Gapas ni Fan Ngom ko Ngiyal’ nib Gel e Momaw’
Dakriy bi’id ngay fani ga’fan ni ngan gay e gapas ni fan ngom.
Dawri n’uw napan nikan pi’ ba murwel ngog ni nggu yibliy biyang ko fare nu’un ni kakrom ni kanoeg e Nauvoo ngay. Bang ko re murwel ney, yag ni gu wean ko fare Kalbus nu Liberty u Missouri. Napan ni gube sap nga ya’an fare kalbus, mug tafney nag fan ni ke par ni kabang ko cheppin e Galasia nib ga’fan. Yafos ko girdi’en e Galasia e ni gaareag ko cham ni yibe gay rogon ni ngan kireb nag ni bachan e aam u Missouri ni pi’ motwon e biney. Ni kab mu’un, fare Profet Joseph ngay nge ku buch nikan kalbus nag raed ulan fare Kalbus u Liberty. Reb fan ni yib e kireb nga dakean gidii’en e Galasia e bachan oren i yaed e dabun e tafney ni boch e girdi’ ab sobut’ ni yaed e tapigpig ko boech e gidii’.1 Biney e cham ntay ngak Joseph Smith nge fapi gachalpen e reb wo’en ni dani mat’aw nikan dugliy ni ngan rrin’ nike gafgow nag e girdi’ nib mat’aw. Ngiyal’ ni i moy Joseph ulan fare Kalbus u Liberty e pow riy nibe dag ni fare mo’oniyan’ e dabun e tirok Somoel banan fa dabun ni ngan thapeg fapi tawa’ath rok.
Ri gu thamiy u ngorngoreg napan ni gu be’eg e thin rok fare Profet Joseph Smith napan ni yoel ulan fare Kalbus u Liberty: “O Got, kam man ngan? Ma bu’uw farngi chig nra mithag tigil’im nib mith?”2 Joseph e fith ko uw n’umngin napan e pi girdi’ rok Somoel “ni nge gafgow ko pi kireb ney nge pi ngongol ney nde fel’.”3
Napan ni gub saki’iy ulan fare Kalbus u Liberty, me chub u gum’ircha’eg napan ni gu be’eg fare fulweg rok fare Somoel: “Fakag, yib e gapas ngom; gafgow rom nge mo’owar rom e kemus ni ta’abochingiyal’; ma, fa’anra gara athamgil, ma Got e ra n’uf nigem ngalang.”4 Rib magagiyel nibe m’ug ni tin nib thil e rayag ni nge ayuwegdaed ko tin nib manechubog, ko tin ni kan dugliy nra buch rodaed nibay rogon ko celestial.5
Fare thin rok fare Tathapeg nib simunguy “Fakag, yib e gapas ngom”6 e ke par rog ma bay nib ga’fan ko pi rran rodaed e chiney. Pugoran ngog fapi machin rok ngak fapi gachalpen ko ngiyal’ ni i moy u fayleng nibe machib.
U m’on ni gafgow Kristus ulan faregi Milay’ nu Gethsemane nge u dakean fare kuruth, motochiyel nag ngak fapi Apostles rok ni “bigimed me t’uf bigimed rok; rogon ni um pired ni gimed ba t’uf rog”7 me gapas nag raed ko pi thin ney: “Nggu tay e gapas nge par romed, nggu pi’ e gapas rog ngomed: dab gu pi’ ngomed ni bod rogon nma rin’ e girdi’ nu fayleng. Dabi magafan’med ma dabi wagagey lanin’med, ma dab mu tamdaggad.”8
Reb fithingan e Somoel rodaed ni fare Tathapeg, ni Yesus Kristus, e “Pilung ko Gapas.”9 Gul’ilungun e ran toey nib mu’un e gapas nge t’ufeg riy.10 Sap gaed nga m’on ko fare gagiyeg ko millenial rok fare Messiah.
Demuturug rogon e biney e gagiyeg ko millennial, gadaed manang ni gapas nge munguy e dani yo’or ko rran rodaed e dabay.11 Urngin napan e yafos rog, ma dariy bi’id ni ku guy fani de ta’areb e girdi’ riy. Gadaed ba sug ko damomow, thin ni to’ogor nge fekyaeth, nge ngongol nibe kireb me be gathay nag e gapas.
Gapas u fayleng e dani micheg fa ni michmicheg nge mada’ ko ngiyal’ ko fare bin Magid ngay ko Wub rok Yesus Kristus. Fare Tathapeg e fil ngak fapi Gachalpen ni fare wub rok nga fayleng e dabi pi’ e gapas. Ke fil, “Dab mfineyed ni ku gub ni nggu fek e gapas i yib nga fayleng.”12 Gapas u fayleng e gathi biyang ko fare machib rok fare Tathapeg. Gapas u fayleng e dariy e dabay.
Machane, gapas ni fan ngom e rayag nigan thapeg demuturug gelngin e damomuw, mel’egthin, nge k’iyeg e gidii’ nibe kireb nag e fayleng e dabay. Dakriy bi’id ngay fani ga’fan ni ngan gay e gapas ni fan ngom. Ba tang ni kab be’ech ko fare hymn, ni fan e fel’yangren e dabay nike yoloey Brother Nik Day nike tunguy fithingan ni “Gapas ngak Kristus”, “Napan ndakriy e gapas u fayleng, bay e gapas ngak Kristus.”13 Gadaed ba tawa’ath ko biney e tang ko hymn u m’on ni yib fare m’ar ko COVID-19 nga dakean e fayleng.
Biney e tang ko hymn e ba tang ni fan e gapas me be yip fan ni gapas e yuluy ko yafos rodaed nge rogon e murwel rok Yesus Kristus. President Joseph F. Smith e ga’ar, “Dariy bi’id nra yib nga fayleng fare thothup ko gapas nge t’ufeg … nge mada’ ko ngiyal’ nike thapeg e girdi’ fare thin rok Got nib riyul’ nge mulwol rok Got … min nang e llowean’ rok nge gelngin ni’ir e ba thothup.”14
Machane dabin pag i gay rogon e gapas u fayleng, kan micheg ngodaed nrayag e gapas ni fan ngodaed, ni woed rogon nike machib nag Kristus. Biney e yalen e bay ulan e Doctrine and Covenants: “Machane mu fil ni cha’en nima rrin’ e murwel nib mat’aw e ra thapeg fare tawa’ath rok, nib mu’un e gapas ngay ko re fayleng ney, nge yafos nib manechubog ko bin migid e fayleng ni bay i yib.”15
Mang boch ko fapi “murwel nib mat’aw” nrayag ni nge ayuwegdaed nge achig nag e tuwthin nge to’ogor me ayuwegey ngan pire’eg e gapas ko biney e fayleng? Gubin fapi machib rok Kristus e be dag rogon e biney. Bay gu weliy mornga’agen inn nib michuwun’ug ni rib ga’fan.
Bin somm’on: T’ufeg Got, Fol ko fapi Motochiyel rok, mag N’agfan Gubin e Girdi’
President George Albert Smith e mang President ko Galasia ko napan e 1945. Yi manang ni ngiyal’ e duw ni i mang Apostle yi manang ni ir reb e tiyugang’ ni ba’adag e gapas. U m’on ko 15 e duw ni mang president, mo’owar nge sikeng nib ga’ nge gafgnow ni yib nga dakean e nam, nge girdi’ ni yim’ ni bachan e War II, e ke par nibay e gapas riy.
Napan e tomur ko World War II, napan e bin somm’on e general conference ni ir e president ko October 1945, President Smith e pog orren ngak fapi Girdi’en e Galasia ni ngar t’ufeged e bugiliyiror roraed mi yaed n’agfan e kireb ko pi to’ogor roraed ni woed rogon nike pining fare Tathepg ni ngar rrin’ed me fil, “Iraram e fare thothup ni gubin Girdi’en Got ko tin Tomur e Rran e thingar thapeged ni fa’anra yaed ba’adag ni ngar saki’iy gaed u powchen me fek raed ngalan pa’ me pining raed nga tabinaew.”16
Bin l’agruw: Gay Wa’amngin e tin nib Thothup
Apostle Paul ni yoel, ngak fapi Galatians ni weliy mornga’agen fagli murwel nib mat’aw nra ayuweg daed ngan thap nga gul’ilungun Got nge fare murwel nrayag ninge ayuweg e biney, ni fa’anra dariy e kalngaen’ riy, ma aram ndabiyag ngodaed. Ko pin’ey nra pi’ ngodaed e iraram fapi wa’amngin e tin nib Thothup: “t’ufeg, felfelan’, gapas laniyan’, gumaen’, gol, nge fel’ ngak e girdi’, nge yul’yul’, nge sobut’an’, [nge] t’ar laniyan’.”17 Paul e ke uneg ngay nra bigimed me ayuweg bigimed nge un i fek gilban fa’anem.18 Ma tin ni murwel ni gathi murwel ko tin nib mat’aw e ba mu’un e damumuw, puwan’, nge awan’.19
Reb e machib ni rib ga’fan ulan fare bin Kakrom e M’ag e mornga’agen Chitamangiy Abraham. Abraham nge Lot, ni fak walagen ni bpin, e ri yow fla’ab machane kar guyew ndabiyag ni ngar pirew u ta’abang. Ra ngar pigew e cham, ke pag Abraham i Lot ni nge mel’eg u biyang ulan fare binaew ni nge par riy. Lot e mel’eg ninge par u Jordan, nibay e rran riy nib fel’ mab fel’ ya’an. Abraham e par ko gin ni gathi rib fel’ e but’ riy ni ka noeg u Mamre ngay. Fapi thin nib thothup e yoeg ni Abraham e toy fagi tent rok me “ubung ba altar riy ni fan ngak Somol.”20 Me yan i par Lot, ni bay u lan fare loway “nib chugur ko binaw nu Sodom.”21 Ra nge fel’ thilrow, magagiyel e n’en nibe machib nag: ni thingar da gayed rogon ninge ta’areb lunguy min gay rogon ni ngan par ni dariy e awan’ ma bay e tayfan ko tin nib ga’fan ndar un ko tin nib mat’aw. Woed rogon ni machib nag fare Pilung i Benjamin, “Ma dabi yib ngaenʼmed ni ngam gafgow niged gimed, machane ngam pired u fithikʼ e gapas.”22 Machane rogon nibay nib mat’aw nge tin nib ga’fan e gam’ing, rib tu’uf ni ngaed pired ni gadaed ba gel ma dabin mul.
Fa’anra gadaed ba’adag ninge thap e gapas ni ir e tawa’ath ko fare murwelen e mat’aw, ma dabda toyed fapi tent rodaed nga fayleng. Gadaed ra toy fapi tent rodaed nib chugur ko temple.
Bin dalip: Puf Mot’wom ningam Mel’eg e Mat’aw
Gapas nge turguy rom e ba chuchur rogon ni ir e kabang ko fare wo’en e tonom ko thap. Woed rogon nikan weliy ko Gospel Topic “Puf Mat’wom ningam Mel’eg,” “Mel’eg e ke pi’ Got ngodaed ni ngaed mel’eged ma gadaed rrin’ ni fan ngodaed.”23 Aragon, puf mat’woy ningan mel’eg e ir e lukungun rogon ni mon’og nge tin ni bayi buch nra tawa’ath nagdaed napan ni gadaed be lek fare Tathapeg.24
Mat’woy ningan mel’eg e ka banan nin dugliy “U m’on ko fayleng ulan fare Mu’ulung u Tharmiy” me buch ni boech e mel’eg ni nge un ngak Kristus ma boech e un ngak Mo’oniyan’.25 Pag e tarfangin min gay rogon ngan mel’eg fare Thapeg e ra ayuwegdaed nge yib e tamilang nge gapas rok ngodaed. Machane mat’woy ningan mel’eg e krayag nra mad’ad ngak be’ fa ni magawon ngak be’.
Rib michuwun’ug ngay ni fare gapas nikan micheg nag ni kad thamiyed e kan gel nag nibe yib ko fapi llowean’ nibay rodaed ko fare Tathapeg ko fayleng nra rrin’ ni fan ngodaed. Machib Nag e Gospel Rog: “Napan ni gadaed ra taga’ ko fare Bayul rok Yesus Kristus, ma rayag nra ayuwegdaed ko pi mo’owar rodaed, nge gubin mit e m’ar, nge amith. Ma rayag nran suguy daed ko gapas, nge cham ningan taleg. Gubin ban’en nib [momaw’ man sikeng] ko yafos e rayog ni ngan fal’eg u dakean fare Bayul rok Yesus Kristus.”26
Bin aningeg: Ntoy Tofen Zion ngalan Gum’ircha’endaed nge Tabinaew Rodaed
Gadaed e bitir rok Got ma gadaed biyang ko tabinaew rok. Gadaed biyang ko fare tabinaew ni ir e gin ni gargelegdaed riy. Biney e ulung ko tabinaew is ir fare def ko fan ko falfalaen’ nge gapas. President Russell M. Nelson e fil ngodaed, ko biney e m’ar nike garag u dakean e fayleng kad filed, ni tabinaew-nibe par e Galasia u lukungun-ni yibe tayfan e tiliw riy, e rayag “ninge pi’ gelngin ko tabinaew … ninge thil e tabinew [rodaed] [s] ko gin ni tigil’ e mich.”27 Fa’anra bay e tiliw ni yibe tayfan ulan e tabinaew rodaed, ma krayag ngodaed fare gapas rok fare Tathapeg.28 Gamad manang ni oren ni gimed e dariy e tabinaew rok nib mat’aw ma be gafgow ko girdi’ nibe mel’eg e tin nde mat’aw. Fare Tathapeg e rayag ni nge yororiyem nge gapas nra powi’iyem ko gin nib gapas ko yoko’ nibe yib ngalan e yafos.
Gube micheg nag ngom ni fare falfalaen’, t’ufeg, nge gay rogon ni ngan t’ufeg, tabinaew nib mat’aw e ra pi’ e gapas nge falfalean’. T’ufeg nge gol e ir fare lukungun nibay fare Zion ulan gum’ircha’endaed nge tabinaew rodaed.29
Laal: Lek fapi Mulwol nike Ta’ar Midlen e Profet Rodaed Ngodaed
Gapas rodaed e ran ga’nag napan ni gadaed ra lek e profet rok Somoel, President Russell M. Nelson. Ndab ki n’uw napan ma gadaed motoyil ngak. Ke fal’eg rogon u mm’on ni kan sunmeg e fayleng nifan e biney e murwel. Rogon ni fel’eg rogon e rin mangil nib gel.30
Ke fil ngodaed nrayag ni ngaed “thamiyed e gapas nge falfalaen’ ko ngiyal’ nib momaw’,” ni gadaed be gay rogon ni ngaed boded fare Tathapeg rodaed, Yesus Kristus.31 Be machib nag ngodaed ni ngan “kalngaen’uy ni gubin ngiyal’“ ninge thapeg e “be’ech nag daed Somoel, me gol nagdaed, me gelnag daed.”32 I gag be’ nib michuwun’ug ni kan pi’ e yi’iy nikan mu’ i thapeg ma be ul’ul’ ni yibe thapeg nibe yib u tharmiy ngak e profet rodaed.
Napan ni gadaed be tayfan ma gadaed be tay ni ir e profet rodaed, ma ram ni gadaed be tayfan e Chitamangdaed nibay u Tharmiy nge fare Tathapeg rodaed, Yesus Kristus. Gadaed be machib u dakean fare Kan ni Thothup.
Gube micheg ma gube pi’ e birog e mich ni gag reb fapi Apostle ni Yesus Kristus, fare Tathapeg nge Tabayul ko fayleng, e be gagiyeg me be powi’iy e Galasia rok nikan sulweg yarmen. Yafos rok nge bayul rok e ir e gin nima yib e gapas riy. I’ir fare Pilung ko Gapas. Ri gube micheg nri bay nib fos. U dakean fithngan Yesus Kristus, amen.