Li Jesukristo: Laj ilol re li qach’ool
Wi naqajal qak’a’uxl chi anchal qach’ool chirixeb’ li qamaak, naqak’e xwankil lix mayej li Kristo sa’ qayu’am.
Ex was wiitz’in, sa’ li xchaq’al ru eq’la a’in re Paswa, nasaho’ li waam chixjultikankil li b’aanuhom k’a’jo’ wi’chik xchaq’alil ut xnimal ru chalen chaq xtiklajik—a’ li mayej aj tojol-ix xb’aan li Qaawa’ Jesukristo. Li aatin kixye li profeet aj Isaias naxch’olob’ xnimal ru lix yu’am ut xchaab’ilal li Kolonel naq kixkub’si rib’ ut kixmayeja rib’ choq’ reheb’ chixjunil li ralal xk’ajol li Dios:
“Chʼolchʼo naq aʼan xʼiiqank re lix rahil qachʼool, ut xkʼam xrahil li qaam; aʼbʼanan kiqakʼoxla naq rahobʼtesinbʼil, sakʼbʼil xbʼaan li Dios, ut tawasinbʼil.
“Aʼbʼan kitochʼeʼ saʼ xkʼabʼaʼ li qʼetok aatin kiqabʼaanu laaʼo, kiteneʼ saʼ xkʼabʼaʼ li qamaaʼusilal; li chʼiilank koowan wiʼ saʼ tuqtuukilal kiwan saʼ xbʼeen aʼan; ut rikʼin li rapleek kixkʼul aʼan, nokokʼirtesiik.”1
Naq kixk’ul sa’ xb’een lix maakeb’ chixjunil li winqilal, naq kik’ehe’ chiru li krus, ut naq kinumta sa’ xb’een li kamk sa’ rox li kutan,2 li Jesus kixk’e xloq’alil li k’ojob’anb’il k’anjel re li Paswa, li kik’eeman reheb’ laj Israel sa’ li najter kutan.3 Sa’ xtz’aqob’resinkil ru li profeetil aatin, a’an kixmayeja lix tib’el ut lix kik’el choq’ li xnimal ru ut roso’jikil mayej,4 ut kixtz’aqob’resiheb’ ru li eetalil ke’roksi chaq sa’ xninq’ehinkil ru li Paswa re li Qaawa’.5 Naq kixb’aanu a’an, li Kristo kixnumsi rahilal sa’ tib’elej ut sa’ musiq’ej li ink’a’ naru naqataw ru. Li Kolonel kixye:
“Xb’aan naq k’e reetal, laa’in, li Dios, kinnumsi li k’a’aq re ru a’in choq’ re chixjunileb’, …
“Ut aʼ rahilal aʼan kinixkʼe laaʼin, li Dios ajwiʼ, li qʼaxal nim wiʼchik chiru chixjunil, chi siksotk xbʼaan xrahil ut chi elk inkikʼel ruuchil tiqobʼ, ut chixnumsinkil xrahil li tzʼejwalej joʼ ajwiʼ li musiqʼej—ut chirajbʼal naq inkʼaʼ raj tinwukʼ li kʼahil sekʼ, ut tinkaʼchʼinobʼresi raj wibʼ—
“Aʼbʼanan, rehaq taxaq li Yuwaʼbʼej li loqʼalil, ut kinʼukʼak ut kinchoy lin kawresihom choqʼ rehebʼ li ralal xkʼajolebʼ li winq.”6
Li Kristo kixb’aanu li rajom li Yuwa’b’ej7 rik’in lix mayej maak’a’ roso’jik ut aj uxtaan. A’an kixq’ax ru li kamk sa’ tib’elej ut sa’ musiq’ej,8 li ki’ok chaq sa’ li ruchich’och’ rik’in lix t’anik laj Adan,9 ut naxk’e chi uxmank li junelik kolb’a-ib’.10
Ka’ajwi’ li Jesus kiru chi b’aanunk re li junelik ut tz’aqal re ru mayej a’an choq’ qe chiqajunil.11 Kisik’e’ ru ut kik’ojob’aak chaq sa’ li nimla ch’utam sa’ choxa, naq toj maji’ nayo’ob’tesiman li ruchich’och’ a’in.12 Xb’aan naq kiyo’la rik’in jun na’b’ej sa’ li ruchich’och’, kiwan xwankil li kamk sa’ tib’elej sa’ xb’een, a’b’an rik’in li Dios, jo’ li Ralal Junaj Chirib’il chiru, kixk’ul xwankilal re xk’eeb’al lix yu’am ut xk’ulb’al wi’chik.13 Jo’kan ajwi’, li Kristo tz’aqal re ru naq kiwan, chi maak’a’ xmaak, jo’kan naq maak’a’ li k’a’ru elajinb’il chiru xb’aan lix tiik ruhil na’leb’ li choxa.14 Li profeet aj Jose Smith kixye junjunq sut:
“Li kolb’a-ib’ moko naru ta na’uxman wi ta ink’a’ raj ki’uxman lix tojb’al rix li maak xb’aan li Jesukristo.
“Li Dios … kixkawresi jun li mayej sa’ xsiib’al tz’aqal li Ralal, li tixte jun li okeb’aal b’ar wi’ eb’ li winq te’ok chiru li Dios.”15
Li Kolonel, rik’in lix mayej, kirisi xwankil li kamk sa’ tib’elej chi junajwa,16 a’b’an ink’a’ kirisi li qateneb’ankil chixjalb’al qak’a’uxl chirixeb’ li qamaak.17 Nokoxb’oq b’an rik’in rahok chixk’amb’al wi’chik qib’ rik’in li qaJunelik Yuwa’. Rik’in li Jesukristo ut lix mayej, naru naqak’ul jun nimla jalaak sa’ qak’a’uxl ut sa’ li qaam, ut xk’utb’al jun chaab’il na’leb’ chiru li Dios ut chiru li qayu’am.18 Naq naqajal qak’a’uxl chi anchal qach’ool chirixeb’ li qamaak, ut naqaq’axtesi li qaam re li k’a’ru naraj li Dios ut lix taqlahom, naru naqak’ul xkuyb’al qamaak ut naru naqeek’a xwankil lix Santil Musiq’ej chi mas wi’chik. Ut rik’in li ruxtaan, ink’a’ tento taqakuy xnumsinkil li nimla rahilal kixkuy xnumsinkil li Kolonel.19
Li maatan re li jalb’a-k’a’uxlej a’an jun reheb’ lix chaab’ilal li Dios rik’ineb’ li ralal xk’ajol, ut naxk’ut li xnimal xwankilal re qatenq’ankil chixq’axb’aleb’ ru li maak naqab’aanu. Jo’kan ajwi’ naxk’utb’esi lix kuyum ut lix q’unal xch’ool li qaYuwa’ aj rahonel rik’ineb’ lix q’unal qametz’ew. Li Awa’b’ej Russell M. Nelson, li qaraarookil profeet, xye naq li maatan a’in, “a’an xlaawil li sahil ch’oolejil ut li k’ojk’ookil ch’oolej.”20
Ex wamiiw, ninch’olob’ xyaalal eere naq wi naqajal qak’a’uxl chi anchal qach’ool chirixeb’ li qamaak,21 naqak’e xwankil lix mayej li Kristo sa’ qayu’am.22 Noko’ach’ab’aak chiru xb’ak’leb’ li maak, naqataw xsahil qach’ool sa’ li qab’eenik sa’ ruchich’och’, ut noko’ok chi k’ulub’ej re xk’ulb’al li junelik kolb’a-ib’, li kikawresiik chalen sa’ xtiklajik li ruchich’och’ choq’ reheb’ li neke’paab’ank re li Jesukristo ut neke’chal rik’in a’an.23
Rochb’een xk’eeb’al li xnimal ru maatan re li kolb’a-ib’, li Kolonel naxk’e qak’irtesinkil ut xtuqub’ankil qach’ool naq nokonume’ sa’ ch’a’ajkilal, aaleek, ut q’unil metz’ew sa’ li yu’am a’in, jo’ ajwi’ li k’a’ru yooko chixk’ulb’al anajwan sa’ li nimla yajel a’in. Ninye chi yaal eere naq li Kristo naxnaw junelik k’a’ru li ch’a’ajkilal yooko chixnumsinkil sa’ li yu’am a’in. Naxtaw ru chi tz’aqal re ru lix k’ahil, lix may, ut lix rahil sa’ tib’elej li naqanumsi, jo’ ajwi’ xch’a’ajkilal li qach’ool ut qamusiq’. Nujenaq lix sa’ xch’ool li Kolonel chi uxtaan, ut yo’on wan re qatenq’ankil. Naru chixb’aanunkil a’in, xb’aan naq sa’ tib’elej a’an kixk’ul sa’ xb’een chixjunil lix rahilal lix q’unil li qametz’ew ut lix majelal li qakawilal.24
Chi q’un ut chi tuulan xch’ool, kikub’e rub’el chixjunil ut kixk’ulub’a tawasiik xb’aaneb’ li winq, us ta ak xtawasiik ajwi’ xb’aaneb’ li qamaak. Kixnumsi li rahilal a’in sa’ qak’ab’a’ chiqajunil, kixk’ul sa’ xb’een chixjunil lix maak li ruchich’och’,25 ut ki’ok choq’ laj ilol qe sa’ musiq’ej.
Naq nokonach’o rik’in a’an, naq naqaq’axtesi qib’ sa’ musiq’ej re naq tooril, tooruuq chixk’ulb’al lix iiqleb’, li moko aal ta, ut aran naqataw xk’ojob’ankil li qach’ool ut li qahilaal xyeechi’i a’an qe. Jo’kan ajwi’, taqak’ul li metz’ew naqaj ru re xnumsinkileb’ li qach’a’ajkilal, lix q’unal qametz’ew, ut li rahilal sa’ li qayu’am, li jwal ch’a’aj raj xkuyb’al wi ink’a’ ta raj tooxtenq’a lix wankil aj k’irtesinel li Kolonel.26 Li loq’laj hu naxk’ut chiqu naq us “xq’axtesinkil li qiiq re li Qaawa’ ut a’an tooxtenq’a.”27 “Tojaʼ ut naq li Dios chixkʼehaq eere naq seebʼaq lee riiq, xbʼaan li sahil chʼoolejil chirix li Ralal.”28
Sa’ xraqik chaq li chihab’ xnume’, kinnaw resil xkamik jun sumaleb’ li wamiiw, laj Mario ut xRegina Emerick, li ke’wan chi tiik chiru li Qaawa’ ut ke’kam chi kaahib’ kutan xyanqeb’ xb’aan li yajel COVID-19.
Jun reheb’ li ralal xk’ajol, li yoo chi k’anjelak anajwan jo’ obiisp aran Brasil, kixseraq’i we a’in: “Jwal ch’a’aj chiwu rilb’aleb’ lin na’ inyuwa’ chi elk sa’ li ruchich’och’ a’in chi jo’kan, a’b’an xweek’a tz’aqal li ruq’ li Qaawa’ sa’ lin yu’am sa’ xyi li rahilal a’an, xb’aan naq xink’ul inmetz’ew ut intuqtuukilal li naxq’ax ru intawom ru. Rik’in lin paab’aal chirix li Jesukristo ut lix tojb’al rix li maak, xink’ul inchoxahil tenq’ re xkawob’resinkileb’ ut xk’ojob’ankileb’ xch’ool lin junkab’al ut chixjunileb’ li xe’tenq’ank qe sa’ li rahilal a’an. Us ta ink’a’ xk’ulman li sachb’a-ch’oolej li xqoyb’eni raj, laa’in tz’aqal aj yehol nawom chirixeb’ li sachb’a-ch’oolej sa’ inyu’am ut sa’ xyu’ameb’ li komon sa’ lin junkab’al. Xweek’a jun tuqtuukilal li ink’a’ xintaw ru li xch’ik rib’ sa’ xchamal li waam, xk’e woyb’enihom ut xkawil inch’ool chirix lix rahom li Kolonel choq’ we ut chirix lix k’uub’anb’il na’leb’ li Dios re sahil ch’oolejil choq’ reheb’ li ralal xk’ajol. Xintzol naq sa’eb’ li rahil kutan, lix tel li Kolonel aj rahonel junelik ye’b’ileb’ naq naqasik’ chi anchal qach’ool, qawankil, qak’a’uxl, ut qametz’ew.”
Ex was wiitz’in, sa’ li domingo a’in re Paswa, ninwotz lix nawom inch’ool naq li Jesus kiwakli sa’ xyanqeb’ li kamenaq ut naq yo’yo. Ninch’olob’ xyaalal naq rik’in a’an ut lix tojb’al rix li maak, li Kolonel kixk’e qe li b’e re xq’axb’al ru li kamk sa’ tib’elej ut sa’ musiq’ej. Rochb’eeneb’ li ninqi osob’tesiik a’in, a’an naxtuqub’ ut naxk’ojob’ qach’ool sa’ li qach’a’ajkilal. Ninch’olob’ xyaalal eere naq wi naqakanab’ qib’ sa’ ruq’ li Jesukristo ut lix mayej re xtojb’al rix li maak, rik’in kuyuk toj sa’ roso’jik, taqayal xsahileb’ lix yeechi’ihom li qaChoxahil Yuwa’ aj rahonel, li naxb’aanu li k’a’ru naru chiru re qatenq’ankil chi q’ajk rik’in a’an sa’ jun kutan. A’an a’in lix k’anjel ut lix loq’alil!29 Ninch’olob’ xyaalal naq li Jesus a’an li Kristo, laj Tojol rix li ruchich’och’, li Mesias yeechi’inb’il, li wakliik chi yo’yo, ut li yu’am.30 Ut ninwotzeb’ li yaal a’in eerik’in sa’ lix santil k’ab’a’, li Junaj Yo’lajenaq chiru li Yuwa’b’ej, li Qaawa’ Jesukristo, amen.