Ang Gahum sang Paghugpong
Ang gahum sang paghugpong nagapatigayon sang indibidwal nga kaluwasan kag kaluwasan sang pamilya sang mga anak sang Dios.
Ginpromisa sang panahon ni Isaias1 “tipunon gikan sa apat ka bahin sang duta”2 kag ibalik sa “kadutaan sang ila palanublion.”3 Si Pangulong Russell M. Nelson nagtawag sining pagtipon “pinakaimportante nga nagakatabo sa kalibutan karon.”4
Ano ang tuyo sining pagtipon?
Ginhambal sang Ginuo kay Propetang Joseph Smith paagi sa rebelasyon nga tinutuyo sini nga proteksyonan ang katawhan sang kasugtanan. “Ang pagtipon sang akon katawhan sa Sion kag sa mga stake mangin palalipdan kag dalangpan sa unos kag kaakig kon ibubo ini sa bilog nga kalibutan.”5 Ang “kaakig” nga ginatumod diri amo ang resulta sang pagsupak sa mga layi kag kasugoan sang Dios.
Tuyo man sining pagtipon nga dalhon ang bugay sang kaluwasan kag pangkahitaasan sa tanan nga mabaton sini. Amo ina ang paagi para matuman ang mga promisa sang kasugtanan kay Abraham. ANaghambal ang Ginuo kay Abraham nga Paagi sa iya kabataan kag priesthood “ang tanan nga panimalay sang duta mabugayan sang mga bugay sang Ebanghelyo, nga amo ang bugay sang kaluwasan, ang kabuhi nga walay katapusan.”6 Ginpaathag ni Pangulong Nelson: “Kon batunon naton ang ebanghelyo kag magpabunyag, ginadala naton sa aton kaugalingon ang ngalan ni Jesucristo. Ang bunyag ang pwertahan sa pagpanubli sang mga ginpromisa sang Ginuo kay Abraham, Isaac, Jacob, kag sa ila mga kabataan.”7
Sang 1836 nagpakita si Moises kay Propetang Joseph Smith sa Kirtland Temple kag “gintugyan… ang mga yabi sang pagtipon sang Israel halin sa apat ka bahin sang kalibutan.”8 Nagpakita man si Elias kag “gintugyan ang dispensasyon sang ebanghelyo ni Abraham nga nagasiling, Paagi sa aton kag sa aton kabataan mabugayan ang tanan nga masunod nga henerasyon.”9 Paagi sa sining awtoridad, ginadala naton ang ebanghelyo ni Jesucristo—sa tanan nga lugar kag mga tawo kag ginatipon ang tanan nga magbaton sa kasugtanan sang ebanghelyo. Mangin “anak sila ni Abraham, sang simbahan kag ginharian, kag mga pinili sang Dios.”10
Didto man sa Kirtland Temple may ikatatlo nga mensahero nga nagpakita kay Joseph Smith kag Oliver Cowdery. Ginatumod ko si propetang Elijah, kag gusto ko maghambal parte sa awtoridad kag mga yabi nga iya ginpanumbalik.11 Ang gahum para mangin balido ang tanan nga ordinansa sang priesthod sa duta kag sa langit—ang gahum sang paghugpong—nga importante kaayo sa pagtipon kag paghanda sang mga buhi kag minatay.
Antes pa lang, ginklaro ni Moroni kay Joseph Smith nga si Elijah magadala sang awtoridad sang priesthood: “ipahayag ko sa inyo ang Pagkapari paagi [kay Elijah] nga propeta.”12 Sang ulihi si Joseph Smith nagsiling: “Ngaa ipadala si Elijah? Tungod sia ang nagakapot sang mga yabi, sang awtoridad sa paghikot sang mga ordinansa sang Priesthood; kon wala sang awtoridad, ang mga ordinansa indi mahikot sa pagkamatarong,”13 gani, ang mga ordinansa wala sing epekto sa diri kag sa wala katapusan.14
Sa Doktrina kag mga Kasugtanan ang Propeta nagsiling, “Siguro para sa iban, pinasahi ang doktrina nga aton ginahambalan—ang gahum nga nagarekord ukon nagabugkos sa duta kag sa langit. Pero, sa tanan nga panahon sa kalibutan, basta maghatag ang Ginuo sing dispensasyon sang priesthood sa isa ukon grupo sang mga tawo paagi sa matuod-tuod nga rebelasyon, may upod gid ini nga gahum. Para ang ginhimo sinang mga tawo nga may awtoridad, sa ngalan sang Ginuo, kon husto kag matutom ini nga ginahimo kag ginarekord, mangin layi ini sa duta kag sa langit, kag indi ini mabawi suno sa mando sang dakong Jehova.”15
Abi naton ang awtoridad sang paghugpong para lang sa pila ka ordinansa sa templo, pero ina nga awtoridad kinahanglan agud ang bisan ano nga ordinansa mangin balido sa duta kag sa langit.16 Ang gahum sa paghugpong nagahatag sang selyo nga lehitimo ang imo bunyag/ agud kilalahon ini diri kag sa langit. Ang tanan nga ordinansa sang priesthood ginahikot sa idalom sang mga yabi sang Pangulo sang Simbahan, kag ginklaro ni President Joseph Fielding Smith: Ang Pangulo sang Simbahan naghatag sa amon sang awtoridad, ginbutang niya ang gahum sa paghugpong sa amon priesthood, bangod sia ang nagakapot sang mga yabi.”17
May isa pa ka tinutuyo ang pagtipon sang Israel nga espesyal para sa aton kon paghugpong sa duta kag langit ang pagahambalan—ini ang pagtukod kag pagdumala sang mga templo. “Ano ang rason sang pagtipon sang … katawhan sang Dios sa bisan ano nga panahon sang kalibutan? … Para magpatindog sang balay para sa Ginuo kon sa diin mapahayag Niya ang mga ordinansa kag himaya sang Iya ginharian kag tudloan ang mga tawo sang dalan sa kaluwasan, kay may mga ordinansa kag prinsipyo nga dapat gid himuon sa lugar ukon balay nga ginpatindog para gid sa sina nga hilikuton.18
Ang gahum sang paghugpong ara man sa nagaluwas nga mga ordinansa para sa minatay nga ginahikot sa lugar nga ginpili sang Ginuo—sa Iya templo. Makita naton diri ang kasagrado sang gahum sang paghugpong—ginapatigayon sini ang kaluwasan sang indibidwal kag sang mga pamilya sa bisan diin kag bisan san-o. Wala sang teolohiya, pilosopiya, ukon awtoridad nga makatupong sining oportunidad nga para-sa-tanan. Ining gahum sang paghugpong perpekto nga ebidensya sang hustisya, kaluoy, kag pagpalangga sang Dios.
Tungod sa gahum sang paghugpong, ang aton mga tagipusuon nagabalikid man sa mga nagtaliwan na. Ang pagtipon pabalik sa kasugtanan nagasakop sang mga nagtaliwan na. Sa perpekto nga kahusay sang Dios, ang mga buhi indi makabaton sang bug-os nga kabuhi nga walay katapusan kon wala sila nagabalikid sa ila “mga ginikanan.” Ang progreso man sang ara na sa pihak nga kinabuhi, ukon sang mga manugtabok pa lang sa belo sang kamatayon nga wala nakabaton sang mga paghugpong,indi kompletomagluwas kon mahugpong sila sa aton, sa ila kaliwatan, kag kita man sa ila paagi sa ordinansa.19 Ang pangako nga magbinuligay sa magtimbang nga bahin sang belo makabig nga isa ka promisa sang bag-o kag walay katapusan nga kasugtanan. Siling ni Joseph Smith, gusto naton “segurohon nga ang aton minatay magabangon [upod sa aton] sa una nga pagkabanhaw.”20
Ang pinakamataas kag pinakabalaan nga ebidensya sang gahum sang paghugpong ara sa pagpakasal sang lalaki kag babayi sa wala katapusan kag sa pag-angot sang ila mga henerasyon. Tungod ang awtoridad sa paghikot sining mga ordinansa tama ka sagrado, ang Pangulo sang Simbahan personal nga nagadumala sang paghatag sini sa iban. Si Pangulong Gordon•B. Hinckley nagsiling sadto, “Kapila ko ginsiling nga bisan wala sing iban nga resulta ang tanan nga kasubo, kabudlayan, kag kasakit sang pagpanumbalik magluwas sa gahum sang priesthood sa paghugpong sang mga pamilya sa katubtuban, mangin mapuslanon ini tanan.”21
Kon wala sang mga sealing nga nagabugkos sang mga pamilya diri kag sa pihak nga kinabuhi, mawad-an kita sing gamot ukon mga sanga—wala sang katigulangan ukon kaliwatan. Ining mga wala nagapahigot ukon mga koneksyon nga liw-as sa pag-asawahay kag relasyon sa pamilya nga ginpahamtang sang Dios,22 nagapaslaw sang katuyuan sang pagtuga sang duta. Kon mangin kinaandan na ina, pareho lang nga ginsumpa ang duta ukon “lubos nga maguba” sa pagkari sang Ginuo.23
Makit-an naton nga “ang pag-asawahay sa tunga sang isa ka lalaki kag isa ka babayi gin-ordin sang Dios kag ang pamilya sentro sa plano sang Tagtuga para sa Iya mga anak.”24 Nakahibalo man kita nga tungod indi kita perpekto sa karon/, indi ini matuman ukon malab-ot sang iban. Apang nagalaum kita kay Cristo. Siling ni Pangulong M.•Russell Ballard, nga samtang nagahulat kita sa Ginuo, “ang balaan nga kasulatan kag mga propeta nagapamatuod nga ang mga nagatuman sang ila kasugtanan sa ebanghelyo makaangkon sang oportunidad sa pangkahitaasan.”25
Ang iban indi malipayon kag malaw-ay ang mga inagihan sa panimalay, gani wala sila nagahandum sang relasyon nga wala katapusan. Si Elder David A. Bednar nagsiling: “Sa mga nag-antos sang kasakit sang diborsyo ukon pagkaguba sang pagsalig, palihog tandai nga [ang sulundan sang Dios para sa pamilya nagasugod liwat sa inyo! Bisan mabugto ang isa ka kaw-id sang inyo henerasyon, ang matarong nga nagkalabilin sa inyo kadena importante gihapon sa wala katubtuban. Pwede ninyo madugang ang kabakod sang inyo kadena/ kag magbulig nga kay-uhon ang nabugto nga mga kaw-id. Ina nga buluhaton mahuman sing isa-isa.”26
Sang Hulyo, sa lubong ni Sister Pat Holland, asawa ni Elder Jeffrey•R. Holland, si Pangulong Nelson nagsiling, si Pangulong Nelson nagsiling: “Sa ulihi si Patricia kag Jeffrey mag-updanay liwat. Upod ang ila kabataan kag tampad-sa-kasugtanan nga mga himata para matilawan ang tanan nga kalipay nga ginhanda sang Dios sa matutom Niya nga kabataan. Ang pinakaimportante nga petsa sa kabuhi ni Patricia indi ang iya birthday ukon ang adlaw sang iya kamatayon. Kundi ang petsa Hunyo 7, 1963, sang ginhugpong sila ni Jeff sa St. George Templo. … Ngaa tuman ini ka importante? Tungod gintuga ang duta para maporma ang pamilya kag mahugpong sa isa kag isa. Ang kaluwasan pang-indibidwal, pero ang pangkahitaasan pang-pamilya. Wala sing pwede mapahitaas nga isahanon.”
Sang nagligad lang, nag-upod kami nga mag-asawa sa sealing sang isa ka abyan sa Bountiful Utah Temple. Nakilala ko ining abyan sa Córdoba, Argentina sang bata pa sia. Sang ara ako sa misyon, nagpamalay-balay kami sang akon kaupod sa unhan lang sang mission office, kag ginpasulod niya kami sa ila balay. Sia, ang iya iloy, kag mga utod nagpabunyag sa Simbahan, kag nangin matutom nga mga miyembro. Hamtong na sia karon kag matahum nga babayi, kag ina nga adlaw ara kami sa templo para ihugpong ang iya patay na nga ginikanan sa isa kag isa kag dayon sia amo man sa ila.
Isa ka mag-asawa nga nangin malapit nga mga abyan amo ang nagrepresentar sang iya mga ginikanan sa altar. Emosyunal kag matahum ato nga okasyon, sang ang amon abyan nga taga-Argentina ginhugpong sa iya mga ginikanan. Anom lang kami ang ara sadtong malinong nga hapon malayo sa kalibutan, nagahikot sang isa sa pinakaimportante nga hilikuton sa duta. Nalipay ako nga ang akon buluhaton nakompleto na halin sa pagpanuktok sa ila balay sadto bilang misyonero, tubtob sa paghikot sang mga ordinansa nga nagaangot sa iya/ sa iya mga ginikanan/ kag nagliligad nga mga henerasyon.
Amo sini pirme ang nagakatabo sa mga templo sa bilog nga kalibutan. Ini ang katapusan nga tikang sa pagtipon sang mga tawo sang kasugtanan. Amo ini ang pinakamataas nga pribilehiyo sang inyo pagkamiyembro sa Simbahan ni Jesucristo. Ginapromisa ko nga kon matutom kamo sa paghandum sini, ihatag ini isa inyo sa karon ukon sa katubtuban.
Nagasaksi ako nga ang gahum kag awtoridad sa paghugpong/ matuod nga ginpanumbalik sa duta paagi kay Joseph Smith, nga ang ginhugpong sa duta ginhugpong man sa langit. Nagasaksi ako nga si Pangulong Russell M. Nelson, bilang Pangulo sang Simbahan, amo ang nagadumala sang paggamit sining tuman kadako nga gahum. Nagasaksi ako nga ang Pagbayad-Sala ni Jesucristo nagpatigayon sang imortalidad kag posibilidad sang ginhitaas nga mga relasyon sang pamilya. Sa ngalan ni Jesucristo, amen.