Dios sa tunga Naton
Ang Dios ara sa tunga naton—kag personal nga nagapakigbahin sa aton mga kabuhi kag aktibo nga nagagiya sang Iya mga anak.
Sa bilog nga kasaysayan, ang Dios nagahambal paagi sa Iya mga alagad, ang mga propeta.1 Sini nga aga may pribelihiyo kita nga mabatian ang propeta sang Dios nga nagahambal sa bilog nga kalibutan. Palangga ka namon, Pangulong Russell M. Nelson, kag ginapaisog ko ang tanan sa bisan diin nga tun-an kag pamatian ang iya mga pulong.
Antes sang akon ika-12 nga kaadlawan, ang amon pamilya napilitan sing makaduha ka beses nga bayaan ang amon balay kag mag-umpisa liwat sa tunga sang kinagamo, kahadlok, kag kawala kapat-uran tuga sang inaway kag pagbinahin-bahin sa pulitika. Isa yadto ka makakululba nga panahon para sa akon, apang pat-od nga nangin makahaladlok yadto para sa akon pinalangga nga mga ginikanan.
Ang akon iloy kag amay halos wala gid nagasugid sining huol sa amon nga apat ka kabataan. Ginpas-an nila ang kabug-at kag pag-antos kutob sa ila masarangan. Ang kahadlok pat-od gid nga mapiguson, nga nagaubos sang ila mga panahon kag nagapaluya sang ila paglaum.
Ining panahon sang kawalay-paglaum pagkatapos sang Ikaduhang Inaway Pangkalibutanon nagbilin sing dako nga epekto sa kalibutan. Nakaapekto ini sa akon.
Sadto, sa akon pinakamasubo nga mga tinion sang pag-isahanon, masami ako nagapamangkot, “May nabilin pa bala nga paglaum sa kalibutan?”
Mga Anghel sa tunga Naton
Samtang akon ginabinagbinag ining pamangkot, akon napensaran ang aton bataon nga mga misyonero nga Amerikano nga nag-alagad sa tunga namon sadtong mga tinuig. Ginbayaan nila ang kasegurohan sang ila mga panimalay sa malayo nga mga lugar kag nagbiyahe pa-Germany—sa duta sang ila mga kaaway sadto nga tion—agud magtanyag sang diosnon nga paglaum sa amon mga katawhan. Nagkadto sila indi para magbasol, magsermon, ukon magpakahuya [sa ila]. Boluntaryo sila nga naghatag sang bahin sang ila linghod nga mga kabuhi nga wala nagpamensar sang dutan-on nga makuha, kundi luyag lamang nga magbulig sa iban nga maagom ang kalipay kag paghidaet nga ila naeksperiyensyahan.
Para sa akon, ining mga pamatan-on kag bataon nga mga babayi perpekto. Pat-od nga may mga depekto sila, pero wala ako sing makita. Padayon ko sila nga pagadumdumon nga mga dalayawon—mga manugtunda sang kapawa, mga ministro sang kaluoy, kaayo, kag kamatuoran.
Bisan pa nga ang kalibutan napun-an sang pagpangyaguta, kaakig, dumot, kag kahadlok, ang halimbawa kag mga panudlo sining mga pamatan-on nagpuno sa akon sing paglaum. Ang mensahe sang ebanghelyo nga ila gintanyag nagpangibabaw sa pulitika, kasaysayan, mga pagdumot, mga kalain sing buot, kag personal nga mga katuyuan. Naghatag ini sang diosnon nga mga sabat sa importante namon nga mga pamangkot sa sining mabudlay nga tinion.
Ang mensahe amo nga ang Dios nagkabuhi kag nag-ulikid sa aton, bisan pa sa sining panahon sang kagubot, kagumon, kag kagamo. Nga matuod gid nga nagpakita Sia sa aton panahon agud ipanumbalik ang kamatuoran kag kasanag—ang Iya ebanghelyo kag Iya Simbahan. Nga nagapakighambal Sia liwat sa mga propeta; nga ang Dios ara sa tunga naton—kag personal nga nagapakigbahin sa aton mga kabuhi kag aktibo nga nagagiya sang Iya mga anak.
Makahalawhaw ang aton matun-an kon tulokon naton sing mas maayo ang plano sang Amay nga Langitnon para sa kaluwasan kag pangkahitaasan, ang plano sang kalipayan, para sa Iya mga anak. Kon nagabatyag kita nga indi kita importante, ginsikway, kag nalimtan, matun-an naton nga makasalig kita nga ang Dios wala nalipat sa aton—sa pagkamatuod, nagatanyag Sia sa tanan Niya nga mga anak sang butang nga indi mahunahuna; ang mangin “mga manunubli sang Dios, kag mga masigkamanunubli ni Cristo.”2
Ano ang kahulugan sini?
Nga magakabuhi kita sa katubtuban, magabaton sang kabug-osan sang kalipay,3 kag may potensyal nga “magapanubli sang mga trono, mga ginharian, mga pamunoan kag mga gahum.”4
Makapaubos ang mahibal-an nga posible ining halangdon kag langitnon nga palaabuton—indi tungod sa kon sin-o kita kundi tungod sa kon sin-o ang Dios.
Nga nahibal-an ini, ngaa bala nga magkumod pa kita ukon magpabilin nga nagahinakit? Ngaa bala nga ginapakanubo pa naton ang aton mga kaugalingon kon ang Hari sang mga hari nagaagda sa aton nga lab-uton ang makahalawhaw nga bwas-damlang sang diosnon nga kalipayan?5
Kaluwasan sa tunga Naton
Tungod sang perpekto nga gugma sang Dios sa aton kag sang walay katapusan nga sakripisyo ni Jesucristo, ang aton mga sala—ang pareho dalagko kag magagmay—sarang mapanas kag indi na pagadumdumon.6 Sarang kita nga magtindog sa Iya atubang nga matinlo, nagakaangay, kag ginpakabalaan.
Ang akon tagipusuon nagaawas sa kapasalamatan para sa akon Amay nga Langitnon. Akon nahangpan nga wala Niya gintalana nga ang Iya mga anak magpangabudlay sa mortal nga kabuhi nga indi makaangkon sang masanag kag wala katapusan nga palaabuton. Naghatag Sia sang mga panulin nga nagapakita sang dalan pabalik sa Iya. Kag ang sentro sining tanan amo ang Iya Pinalangga nga Anak, nga si Jesucristo,7 kag ang Iya sakripisyo para sa aton.
Ang walay dulonan nga Pagbayad-Sala sang Manluluwas lubos nga nagaliwat sang aton panan-aw sa aton mga kalapasan kag mga kakulangan. Imbes nga padalman ang mga ini kag magbatyag nga dawsa indi na matubos ukon wala na sing paglaum, pwede kita magtuon halin sa mga ini kag maglaum.8 Ang nagatinlo nga dulot sang paghinulsol nagatugot sa aton nga bayaan ang aton mga sala kag mangin bag-o nga tinuga.9
Bangod kay Jesucristo, ang aton mga kapaslawan indi kinahanglan maglaragway sang aton pagkatawo. Ang mga ini makapapino sa aton.
Pareho sa isa ka musikero nga nagahanas sa mga nota, makita naton ang aton sayop nga mga tikang, mga diperensya, kag mga sala bilang mga oportunidad para sa dugang nga pagkilala-sa-kaugalingon, madalom kag mas tampad nga pagpalangga sa iban, kag pag-uswag paagi sa paghinulsol.
Kon maghinulsol kita, ang mga sala wala nagadiskalipika sa aton. Ang mga ini kabahin sa aton pag-uswag.
Tanan kita mga lapsag ikomparar sa mga tinuga sang himaya kag sa kadungganon nga gintuga kita nga mangin. Wala sing mortal nga tawo nga nagaabante halin sa pagkamang pakadto sa paglakat pakadto sa pagdalagan nga wala pirme nagakasandad, nagakabunggo, kag mga lagob. Amo ina kon paano kita nagatuon.
Kon hugot naton nga ginapadayon ang paghimo, nga nagatinguha pirme sa pagtuman sang mga kasugoan sang Dios, kag ginadedikar ang aton mga paghimud-os sa paghinulsol, pagbatas, kag pagpangabuhi sang aton natun-an, sing amat-amat, magatipon kita sang kapawa sa aton mga kalag.10 Kag bisan nga indi naton lubos nga mahangpan ang aton bug-os nga potensyal sa karon, “nahibaloan naton nga kon [ang Manluluwas] magpakita,” makita naton ang Iya dagway sa aton kag “makita ta Sia subong nga Sia gid.”11
Daw ano katahum nga pangako!
Huo, ang kalibutan yara sa kagamo. Kag huo, may mga kahuyang kita. Apang indi naton kinahanglan nga magluya, tungod pwede kita magsalig sa Dios, pwede kita magsalig sa Iya Anak, nga si Jesucristo, kag pwede naton batunon ang dulot sang Espiritu nga maggiya sa aton sa sini nga dalan padulong sa kabuhi nga puno sang kalipay kag diosnon nga kasadya.12
Si Jesus sa tunga Naton
Masami ako nagapamensar, Ano ang itudlo kag himuon ni Jesus kon ari Sia sa tunga naton karon?
Pagkatapos sang Iya Pagkabanhaw, gintuman ni Jesucristo ang Iya promisa nga bisitahan ang Iya “iban nga karnero.”13
Ang Libro ni Mormon: Isa pa ka Katipan nahanungod kay Jesucristo nagahambal parte sinang pagpakita sa katawhan sa kontinente sang Amerika. May ara kita sining bilidhon nga rekord bilang isa ka makaptan nga saksi sang binuhatan sang Manluluwas.
Ang katawhan sa Libro ni Mormon nagpuyo sa pihak nga bahin sang globo—ang ila mga kasaysayan, mga kultura, kag mga kahimtangan sa pulitika malayo kaayo sa mga tawo nga gintudloan ni Jesus sa tion sang iya mortal nga pagpangalagad. Apang Iya sila gintudloan sang madamo nga pareho nga mga butang nga Iya gintudlo sa Balaan nga Duta.
Ngaa nga ginhimo Niya ina?
Ang Manluluwas masami nga nagatudlo sang wala nagalubad nga mga kamatuoran. Magamit ang mga ini sa mga tawo sa bisan ano nga pangidaron kag sa bisan ano nga sirkumstansya.
Ang iya mensahe sadto kag karon isa ka mensahe sang paglaum kag pagkalakip—isa ka testimonya nga ang Dios nga aton Amay nga Langitnon wala nagbiya sa Iya mga anak.
Nga ang Dios ara sa tunga naton!
Duha ka gatos katuig ang nagligad, ang Manluluwas nagbalik liwat sa duta. Upod ang Dios nga Amay, nagpakita Sia sa 14 anyos nga si Joseph Smith kag ginsugdan ang Pagpanumbalk sang ebanghelyo kag Simbahan ni Jesucristo. Sumugod sadtong adlaw, ang kalangitan nagbukas, kag ang langitnon nga mga mensahero nanaog sa duta halin sa lugar sang imortal nga himaya. Ang kasanag kag kaalam nagbubo gikan sa selestiyal nga trono.
Ang Ginuong Jesucristo nakighambal liwat sa kalibutan.
Ano ang Iya ginhambal?
Bilang bugay sa aton, madamo sang Iya mga pulong ang nasulat sa Doktrina kag mga Kasugtanan—nga matigayon sang bisan sin-o sa kalibutan nga luyag magbasa kag tun-an ang mga ini. Daw ano kamalahalon sining mga pulong sa aton sa karon!
Kag indi kita dapat makibot nga mabasahan nga ang Manluluwas nagatudlo liwat sang mayor nga mensahe sang Iya ebanghelyo: “Higugmaa ang Ginuo sa bug-os mo nga tagipusuon, sa bug-os mo nga ikasarang, panghunahuna, kag kusog; kag alagaran mo sia sa ngalan ni Jesucristo.”14 Ginainspirar Niya kita nga pangitaon ang Dios15 kag magkabuhi paagi sa mga panudlo nga Iya ginpahayag sa Iya mga alagad, ang mga propeta.16
Ginatudloan Niya kita nga higugmaon ang isa kag isa17 kag mangin “puno sang gugma para sa tanan nga tawo.”18
Ginaagda Niya kita nga mangin Iya mga kamot, nga maghimo sang kaayohan.19 “Dili kita maghigugma sa pulong … kundi sa buhat kag sa kamatuoran.”20
Ginahangkat Niya kita nga pamatian ang Iya dako nga sugo: nga magpalangga, nga magpaambit, nga mag-agda sang tanan sa Iya ebanghelyo kag Iya Simbahan.21
Ginasugo Niya kita nga magpatindog sang balaan nga mga templo kag magsulod kag mag-alagad didto.22
Ginatudloan Niya kita nga mangin Iya mga disipulo—nga ang ang aton mga handum indi dapat magtinguha para sa personal nga gahum, manggad, pagdayaw, ukon posisyon. Nagatudlo man Sia sa aton nga “ipahigad ang mga butang sining kalibutan, kag pangitaon ang mga butang sang mas maayo nga kalibutan.”23
Ginapaisog Niya kita nga pangitaon ang kalipay, kasanagan, paghidaet, kamatuoran kag kalipayan,24 kag ang promisa sang imortalidad kag kabuhi nga wala’y katapusan.25
Padayunon pa gid naton ini. Kon abi si Jesus nag-abot sa inyo ward, sa inyo branch, ukon sa inyo balay sini nga adlaw. Mangin ano ayhan ang sitwasyon?
Mahibaloan Niya ang matuodtuod ninyo nga balatyagon. Ang panggwa nga hitsura indi mangin importante. Makilala Niya kamo kon sin-o kamo. Mahibaloan Niya ang mga handum sang inyo tagipusuon.
Ibayaw Niya ang mapainumoron kag mapainubuson.
Ang masakiton Iya ayuhon.
Ang mga nagapangduhaduha pabakuron Niya ang pagtuo kag paisugon nga magpati.
Tudloan Niya kita nga buksan ang aton mga tagipusuon sa Dios kag magdab-ot sa iban.
Kilalahon Niya kag pasidunggan ang katampad, pagpaubos, integridad, pagkamatinuohon, pagkamaluluy-on, kag putli nga pagmahal.
Sa isa lamang ka pagtulok sa Iya mga mata madamo ang magabag-o sa aton. Magabag-o kita sing dalayon. Bag-uhon kita sang dako nga realisasyon nga, sa pagkamatuod, ang Dios ara sa tunga naton.
Ano ang Dapat Naton Himuon?26
Ginapanumdum ko nga may kaayo ang akon lamharon nga kaugalingon samtang nagadako. Kon pwede ako magbalik sa nagligad, paumpawan ko sia kag hambalan nga magpadayon sa paghimo sang husto kag magpadayon sa pagpangita. Kag pangabayon ko sia nga agdahon niya si Jesucristo sa iya kabuhi, kay ang Dios ara sa tunga naton!
Sa inyo, palangga kong mga kauturan, pinalangga nga kaabyanan, kag sa tanan nga nagapangita sang mga sabat, kamatuoran kag kalipay, ginatanyag ko ang amo man nga laygay: padayon sa pagpangita nga may pagtuo kag pasensya.27
Magpangayo, kag magabaton kamo. Magpanuktok, kag pagabuksan ini sa inyo.28 Magsalig sa Ginuo.29
Sa aton adlaw-adlaw nga pagpangabuhi importante naton nga hilikuton kag bulahan nga oportunidad ang maatubang ang Dios.
Sa aton pagsikway sang bugal kag pagpalapit sa Iya trono nga may masinulub-on nga tagipusuon kag mahinulsulon nga espiritu,30 Sia magapalapit sa aton.31
Samtang aton ginatinguhaan nga sundon si Jesucisto kag maglakat sa dalan sang pagkadisipulo, sing amat-amat, ang adlaw magaabot nga aton maeksperiyensyahan inang indi malaragway nga regalo sang pagbaton sang kabug-osan sang kalipay.
Pinalangga kong kaabyanan, ang inyo Amay nga Langitnon nagahigugma sa inyo nga may perpekto nga paghigugma. Iya ginpamatud-an ang Iya paghigugma sa indi maisip nga mga paagi, pero labaw sa tanan paagi sa pagtugyan Niya sang Iya Bugtong nga Anak bilang sakripisyo kag bilang regalo sa Iya mga anak agud matuman ang aton pagbalik sa aton langitnon nga mga ginikanan.
Nagasaksi ako nga ang aton Amay nga Langitnon buhi, nga si Jesucristo ang nagapanguna sang Iya Simbahan, nga si Pangulong Russell M. Nelson Iya propeta.
Ginapalab-ot ko sa inyo ang akon pagpalangga kag pagpakamaayo sa sining masadya nga panahon sang Paskwa sang Pagkabanhaw. Buksi ninyo ang inyo tagipusuon sa aton Manluluwas kag Manunubos, ano man ang inyo mga sirkumstansya, mga pagtilaw, pag-antos, ukon mga sayop, mahibaloan ninyo nga buhi Sia, nga palangga Niya kamo, kag tungod sa Iya, indi gid kamo magaisahanon.
Ang Dios ara sa tunga naton.
Sa sini ako nagasaksi kag nagapamatuod sa sagrado nga ngalan ni Jesucristo, amen.