Malampuwasan ang Adlaw paagi kay Cristo

Ni Sister Amy A. Wright

Unang Manuglaygay sa Pangkabilogan nga Pangulohan sang Primary

Ginhimo ni Jesucristo nga posible nga aton “malampuwasan ang adlaw.”

Isa ato ka adlaw nga puno sang prangka kag maathag nga mga paanggid, mga pamangkot, kag doktrina. Pagkatapos nga sawayon sang mga tawo nga daw “katahum tulukon sa gwa, pero ang sulod puno sang tanan nga kagarukan,”¹ nagtudlo si Jesus sang tatlo pa ka paanggid parte sa espiritwal nga paghanda kag pagkasumulunod. Isa didto ang paangid parte sa pulo ka dalaga.

“Ang ginharian sang langit mapaanggid sa pulo ka dalaga nga nagdala sang mga kingki kag naghulat sa lalaki nga kalaslon.

“Ang lima sa ila maalam; ang lima indi.

“Ang indi maalam wala magbalon sing lana:

“Ang mga maalam nagbalon sang lana.

“Samtang nagahulat sa kalaslon, natulogan ang mga dalaga.

“Sang magtungang gab-i may nagsinggit, ‘Ari na ang kalaslon! Sugata ninyo sia.

“Ang pulo ka dalaga nagbugtaw kag naghanda sang ila mga kingki.

“Ang mga indi maalam nagsiling, ‘Hatagi kami sang inyo lana, kay naubusan na kami.

“Nagsabat ang mga maalam, ‘Indi makaigo ining dala namon para sa amon kag sa inyo. Magbakal na lang kamo.

“Paglakat sang lima ka dalaga para magbakal amo man ang pag-abot sang kalaslon. Ang lima nga naghanda nakaupod sa iya sa kasal, kag ginsiradhan ang pwertahan.

“Dugaydugay nag-abot ang iban nga mga dalaga, Siling nila, ‘Ginuo, Ginuo! Pasudla kami.”²

“Pero nagsabat sia, ‘Wala ako makakilala sa inyo.”³

“Gani kinahanglan ninyo magbantay pirme, kay wala kamo makahibalo kon san-o Sia maabot.”⁴

Si Pangulong Dallin•H. Oaks nagpamangkot sini:⁵Paano kon bwas na Sia maabot? Nga makita na naton ang Ginuo bwas—kay temprano kita mapatay ukon tungod gulpi Sia mag-abot—ano ang himuon naton subong”⁶

Natun-an ko nga ang espiritwal nga paghanda sa pag-abot sang Ginuo indi lang importante kundi ang nagaisahanon nga paagi para maagom ang matuod nga kalinong kag kalipay.

Isa sadto ka matugnaw ang adlaw sang taglagas sang ginhambalan ako “May kanser ka.” Nakibot gid kami sang bana ko! Malinong kami nga nagbiyahe pauli. Nahunahuna ko ang akon tatlo ka kabataan.

Namangkot ako sa Amay sa Langit, “Mapatay na bala ako?”

Ang Espiritu naghutik, “Mangin OK lang ang tanan.”

Dayon namangkot ako, “Mabuhi pa bala ako?”

Liwat, ang sabat, “Mangin OK lang ang tanan.”

Naglibog ang ulo ko. Ngaa pareho ang sabat kon mabuhi ako ukon mapatay?

Hinali nga napuno ang bilog ko nga lawas sang lubos nga katawhay: Indi namon kinahanglan magdalagan pauli para tudloan ang amon kabataan nga magpangamuyo Kabalo na sila sini, nga ginasabat kag may kasulhay sa pagpangamuyo Indi namon kinahanglan maghingagaw para tudloan sila nga magbasa sang balaan nga kasulatan ukon mamati sa buhi nga mga propeta. Ginahimo na nila ini. Kabalo na sila parte sa paghinulsol, Pagkabanhaw, Pagpanumbalik, sang plano sang kaluwasan, wala katapusan nga mga pamilya, ukon sang doktrina ni Jesucristo.

Ang tagsa ka leksyon sa family home evening, pagtuon sang balaan nga kasulatan, pangamuyo, bendisyon, testimonya, pagtuman sang kasugoan, pagkadto sa templo kag pagsimba may kapuslanan—daku gid nga kapuslanan! Wala na sang oras para magbutang sang lana sa amon mga suga. Kinahanglan na namon ang tagsa ka tulo sini, subong mismo!

Bangud kay Jesucristo kag sang Iya ebanghelyo, kon mapatay ako, paumpawan ang akon pamilya, pabakuron, kag ipanumbalik sa pila ka adlaw. Kon mabuhi ako, mabaton ko ang pinakadako nga gahum para buligan, suportahan, kag paayuhon ako. Sa ulihi, bangud kay Jesucristo, mangin maayo ang tanan.

Mabasa naton sa Doktrina kag mga Kasugtanan kon ano ang buot silingon sang “maayo”:

“Kag sa sina nga adlaw kon magkari ako sa akon himaya, matuman ang paangid nga ginhambal ko parte sa napulo ka birhen.

“Kay sila nga maalam kag nagbaton sang kamatuoran, kag naghimo sang Balaan nga Espiritu [bilang] ila giya, kag wala napatalang—indi sila pagasikwayon kag idap-ong sa kalayo kundi malampuwasan nila ang adlaw.”⁷

Ginhimo ni Jesucristo nga posible nga aton “malampuwasan ang adlaw.” Ang paglampuwas wala nagakahulugan sang dugang nga hilimuon Pamensara ang lente. Wala lang sini ginapadako ang mga butang. Ginatipon man sini kag ginatutok ang kasanag para mangin mas mabaskog. Simplehon naton, magtutok, kag magtipon sang Kasanag ni Jesucristo. Kinahanglan naton sang mas madamo nga balaan nga eksperiyensya kag rebelasyon.

Makita sa northwestern Israel ang matahum nga kabukiran nga ginatawag “berde nga kabukiran.” Ang Bukid nga Carmel⁸ berde pirme tungod sang humog. May sustansya ini adlaw-adlaw. Pareho sang humog sang Carmel,⁹ kon sagod ang aton kalag sang “pagkamatarong,”¹⁰ sa gagmay kag simple nga mga butang,”¹¹ ang aton testimonya kag ang testimonya sang aton kabataan mabuhi!

Mapinsar kamo, “Sister Wright, indi mo kilala ang akon pamilya. Nagatinguha gid kami pero indi amo sini ang nagakatabo.” Husto kamo. Indi ko kilala ang inyo pamilya. Pero ang Dios nga may pagpalangga, kaluoy, gahum, ihibalo, kag himaya nakakilala sa inyo.

Siguro ang inyo mga pamangkot, tungod man sa inyo mga kabalaka. Amo man sina ang mga pamangkot sa balaan nga kasulatan:

“Ginuo, wala ka nabalaka nga [ang akon pamilya] daw malunod na?”¹²

“Ano pa ang lauman ko?”¹³

“Paano [ko] dulaon ining panganod sang kadulom nga nagalipod sa [akon]?”¹⁴

“Diin makita ang kaalam? Diin kita makatuon sang paghangop?”¹⁵

“Paano [ko] makaptan ang tagsa ka maayo nga butang?”¹⁶

“Ginuo, ano ang ipahimo mo sa [akon]?”¹⁷

Matam-is ang mga sabat diri:

“Nagapati ka bala sa gahum ni Cristo sa pagluwas?”¹⁸

“May ginsugo bala ang Ginuo nga indi sila mag-ambit sang iya kaayo?”¹⁹

“Nagatuo bala kamo nga mapaayo [Niya] kamo?”²⁰

“Nagapati bala kamo sa mga propeta?”²¹

“Nagapati bala kamo sa pagtubos niya nga nagtuga sa inyo?”²²

“Indi bala mangin patas ang Hukom sang bug-os nga kalibutan?”²³

Mga abyan, indi naton pwede ihatag ang aton lana, pero pwede naton ipalapta ang Iya kasanag. Ang lana sa aton mga kingki indi lang makabulig nga “malampuwasan ang adlaw” kundi makapasanag man sang dalan sang aton mga mahal sa kabuhi pabalik sa Manluluwas, nga “bukas ang mga butkon sa pagbaton” sa ila.²⁴

“Gani siling sang Ginuo; Indi na maghibi, pahiri ang imo mga luha. Ang tanan mo nga nahimo may balik.

“Kag may paglaom ang imo palaabuton ang imo kabataan magapauli.”²⁵

Si Jesucristo ang “paglaom sang [aton] palaabuton.” Wala kita sang ginhimo, ukon wala pa nahimo, nga indi malab-ot sang Iya sakripisyo. Sia ang rason kon ngaa nagapadayon ang aton istorya.²⁶ Kinahanglan gid naton nga “[mag-abante sing malig-on] kay Cristo, nga may perpekto nga paglaum, kag gugma sang Dios sa tanan nga tawo. Kon mag-abante [kita], nga nagapaayaw sa pulong ni Cristo, kag magapadayon sa katapusan, siling sang Amay: Maangkon [naton] ang kabuhi nga wala’y katapusan.”²⁷

Ang wala katapusan nga kabuhi, wala katapusan nga kalipay. Kalipay sa sining kabuhi, sa karon—indi sa pihak sang mga kabudlayan naton kundi tungod sa bulig sang Ginuo makatuon kita kag malampuwasan naton ini sa ulihi—kag ang wala tupong nga kalipay sa pihak nga kinabuhi. Magamala ang luha, maumpawan ang kasakit sang buot, makita ang nadula, masolbar ang mga problema, mag-uliay ang mga pamilya, kag ang tanan nga iya sang Amay mangin aton.²⁸

Magtulok kay Jesucristo kag mabuhi²⁹ ini ang akon testimonya sa sagrado kag balaan nga ngalan sang pinalangga nga “Manugbantay kag Manug-atipan sang [aton] mga kalag,”³⁰ nga si Jesucristo, amen.