ព្រះចេស្ដារបស់ព្រះយេស៊ូវគ្រីស្ទនៅក្នុងជីវិតយើងជារៀងរាល់ថ្ងៃ
ប្រភពនៃកម្លាំងយើងនោះគឺសេចក្ដីជំនឿលើព្រះយេស៊ូវគ្រីស្ទ កាលដែលយើងព្យាយាមដោយចេតនាមកកាន់ទ្រង់ជារៀងរាល់ថ្ងៃ ។
បងប្អូនប្រុសស្រីជាទីស្រឡាញ់ នេះជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ឱ !វាជាអំណរអ្វីម្ល៉េះ ដែលបានជួបជុំគ្នាក្នុងនាមជាសាសនាចក្ររបស់ទ្រង់ ។ ខ្ញុំមានអំណរគុណដែល ប្រធាន រ័សុល អិម ណិលសុន បានរំឭកយើងឲ្យប្រើឈ្មោះត្រឹមត្រូវនៃសាសនាចក្ររបស់ព្រះអម្ចាស់ជាញឹកញាប់ ដើម្បីឲ្យយើងចងចាំថានេះជាសាសនារបស់នរណា ហើយការបង្រៀនរបស់នរណាដែលយើងធ្វើតាម ។
ប្រធាន ណិលសុន បានថ្លែងថា ៖ « នៅពេលដ៏ខ្លីខាងមុខនេះ យើងនឹងឃើញការបើកសម្តែង ដ៏មហិមាអំពីព្រះចេស្តារបស់ព្រះអង្គសង្គ្រោះ ដែលលោកិយនេះមិន ធ្លាប់បានឃើញពីមុនមក ។… នោះទ្រង់នឹងប្រទានឯកសិទ្ធិ ពរជ័យ និងអព្ភូតហេតុរាប់មិនអស់មកលើមនុស្សស្មោះត្រង់ » ។១
ឯកសិទ្ធិ ដ៏អស្ចារ្យមួយដែលខ្ញុំ និងភរិយាខ្ញុំ រេនី មាន គឺការជួបនឹងពួកបរិសុទ្ធនៅកន្លែងដែលយើងបម្រើ ។ យើងស្ដាប់ដំណើររឿងរបស់ពួកគេ យើងធ្វើជាសាក្សីនៃការបាត់បង់របស់ពួកគេ យើងរំលែកទុក្ខពួកគេ ហើយយើងរីករាយនឹងជោគជ័យរបស់ពួកគេ ។ យើងបានឃើញពរជ័យ និងអព្ភូតហេតុជាច្រើន ដែលព្រះអង្គសង្គ្រោះបានប្រទានដល់ពួកអ្នកស្មោះត្រង់ ។ យើងបានជួបអ្នកដែលបានឆ្លងកាត់អ្វីដែលមិនអាចទៅរួច ជាអ្នកដែលបានរងទុក្ខហួសប្រមាណ ។
យើងបានឃើញការបើកសម្ដែងនៃព្រះចេស្តារបស់ព្រះអង្គសង្គ្រោះតាមស្ត្រីមេម៉ាយម្នាក់ ដែលបានបាត់បង់ស្វាមី ពេលដែលពួកគាត់កំពុងធ្វើកិច្ចការរបស់ព្រះនៅក្នុងប្រទេស បូលីវា ។២ យើងបានឃើញព្រះចេស្តានេះតាមស្ត្រីវ័យក្មេងម្នាក់នៅប្រទេស អាហ្សង់ទីន ដែលត្រូវបានធ្លាក់ទៅក្រោមរថភ្លើង ហើយបាត់បង់ជើងរបស់នាង ដោយសារមានគេចង់លួចទូរសព្ទដៃរបស់នាង ។៣ ហើយឪពុកពោះម៉ាយរបស់នាង ដែលឥឡូវនេះច្បាស់ជាខិតខំកែខៃនិងពង្រឹងកូនស្រីគាត់ បន្ទាប់ពីអំពើដ៏ឃោរឃៅដែលមិនអាចពន្យល់បាននេះកើតឡើង ។ យើងបានឃើញព្រះចេស្ដារមានក្នុងក្រុមគ្រួសារ ដែលបាត់បង់ផ្ទះ និងទ្រព្យសម្បត្តិទាំងអស់ ពេលភ្លើងឆេះនៅប្រទេស ឈីលី តែពីរថ្ងៃមុនបុណ្យគ្រីស្ទម៉ាស់នៅ ឆ្នាំ ២០២២ ។៤យើងបានឃើញព្រះចេស្ដារមានដល់ពួកអ្នកដែលរងទុក្ខបន្ទាប់ពីការលែងលះដ៏តក់ស្លុត និងជនស្លូតត្រង់ដែលទទួលរងការរំលោភបំពាន ។
តើអ្វីទៅដែលផ្ដល់អំណាចដល់ពួកគេឲ្យឆ្លងកាត់ការណ៍ដ៏លំបាកទាំងនេះ ? តើអ្វីទៅដែលផ្ដល់កម្លាំងបន្ថែមឲ្យពួកគេបន្តទៅមុខ ពេលដែលអ្វីៗហាក់ដូចជាបាត់បង់អស់នោះ ?
ខ្ញុំបានរកឃើញថា ប្រភពនៃកម្លាំងនោះគឺសេចក្ដីជំនឿលើព្រះយេស៊ូវគ្រីស្ទ កាលដែលយើងព្យាយាមដោយចេតនាមកកាន់ទ្រង់ជារៀងរាល់ថ្ងៃ ។
ព្យាការី យ៉ាកុប បានបង្រៀនថា « ហើយទ្រង់យាងមកឯលោកិយ ដើម្បីទ្រង់អាចសង្គ្រោះមនុស្សលោកទាំងអស់ បើសិនជាពួកគេព្រមស្តាប់តាមព្រះបន្ទូលរបស់ទ្រង់ ដ្បិតមើលចុះទ្រង់រងទុក្ខការឈឺចាប់នៃមនុស្សលោកទាំងអស់ មែនហើយ គឺការឈឺចាប់របស់សត្វលោកសព្វសារពើ ដែលរស់នៅទាំងប្រុសទាំងស្រី និងក្មេងៗដែលជាគ្រួសារនៃលោកអ័ដាម » ។៥
ពេលខ្លះ ការមានសេចក្ដីជំនឿលើព្រះយេស៊ូវគ្រីស្ទអាចមើលទៅដូចជាពុំអាចទៅរួច ស្ទើរតែមិនអាចទទួលបាន ។ យើងអាចនឹងគិតថា ការមកឯព្រះគ្រីស្ទតម្រូវឲ្យមានកម្លាំង អំណាច និងភាពល្អឥតខ្ចោះ ដែលយើងគ្មាន ហើយយើងមិនអាចស្វែងរកថាមពលដើម្បីធ្វើវាទាំងអស់បានទេ ។ ប៉ុន្តែ អ្វីដែលខ្ញុំបានរៀនពីមនុស្សទាំងអស់នេះ គឺថាសេចក្ដីជំនឿលើព្រះយេស៊ូវគ្រីស្ទនោះហើយ គឺជាអ្វីដែលផ្ដល់ថាមពលដល់យើងដើម្បីចាប់ផ្ដើមការធ្វើដំណើររបស់យើង ។ ជួនកាល យើងអាចគិតថា « ខ្ញុំត្រូវតែកែតម្រូវជីវិតខ្ញុំសិន មុននឹងខ្ញុំមកឯព្រះយេស៊ូវ » ប៉ុន្តែជាក់ស្តែងនោះគឺថា យើងមកឯព្រះយេស៊ូវដើម្បីកែតម្រូវជីវិតរបស់យើងតាមរយៈទ្រង់ ។
យើងមិនមកឯព្រះយេស៊ូវដោយសារយើងល្អឥតខ្ចោះនោះទេ។ យើងមកឯទ្រង់ ព្រោះតែយើងមានគុណវិបត្តិ ហើយយើងអាច « បានល្អឥតខ្ចោះ » នៅក្នុងទ្រង់ ។៦
តើយើងចាប់ផ្ដើមអនុវត្តសេចក្ដីជំនឿបន្តិចបន្តួចជារៀងរាល់ថ្ងៃបានដោយរបៀបណា ? សម្រាប់ខ្ញុំ វាចាប់ផ្ដើមនៅពេលព្រឹក ៖ នៅពេលខ្ញុំក្រោកឡើង ខ្ញុំអធិស្ឋានជំនួសឲ្យការមើលទូរសព្ទរបស់ខ្ញុំ ។ សូម្បីតែជាការអធិស្ឋានដ៏សាមញ្ញមួយក្តី ។ បន្ទាប់មកខ្ញុំអានព្រះគម្ពីរ ។ ការធ្វើបែបនេះជួយខ្ញុំធ្វើសេចក្ដីសញ្ញាប្រចាំសប្ដាហ៍របស់ខ្ញុំដែលបានចុះ នៅពេលខ្ញុំទទួលសាក្រាម៉ង់ដើម្បី « ចងចាំទ្រង់ជានិច្ច » ។៧ ពេលខ្ញុំចាប់ផ្ដើមថ្ងៃរបស់ខ្ញុំដោយមានការអធិស្ឋាន និងព្រះគម្ពីរ នោះខ្ញុំអាច « ចងចាំទ្រង់ » ពេលខ្ញុំមើលទូរសព្ទរបស់ខ្ញុំ ។ ខ្ញុំអាច « ចងចាំទ្រង់ » ពេលខ្ញុំប្រឈមនឹងបញ្ហា និងការទាស់ទែង ហើយខ្ញុំព្យាយាមប្រឈមនឹងវាដូចជាព្រះយេស៊ូវនឹងធ្វើ ។
ពេលខ្ញុំ « ចងចាំទ្រង់ » ខ្ញុំមានបំណងប្រាថ្នាដើម្បីផ្លាស់ប្ដូរ ដើម្បីប្រែចិត្ត ។ ខ្ញុំស្វែងរកប្រភពនៃថាមពល ដើម្បីរក្សាសេចក្ដីសញ្ញាខ្ញុំ ហើយខ្ញុំទទួលអារម្មណ៍ពីឥទ្ធិពលនៃព្រះវិញ្ញាណបរិសុទ្ធក្នុងជីវិត « ហើយកាន់តាមព្រះបញ្ញត្តិទ្រង់ ដែលទ្រង់បានប្រទានដល់ [ ខ្ញុំ ] ប្រយោជន៍ឲ្យ [ ខ្ញុំ ] អាចបានព្រះវិញ្ញាណរបស់ទ្រង់គង់នៅជាមួយនឹង [ ខ្ញុំ ] ជាដរាប » ។៨ វាជួយខ្ញុំឲ្យស៊ូទ្រាំដល់ទីបំផុត ។៩ ឬយ៉ាងហោចណាស់ដល់ទីបញ្ចប់នៃថ្ងៃនោះ ! ហើយនៅថ្ងៃដែលខ្ញុំភ្លេចចងចាំទ្រង់អស់ពេញមួយថ្ងៃ ក៏ទ្រង់នៅតែគង់នៅទីនោះ ស្រឡាញ់ខ្ញុំ និងប្រាប់ខ្ញុំថា « វាមិនថ្វីទេ កូនអាចព្យាយាមម្ដងទៀតនៅថ្ងៃស្អែក » ។
ទោះបីជាយើងចងចាំទ្រង់មិនបានល្អឥតខ្ចោះក្តី ក៏ព្រះវរបិតាសួគ៌ដែលពោរពេញដោយក្ដីស្រឡាញ់របស់យើងមិនដែលភ្លេចយើងឡើយ ។
កំហុសមួយដែលយើងធ្វើជាញឹកញាប់ គឺគិតថាការរក្សាតាមសេចក្ដីសញ្ញា ឬការសន្យាដែលយើងធ្វើជាមួយព្រះ គឺជាប្រតិបត្តិការដែលយើងធ្វើជាមួយទ្រង់ ៖ ខ្ញុំគោរពតាម ហើយទ្រង់ការពារខ្ញុំពីអ្វីៗដែលអាក្រក់កុំឲ្យកើតឡើងចំពោះខ្ញុំ ។ ខ្ញុំបង់ដង្វាយមួយភាគក្នុងដប់ ហើយខ្ញុំនឹងមិនបាត់បង់ការងារ ឬភ្លើងនឹងមិនឆេះផ្ទះខ្ញុំឡើយ ។ ប៉ុន្តែ ពេលដែលអ្វីៗមិនបានដូចការរំពឹងទុក នោះយើងអំពាវនាវដល់ព្រះអម្ចាស់ « យើង វិនាសហើយលោកមិនខ្វល់ទេឬអី ? »១០
សេចក្ដីសញ្ញារបស់យើងមិនគ្រាន់តែជាប្រតិបត្តិការនោះទេ វាជាការផ្លាស់ប្ដូរ ។១១ តាមរយៈសេចក្ដីសញ្ញាខ្ញុំ នោះខ្ញុំទទួលបានអំណាចនៃការញែកចេញជាបរិសុទ្ធ និងការពង្រឹងរបស់ព្រះយេស៊ូវគ្រីស្ទ ដែលអនុញ្ញាតឲ្យខ្ញុំក្លាយជាមនុស្សថ្មីម្នាក់ ដើម្បីអត់ទោសដល់អ្វីដែលមិនអាចអត់ទោស ដើម្បីឈ្នះអ្វីដែលមិនអាចឈ្នះបាន ។ ការចងចាំព្រះយេស៊ូវគ្រីស្ទដោយចេតនា តែងតែ មានឥទ្ធិពល វាផ្ដល់កម្លាំងបន្ថែមដល់ខ្ញុំដើម្បី « កាន់តាមព្រះបញ្ញត្តិទ្រង់ ដែលទ្រង់បានប្រទានដល់ [ ខ្ញុំ ] » ។១២វាជួយខ្ញុំឲ្យធ្វើជាមនុស្សល្អ ឲ្យញញឹមទោះជាគ្មានអ្វីដែលត្រូវញញឹម ឲ្យក្លាយជាអ្នកដែលផ្សះផ្សាគេ១៣ដើម្បីចៀសវាងពីការទាស់ទែង ដើម្បីទុកឲ្យព្រះឈ្នះក្នុងជីវិតខ្ញុំ ។១៤
ពេលដែលការឈឺចាប់របស់យើង ឬរបស់នរណាម្នាក់ដែលយើងស្រឡាញ់មានខ្លាំងរហូតដល់យើងមិនអាចទ្រាំបាន នោះការចងចាំព្រះយេស៊ូវគ្រីស្ទ និងការមកឯទ្រង់អាចសម្រាលបន្ទុក បន្ទន់ដួងចិត្ត និងបន្ថយការឈឺចាប់បាន ។ នេះជាអំណាចដែលពង្រឹងដល់ឪពុកម្នាក់លើសពីសមត្ថភាពធម្មជាតិរបស់គាត់ក្នុងការគាំទ្រកូនស្រីគាត់ឲ្យឆ្លងកាត់ការឈឺចាប់ខាងរាងកាយ និងខាងផ្លូវចិត្ត ដែលជើងនាងពិការ ។
ពេលដែល អែលឌើរ សូរ៉េស បានទៅទស្សនកិច្ចនៅប្រទេស អាហ្សង់ទីន កាលពីខែ មិថុនា មុននេះ ហើយបានសួរ ហ្វ្លាវៀ អំពីឧបទ្ទវហេតុដ៏សោកនាដកម្មរបស់នាង នោះនាងបានឆ្លើយតបដោយស្មោះត្រង់ថា « ខ្ញុំបានជួបភាពចលាចល ជូរចត់ កំហឹង និងការស្អប់ ពេល [ ឧបទ្ទវហេតុនេះបានកើតឡើង ] ។ អ្វីដែលបានជួយខ្ញុំគឺការមិនសួរថា ‹ ហេតុអ្វីជាខ្ញុំ ? › ប៉ុន្តែសួរថា ‹ ដើម្បីអ្វី ? ›… នេះជាអ្វីដែលបានធ្វើឲ្យខ្ញុំកាន់តែជិតស្និតនឹងមនុស្សដទៃទៀត និងព្រះអម្ចាស់ ។ … … ជំនួសការធ្វើឲ្យខ្លួនឯងឃ្លាតឆ្ងាយពីទ្រង់ ខ្ញុំត្រូវតោងជាប់នឹងទ្រង់វិញ » ។១៥
ប្រធាន ណិលសុន បានបង្រៀនថា ៖ « រង្វាន់នៃការរក្សាសេចក្តីសញ្ញាជាមួយនឹងព្រះគឺជាព្រះចេស្តាមកពីស្ថានសួគ៌—ពោលគឺព្រះចេស្តាដែលពង្រឹងយើង ឲ្យកាន់តែខ្លាំងទប់ទល់នឹងការសាកល្បង ការល្បួង និងការឈឺចាប់ទាំងឡាយរបស់យើង ។ … … ដូច្នេះ អ្នកដែលរក្សាសេចក្តីសញ្ញាមានសិទ្ធិទទួល សេចក្តីសម្រាក ដ៏ពិសេសមួយ » ។១៦ នេះគឺជាប្រភេទនៃសេចក្ដីសម្រាក និងភាពសុខសាន្ត ដែលខ្ញុំបានឃើញនៅក្នុងកែវភ្នែករបស់ស្ត្រីមេម៉ាយនោះ ទោះបីជាមានការឈឺចាប់ក្នុងចិត្តព្រោះបាត់បង់ស្វាមីគាត់ក្ដី ។
ព្រះគម្ពីរសញ្ញាថ្មីប្រាប់អំពីពេលមួយដែលព្រះយេស៊ូវ និងពួកសិស្សទ្រង់នៅលើទូកមួយ ៖
« នោះកើតមានខ្យល់ព្យុះជាខ្លាំង ហើយរលកបោកចូលក្នុងទូកដល់ម៉្លេះបានជាទូកពេញហើយ ។ …
« តែទ្រង់ផ្ទំលក់លើខ្នើយ … ពួកសិស្សដាស់ទ្រង់ឡើងទូលថា លោកគ្រូអើយ យើងវិនាស ហើយលោកមិនរវល់ទេឬអី ?
« កាលតើនឡើងទ្រង់កំហែងខ្យល់ ក៏បង្គាប់ទៅសមុទ្រថាចូរស្ងៀមទៅហើយឈប់ចុះ ។ …
« រួចទ្រង់មានព្រះបន្ទូលថា ហេតុអ្វីបានជាអ្នករាល់គ្នាភ័យដល់ម៉្លេះ ម្តេចក៏គ្មានសេចក្តីជំនឿ ? »១៧
ខ្ញុំតែងតែចាប់អារម្មណ៍អំពីដំណើររឿងនេះ ។ តើព្រះអម្ចាស់រំពឹងឲ្យពួកលោកប្រើសេចក្ដីជំនឿដើម្បីធ្វើឲ្យខ្យល់បានស្ងប់ឬ ? ឲ្យកំហែងខ្យល់ ? សេចក្ដីជំនឿលើព្រះយេស៊ូវគ្រីស្ទគឺជាអារម្មណ៍នៃភាពសុខសាន្តដើម្បីទប់ទល់នឹងខ្យល់ព្យុះ ដោយដឹងថាយើងនឹងមិនត្រូវវិនាសឡើយ ព្រោះទ្រង់គង់នៅក្នុងទូកជាមួយយើង ។
នេះជាប្រភេទនៃសេចក្ដីជំនឿ ដែលខ្ញុំបានឃើញពេលយើងទៅជួបក្រុមគ្រួសារជាច្រើនបន្ទាប់ពីភ្លើងឆេះនៅប្រទេស ឈីលី ។ ភ្លើងបានឆាបឆេះផ្ទះរបស់ពួកគេអស់ ពួកគេបានបាត់បង់អ្វីៗគ្រប់យ៉ាង ។ ប៉ុន្តែ ពេលយើងដើរចូលទៅក្នុងកន្លែងដែលធ្លាប់ជាផ្ទះរបស់ពួកគេ នោះពួកគេបានប្រាប់យើងអំពីបទពិសោធន៍ពួកគេ យើងមានអារម្មណ៍ថាដូចជាកំពុងឈរនៅនឹងកន្លែងបរិសុទ្ធអ៊ីចឹង ។ ប្អូនស្រីម្នាក់បានប្រាប់ភរិយាខ្ញុំថា « ពេលខ្ញុំបានឃើញផ្ទះនៅក្បែរនោះឆេះ ខ្ញុំមានអារម្មណ៍ថា ផ្ទះយើងនឹងឆេះដែរ ថាយើងនឹងបាត់បង់អ្វីៗគ្រប់យ៉ាង ។ ខ្ញុំបានទទួលភាពសុខសាន្តដែលមិនអាចពិពណ៌នាបាន ជំនួសឲ្យការអស់សង្ឃឹម ។ ដោយហេតុណាមួយនោះ ខ្ញុំបានមានអារម្មណ៍ថា អ្វីៗនឹងមិនថ្វីទេ » ។ ការទុកចិត្តលើព្រះ ហើយរក្សាសេចក្ដីសញ្ញារបស់យើងជាមួយទ្រង់ ប្រទានអំណាចដល់ភាពទន់ខ្សោយរបស់យើង ហើយលួងលោមទូក្ខសោករបស់យើង ។
ខ្ញុំមានអំណរគុណចំពោះឱកាសដែល រេនី និងខ្ញុំមាន ដើម្បីជួបនឹងពួកបរិសុទ្ធដ៏អស្ចារ្យមួយចំនួននេះ និងគំរូនៃសេចក្ដីជំនឿ កម្លាំង និងការតស៊ូរបស់ពួកគេ ។ ចំពោះរឿងរ៉ាវឈឺចាប់ និងការខកចិត្ត ដែលមិនដែលចុះផ្សាយនៅទំព័រមុខរបស់សារព័ត៌មាន ឬមិនដែលបានឮ ។ ចំពោះដំណក់ទឹកភ្នែក និងការអធិស្ឋាន បន្ទាប់ពីការបាត់បង់ ឬការលែងលះដ៏តក់ស្លុតដែលមិនបានថត ទាំងមិនដែលចុះផ្សាយអំពីការភ័យខ្លាច ទុក្ខព្រួយ ការឈឺចាប់ ដែលមិនអាចទ្រាំទ្របាន សូមថ្លែងអរគុណចំពោះសេចក្ដីជំនឿទៅលើព្រះយេស៊ូវគ្រីស្ទ និងដង្វាយធួនរបស់ទ្រង់ ។ មនុស្សទាំងនេះពង្រឹងសេចក្ដីជំនឿរបស់ខ្ញុំផ្ទាល់ ហេតុដូច្នោះហើយ ខ្ញុំមានអំណរគុណយ៉ាងជ្រាលជ្រៅណាស់ ។
ខ្ញុំដឹងថា នេះជាសាសនាចក្ររបស់ព្រះយេស៊ូវគ្រីស្ទ ។ ខ្ញុំដឹងថា ទ្រង់ត្រៀមប្រទានព្រះចេស្ដារបស់ទ្រង់ដល់យើងរួចជាស្រេច បើយើងមកឯទ្រង់ជារៀងរាល់ថ្ងៃ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕