Ġesù Kristu huwa l-Qawwa taż-Żgħażagħ
Afdaw f’Alla. Huwa jmexxikom fit-triq it-tajba. Huwa l-qawwa tagħkom.
Waqt li llum kont qed inħejji dan il-messaġġ, ħassejt fija b’qawwa li għandi nindirizza lit-tfajliet u l-ġuvintur.
Se nkun qed inkellem ukoll lil dawk li xi darba kienu żgħażagħ, anke lil dawk li m’għadhomx jiftakru aktar dak iż-żmien.
U se nkellem lilkom kollha li tħobbu liż-żgħażagħ tagħna u triduhom jirnexxu fil-ħajja.
Għall-ġenerazzjoni li għadha tielgħa, għandi messaġġ speċjalment għalikom mingħand is-Salvatur tagħna, Ġesù Kristu.
Il-Messaġġ tas-Salvatur Għalikom
Għeżież ħbieb żgħażagħ tiegħi, kieku s-Salvatur kien hawn illum, x’kien jgħidilkom?
Nemmen li jibda billi jesprimi l-imħabba kbira tiegħu lejkom. Jaf jagħmel dan permezz ta’ kliemu, iżda taf tinħass ukoll b’tant qawwa—sempliċiment mill-preżenza tiegħu—li tkun inkonfondibbli, fejn tilħaq il-fond ta’ qalbkom, u timla kull rokna ta’ ruħkom!
Madankollu, peress li aħna lkoll dgħajfin u imperfetti, moħħkom jaf jibqa’ mtaqqal b’ċerti ħsibijiet. Intom tafu tibqgħu tiftakru fi żbalji li wettaqtu, f’mumenti meta waqajtu fit-tiġrib, ħwejjeġ li tixtiequ li qatt ma wettaqtu—jew li tixtiequ li wettaqtu aħjar.
Is-Salvatur jagħraf dan, u nemmen li Hu jiżgurakom permezz ta’ kliem li Huwa qal fl-iskrittura:
“Tibżgħux.”1
“Tiddubitawx.”2
“Agħmlu l-qalb.”3
“Tħallux qalbkom titħawwad.”4
Ma naħsibx li jiskużakom għall-iżbalji tagħkom. Ma jippruvax inaqqas is-severità tagħhom. Le, Hu jitlobkom biex tindmu—li twarrbu dnubietkom, tinbidlu, ħalli jkun jista’ jaħfrilkom. Huwa jfakkarkom li 2,000 sena ilu Hu tgħabba b’dawk id-dnubiet ħalli intom tkunu tistgħu tindmu. Dik hi parti mill-pjan ta’ ferħ mogħti lilna minn Missierna fis-Smewwiet kollu mħabba.
Ġesù jaf ifakkarkom li l-patti li għamiltu miegħu—li għamiltu meta tgħammidtu u li ġeddidtu kull darba li ħadtu sehem fis-sagrament—jipprovdulkom rabta speċjali miegħu. It-tip ta’ rabta deskritta fl-iskrittura fejn bl-għajnuna tiegħu, tistgħu ġġorru kwalunkwe tagħbija li jkollkom.5
Nemmen li s-Salvatur Ġesù Kristu jridkom taraw, tħossu, u tagħrfu li Huwa l-qawwa tagħkom. Li bl-għajnuna tiegħu, m’hemmx limitu sa fejn tistgħu taslu. Li l-potenzjal tagħkom hu bla limitu. Hu jridkom tħarsu lejkom infuskom kif jarakom Hu. U dan hu differenti ħafna minn kif tħares lejkom id-dinja.
Is-Salvatur jiddikjara, bla tlaqliq, li inti bint jew iben Alla li Jista’ Kollox. Missierkom fis-Smewwiet huwa l-aktar esseru glorjuż fl-univers, mimli mħabba, hena, safà, qdusija, dawl, grazzja, u verità. U xi darba jridkom tirtu dak kollu li Huwa għandu.6
Hi r-raġuni għalfejn tinsabu fid-dinja—biex titgħallmu, tikbru, u tagħmlu progress u ssiru dak kollu li ħalaqkom għalih Missierkom fis-Smewwiet.
Biex dak ikun jista’ jseħħ, Huwa bagħat lil Ġesù Kristu biex ikun is-Salvatur tagħkom. Huwa l-għan tal-pjan kbir ta’ ferħ tiegħu, tal-Knisja tiegħu, tas-saċerdozju tiegħu, tal-iskrittura—ta’ kollox.
Dak hu d-destin tagħkom. Dak hu l-ġejjieni tagħkom. Dik hija l-għażla tagħkom!
Verità u Għażliet
Fil-qalba tal-pjan ta’ Alla għall-ferħ tagħkom hemm il-qawwa tagħkom li tagħżlu.7 Bla dubju, Missierkom fis-Smewwiet iridkom tagħżlu l-hena ta’ dejjem miegħu, u Hu jgħinkom tiksbuha, iżda Hu qatt mhu se jinponiha fuqkom.
Għalhekk Hu jagħtikom iċ-ċans li tagħżlu: Dawl jew dlam? Tajjeb jew ħażen? Hena jew miżerja? Ħajja ta’ dejjem jew mewt spiritwali?8
L-għażla tinstama’ waħda faċli, hux veru? Iżda b’xi mod, hawn fid-dinja, tidher li hija aktar kumplikata milli għandha tkun.
Il-problema hi li aħna mhux dejjem naraw l-affarijiet ċari daqs kemm nixtiequ. L-Appostlu Pawlu qabbel dan meta nħarsu “bħallikieku f’mera, mċajpar.”9 Fid-dinja hawn wisq konfużjoni dwar x’inhu tajjeb u x’inhu ħażin. Il-verità tiġi mdawra b’tali mod fejn il-ħażin jidher tajjeb u t-tajjeb ħażin.10
Iżda meta tfittxu l-verità b’ħerqa—verità eterna, li ma tinbidilx—l-għażliet tagħkom isiru aktar ċari. Iva, xorta waħda tħabbtu wiċċkom mat-tiġrib u l-isfidi. Xorta waħda tesperjenzaw affarijiet xejn sbieħ. Affarijiet li ma tkunux qed tistennewhom. Affarijiet traġiċi. Iżda jirnexxielkom tibqgħu għaddejjin meta tkunu tafu min intom, għalfejn tinsabu hawn, u meta tafdaw lil Alla.
Allura fejn tistgħu ssibu l-verità?
Tinsab fl-evanġelju ta’ Ġesù Kristu. U l-milja ta’ dak l-evanġelju hija mgħallma fil-Knisja ta’ Ġesù Kristu tal-Qaddisin tal-Aħħar Żmien.
Ġesù Kristu qal, “Jiena hu t-triq, il-verità u l-ħajja: ħadd ma jmur għand il-Missier jekk mhux permezz tiegħi.”11
Meta jkollkom għażliet importanti x’tagħmlu, Ġesù Kristu u l-evanġelju rrestawrat tiegħu huma l-aqwa għażla. Meta jkollkom xi mistoqsijiet, Ġesù Kristu u l-evanġelju rrestawrat tiegħu huma l-aqwa tweġiba. Meta tħossukom dgħajfin, Ġesù Kristu huwa l-qawwa tagħkom.
Huwa jagħti l-qawwa lil min hu għajjien; u lil dawk li jħossuhom bla qawwa, lilhom isaħħaħ.
Dawk li jitammaw fil-Mulej iħossuhom imġedda permezz tal-qawwa tiegħu .12
Għas-Sodizza taż-Żgħażagħ
Biex tgħinkom issibu t-Triq u tgħinkom tagħmlu d-duttrina ta’ Kristu l-influwenza li tiggwidakom f’ħajjitkom, il-Knisja ta’ Ġesù Kristu tal-Qaddisin tal-Aħħar Żmien ħejjiet riżorsa ġdida, verżjoni riveduta ta’ Għas-Sodizza taż-Żgħażagħ.
Għal aktar minn 50 sena, Għas-Sodizza taż-Żgħażagħ kienet gwida għal ġenerazzjonijiet sħaħ ta’ żgħażagħ Qaddisin tal-Aħħar Żmien. Jien dejjem inżomm kopja fil-but tiegħi, u nixxerjaha ma’ nies li jixtiequ jkunu jafu dwar l-istandards tagħna. Issa ġiet aġġornata biex taffronta aħjar l-isfidi u t-tiġrib ta’ żmienna. Ii-verżjoni l-ġdida ta’ Għas-Sodizza taż-Żgħażagħ hi disponibbli f’50 lingwa differenti u se tkun disponibbli wkoll stampata. Se tkun ta’ għajnuna sinifikanti biex tagħmlu l-għażliet f’ħajjitkom. Jekk jogħġobkom għamluha tagħkom u aqsmuha ma’ sħabkom.
Din il-verżjoni l-ġdida ta’ Għas-Sodizza taż-Żgħażagħ għandha s-sottotitolu Gwida li Tgħinkom Tagħżlu.
Biex inkun għidt kollox, l-aqwa gwida li qatt jista’ jkollkom fl-għażliet tagħkom hu Ġesù Kristu. Ġesù Kristu hu s-sodizza taż-żgħażagħ.
Għalhekk l-għan ta’ Għas-Sodizza taż-Żgħażagħ hu li tidderiġikom lejh. Tgħallimkom veritajiet eterni tal-evanġelju rrestawrat tiegħu—veritajiet dwar intom min intom, Hu min hu, u x’tistgħu twettqu bil-qawwa tiegħu. Tgħallimkom kif tagħmlu għażliet tajbin ibbażati fuq dawk il-veritajiet eterni.13
Hu importanti wkoll li tkunu tafu x’ma tagħmilx Għas-Sodizza taż-Żgħażagħ għalikom. Ma tiħux deċiżjonijiet għalikom. Ma tagħtikomx “iva” jew “le” dwar kull għażla li tistgħu qatt tiffaċċjaw. Għas-Sodizza taż-Żgħażagħ tiffoka fuq il-pedament għall-għażliet tagħkom. Tiffoka fuq il-valuri, il-prinċipji, u d-duttrina minflok fuq kull imġiba speċifika.
Il-Mulej, permezz tal-profeti tiegħu, minn dejjem ilu jiggwidana f’dik id-direzzjoni. Hu qed jitlobna biex “inkabbru l-kapaċità spiritwali tagħna li nirċievu r-rivelazzjoni.”14 Hu qed jistedinna biex “nisimgħuh.”15 Hu qed isejħilna biex nimxu warajh f’toroq aktar għoljin u qaddisa.16 U aħna qed nitgħallmu bl-istess mod kull ġimgħa f’ Come, Follow Me.
M’hemmx dubju li gwida tista’ tippreżentalkom lista twila ta’ lbies li m’għandkomx tilbsu, kliem li m’għandkomx tgħidu, u films li m’għandkomx taraw. Iżda dan verament ikun ta’ għajnuna fi knisja globali? Dan it-tip ta’ atteġġjament verament iħejjikom għal għajxien ta’ ħajja Kristjana?
Joseph Smith qal, “Jien ngħallimhom prinċipji korretti, u huma jmexxu lilhom infushom.”17
U s-Sultan Benjamin qal lin-nies tiegħu fil-Ktieb ta’ Mormon, “Jien ma nistax ngħidilkom kull ħaġa li permezz tagħha tistgħu taqgħu fid-dnub; għax tant hemm modi u mezzi diversi, li ma nistax insemmihom kollha.”18
Is-Sultan Benjamin kompla biex jgħid, “Iżda li nista’ ngħidilkom hu dan, … ikkontrollaw lilkom infuskom, u ħsibijietkom, u kliemkom, u għemilkom, u osservaw il-kmandamenti ta’ Alla, u ibqgħu fil-fidi ta’ … Sidna l-Mulej, sewwasew sat-tmiem ta’ ħajjitkom.”19
Xi ħaġa ħażina li jkollna ċerti regoli? Żgur li le. Aħna neħtiġuhom kull jum. Iżda ħażin li niffokaw biss fuq ir-regoli minflok ma niffokaw fuq is-Salvatur. Jeħtieġ li tkunu tafu l-għalfejn u l-kif, u mbagħad tikkunsidraw il-konsegwenzi tal-għażliet tagħkom. Jeħtieġ li tafdaw f’Ġesù Kristu. Huwa jmexxikom fit-triq it-tajba. Huwa l-qawwa tagħkom.20
Il-Qawwa tal-Veru Duttrina
Għas-Sodizza taż-Żgħażagħ tiddikjara bla tlaqliq id-duttrina ta’ Ġesù Kristu. tistedinkom bla tlaqliq biex tibbażaw l-għażliet tagħkom fuq id-duttrina ta’ Kristu. Tiddeskrivi bla tlaqliq il-barkiet li Ġesù Kristu jwiegħed lil dawk li jimxu fit-Triq tiegħu.21
Il-President Russell M. Nelson għallem: “Meta l-akbar xewqa tiegħek hi li tħalli lil Alla jiddomina f’ħajtek, … ħafna deċiżjonijiet isiru aktar faċli. … Ħafna kwistjonijiet ma jibqgħux aktar importanti! Tkun taf kif għandek tieħu ħsieb aħjar tiegħek innifsek. Tkun taf x’għandek tara u taqra, fejn tqatta’ ħinek, u ma’ min tagħmilha. Tkun taf xi trid twettaq f’ħajtek. Tkun taf it-tip ta’ bniedem … li trid verament tkun.”22
Standard Ogħla
Ġesù Kristu jistenna standards għoljin ħafna mid-dixxipli tiegħu. U l-istedina biex tfittxu b’ħerqa r-rieda tiegħu u tgħixu skont il-veritajiet tiegħu hija l-ogħla standard possibbli!
Għażliet temporali u spiritwali importanti m’għandhomx ikunu bbażati biss fuq preferenzi personali, jew dwar x’inhu konvenjenti jew popolari.23 Il-Mulej mhux qed jgħid, “Agħmlu li tridu.”
Hu qed jgħid, “Ħallu lil Alla jiddomina.”
Hu qed jgħid, “Ejjew, imxu warajja.”24
Hu qed jgħid, “Għixu b’mod aktar qaddis, ogħli u matur.”
Hu qed jgħid, “Ħarsu l-kmandament tiegħi.”
Ġesù Kristu hu l-eżempju perfett tagħna, u aħna nagħmlu li nistgħu bl-enerġija kollha ta’ ruħna biex nimxu warajh.
Għeżież ħbieb tiegħi, ippermettuli ntenni li jekk is-Salvatur kien jinsab wieqaf hawn illum, Hu kien jesprimi l-imħabba bla tmiem tiegħu għalikom, il-kunfidenza sħiħa li għandu fikom. Huwa jgħidilkom li intom kapaċi tagħmlu dan. Intom tistgħu tibnu ħajja hienja u kuntenta peress li Ġesù Kristu huwa l-qawwa tagħkom. Tistgħu ssibu l-kunfidenza, is-sliem, is-sigurtà, il-ferħ, u l-appartenenza issa u fl-eternità, għaliex intom issibu dan kollu f’Ġesù Kristu, fl-evanġelju tiegħu, u fil-Knisja tiegħu.
Ta’ dan jien naqsam magħkom ix-xhieda tiegħi bħala Appostlu tal-Mulej Ġesù Kristu u nħallikom bil-barka sinċiera tiegħi bi gratitudni u mħabba kbira lejkom, f’isem Ġesù Kristu, ammen.