Paglantaw sa Pamilya sang Dios sa Kabilogan nga Perspektibo
Nagapati ako nga mahimo naton, paagi sa mata sang pagtuo, bag-ohon ang aton panan-aw kag tamdon ang aton kaugalingon kag aton pamilya nga may paglaum kag kalipay.
Sang gamay pa ang amon kinaagot nga bata nga si Berkeley, nagsugod ako gamit sang antipara sa pagbasa―ang klase nga ginapalapit kag ginapadaku ang tanan. Isa ka adlaw, sang nagabasa kami sang libro, gintulok ko sia nga may pagpalangga kag kasubo tungod, gulpi lang, daw kadaku na gid sa iya. Namensar ako, “Kadasig sang panahon. Kadaku na sa iya!”
Pagkakas ko sang akon antipara agud pahiran ang luha, nadiparahan ko “Ay dali lang—wala sia nagdaku; sa antipara lang gali! Sige na lang!”
Kon kis-a ang makita lang naton amo ang malapit, dako nga panan-awan naton sa aton mga pinalangga. Sini nga gab-i, ginaagda ko kamo nga pasangkaron ang panulok kag magtan-aw sa lain nga perspektibo—isa ka wala katapusan nga panulokan nga nagatutok sa kabilogan.
Pagsugod sang tawo panikasog nga magkadto sa kahawaan, ang mga rocket wala sakay kag wala bintana. Pero paglab-ot sa Apollo 8 nga misyon sa bulan, may bintana na ang mga astronaut. Samtang nagalutaw-lutaw sa kahawaan, natandog sila sa eksperiyensya nga makita ang aton kalibutan kag ginlitratohan ining matahum nga imahe, nga nagbihag sang atensyon sang bilog nga kalibutan. Atong mga astronaut nakaeksperiyensya sang balatyagon nga tuman kabaskog nga gintawag ini: Ang epekto sang kabilogan nga perspektibo.
NASA
Ang paglantaw halin sa mas mataas nga nahamtangan nagabag-o sang tanan. Isa ka astronaut ang nagsiling nga “ginapagamay sini ang mga bagay nga pamatyag mo daw kahapos lang sang tanan. … Mahimo naton ini. Paghidaet sa duta—wala problema. Nagahatag ini sa tawo sinang klase sinang kapagsik … sinang klase sang gahum.”1
Bilang tawo, limitado ang aton panan-aw, pero ang Dios may daku, kabilogan nga perspektibo sang uniberso. Makita Niya ang tanan nga tinuga, tanan kita, kag napun-an sang paglaum.
Posible bala nga makakita pareho sa Dios samtang nagakabuhi sa ibabaw sining planeta—agud maeksperiyensyahan ining pamatyagan sang kabilogan nga perpektibo? Nagapati ako nga mahimo naton, paagi sa mata sang pagtuo, bag-ohon ang aton panan-aw kag tamdon ang aton kaugalingon kag aton pamilya nga may paglaum kag kalipay.
Nagasanto ini sa balaan nga mga kasulatan. Si Moroni nagahambal parte sinang ang ila pagtuo “tuman kabakod” nga sila “matuod gid nga nakakita … sa isa ka mata sang pagtuo, kag sila nalipay.”2
Ang mata nga nakatutok kay Jesucristo, nabatyagan nila ang kalipay kag nahibal-an ining kamatuoran: bangod kay Cristo, ang tanan nagamaayo. Ang tanan nga ginakabalakhan nimo kag nimo kag nimo sa ulihi—mangin OK ang tanan! Kag inang mga nagatulok nga may mata sang pagtuo makabatyag nga mangin OK ang tanan subong.
Nakaagi ako sang mabudlay nga tion sa akon senior year sa high school sang wala ako nagahimo sing maayo nga mga pagpili. Madumduman ko si nanay nga nagahibi, kag nagpalibog ako kon bala tungod ini sa akon. Sadto, nabalaka ako nga ang iya mga luha nagakahulugan nga nawad-an sia sang paglaum sa akon, kag kon wala na sia sang paglaum sa akon, basi indi na ako maulian.
Pero si tatay mas eksperiyensyado sa pagpasangkad sang iya panan-awan kag magtan-aw sa palaabuton. Natun-an niya sa eksperiyensya nga ang pagkabalaka daw gugma man, pero indi sila pareho.3 Gingamit niya ang mata sang pagtuo agud makita nga ang tanan sa ulihi mangin maayo, kag ang iya may paglaum nga pamaagi nagbag-o sa akon.
Pagkatapos ko sa high school kag pagsulod sa BYU, si tatay nagpadala sang mga sulat nga nagapahanumdum sa akon kon sin-o ako. Ginpaisog niya ako, kag ang tanan nga tawo nagakinahanglan sang manugpaisog—tawo nga wala nagahambal “Kahinay sa imo magdalagan”; kundi mapinalanggaon ka nga ginapadumdom nga masarangan mo ina.
Ginpangabuhi ni Tatay ang damgo ni Lehi. Pareho kay Lehi, nakahibalo sia nga wala mo ginalagas ang imo mga pinalangga nga daw nagtalang. “Nagatiner ka kon diin ka kag ginatawag sila. Ginatuman mo ang mga kasugoan sang Dios, magpadayon, mangin malipayon, kag may yuhum sa imo nawong nga magpadayon sa pagpanawag sa imo mga pinalangga kag ipakita paagi sa ehemplo nga ang pagsunod sa mga kasugoan nagadala sang kalipay.”4
Ining paglaragway nagbulig sa akon kon ginasubuan ako samtang nagatuman sang mga kasugoan, malipayon pero nagahibi tungod nabalaka ako; kag sa matuod, ano bala ang mabulig sina? Sa baylo, pilion naton ang paglaum—paglaum sa aton Tagtuga kag sa tagsa-tagsa, nga nagasakdag sang aton ikasarang nga mangin mas maayo sangsa kon ano kita subong.
Wala madugay pagkatapos nga napatay si Elder Neal A. Maxwell, isa ka reporter ang namangkot sa iya bata kon ano gid ang iya nahidlawan. Hambal niya ang mga panyapon sa balay sang iya ginikanan tungod kada pauli niya mabatyagan niya nga nagasalig ang iya amay sa iya.
Amoamo man sini nga tion nga ang amon hamtong nga kabataan nagsugod kadto sa balay upod sa ila mga tiayon para magpanyapon kada Domingo. Kada semana, mental ako nga nagalista sang mga butang nga ipadumdum sa ila kon Domingo pareho sang: “Basi pwede kamo magbulig pa gid atipan sang kabataan kon ara kamo sa balay,” ukon “Indi malipat nga magpamati sang maayo.”
Sang nabasahan ko ang ginhambal ni Brother Maxwell, ginhaboy ko ang listahan kag ginpaiway ang pagsaway, gani kon magkit-anay kami sang hamtong ko nga kabataan sa sinang malip-ot nga tion kada semana, nagtutok ako sa madamo nga positibo nga butang nga ila na ginahimo. Sang mapatay ang amon subang nga si Ryan pila ka tuig pagkatapos, madumduman ko nga nagapasalamat ako nga ang amon pag-updanay mas malipayon kag mas positibo.
Antes kita makig-angot sa aton pinalangga, pwede bala pamangkoton naton ang aton kaugalingon “Ang himuon ukon ihambal ko bala makabulig ukon makasakit?” Ang aton mga tinaga daku kaayo ang epekto sa iban, kag ang mga miyembro sang aton pamilya gusto makahibalo kon ano ang panumduman naton sa ila. Ining mga mensahe, hungod man ukon indi, dapat puno sang paglaum kag nagapaisog.5
Ang aton obra indi nga tudloan ang tawo nga ginabudlayan nga malain sila ukon pigaw sila. Sa panalagsa makabatyag kita nga kinahanglan naton magsaway, pero pirme gid naton pahibal-on ang aton mga pinalangga sa hambal kag sa buhat, sang gusto nila mabatian: “Ang aton pamilya bug-os kag kumpleto kay ara ka.” “Palangga ka namon sa bilog mo nga kabuhi—bisan magkainano pa.”
Kon kis-a, ang kinahanglanon naton pag-unong imbes paglaygay; pagpamati imbes nga sermon; tawo nga nagapamati kag nagapamangkot sa iya kaugalingon, “Ano ang batyagon ko kon ako ang ara sa ila lugar?”
Tandai, ang mga pamilya laboratoryo nga ginhatag sang Dios agud ululupod kita nga magtuon, gani ang mga sayop kag sala indi lang posible kundi laban nga matabo gid. Kag indi bala masadya, kon sa katapusan sang aton kabuhi, makita naton nga inang mga kaangtanan, bisan ang makahalangkat nga tinion, amo mismo ang mga butang nga nagbulig sa aton nga mangin mas pareho sa aton Manluluwas? Ang tagsa ka mabudlay nga pagpakig-angot isa ka oportunidad agud matun-an kon paano magpalangga sing mas hugot—nga pareho sa Dios.6
Pasangkaron naton ang aton panulok agud tamdon ang pamilya bilang perpekto nga paagi agud tun-an ang mga leksyon nga dapat naton matun-an samtang nagadangop kita sa Manluluwas.
Akuon naton, sa kalibutan nga nahulog sa sala, indi kita mangin perpekto nga asawa/bana, ginikanan, anak, apo, manunudlo, ukon abyan—pero minilyon ang pamaagi nga mangin maayo dira.7 Magpadayon kita sa pagtuman sang kasugoan, mag-ambit sang gugma sang Dios, kag ipakigbahin ini. Paagi sa pagbulig sa mga tawo sa aton palibot, ululupod kita nga magpaibabaw.
Apang, ang handurawan lang sang pagkaon sang prutas indi bastante; kinahanglan naton mag-ambit sing liwatliwat para maposisyon ang aton lente kag maangot kita sa langitnon nga perspektibo paagi sa pagbasa sang balaan nga mga kasulatan, nga puno sang kasanag, agud tabugon ang kadulom, kag magluhod tubtob ang aton pasapayan nga pangamuyo mangin sinsero. Diri nagahumok ang aton mga tagipusuon, kag nagasugod kita nga makakita pareho sang makita sang Dios.
Sa sining katapusan nga mga adlaw, siguro ang pinakadaku naton nga buluhaton amo ang sa aton mga pinalangga—maayo nga mga tawo nga nagapuyo sa kalibutan nga puno sang kalainan. Ang aton paglaum nagabag-o sang ila panulok sa ila kaugalingon kag kon sin-o gid sila. Kag paagi sa sining lente sang pagpalangga, makita nila kon mangin ano sila sa palaabuton.
Pero ang kaaway indi gusto nga magbalik kita pauli upod sa aton mga pinalangga. Kag tungod nagapuyo kita sa planeta nga nalimitahan sang panahon kag tinuig,8 nagatinguha sia nga magtuga sang balatyagon sing tunay nga kahadlok sa aton. Mabudlay makita, kon nakatutok kita sa mga detalye sang kabuhi, nga ang aton kaladtuan mas importante sangsa aton kadasigon.
Dumduma, “Kon gusto mo nga magdasig, maglakat sing isahanon. Kon gusto mo nga malayo ang malab-otan, maglakat sing ululupod.”9 Maayo lang, ang Dios nga aton ginasimba wala nalimitahan sang panahon. Kilala Niya kon sin-o gid ang aton mga pinalangga kag kon sin-o gid kita.10 Gani pasensyoso sia sa aton, kag nagalaum nga mangin pasensyoso kita sa isa kag isa.
Akuon ko nga may mga tinion nga ang kalibutan, ang aton dutan-on nga puluy-an, daw puro na lang kalisod—mga tinion nga may isa ako ka mata sang pagtuo kag isa ka mata nga nagahibi.11 Nabatyagan niyo na bala ini?
May amo ako sina nga balatyagon sang Martes.
Sa baylo pwede bala naton pilion nga sundon ang panindugan sang aton propeta sang nagpromisa sia sang milagro sa aton mga pamilya? Kon himuon naton ini, ang aton kalipay magadugang bisan pa nga ang kagamo nagadugang man. Nagapromisa sia nga ang epekto sang kabilogan nga perspektibo maeksperiyensyahan naton subong, bisan ano pa ang aton mga sirkumstansya.12
Ang pag-angkon sining mata sang pagtuo sa sini nga kabuhi pagsulit lang sang aton pagtuo antes kita magkadto sa sini nga kalibutan. Makakita ini lapaw sa tinion nga wala kapat-uran, nga nagatugot sa aton nga “malipayon naton nga himuon ang tanan nga aton masarangan; kag dayon … maghulat kita nga may lubos nga pagsalig.”13
May butang bala nga mabudlay sa imo kabuhi subong, butang nga ginakabalak-an mo nga indi masolbar? Kon wala ang mata sang pagtuo, ang pamatyagan sina daw pareho nga ang Dios wala na nagatatap sa tanan, kag matuod bala ina?
Ukon basi ang mas ginakahadlokan mo amo nga agyan mo ining mabudlay nga tion nga isahanon, pero magakahulugan ina nga gin-abandona ka sang Dios, kag matuod bala ina?
Nagasaksi ako nga ang Manluluwas may ikasarang, tungod sa Iya Pagbayad-Sala, sa pagbaylo sang bangungot nga imo ginaagyan sa bugay. Ginpromisahan Niya kita “sing di-maliwat nga kasugtanan” nga samtang nagatinguha kita nga higugmaon kag sundon Sia, ang “tanan nga butang nga gin-antos [naton] magaresulta sa [aton] kaayohan.”14 Tanan nga butang.
Kag tungod mga anak kita sang kasugtanan, makapangayo kita sining balatyagon sing paglaum subong!
Bisan indi perpekto ang aton mga pamilya, sarang naton maperpekto ang aton pagpalangga sa iban tubtob mangin sige-sige ini, wala nagabag-o, bisan-magkainano nga sahi sang pagpalangga—ang klase sang pagpalangga nga nagasuporta sang pagbag-o kag nagatugot sang pagtubo kag pagbalik.
Buluhaton sang Manluluwas nga dal-on ang aton mga pinalangga pabalik. Iya ini buluhaton kag Iya tion. Ang aton buluhaton amo ang maghatag sang paglaum kag tagipusuon nga mapaulian nila. “Wala kita sang awtoridad sang [Dios] nga magkondenar ukon sang Iya gahum nga magtubos, pero ginhatagan kita sang awtoridad nga ipakita ang Iya gugma.”15 Si Pangulong Nelson nagtudlo man nga ang iban nagakinahanglan sang aton pagpalangga masobra sangsa aton paghusga. “Kinahanglan nila maeksperiyensyahan ang putli nga gugma ni Jesucristo sa [aton] mga tinaga kag mga aksyon.”16
Ang pagpalangga amo ang nagabag-o sang mga tagipusuon. Ini ang pinakaputli nga motibo sa tanan, kag mabatyagan ini sang iban. Magkapyot kita sa sining mga pulong sang propeta nga ginhatag 50 katuig na ang nagligad: “Wala sing panimalay nga mapaslawan luwas lang kon mag-untat ini sa pagtinguha.”17 Sigurado gid, ang mga nagapalangga sing tuman kag pinakamalawig nagadaug!
Sa dutan-on nga mga pamilya, ginahimo lang naton ang ginhimo man sang Dios sa aton—ginatudlo ang alagyan kag nagalaum nga ang aton mga pinalangga magakadto sa sina nga direksyon, nga nakahibalo nga sila ang magapili sang dalan nga ila sundon.
Kag kon mapatay sila kag maglapit sa mahigugmaon nga pagbutong sang ila langitnon nga puluy-an,18 nagapati ako nga mangin pamilyar ini sa ila tungod sa kon paano sila ginpalangga diri sa duta.
Gamiton naton inang kabilogan nga perspektibo kag kabigon ang mga tawo nga aton palangga kag upod sa balay bilang suod nga kaupdanan sa sining aton matahum nga planeta.
Ikaw kag ako? Mahimo naton ini! Sarang kita magbatas kag padayon nga maglaum! Sarang kita magtuman sang mga kasugoan sang Dios, magpadayon nga may yuhum sa aton nawong, kag tugotan ang Kasanag ni Cristo sa aton mga mata nga mangin ila salandigan sa ila pinakamabudlay nga tinion. Kag kon makita nila ang kasanag nga athagon sa aton mga nawong, magapalapit sila diri. Dayon mabuligan naton tutok ang ila atensyon sa una nga ginahalinan sang gugma kag kasanag, “ang masanag nga kabugwason,” si Jesucristo.19
Nagasaksi ako nga ini, tanan sini, mangin mas maayo sangsa aton mahunahuna! Gamit ang mga mata sang pagtuo kay Jesucristo, makita kuntani naton nga ang tanan sa katapusan mangin maayo kag mabatyagan nga mangin maayo ini subong. Sa ngalan ni Jesucristo, amen.