Runguy nima Thamgiliy fare Tathapeg
E murnguy ngak reb e girdi’ i’ir e kenginn e gospel ku Yesus Kristus.
Ta’areb e fil nib ga’ ni ke pi’ fare Tathapeg nap’an e muruwel rok u fayleng ningan yoeg e murnguy ngak e girdi’. Ngad lemniged mornga’agen re fil ney u dakean re yalen ku Yesus Kristus ulan fare tabinaew rok Simon fare Farise.
Fare Gospel ku Luke e be yoeg mornga’agen e bpin, ni kanoeg ni’ir e cha’ nima denen, ni ke yib ulane nu’un rok Simon nap’an Yesus ke taw ngaram. U fithik e kalngaen’ nib ga’, ke yib fare bpin ngak Yesus, ngi i yor nge munurnag e rif rif u ay ko lu’ rok, me falay piyan lolugen, me faray ngay, me gapgep nag ko gapgep nib ga’fan.1 Fare mo’on ni ir e bmil suwan fare nu’un, ke lemnag ni ki ga’ mat’aw ko fare bpin, ke lemnag u fanethin nib tuftuf, “Fa’anra riyul’ nre mo’on ney e ba profet, ma kenang ko mini’ e re pin ney ni be math ngak, ma kenang e re mit i ngongol nib kireb nma ngongliy.”2
Laniyaen’ fare Farise ni ke ga’ thothtup ni be yoeg e pufthin nag nib kireb ngak Yesus nge fare bpin. Machane ir e manang urngin e tin, en Tathapeg ma nang fan e laniyaen’ Simon, ma u dakean e gonop nib ga’, ke sikeng nag e fananikan ku Simon, ma ke ning chilyen ngak bachan dabki thapeg nib fel’ rogon e bee’ woed fare Tathapeg ko nu’un rok. Ararme, fapi thin ke yoeg Yesus ngak fare Farise ba m’ag nib riyul ni Yesus ke fanay fare tawa’th ko thogthog ma fare bpin nem, ni bay e gum’racha’ nib m’ingaen mab sobutaen’, ni ke kalngaen’ me yoeg e n’ag ngak ni fan e denen rok.3
Woed reb e yaar nap’an e muruwel rok Yesus u fayleng, chepin ney ba dag fare Tathapeg ni ke yoeg e murunguy ngak e girdi’ ni kar baed ngak—dariy fan e rograed—mab riyul’ ngak e girdi’ ni yaed be t’uf e ayuw rok nib alamrin. Fare bpin ni ke yoeg e t’uf nib m’ingaen’ mab sorok ngak Yesus u dakean e kalngaen’ nib riyul’ mab arar ninge thapeg e n’agfan ko denen rok. Machane, Simon ke lemang ni ke ga’ mat’aw, ma gum’racha’ nib el’el’,4 taleg ninge yoeg e murnguy ko fare bpin nibe kalngaen’, ma ke non ni dariy fan ngak fare Tathapeg ko fayleng u fithik e fananikay. Laniyaen’ ba dag e yalen ko yafos rok kemus ninge fol fapi motochiyel ni dariy fan make dag e laniyaen’ u dakean e tuftuf ko ngongol ma thothup nib baen.5
Fare murnguy nge ayuw ni ke pi’ Yesus ko chepin e be fil ngodaed nib fel’ rogon ningaed ngongoliyed ngak e buguliyoror. Bay yo’or e chepin ko fapi babyor nib thothup mornga’agen u rogon fare Tathapeg, u dakean e murnguy nib ga’, ke non ngak e girdi’ ko rran rok ma u rrogon nike ayuweg fapi girdi’ nib gafgow makar “ndar nanged e n’en ni ngar rin’ed, ya yad bod e saf nde moy rorad e en nma gafaliyrad.”6 Ke ki’yag pa’ nibe murnguy ngak fapi girdi’ ni yaed ba t’uf e ayuw ko tomalngin roraed, ko tin nib dogur nge tin ko thothup.7
Fare laniyaen’ ku Yesus nima tabab ko t’ufeg,8 arragon, t’ufeg rok nib machalboegmab polo’, i’ir e fan e miligach ko bayul rok. Muruwel u fithik e murnguy ni’ir e ban’en nib ga’fan ko e girdi’ nima thapeg e be’ech nag nibe un reb e kenginn e mich ko Christian woed e kirebaen’ ngak e girdi’ ni yaed ba kirebaen’ ma, runguy, nge gol.9 Fare maga’fan ngak reb e girdi’, nib riyul’, i’ir e n’en nib ga’ ko fare gospel rok Yesus Kristus ni’ir e pow ni gadaed ba chuchgurgaed ngak fare Tathapeg ko tin nthothup nge tin thamtham. Arame, nibe dag e ayuw Rodaed u yafos rodaed ma ba dag e tin ga’ ko ya’el rodaed.
Nib ga’ fan ni fapi murwel nib murnguy rok Yesus dabki motochiyel nag, sana ban’en nib t’uf ninge rrin’, machane i’ir e ngongol ni ke yoeg u dakean e t’ufeg rok Got ni fan fapi bitir rok nge arar rok ninge ayuwegraed.
Yesus rayog ninge nang fan e tin t’uf ko girdi’ nib palog. Arame, nib riyul’, ni woed, nap’an ke golnag e taayuw ko fare salthaw nib centurion10 Yesus ke milekag ko Capernaum nga reb e binaew ni kanoeg Nain ngay. U gin’em Yesus ke rrin’ e ma’ang’ang nib ga’ murnguy ko murwel rok u fayleng nap’an ke motochiyel nag e mo’on nib fel’ e duw ni ke yim’, ni go’ e fak e bpin ni ke yim’ figirngin, ninge sak’iy me fos. Yesus ke thamiy e tin gafgow ko re galabthir ma tin kirebaen’ ko yafos rok, me ke thamiy e murnguy ngak.11
Woed fare bpin ni ta denen nge fare bpin ni ke yim’ figirngin u Nain, yo’or e girdi’ ba t’uf e runguy, tiyaen’, fagar, nge ayuw ningaed pii’ed ngoraed. Rayog ningaed manged fapi talin u pa’ Somoel ngaed ngongoliyed e murunguy ngak reb e girdi’ nib t’uf, woed Yesus ke rrin’.
Guma nang e bitir nib bpin ni bay e kii’ u dap’ lingan nge cleft palate rok nap’an nikan gargel nag. Ke thapeg e bin somm’on e surgey ko yo’or e surgery nap’an e bin l’agruw e rran ko yafos rok. U dakean e murnguy ni fan e girdi’ ko ta’ab e sikeng roraed, fare bpin nge galabthir rok ba pi’ e ayuw, nang fan, nge murnguy ngak reb e girdi’ ko ta’ab e sikeng. Kar oeged, u thin roraed: “U dakean e sikeng ko bitir romow, rayog ningaed mada’ nag bo’or girdi’ nib fel’ ni yaed ba t’uf e gol, ayuw, nge murnguy. Boech e ngyial’, fare bitir, chiney 11 e duw rok, ke non ngak reb e galibthir ko reb e madoway ni bay ta’ab e sikeng rok. Nap’an e sabathin, fare bitir nib bpin ke luf e mask rok ni fan e pandemic ninge dag fa galibthir ni bay athap, arrogon ni bay bo’or e magowen ko fare madway thingari gel nag. Kug faflaen’ gaed ni bay wo’en ningaed pi’ed e murnguy ngak e girdi’ nibe gafgow, woed rogon fare Tathapeg nibe rrin’ ngodaed. Kug thamiyed nibe chigchig nag amith romaed nap’an ngaed ayuweged amith ko reb e be’.”
Pi fagar rog, nap’an gadaed ra fi’leg e laniyaen’ nib murnguy u yafos rodaed, gadaed ra fol ngak fare Tathapeg, gadaed ra nang fan e tin nib t’uf ko reb e girdi’. U dakean e laniyaen’ nem, ra yib e thamtham nib riyul’ ko t’ufeg nira un e muruwel rodaed. Fare Somoel ra guy e murwel rodaed, nira tawa’ath nag daed ningaed manged talin u pa’ ninge munguy e gum’racha’ ma pi’ e ayuw ngak e girdi’ ni dariy athap roraed.12
E fanow ku Yesus ngak Simon fare Farise ba fil ni dad pufthin nag nib kireb ngak reb e buguliyoror rodad bachan gadaed gubin ba t’uf e murnguy nge nang fan ko tin oloboech rodaed ko Chitamangdaed nu Tharmiy nib t’uf ngodaed. Aram fare n’en ni fare somoel ni ke fil reb e ngiyal’ nap’an ke yoeg, “re mangfan ni ga be sap nga ba tabyu’ ni bay u lan mit walagem, ma damur tiyan’um nga ba ley i gek’iy ni bay u lan owchem?”13
Thingar ningaed lemniged gathi moem’ ningan nang fan urngin e ban’en nibe un e laniyaen’ fa ngongol ko cha’. Ya’an rayog e baen ma boech e ngiyal’ dani weliy ni fel’ rogon urngin e murwel ko be’. U reb e rogon, Kristus e rayog ninge guy urngin e ban’en ko urngin e ngiyal’.14 Arragon ir e manang urngin e tin waer rodaed, fare Tathapeg darma pufthin nag daed u fithik e puwaen’ machane ir e ma muruweliy ninge pi’ e murnguy ngodaed, nibe ayuweg daed ningaed chuwegaed e mit u owchdaed. Yesus ma sap nga gum’racha’ nge gathi feni picho’ay e be’.15 Ke yoeg ni, “Dabi mit owchem nga n’umngin nge feni pichoay.”16
Chiney, mu lemnag morga’agen e fanow nib gonop rok fare Tathapeg ngak fare ragag nge l’agruw e gachalpen nib Nephite ningar lemniged re duwer ney:
“Ma gubaʼadag ni ngam nanged ni bay mmanged tapufthin rokʼ e pi gidiiʼ ney, u rogon ba yalen ni bay gu piiʼ ngomed, niʼir e ba matʼaw. Ere, ba mit i mang gidiiʼ e ngam boeded? Rug be gaʼar ngomed, ngam boeded gag.”17
“Ere gubaʼadag ni ngam machalbog gaed ni boed gag, ara boed e Chitamangmed ni bay u tharmiy nib machalbog.”18
Arame, fare Somoel ma pi’ e pufthin ngak e girdi’ nira pufthin nag nib kireb e tin oloboech. Ninge yoeg ningaed mat’aw gaed ko e pufthin, thingar ningaed manged woed fare Tathapeg ngaed sapgaed ko fatin oloboech ko reb e girdi’ u fithik e murnguy, arragon ni woed rogon owchen. Bayi rib palog thingar ningad milekag riy u mm’on ningedd tawgaed ko machaelboeg, sana nib fel’ fa’an ngad paered nga but’ ko rifrifan en Yesus mag wenig nag ko murnguy ni fan e tin oloboech rodadd, woed fare bpin nib kalngaen’ ke rrin’ u lane fare nu’un ko farise, ma dad puluwgaed ko tin oloboech ko reb e girdi’.
Pi fagar rog, Gube pi’ e m’ag ni nap’an ningad thapeged e murnguy rok fare Tathapeg ko yafos rodaed, e rayog rodedd ningaed nanged e tin fel’ ko buguliyiror rodaed ra ga’ nag yira chigchig nag e laniyaen’ dad ningad pufthin nag e tin oloboech roraed. Ran ga’ nag e meybil rodaed ngak Got, ma fapi yafos rodaed ra mang woed e lamen ni athib, ran munguy e thamtham rodaed, nira yoeg e falflaen’daed ni dabimus. Yira tungun fithingandaed ni girdi’ ko gapas,19 ningan yoeg fapi thin rodaed ni woed e n’uw me ngal’ ni wa’angachal u but’ ni kadbul.
Gube meybil ningad thapeged e gumaen’daed mag nanged fan reb e girdi’ nge u dakean e murnguy rok Somoel, ran ga’nag e sobutaen’daed ma gumaen’daed, ningad fel’ rogon e gumaen’daed ngak fa tin oloboech rorad. Ni’ir e milwol rok fare Tathapeg ni fan ngodaed. Gube pi’ e m’ag ni ir be fos. Ir e ma dag fare bin thabi fel’ e wo’en ni fan e gachalpen nib murnguy mab gumaen’. Gube pii’ e m’ag rog mornga’agen fatin njib riyul’ u dakean fithingan Yesus Kristus, amen.