Paglaum kay Cristo
Luyag naton buligan ang tanan nga nagabatyag nga isahanon ukon nagabatyag nga wala sila nalakip. Tugoti ako nga hingadlan, labi na gid, inang mga solo-lawas sa karon.
Mga utod, sa sining tion sang Paskwa sang Pagkabanhaw nagatutok kita sa mahimayaon nga Pagkabanhaw sang aton Ginuo kag Manluluwas, si Jesucristo. Ginadumdum naton ang Iya mapinalanggaon nga pangagda nga “kari sa akon, tanan kamo nga ginabudlayan kag ginabug-atan, kag papahuwayon ko kamo.
“Itakod ang akon gota sa inyo, kag magtuon kamo sa akon; kay ako mapainubuson kag malulo sa tagipusuon: kag makakita kamo sang kapahuwayan sa inyo mga kalag.
“Kay ang akon gota mahulas, kag ang akon lulan mamag-an.”1
Ang pangagda sang Manluluwas nga magkari sa Iya isa ka pangagda sa tanan nga indi lamang magkari sa Iya kundi malakip man sa Iya Simbahan.
Sa bersikulo antes sining mapinalanggaon nga pangagda, si Jesus nagatudlo kon paano ini himuon paagi sa pagtinguha nga sundon Sia. Sia nagpahayag, “Sa Anak wala sing nakakilala luwas ang Amay, kag sa Amay wala sing nakakilala luwas ang Anak kag sa bisan kay sin-o nga nahamut-an sang Anak nga ipahayag ang Amay.”2
Luyag ni Jesus nga mahibal-an naton nga ang Dios isa ka mapinalanggaon nga Amay nga Langitnon.
Ang paghibalo nga ginapalangga kita sang aton Amay nga Langitnon magabulig sa aton hibalo kon sin-o kita kag nga nalakip kita sa Iya dako nga walay katapusan nga panimalay.
Ang Mayo Clinic sang sini lang nagsiling: “Ang pag-angkon sang balatyagon sang pagkalakip tama kaimportante. … Halos tanan nga aspeto sang aton mga kabuhi nahamtang sa pagkalakip sa isa ka butang.” Dugang sining report, “Indi naton mapain ang importansya sang balatyagon sang pagkalakip sa ikaayo sang aton lawas kag hunahuna”3—kag, idugang ko, sa aton espirituhanon nga ikaayo.
Sang gab-i antes sang Iya pag-antos sa Getsemani kag kamatayon sa krus, ang Manluluwas nakigkita sa Iya mga disipulo para sa Katapusan nga Panyapon. Nagsiling Sia sa ila, “Sa kalibutan may kangitngitan kamo: apang magpakalig-on kamo; nadaug ko ang kalibutan.”4 Antes magtunod ang adlaw pagkabwas, si Jesucristo nag-antos kag “napatay [sa krus] para sa aton mga sala.”5
Ginahunahuna ko kon daw ano nga kasubo ang nabatyagan sang tampad nga mga babayi kag lalaki nga nagsunod sa Iya sa Jerusalem sang pagtunod sang adlaw kag sang ang kadulom kag kahadlok naglikop sa ila.6
Pareho sining dumaan nga mga disipulo malapit na 2,000 ka tuig ang nagligad, madamo sa inyo siguro ang nagabatyag man sing kasubo kon kis-a. Nabatyagan ko ining kasubo sugod sang pagkapatay sang akon mahal nga asawa nga si Barbara, masobra duha kag tunga ka tuig na ang nagligad. Nakahibalo ako kon ano ang mapalibotan sang pamilya, mga abyan, kag mga kaupdanan pero masubo gihapon—tungod ang gugma sang akon kabuhi wala na sa tupad ko.
Ang COVID-19 nga pandemya nagpadako pa gid sining balatyagon sang kasubo kag pag-isahanon para sa kadam-an. Apang, sa pihak sang mga hangkat nga aton ginaatubang sa kabuhi, mahimo kita, pareho sang una nga aga sang Paskwa sang Pagkabanhaw, magbugtaw sa bag-o nga kabuhi kay Cristo, nga may bag-o kag tumalagsahon nga mga palaabuton kag bag-o nga adlaw sa aton pagdangop sa Ginuo para sa paglaum kag pagkalakip.
Personal ko nga nabatyagan ang kasakit sinang mga wala makabatyag nga nalakip. Sa akon paglantaw sang mga balita sa bilog nga kalibutan, makita ko ang madamo nga daw nagabatyag sining kasubo. Sa pensar ko, para sa madamo, tungod ini nga wala sila basi nakahibalo nga palangga sila sang Amay nga Langitnon kag nga tanan kita kabahin sang Iya walay katapusan nga pamilya. Ang pagpati nga palangga kita sang Dios kag nga Iya kita mga anak makapaumpaw kag nagapasalig.
Bangod mga espiritu kita nga anak sang Dios, ang tanan may diosnon nga ginhalinan, kinaiya, kag ikasarang. Ang kada isa sa aton ”pinalangga nga anak nga lalaki ukon babayi sang langitnon nga mga ginikanan.”7 Amo ini ang aton pagkatawo! Amo ini kon sin-o gid kita!
Ang aton espirituhanon nga pagkatawo mas nagatahum kon aton mahangpan ang madamo naton nga pagkatawo sa sini nga kabuhi lakip na ang rasa, kultura, ukon pungsodnon nga panublion.
Ining balatyagon sang espirituhanon kag kultural nga pagkilala, pagpalangga kag pagkalakip makainspirar sang paglaum kag gugma para kay Jesucristo.
Nagahambal ako parte sa paglaum kay Cristo indi nga daw nagadamgo lang. Kundi, nagahambal ako sang paglaum bilang isa ka ginapaabot nga matuman. Inang paglaum kinahanglanon sa pagdaog sang mga kabudlayan, pagpalig-on sang espirituhanon nga kabakod kag kusog, kag pagkilala nga ginapalangga kita sang aton Walay Katapusan nga Amay kag nga Iya kita mga anak, nga kabahin sang Iya pamilya.
Kon may paglaum kita kay Cristo, mahibaloan naton nga samtang kinahanglan naton nga maghimo kag magtipig sang sagrado nga mga kasugtanan, ang mga butang nga aton gid ginahandum sarang matuman paagi sa Iya.
Ang Korum sang Dose ka Apostoles naghinun-anon sa espiritu sang pagpangamuyo kag upod ang handum nga mahibal-an kon paano buligan ang tanan nga nagabatyag nga isahanon ukon wala nalakip. Luyag namon buligan ang tanan nga nagabatyag sini. Tugoti ako nga hingadlan, labi na gid, inang mga solo-lawas sa karon.
Mga utod, masobra katunga sang mga hamtong sa Simbahan subong mga balo, diborsyado, ukon wala gid nakapakasal. Ang iban nagapalibog parte sa ila mga oportunidad kag lugar sa plano sang Dios kag sa Simbahan. Dapat naton hangpon nga ang kabuhi nga walay katapusan indi lang parte sa estado sa kasal subong kundi parte sa pagkadisipulo kag pagka-“maisog sa testimonya parte kay Jesus.”8 Ang ginalauman sang tanan nga mga solo-lawas pareho lang sa iya sang tanan nga miyembro sang ginapanumbalik nga Simbahan sang Ginuo—ang maangkon ang grasya ni Cristo paagi sa “pagtuman sang mga kasugoan kag mga ordinansa sang Ebanghelyo.”9
Ginapanugyan ko nga may pila ka importante nga mga prinsipyo nga kinahanglan naton mahangpan.
Una, ang balaan nga mga kasulatan kag mga propeta sa ulihing mga adlaw nagapamatuod nga ang tanan nga tampad sa pagtipig sang mga kasugtanan sang ebanghelyo makaangkon sang oportunidad para sa pagkahitaas. Si Pangulong Russell M. Nelson nagpanudlo: “Sa nagakaigo nga pamaagi kag tion sang Ginuo, wala sing bugay nga indi pag-ihatag sa Iya tampad nga mga Santos. Hukman kag padyaan sang Ginuo ang tagsa ka tawo suno sa hugot-tagipusuon nga handum kag amo man sa buhat.”10
Ika-duha, ang eksakto nga tion kag paagi nga ginahatag ang mga bugay sang pagkahitaas wala pa tanan napahayag, pero sa gihapon sigurado ang mga ini.11 Si Pangulong Dallin H. Oaks nagpaathag nga ang pila sa mga sirkumstansya “sang dutan-on nga kabuhi pagatadlungon sa Milenya, nga amo ang tion para sa katumanan sang tanan nga kakulangan sa dakong plano sang kalipay para sa tanan nga nagakaangay nga mga anak sang aton Amay.”12
Wala ini nagakahulugan nga ang tagsa ka bugay ginapaiway tubtob sa Milenya; ang iban sini nabaton na, kag ang iban padayon nga mabaton tubtob sina nga adlaw.13
Ika-tatlo, ang paghulat sa Ginuo nagakahulugan sang padayon nga pagkamatinumanon kag espirituhanon nga pag-uswag pakadto sa Iya.. Ang paghulat sa Ginuo, wala nagakahulugan sang pagpalipas-tiempo. Indi kamo dapat magbatyag nga ara kamo sa hululatan nga kwarto.
Ang paghulat sa Ginuo nagapahangop sang aksyon. Natun-an ko sa mga tinuig nga ang aton paglaum kay Cristo nagatubo kon nagaalagad kita sa iban. Sa pag-alagad pareho sang pag-alagad ni Jesus, natural naton nga ginapatubo ang aton paglaum sa Iya.
Ang personal nga pagtubo nga matigayon subong samtang nagahulat sa Ginuo kag Iya mga promisa isa ka malahalon, sagrado nga bahin sang Iya plano para sa tagsa sa aton. Ang mga bulig nga mahatag subong agud mapabakod ang Simbahan sa duta kag agud tipunon ang Israel tuman gid nga kinahanglanon. Ang estado sa kasal wala sing kahilabtanan sa kapasidad sa pag-alagad. Ginabayaw sang Ginuo ang mga nagaalagad kag nagahulat sa Iya sing may pasensya kag pagtuo.14
Ika-apat, ang Dios nagatanyag sang kabuhi nga walay katapusan sa tanan sang Iya mga anak. Ang tanan nga nagabaton sang maalwan nga dulot sang paghinulsol sang Manluluwas kag nagatuman sang Iya mga kasugoan makabaton sang kabuhi nga walay katapusan, bisan pa indi nila matigayon ang tanan nga kinaiya kag kahimpit sini sa mortalidad. Inang mga nagahinulsol makaeksperiyensya sang kahanda sang Ginuo sa pagpatawad, pareho sang Iya ginpasalig, “Kag subong man, kon ano kasunson maghinulsol ang akon katawhan patawaron ko sila sang ila mga kalapasan batok sa akon.”20
Kon sumahon, ang ikasarang, mga handum, kag mga oportunidad sang isa ka tawo parte sa pagbuot kag pagpili, lakip na ang kalipikasyon para sa walay katapusan nga mga bugay, mga butang nga ang Ginuo lang ang makahusga.
Ika-lima, ang aton kompiyansa sa sining mga pasalig naangot sa aton pagtuo kay Jesucristo, nga paagi sa Iya grasya ang tanan nga butang parte sa sining kabuhi pagatadlungon.16 Ang tanan nga ginpromisa nga mga bugay posible bangod sa Iya, nga paagi sa Iya Pagbayad-Sala, “nagpanaog sa idalom sang tanan nga butang”17 kag “nadaug ang kalibutan.”18 Sia “nagpungko sa tuo nayon nga kamot sang Dios, sa pagsukot gikan sa Amay sang iya mga kinamatarong sa kaluoy nga may iya sia sa mga anak sang tawo … ; gani ginaapinan niya ang kawsa sang mga anak sang tawo.”19 Sa ulihi, “pagapun-on ang mga santos sang iya himaya, kag magabaton sang ila panublion”20 bilang “masigkamanunubli ni Cristo.”21
Ang aton handum amo nga ining mga prinsipyo magabulig sa tanan nga makaangkon sing dugang nga paglaum kay Cristo kag magbatyag nga nalakip.
Indi gid pagkalimti nga anak kamo sang Dios, ang aton Walay Katapusan nga Amay, karon kag sa walay katubtuban. Palangga kamo Niya, kag ang Simbahan luyag kag nagakinahanglan sa inyo. Huo, kinahanglan namon kamo! Kinahanglan namon ang inyo mga tingug, mga talento, mga abilidad, kaayo, kag pagkamatarong.
Sa madamo nga tinuig, naghambal kita parte “young single adults,” “single adults,” kag “adults.” Inang mga titulo mahimo nga mapuslanon sa pagdumala kon kaisa pero di-hungod nga makaliwat sang aton panan-aw sa iban.
May paagi bala nga malikawan ining tawhanon nga huyog nga makaseparar sa aton sa isa kag isa?
Si Pangulong Nelson nagpangabay nga tawgon naton ang aton mga kaugalingon nga mga miyembro sang Ang Simbahan ni Jesucristo sang mga Santos sa Ulihing mga Adlaw. Dawsa nagatumod ina sa aton tanan, indi bala?
Ang ebanghelyo ni Jesucristo may gahum sa pag-isa sa aton. Sa kabilogan, mas palareho kita sangsa magkalain-lain. Bilang miyembro sang panimalay sang Dios, matuod gid kita nga mag-ululutod. Si Pablo nagsiling, “Kag ginhimo sang [Dios] ang tagsa ka pungsod sang mga tawo sa pagpuyo sa bug-os nga nawong sang duta.”22
Sa inyo nga mga stake president, mga bishop, kag mga lider sang korum kag mga sister, ginapangabay ko kamo nga kabigon ang tagsa ka miyembro sang inyo stake, ward, korum, ukon organisasyon bilang miyembro nga makabulig kag makaalagad sa mga calling kag makapasakop sa madamo nga mga paagi.
Ang tagsa ka miyembro sang aton mga korum, mga organisasyon, mga ward, kag mga stake may mga dulot kag mga talento nga ginhatag sang Dios nga makabulig pauswag sang Iya ginharian subong.
Magpanawagan kita sa aton mga miyembro nga mga solo-lawas nga mag-alagad, magtib-ong, kag magtudlo. Ibale-wala ang daan nga mga pagpati kag mga ideya nga kon kaisa sa indi hungod nagdugang sa ila mga balatyagon sang kasubo kag nga wala sila nalakip ukon indi makaalagad.
Nagapamatuod ako sa sining talipuspusan sang semana sang Paskwa sang Pagkabanhaw parte sa aton Manluluwas, si Jesucristo, kag sa walay katapusan nga paglaum nga Iya ginahatag sa akon kag sa tanan nga nagapati sa Iya ngalan. Kag nagasambit ko ining testimonya sing mapainubuson sa Iya sagrado nga ngalan, nga amo si Jesucristo, amen.