, o le na auina mai Lona Alo e Toatasi na Fanaua e faamama a tatou avega, aua afai tatou te valaau atu i le Atua, ou te molimau atu o le a tatou lē pa’ū’ū lava. I le suafa o Iesu Keriso, amene.