Tom Qab Sim Peb txoj Kev Ntseeg
Thaum peb mloog Vajtswv lub suab thiab coj raws li Nws tej kev khi lus, Nws yuav txhawb peb lub zog thaum peb raug kev sim siab.
Thaum kuv yog ib tug me nyuam, Frank Talley, ib tug mej zeej ntawm lub Koom Txoos hais tias nws yuav pab kuv tsev neeg caij nyab hoom txij ntawm Puerto Rico mus rau Salt Lake City peb thiaj li ua tau kev cai sib khi hauv lub tuam tsev, tiam sis tsis ntev tom qab ntawd peb pib muaj teeb meem. Kuv ib tug muam, Marivid, pib mob heev. Kuv niam kuv txiv ntxhov siab thiab thov Vajtswv seb yuav ua li cas thiab nkawd tseem txais kev tshoov siab mus. Nkawd ntseeg tias yog lawv rau siab coj raws li tus Tswv tej kev tshoov siab, Nws yuav saib xyuas peb tsev neeg thiab foom koob hmoov rau peb—thiab twb muaj li ntawd.
Txawm peb raug teeb meem twg hauv lub neej no, peb ntseeg tias Yexus Khetos yuav npaj ib txoj kev mus tom ntej yog peb ntseeg. Vajtswv tau cog lus tias txhua tus uas ua raws li tej kev khi lus uas lawv tau ua rau Nws yeej yuav txais tag nrho Nws cov lus cog tseg, raws li Nws lub sij hawm. Txwj Laug Jeffrey R. Holland qhia hais tias, “Tej koob hmoov los sai sai, tej koob hmoob los lig, thiab ib txhia tsis los txog thaum peb mus saum ntuj ceeb tsheej; tiam sis rau cov uas ua raws nraim li Yexus Khetos txoj moo zoo, cov koob hmoov yeej yuav los.”1
Maulaunais qhia tias “kev ntseeg yog tej uas yus cia siab rau tiam sis tsis pom; yog li ntawd tsis txhob cam vim nej tsis pom, vim nej yuav tsis txais kev ua tim khawv kom txog thaum twb sim nej txoj kev ntseeg lawm tso.”2
Ib txoj lus nug zoo yog, Peb yuav tsum ua li cas kom kov yeej tej kev sim siab uas los raug peb?
Nyob hauv nws thawj zaj lus hais rau cov pej xeem thaum nws yog tus Thawj Tswj Hwm ntawm lub Koom Txoos Thawj Tswj Hwm Russell M. Nelson qhia tias: “Vim peb yog ib pawg thawj tswj hwm tshiab, peb xav pib kom nej xav txog qhov kawg. Yog li ntawd, peb hais rau nej los ntawm ib lub tuam tsev. Qhov kawg uas peb txhua tus xav tau yog kev txais vaj txiaj ntsim lub hwj chim nyob hauv tus Tswv lub tsev, nrog tsev neeg sib khi ua ke, ua raws nraim li tej kev khi lus uas ua hauv lub tuam tsev uas ua rau peb tsim nyog txais Vajtswv lub txiaj ntsim zoo kawg nkaus—uas yog txoj sia nyob mus ib txhis. Cov kab ke hauv lub tuam tsev thiab kev khi lus uas nej ua yeej yog qhov uas yuav txhawb nej lub neej, nej txoj kev sib yuav thiab tsev neeg lub zog, thiab pab nej tiv taus tus yeeb ncuab txoj kev tawm tsam. Nej txoj kev teev tiam Vajtswv nyob hauv lub tuam tsev thiab nej txoj kev pab nej cov poj koob yawm txwv yuav ua rau nej txais kev tshwm sim thiab nyob kaj siab lug thiab pab nej ua raws li nej tej kev khi lus.”3
Thaum peb mloog Vajtswv lub suab thiab coj raws li Nws tej kev khi lus, Nws yuav txhawb peb lub zog thaum peb raug kev sim siab.
Kuv tsev neeg txoj kev mus rau lub tuam tsev ntau xyoo tas los yeej nyuaj, tiam sis thaum peb tuaj txog lub Tuam Tsev Salt Lake City, nyob hauv lub xeev Utah, kuv niam, uas muaj kev xyiv fab thiab kev ntseeg heev hais tias, “Peb yuav nyob zoo; tus Tswv yuav pov hwm peb.” Peb tsev neeg tau ua kev cai sib khi, thiab kuv tus muam rov zoo. Tau muaj li no tom qab tau sim kuv niam kuv txiv txoj kev ntseeg thiab thaum nkawd ua raws li tus Tswv tej kev tshoov siab.
Kuv niam kuv txiv tus yam ntxwv tseem pab peb lub neej niaj hnub nim no. Nkawd tus yam ntxwv qhia peb vim li cas muaj cov lus qhuab qhia ntawm txoj moo zoo thiab pab peb to taub lub ntsiab, lub hom phiaj, thiab cov koob hmoov uas los ntawm txoj moo zoo. Qhov uas yus to taub vim li cas muaj Yexus Khetos txoj moo zoo kuj pab tau peb muaj kev ntseeg thaum raug kev sim siab.
Txhua yam uas Vajtswv caw thiab txib peb ua yog vim Nws hlub peb thiab Nws xav kom peb txais tau cov koob hmoov uas tshwj cia rau cov uas rau siab ntseeg. Peb yuav tsum tsis txhob xav tias peb cov me nyuam yuav nyiam txoj moo zoo yog nyob lawv tus kheej; yog peb txoj kev lav ris qhia lawv. Thaum peb pab peb cov me nyuam kawm siv lawv txoj kev ywj siab xaiv, peb tus yam ntxwv ncaj ncees yuav pab lawv xav xaiv tej yam ncaj ncees lawv tus kheej. Lawv txoj kev ua neej rau siab ntseeg yuav pab lawv cov me nyuam paub qhov tseeb ntawm txoj moo zoo lawv tus kheej.
Cov tub hluas ntxhais hluas, cia li mloog tus yaj saub hauv lub caij nyoog no uas hais lus rau nej. Cia li nrhiav qhov tseeb nrog kev ntseeg thiab to taub tej ntawd ntawm nej tus kheej. Thawj Tswj Hwm Nelson tau ntuas hais tias: “Nej ho tsis muaj tswv yim dab tsi? … Ua raws li tus Yaj Saub Yauxej tus yam ntxwv. Nrhiav ib qho chaw uas ntsiag to. … Txo nej lub hwj chim rau Vajtswv. Qhia nej Leej Txiv Saum Ntuj Ceeb Tsheej seb nej lub siab xav li cas tiag. Mus rau Nws kom tau lus teb.”4 Thaum nej nrhiav nej Leej Txiv Saum Ntuj Ceeb Tsheej txoj kev coj, thiab mloog cov yaj saub tej lus, thiab saib niam tsev txiv tsev ncaj ncees tus yam ntxwv, nej kuj yuav pab nej tsev neeg muaj kev ntseeg uas muaj zog.
Rau nej cov niam tsev txiv tsev uas muaj cov me nyuam uas tsis taug txoj kev ua raws li kev khi lus, cia li pab lawv. Pab lawv to taub qhov tseeb ntawm txoj moo zoo. Pib tam sim no; yeej tsis muaj sij hawm uas lig dhau.
Peb txoj kev coj yam ntxwv ua neej ncaj ncees pab tau heev. Thawj Tswj Hwm Nelson tau hais tias: “Vim peb yog ib Tsoom Haiv Neeg Ntseeg, peb twb tau xav tias ‘lub koom txoos’ yog muaj nyob hauv peb tej tsev sib ntsib, es tej yam uas ua hauv tsev txhawb nqa tej ntawd xwb. Peb yuav tsum kho peb tej kev xav li no. Twb txog lub sij hawm rau ib lub Koom Txoos uas ua hauv tsev, thiab tej yam uas peb ua hauv peb ceg ntseeg, pawg ntseeg, thiab ceg txheem ntseeg yuav txhawb nqa xwb.”5
Cov vaj lug kub qhia tias, “Qhia me nyuam kom paub ua nws lub neej, nws yuav nco ntsoov tej lus ntawd mus tas nws sim neej.”6
Lawv kuj hais tias, “Thiab nim no, vim txoj kev qhia txog txoj lus muaj hwj chim coj tau cov neeg mus ua tej yam uas ncaj ncees—muaj tseeb tiag, txoj kev qhia txog txoj lus muaj hwj chim hloov cov neeg lub siab xav tshaj rab ntaj, los sis tshaj lwm yam huv tib si, uas tau tshwm sim rau lawv—yog li ntawd Amas thiaj xav tias tsim nyog rau lawv sim lub hwj chim ntawm Vajtswv txoj lus.”7
Muaj ib zaj txog ib tug poj niam uas tu siab vim nws tus tub noj khoom qab zib ntau dhau. Txawm nws hais nws tus tub npaum li cas los, nws tus tub tseem nyiam noj khoom qab zib. Nws ntxhov siab kawg, nws thiaj li coj nws tus tub mus ntsib ib tug txiv neej uas muaj tswv yim.
Nws mus ntsib tus txiv neej no thiab hais tias, “Xib hwb, kuv tus tub noj khoom qab zib ntau dhau. Koj puas kam qhia nws kom tsis txhob noj ntxiv?”
Nws mloog tus poj niam zoo zoo ces hais rau nws tus tub hais tias, “Cia li mus tsev thiab rov qab los tom qab ob lub lim tiam.”
Tus poj niam coj nws tus tub mus tsev, xyov yog vim li cas nws tis tau hais kom tus tub tsis txhob noj khoom qab zib ntau dhau.
Ob lub lim tiam nkawd rov qab mus. Tus neeg txawj ntse ntsia tus tub ntawd thiab hais tias, “Me tub es, koj yuav tsum tsis txhob noj khoom qab zib ntau. Tsis zoo rau koj lub cev.”
Tus tub nyo hau thiab cog lus tias nws yuav tsis ua ntxiv.
Tus tub niam nug tias, “Vim li cas koj tsis tau qhia nws li ntawd ob lub lim tiam ua ntej?”
Tus txiv neej muaj tswv yim luag nyav. “Ob lub lim tiam tas los kuv tseem noj khoom qab zib ntau kuv tus kheej.”
Tus txiv neej no ua siab ncaj heev nws thiaj li paub tias nws tej lus ntuas yuav muaj hwj chim tsuas yog nws ua raws li nws tej lus ntuas nws tus kheej.
Peb txoj kev txawj pab peb cov me nyuam los muaj hwj chim ntxiv thaum lawv pom peb taug txoj kev ua raws li peb tej kev khi lus. Tus yaj saub hauv Phau Ntawv Maumoos Yakhauj yeej coj yam ntxwv txog kev ncaj ncees li no. Nws tus tub Enos sau txog nws txiv tej lus qhia li no:
“Kuv, Enos, paub tias kuv txiv nws yog ib tug neeg ncaj—rau qhov nws qhia kuv txog nws yam lus, thiab qhia kuv raws li tus Tswv tej kev cob qhia thiab kev qhuab ntuas—thiab cia li qhuas kuv tus Vajtswv lub npe vim yog tej yam ntawd. …
“… Thiab tej lus uas ntau lub sij hawm kuv tau hnov kuv txiv hais txog txoj sia nyob mus ib txhis, thiab txoj kev xyiv fab ntawm cov ntseeg, nkag mus tob rau hauv kuv lub siab.”8
Cov niam ntawm cov tub rog hluas twb ua neej raws li txoj moo zoo lawv twb ua rau lawv cov me nyuam muaj siab ntseeg heev. Lawv tus thawj coj hais tias:
“Lawv niam tau qhia lawv hais tias, yog lawv ntseeg, Vajtswv yuav cawm lawv dim.
“Thiab lawv qhia lawv niam cov lus rau kuv, hais tias: Peb ntseeg tias peb niam yeej paub li ntawd.”9
Enos thiab cov tub rog hluas lawv niam lawv txiv txoj kev ntseeg tau ntxiv dag zgo rau lawv, lawv thiaj li kov yeej tau tej kev sim lawv txoj kev ntseeg.
Peb tau koob hmoov vim muaj Yexus Khetos txoj moo zoo hauv peb hnub nyoog no, uas txhawb nqa peb thaum peb poob siab los sis ntxhov siab. Peb txais kev nplij siab tias peb tej hauj lwm yuav txi txiv raws li tus Tswv sij hawm uas Nws teem tseg yog tias peb txiv mus lawm tom hauv ntej dhau kev sim peb txoj kev ntseeg.
Kuv tus poj niam thiab kuv wb nrog Cheeb Tsam Pawg Thawj Tswj Hwm, tau nrog Txwj Laug David A. Bednar mus muab lub Tuam Tsev Haiti Port-au-Prince fij tseg. Wb tus tub Jorge nrog wb mus thiab nws hais txog tej yam uas nws pom: “Xav tsis thoob os, Txiv! Thaum Txwj Laug Bednar pib thov muab lub tuam tsev fij tseg, kuv hnov tau txoj kev kaj puv chav ntawd ua rau txhua yam ci ntsa iab thiab sov. Zaj lus thov ntawd tau pab kuv kawm vim li cas muaj ib lub tuam tsev. Yeej yog tus Tswv lub tsev.”
Nyob hauv Phau Ntawv Maumoos, Nifais qhia tias thaum peb xav paub Vajtswv lub siab nyiam, Nws yuav ntxiv dag zog rau peb. Nws sau hais tias, “Kuv, Nifais, tus uas tseem hluas heev, tiam sis tseem muaj lub cev loj siab, thiab kuj muaj lub siab xav paub txog Vajtswv tej txuj ci uas neeg tsis paub txog thiab, yog li ntawd, kuv thiaj tau tsa ncauj quaj thov rau tus Tswv; thiab saib seb nws tau los xyuas kuv, thiab tau nplij kuv lub siab ces kuv txawm ntseeg txhua lo lus uas kuv txiv tau hais; yog li ntawd, kuv tseem tsis tau ntxeev siab tawm tsam nws li kuv cov tij laug.”10
Cov kwv tij thiab cov muam, thov kom peb yuav pab peb cov me nyuam thiab cov ib puag ncig kom coj raws li Vajtswv txoj kev ua raws li kev khi lus, tus Ntsuj Plig thiaj yuav qhia lawv thiab ua rau lawv lub siab mos muag lawv thiaj li yuav xav coj raws li Nws tas lawv lub neej.
Thaum kuv xav txog kuv niam kuv txiv tus yam ntxwv, kuv paub tias peb txoj kev ntseeg tus Tswv Yexus Khetos yuav qhia ib txoj kev rau peb rov qab mus cuag peb lub tsev saum ntuj ceeb tsheej. Kuv paub tias tej txuj ci tseem ceeb los tom qab tau sim peb txoj kev ntseeg.
Kuv ua tim khawv txog Yexus Khetos thiab Nws txoj kev theej txhoj. Kuv paub tias Nws yog peb tus Cawm Seej thiab tus Txhiv Dim. Nws thiab peb Leej Txiv Saum Ntuj Ceeb Tsheej twb los thaum sawv ntxov ntawm lub caij nplooj ntoo hlav xyoo 1820 rau Yauxej Xamiv, tus yaj saub ntawm Kev Muab txoj Moo Zoo Txum Tim Rov Qab Los. Thawj Tswj Hwm Russell M. Nelson yog tus yaj saub hauv peb hnub nyoog. Los ntawm Yexus Khetos lub npe, amees.