Cia Peb Sab Ntsuj Plig Tswj Hwm Peb Sab Cev Nqaij Daim Tawv
Ib yam tseem ceeb tshaj plaws uas peb kawm tau hauv lub neej no yog kev txhawb nqa peb sab ntsuj plig uas nyob mus ib txhis thiab tswj hwm peb tej kev xav ua phem.
Kuv cov kwv tij thiab cov muam, thaum txog lub Kaum Hli Ntuj lub rooj sab laj xyoo tas los, kuv tau npaj kuv zaj lus hais txog qhov uas 100 xyoo tas los Thawj Tswj Hwm Joseph F. Smith tau ua yog toog pom lub ntuj ntsuj plig thaum lub Kaum Hli Ntuj hnub tim 3, 1918.
Ob peb hnub tom qab kuv xa kuv zaj lus rau neeg txhais lus, kuv tus khub mus ib txhis uas kuv hlub, Barbara, twb tso lub ntiaj teb no tseg thiab mus rau hauv lub ntuj ntsuj plig.
Thaum uas tej hnub dhau mus hloov ua tej lub lim tiam, ces dhau mus ua ob peb hlis, ces tam sim no yog ib xyoos tom qab Barbara tas sim neej no, kuv yeej nyiam nqe vaj lug kub no ntxiv: “Nej yuav tsum nyob ua ke nrog txoj kev sib hlub, nej thiaj yuav tsum quaj rau lawv cov uas tau ploj tuag.”1 Barbara thiab kuv wb tau koob hmoov vim wb tau “nyob ua ke nrog txoj kev sib hlub” tau 67 xyoo. Tiam sis kuv twb kawm ntawm kuv tus kheej qhov uas hais tias “nej thiaj yuav tsum quaj rau cov uas tau ploj tuag” txhais li cas. Auj, kuv hlub nws thiab nco nws kawg li!
Nyaj peb feem coob tsis tshua nco tej yam uas lwm tus ua rau peb mus txog thaum lawv tsis nyob lawm. Kuv twb paub tias Barbara muaj ntau yam ua, tiam sis kuv tsis tau to taub tias nws tau siv sij hawm npaum li cas rau tsev neeg, lub Koom Txoos, thiab zej zog. Muaj ntau yam uas nws pheej rov qab ua txhua hnub ib xyoos dhau ib xyoos uas pab wb tsev neeg nyob tau. Thiab txawm nws ua li ntawd los, tsis muaj leej twg hauv peb tsev neeg uas tau hnov nws qw nrov los sis hais lus tsis zoo rau lwm tus.
Xyoo tas los no ua rau kuv nco txog ntau yam heev. Kuv twb xav txog qhov uas nws tau xaiv ua ib tug niam tsev rau xya tus me nyuam. Nws yeej ib txwm xav ua ib tug niam tsev, thiab nws twb ua txoj hauj lwm ntawd zoo kawg.
Ntau zaus kuv xav paub seb nws ua li cas ho txawj paub peb cov me nyuam thiab kuv nyob qhov twg. Kev ua mov qhov ntawd xwb yeej yog ib txoj hauj lwm loj kawg, tsis hais tej yam xws li ntxhua khaub ncaws ntau tsis ntau uas peb tsev neeg muaj txhua lub lim tiam, thiab yuav khau thiab ris tsho loj txaus rau cov me nyuam tas li. Peb txhua tus twb thov nws pab ua ntau yam uas tseem ceeb rau peb. Thiab vim tej ntawd twb tseem ceeb rau peb, tej ntawd kuj tseem ceeb rau nws. Nws yeej yog ib tug zoo kawg li—thaum ua ib tug niam tsev, ib tug phooj ywg, ib tug neeg zej zog, thiab Vajtswv ib tug ntxhais.
Nim no nws twb mus lawm, es kuv zoo siab uas kuv tau zaum nrog nws thaum kuv los tsev tau ob peb lub hlis ntawm nws lub neej, tuav nws tes thaum wb saib qhov kawg ntawm tej kev ua yeeb yam uas nws nyiam tshaj—wb rov qab saib ntau zaus vim nws mob Alzheimer’s ua rau nws tsis nco qab hais tias nws twb saib ib hnub dhau los xwb. Txoj kev nco txog tej lub sij hawm tuav tes tshwj xeeb yeej muaj nqis rau kuv heev.
Cov kwv tij thiab cov muam, kuv thov nej kom tsis txhob cia sij hawm dhau mus thaum nej tsis tau saib nej tsev neeg nrog txoj kev hlub. Cov me nyuam thiab cov niam tsev txiv tsev, thov kom nej ib leeg ncav tes pab ib leeg thiab ib leeg qhia tias nej hlub thiab zoo siab rau ib leeg. Ib yam li kuv, tej zaum muaj ib hnub nej ib txhia yuav tsim los thiab kawm tias lub sij hawm sib tham li ntawd twb dhau mus lawm. Cia li ua neej txhua hnub ua ke nrog tej lub siab uas muaj kev ris txiaj, kev nco txog tej yam zoo, kev pab, thiab kev hlub ntau.
Xyoo no, kuv haj yam xav txog peb Leej Txiv Saum Ntuj Ceeb Tsheej txoj hau kev. Thaum Amas qhia nws tus tub Khauli-atoos, Amas hais tias yog “txoj hau kev zoo siab uas tseem ceeb.”2
Lo lus uas kuv pheej xav txog thaum kuv xav txog txoj hau kev no yog “kev rov qab koom ua ke.” Yog ib txoj hau kev uas peb Leej Txiv Saum Ntuj Ceeb Tsheej tau npaj, kom peb muaj cib fim thaum kawg kom muaj ib txoj kev rov qab koom ua ke nrog peb tsev neeg txhua tus—cov txiv tsev rov qab koom ua ke nrog cov niam tsev, cov niam tsev txiv tsev rov qab koom ua ke nrog cov me nyuam, ib tiam koom ib tiam nyob hauv Vajtswv tsev neeg.
Txoj kev xav no nplij kuv lub siab thiab ua rau kuv paub tseeb tias kuv yuav rov qab nrog Barbara nyob dua. Txawm nws lub cev raug mob thaum kawg ntawm nws lub neej, nws tus ntsuj plig yeej muaj zog, tsim nyog, thiab dawb huv. Nws tau npaj nws tus kheej ua txhua yam kom thaum txog lub sij hawm nws yuav sawv ntawm “Vajtswv lub rooj txiav txim,”3 nws yuav ntseeg nws tus kheej thiab muaj kev kaj siab lug. Tiam sis kuv nyob no, tshuav ob hnub thaum kuv muaj 91 xyoos thiab kuv tseem xav paub “Kuv puas tau npaj lawm? Kuv puas ua txhua yam kuv yuav tsum ua kom kuv tuav tau nws tes dua ntxiv?”
Qhov tseeb yooj yim tshaj rau peb txhua tus paub hauv lub neej no yog li no: Peb txhua tus yuav tuag. Txawm peb tuag thaum laus los hluas, yooj yim los nyuaj, muaj nyiaj los pluag, muaj phooj ywg coob los kho siab, tsis muaj leej twg dim tau kev tuag.
Yav tas los, Thawj Tswj Hwm Gordon B. Hinckley hais ib yam uas muaj nqis txog qhov no: “Kev nplij siab thiab kev kaj siab lug uas los ntawm qhov uas peb paub tias yog peb yuav tus neeg yog lawm thiab ua neej raws li qhov yog, ces peb txoj kev sib raug zoo yuav kav ntev mus, tsis hais tom qab tuag thiab txawm sij hawm dhau mus.”4
Kuv yeej tau yuav tus yog lawm. Kuv yeej paub li ntawd. Tiam sis raws li Thawj Tswj Hwm Hinckley hais, ua li ntawd yeej tsis txaus. Kuv yuav tsum ua neej raws li qhov yog thiab.5
Hnub no, “kev ua neej raws li qhov yog” yeej yog ib lub ntsiab uas nyuaj to taub, yog tias yus siv sij hawm ntau rau social media, vim nyob ntawd leej twg hais tau tej yam tseeb los sis tej lus cuav txog Vajtswv thiab Nws txoj hau kev rau Nws cov me nyuam. Ua tsaug uas peb cov mej zeej hauv lub Koom Txoos muaj tej ntsiab cai ntawm txoj moo zoo kom peb paub ua neej li cas peb thiaj yuav npaj siab zoo dua ntxiv thaum peb tas sim neej no.
Ob peb lub hlis ua ntej kuv yug los, kuv yawg uas yog ib tug Thwj Tim, Txwj Laug Melvin J. Ballard, hais ib zaj, uas ib txhia neeg xav tias tau qhia lub ntsiab ntawm kev ua neej raws li qhov yog. Zaj ntawd muaj lub npe “Kev Sib Txeeb tus Ntsuj Plig,” es nws hais txog kev tsis sib haum ntawm peb sab cev nqaij daim tawv thiab peb sab ntsuj plig uas nyob mus ib txhis.
Nws hais tias, “Qhov teeb meem loj tshaj uas ib tug neeg yuav muaj … yog kev tswj yus tus kheej,” es nws piav tias Dab Ntxwg Nyoog, “peb tus yeeb ncuab ntawm sab ntsuj plig,” tawm tsam peb los ntawm “tej kev ntshaw, tej kev xav tau ntawm sab cev nqaij daim tawv.”6 Yog li ntawd qhov teeb meem yog nyob ntawm peb sab ntsuj plig uas los ntawm Vajtswv thiab sab cev nqaij daim tawv uas los ntawm tib neeg. Cov kwv tij thiab cov mua, cia li nco ntsoov tias, peb txais tau kev pab rau peb sab ntsuj plig los ntawm tus Vaj Ntsuj Plig Dawb Huv lub hwj chim uas yuav “qhia txhua yam rau nej.”7 Kev pab kuj los ntawm lub hwj chim thiab cov koob hmoov ntawm lub pov thawj hwj.
Nim no kuv nug nej tias, nej txhua tus ua li cas kom kov yeej qhov teeb meem no?
Thawj Tswj Hwm David O. McKay hais tias: Tib neeg lub neej hauv ntiaj teb no yog kev sim siab seb nws puas yuav tsom ntsoov kawg siab kawg ntsws rau tej yam uas ua rau nws txaus siab thiab ua raws li nws lub cev nqaij daim tawv nyiam, los sis nws puas yuav siv nws lub neej kom txais tau tej cwj pwm rau nws sab ntsuj plig.”8
Kev tsis sib haum ntawm peb sab cev nqaij daim tawv thiab sab ntsuj plig yeej tsis yog ib yam tshiab. Nyob hauv nws zaj lus kawg rau nws cov neeg, Vaj Ntxwv Npeyamis qhia tias “tus neeg ntawm sab cev nqaij daim tawv yog ib tug yeeb ncuab rau Vajtswv, thiab ib txwm yog txij thaum Adas poob los, thiab yuav yog, mus ib txhiab thiab ib txhis, tsuas yog nws ywj rau tus Vaj Ntsuj Plig Dawb Huv tej kev tshoov siab, thiab tso tus neeg ntawm sab cev nqaij daim tawv tseg thiab los ua ib tug neeg dawb huv los ntawm tus Tswv Khetos txoj kev theej txhoj.”9
Tus Thwj Tim Povlauj qhia tias “tus uas ua lub neej raws li lub siab qub qhia, tus ntawd yeej ua raws li nws lub siab qub nyiam, tiam sis tus uas ua nws lub neej raws li Vaj Ntsuj Plig qhia, tus ntawd yeej ua raws li Vaj Ntsuj Plig lub siab nyiam.
“Tus uas ua raws li nws lub siab qub qhia, tus ntawd yuav raug kev ploj kev tuag, tiam sis tus uas ua raws li Vaj Ntsuj Plig qhia, tus ntawd yuav tau txoj sia thiab kev kaj siab.”10
Kuv paub meej tias ib yam tseem ceeb tshaj plaws uas peb kawm tau hauv lub neej no yog kev txhawb nqa peb sab ntsuj plig uas nyob mus ib txhis thiab tswj hwm peb tej kev xav ua phem. Xyov vim li cas qhov no yuav nyuaj rau peb ua. Vim peb sab ntsuj plig twb nyob ntev dua li peb muaj sab cev nqaij daim tawv, es peb sab ntsuj plig twb xaiv kev ncaj ncees thiab kov yeej kev phem hauv lub ntuj ua ntej peb yug los. Ua ntej tau tsim ntuj tsim teb, peb nyob hauv ib lub ntsuj ntsuj plig uas muaj Niam Thiab Txiv Saum Ntuj Ceeb Tsheej, nkawd hlub peb thiab hlub peb tam sim no.
Thiab peb twb tau txiav txim txog tej yam uas tau hloov peb lub neej nyob hauv lub ntuj ua ntej peb yug los ntawd. Txhua tus neeg uas tau nyob thiab txhua tus uas yuav nyob hauv lub ntiaj teb no twb txiav txim siab xaiv Leej Txiv Saum Ntuj Ceeb Tsheej txoj hau kev rau peb txoj kev cawm seej. Yog li ntawd thaum peb txhua tus tau los rau hauv lub ntiaj teb peb twb muaj sab ntsuj plig uas muaj zog thiab paub txog peb txoj hmoov nyob mus ib txhis.
Cia li xav txog qhov ntawd. Peb ib txwm yog li no: Vajtswv ib tug tub los sis ib tug ntxhais, uas muaj tus ntsuj plig uas yeej nyob mus ib txhis thiab muaj peev xwm kawm tau mus yav tom ntej tsis paub kawg. Nej yog—ib txwm yog thiab yeej yuav yog—ib tug ntawm sab ntsuj plig. Yog li ntawd thaum peb xaiv cia peb sab cev nqaij daim tawv tswj hwm peb sab ntsuj plig, ces peb xaiv ib yam uas tsis sib haum nrog peb tus kheej tiag tiag uas yog ib tug los ntawm sab ntsuj plig.
Txawm li ntawd los, peb yeej paub tias peb sab cev nqaij daim tawv thiab peb tej kev xav tau hauv lub ntiaj teb no ua nyuaj rau peb txiav txim siab. Vim muaj daim ntaub thaiv kom peb cov hauv lub ntuj no tsis nco qab txog lub ntuj ntsuj plig ua ntej, ua rau peb thiaj li tsis nco qab txog qhov uas peb yog Vajtswv cov me nyuam thiab peb yog neeg ntawm sab ntsuj plig, thiab peb sab cev nqaij daim tawv ua rau peb tsom ntsoov rau tej yam uas peb xav tau tam sim no. Kev kawm xaiv tej yam los ntawm tus Ntsuj Plig thiab tsis xaiv tej yam ntawm sab cev nqaij daim tawv yeej yog vim li cas kev ua neej nyob hauv lub ntiaj teb yog ib feem ntawm Leej Txiv Saum Ntuj Ceeb Tsheej txoj hau kev. Yog vim li no lub hauv paus ruaj nrees ntawm txoj hau kev no yog peb tus Tswv thiab tus Cawm Seej, Yexus Khetos, txoj Kev Theej Txhoj, peb thiaj li yuav kov yeej peb tej kev txhaum, tsis hais tej yam peb ua yuam kev thaum peb ywj rau sab cev nqaij daim tawv, yog peb hloov siab lees txim tsis tu tsis tseg thiab peb yuav tsom ntsoov rau sab ntsuj plig. Tam sim no yog lub sij hawm tswj hwm tej yam peb lub cev ntshaw kom ua raws li Khetos cov lus qhuab qhia. Yog vim li ntawd peb yuav tsum tsis txhob laug sij hawm rau hnub uas peb hloov siab lees txim.11
Yog li ntawd, kev hloov siab lees txim yog ib qhov tseem ceeb ntawm peb txoj kev tswj hwm peb tus kheej. Lub tuam rooj sab laj tas los, Thawj Tswj Hwm Russell M. Nelson hais txog qhov no thiab qhia peb tias “Thaum peb xaiv hloov siab lees txim, peb txiav txim siab tias peb yuav hloov!” Peb cia tus Cawm Seej muab peb hloov los ua tus neeg zoo tshaj peb ua tau. Peb xaiv kom peb sab ntsuj plig loj tuaj thiab muaj kev xyiv fab—yog kev xyiv fab uas los ntawm Nws txoj kev txhiv dim. Thaum peb xaiv hloov siab lees txim, peb xaiv kev hloov los ua neeg zoo li Yexus Khetos ntxiv!”12
Txhua hmo thaum kuv xav txog hnub ntawd kuv thov kuv Leej Txiv Saum Ntuj Ceeb Tsheej, thov nws zam txim pub rau kuv yog tias kuv twb ua ib yam dab tsi tsis yog thiab kuv cog lus tias kuv yuav sim ua zoo dua ntxiv tag kis. Kuv ntseeg tias kev hloov siab lees txim txhua hnub pab kuv sab ntsuj plig ua rau kuv lub cev paub sab twg yog sab uas tswj hwm.
Ib yam uas pab ntxiv yog lub cib fim txhua lub lim tiam uas peb muaj kom txhawb peb sab ntsuj plig thaum peb txais lub cim nco txog kom nco txog txoj Kev Theej Txhoj thiab tus Tswv thiab tus Cawm Seej, Yexus Khetos, txoj kev hlub zoo tag nrho.
Cov kwv tij thiab cov muam, kuv thov kom nej txhua tus maj mam mus me ntsis thiab xav txog qhov uas nej puas tswj nej sab cev nqaij daim tawv thiab txhawb nqa nej sab ntsuj plig, ces thaum txog lub sij hawm, nej thiaj yuav dhau mus rau hauv lub ntuj ntsuj plig rov qab koom ua ke nrog cov uas nej hlub—kuv ua tim khawv txog qhov no thiab thov kom yuav muaj li no los ntawm tus Tswv Yexus lub npe dawb ceev, amees.