Fare Mich ningan Fith nge Mu’ min Rrin’
Mich ngak Yesus Kristus e ir fare kiy ko thapeg fapi yi’iy nib riyul’.
Pi walageg nib t’uf rog, kug faflaen’ ni gube non ngomed nap’an e re Sabado ni mithig yal’ ney ko mo’olung ney ko general conference. Nap’an e welthin rok ko re conference ney ko kakadbul riy, President Russell M. Nelson keyog ni “yi’iy nib machalbog nifan ko fapi duwer ulan e gum’ircha’med ra fal’eg e mu’ulung ney nibthabi fel’ ndab ni pagtalin. Fa’anra dawrum gay rogon fapi machib nima yib rok fare Kan ni Thothup ninge ayuwegnem ngam rung’ag e tin ni ba’adag Somol ni ngam rung’ag ko gali rran ney, gube piningem e chiney ni ngam rrin’ e biney.”1 Kug gay e biney e tawa’ath napan ni kug fal’eg rogog ni nggu thapeg e yi’iy ko biney mu’ulung ngom. Gube meybil ningam thapeged e re yi’iy ney ku Got.
Rogon ni ngam thapeged e yi’iy ku Got e dawri thil rogon ko napan e pi rran rok Adam nge Eva. Ni ta’ab rogon nifan ko gubin e ta pigpig rok Somoel aram ko somm’on nge yibi mada’ ko ngiyal’ ney. Ni ta’ab rogon nifan ko gur nge gag. Ma rrin’ napan ni gagyeg nag e mich.2
Joseph Smith ni kab pagael bay bochi mich ni nge fith e duwer ngak Got, ya mich u wan’ ni Got e ra fulweg e tin ni ba’adag. Biney e fulweg nike yib ke thilyeg e feylang. Ir e ba’adag ni nge nang ko bin ngan e galasia ni thingri un ngay ni nge be’ech nag ko denen. Fulweg ni ke thapeg e ke pii’ e athamgil ngak ni nge fith e pi duwer nib fel’ nge rrin’ e ngongol bachane ko yi’iy ni kab tabab.3
Sana biney ra buch ngom chuchugur ko ta’ab rogon ulan e biney e mu’ulung. Bay e duwer rom ni gaba’adag ni ngan fulweg taban. Bay bochi mich ni ngam athap ni fulweg ni yib ngom rok’ fare Somoel ufithik’ e tapigpig Rok’.4 Dariy rogon ni ngam fith ngak e tanon nifan ko pi fulweg, machane ra ngam fith ngak e chitimangiy rom nib sumunguy u dakean e meybil.
Gu manang ni ra yib fapi fulweg taban e tin nib tu’uf ngom nge tin nib tu’uf ko rogon ni ngan fal’ag nib thothup ngom. Fa’an thingar mu thapeg e fulweg nifan e tin ko yafos rom nib manechubog fa ku bee’, sana biney e fulweg e ra yib nib papay. Machane, sana, rangam thapeg—woed ni Joseph Smith—fare fulweg ni ngam soen.5
Fa’an e mich rom Yesus Kristus ke munguy nag e gum’ircha’ ufithik e gelingen ko Bayul Rok’, rangam rung’ag ni rib fel’ e kathkath nag rok fare Thothup ni ma fulweg e pi meybil rom. Ya mich rog ni, lam nib achigchig rib moem—nib riyul’l—ni nggu rung’ag ulan e tafney rog napan kug thamey e gapas nge sobut’ niged yaed ko gubin e pin’en ni ba’adag Somoel. Biney e thamiy nib sobut’ e boed rogon ko “Machane gathi tin nib m’agan’ug ngay e ngam rin’, ya tin nib m’agan’um ngay.”6
Wo’en e biney e yi’iy e fan ni ngam rung’ag e pi tanon nibe machib nag ulan e biney e mu’ulung ni kanoeg e machib ku Kristus ngay.7 Yi’iy e ma yib ngodad ni yuyang ko rogon ni ngad thapeg e machib ku Krustus ulan e gum’ircha’endad min tay ngalan e yafos rodad.
Kaga manang ulan fare Babyor ku Mormon Nephi ke weliy ngodad e mich ngak Yesus Kristus th’abi gaa’ fan e yi’iy ko tin riyul’ nge th’abi gaa’ fan ni ngad nanged gadad be leaked e fanow rok’ fare Tathapeg. Nephi e ke yoloey e pi thin ney ni bo’or e duw u mon nin gargeleg Yesus Kristus ko yafos ney:
“Pi angel e manon u dakean gelingin fare Kan ni Thothup; ere, yaed mayoeg e thin rokʼ Kristus. Ere, gube gaʼar ngomed, mu duruwʼiyed gimed ko thin rokʼ Kristus; ya musap gaed, pi thin rokʼ Kristus e ra yoeg ngomed rogon gubin e pinʼen ni ngam rinʼed.
“Ere, chiney u tomuren ni kug weliy e pi thin ney, ma faʼanra damur nanged fan meʼere ra yaeni aw ni bachan e damur deʼeriyed, ara mu tugtuguyed e mab; ere, danur fekmed nga tamilang, ere thingar mmʼaed u fithikʼ e lumor.
“Ya musap gaed, bayay, gube yoeg ngomed ni faʼan gimed ra yaen u lan fare paʼ i kanawoʼ, mi gimed thapeg fare Kan ni Thothup, ma ra dag ngomed gubin banʼen ni ngam rinʼed.
“Musap gaed, ireray fare machib rokʼ Kristus, ma arame dakuriy e machib ni ngan piiʼ nge yaeni madaʼ nga tomuren ni ke mʼug ngomed u lan e dowef. Ma napʼan nra mʼug ngomed u lan e dowef, ma pinʼen nra yoeg ngomed e ngam guyed rogon ngam rinʼed.”8
Somoel e ra yoeg e pin’en u fithik e pi tapigpig Rok ngodad ko daba’ nge borran. Irra non ngodad e pin’en thingari rrin’ed.9 Fare Tathapeg e dabi tolul nag e chiyliy rok ngodad. Woed nike fil ngak Elijah:
“Me ga’ar SOMOL ngak, Mman nga wean nga mub mu sak’iy nga p’eowcheg u p’ebugul e re burey ney. Me yib SOMOL nge yan nib chugur ngak, me pi’ bangi nifeng nib gel nib gel nge yib nge rurug fare burey me bilbilig e war, machane de moy SOMOL u fithik’ e re gi nifeng nem. Me tal fa gi nifeng ndaki thow, me yib ba durru’, machane de moy SOMOL u fithik’ e re durru’ nem:
“Me chuw fare durru’ me yib ba nifiy, machane de moy SOMOL u fithik’ e re nifiy nem. Me chuw fare nifiy me yib ba lam ni be kathkath.”10
Rung’ag e binem e lam era yib ko mich rodaed ngak. Mich nibay nib buchu’uw, gadad ra fith ngak ko kanawo’ nge gadad ranoed nge rrin’ demtrug ni ma fith ngodad.11 Rangad gaa’ nag e mich ni ngad nanged demtrug Ir ma fith ngodad ra yibliy nag e gidii, nge rangad machalbog nagdad bachane e t’ufeg rok ni fan dad.
Mich rodad ngak Yesus Kristus e ra wawliy daed ni ngad fithed ngak e Chitimangiy nifan ko pi fulweg, mich nem e ra fekdad ko rogon nib munguy rok’ e Tathapeg ni ngad rung’ag e kanawo’ Rok’ nge thapeg e athamgil nge falfalaen’ ni ngad fol. Ma gadad ra yon’ed fapi thin ko fare tang u fithik e falfalaen’, dariy fan e muruwel nib momaw’ riy: “Nib fel’ e muruwel riy, Got rog, Pilung rog.”12
Ma baga’ ni tin ba’aray e michib rok Kristus ulan e yafos rodad nge gum’ircha’endad, e baga’ ni tin ba’aray ni ngad thamiyed e adag nib gaa’ nifan ko pi’in dar thap e pi tawa’ath ko mich u Yesus Kristus fa pi’in dabi gaa’nag binem. Rib momaw’ ni ngam fol ko pi motochiyl rok Somoel fa’an dariy’ e mich nge pa’agaen’ Ngak. Napan boch e ra palog e mich rorad rok fare Somoel, boch e ra cham ngak fapi mulwol Rok’, ra pining e fel’ ko tin nib kireb nge kireb ko tin nib fel’.13 Ra dabin rrin’ e re oloboch ney, rib gaa’ e yi’iy nifan ngom ni mornga’agen e tafney nge ngongol dabi cham ko fapi machib ko fare Somoel nge pi profet Rok’.
Pi walageg, ba tu’uf e mich ni ngam fol ko fapi motochiyl rok Somoel. Ba tu’uf e mich ngak Yesus Kristus ni ngam pigpig ngak e gidii’ nifan ngak. Ba tu’uf e mich ni ngam machib nag e gospel Rok’ nge pii’ ngak’ e gidii’ ni dabi thamiy e lam ko Thothup fa boch enra fek yathin e tin riyul’ ko mulwol. Machane napan ni ngad gagyeg nag e michaen’ ngak’ Kristus—min fol ko profet Rok’ nib fos—ra gaa’ nag e mich u dakean e feylang. Bachan e technology, sana boch e bitir ku Got e ra rung’ag nge nang e thin rok Got ko biney e wikind demtrug reb ko gali rran ney ko chep rorad.
U fithik e mich nib gaa’ biney ir e Galasia rok Somoel nge gil’ilungun u dakean e feylang, bo’or e chongin ma pii’ e tithing nge reb e salpiy nifan e ayuw, dariy fan e magawon roraed. Dakean e mich ngak Yesus Kristus ke pinning raed, fapi missionaries u dakean e feylang kar fal’ig rogon ni ngar gelnag e tin momaw’ ko m’ar—nge rrin’ u fithik e athamgil nge falfalaen’. Nge udakaen e ngongol nib gaa’, kan gaa’ nag e mich roraed.
Togopluw nge sikeng e ke mang tafen e gaa’ nag e mich. Binem e riyul’, ma rib gaa’ ni yigo’ ke tabab ko fare Sulweg nge fal’eg fare Galasia rok Somoel.14
Thin rok President George Q. Cannon e ga’ar kafram e be riyul’ daba’ nge mada ko ngiyal nra sul fare Tathapeg nge powi’iy e Galasia Rok’ nge gidii Rok’: “Ma fol ko fare Gospel ra fek e [gidii’] nga e tha’ nib fel’ rok Somoel. Ir e ma puthuy nib fel’ e gidii nu feylang ko Tasunmiy nib gaa’ nu feylang. Ma pii’ ulan e tafney ko bee’ e athamgil nib macholbog ulan e Gubin ma Rayog Rok’ nge ba’adag rok’ ni Nge rung’ag nge fulweg e pi meybil rorad e gidii’ ma tay e pagaen’ roraed ngak’. Ulan e magawon nge tin mo’omaw’ biney e athamgil ni dariy’ e pulwon riy. Magawon ra yib ngak e bee’ fa ngak e gidii’, tin nima gathy ra yib nge athap ko gidii’ ra chuw, machane, napan e gidii’ kar thapeg e ayuwegrad bachane ni kar fol pin’en ko fare Gospel, yad be thapeg e dayif nib gel; kar sakiy nga dakaen e malong ni dabi mithmith.”
Ya mich rog e malong ni ngad sakiy nga dakean i ir e pow riy rodad ni Yesus e ir Kristus, biney ir e Galasia Rok’ nibe powi’iy’ nge President Russell M. Nelson e ir fare profet Rok’ e daba’ nib fos.
Presiden Nelson be thapeg e chiylen ku Somoel. Ke dag yalen ngog ni ke sap ko kanawo’ ma ba’adag ni nge fol. Biney ni ba’adag ni nge fol e kanawo’ rok Somoel e be paer ulan gubin gum’ircha’enraed e pi’in ni ra non, meybil, fa yon e tang ko re mu’ulung ney ko Galasia Rok’.
Gube meybil pi’in nibay u dakean e feylang e ra rung’ag fa sap ko re mu’ulung ney mara thamiy e t’uf rok’ Somoel nifan ngoraed. Chitimangiy nu Tharmiy nike fulweg e meybil rog ni nggu thamiy nib buchiyang fare t’ufeg rok Somoel nifan ngomed nge t’ufeg Rok’ nifan Ngak e Chitimangiy nu Tharmiy, ni’ir e Chitimangdad nu Tharmiy.
Gube micheg nib fos Yesus Kristus. I Ir e Tabiyul rodaed nge Tathapeg rodaed. Ireray e Galasia Rok. I’ir e ba suwey. Ir, nge Chitamangin, kar m’ugew ngak Joseph Smith u fithik ulan e luway nib sug e geki’iy riy u New York. Fare gospel rok’ Yesus Kristus nge gelingen Rok’ ke sulweg u dakean fapi tamal’og.16 Dakean gelingin fare Kan ni Thothup, guma nang ni biney e riyul’.
Gub meybil ni ngam thapeg ni ta’ab rogon e biney nibe micheg. Gu meybil ni gamed ra fith ngak Chitimangiy nu Tharimy ni fan ko mich ngak Yesus Kristus ni thingari t’uf ni ngam fal’eg nge kol e micheg ni ra ayuweg e Kan ni Thothup ma paer rom ni gubin e rran. Gub pii’ ngomed e adag rog nge m’ag rog u dakean fithingan nib thothup Yesus Kristus, amen.