Kev Ua Dawb Huv thiab txoj Hau Kev Zoo Siab
Kev muaj kev zoo siab ntxiv yog los ntawm kev ua dawb huv ntxiv.
Kuv cov kwv tij thiab cov muam, kuv twb thov Vatjswv kom muaj hwj chim pab nej thaum nej nrhiav kev zoo siab. Nej ib txhia tej zaum xav tias nej zoo siab txaus lawm, tiam sis yeej tsis muaj leej twg uas yuav xyeej kev zoo siab ntxiv. Txhua tus yeej yuav txais tau kev zoo siab kav ib txhis uas yuav muaj tseeb tiag.
Nov yog qhov uas Leej Txiv Saum Ntuj Ceeb Tsheej; Nws Leej Tub, Yexus Khetos; thiab tus Vaj Ntsuj Plig Dawb Huv xav muab rau Leej Txiv Saum Ntuj Ceeb Tsheej txhua tus me nyuam ntsuj plig, tsis hais cov nyob tam sim no, cov uas yuav nyob, los sis cov uas twb tau nyob hauv lub ntiaj teb no. Qhov uas lawv muab li no rau peb los tej lub sij hawm peb hu ua txoj hau kev zoo siab. Tus yaj saub Amas twb hu li no thaum nws qhia nws tus tub uas raug kev nyuaj siab los ntawm kev txhaum. Amas paub tias kev phem yeej tsis yog kev zoo siab rau nws tus tub—los yog rau Leej Txiv Saum Ntuj Ceeb Tsheej cov me nyuam ib tug twg.1
Nws qhia nws tus tub hais tias kev ua dawb huv ntxiv yeej yog tib txoj kev rau kev zoo siab. Nws tau qhia meej tias kev ua dawb huv ntxiv yeej los ntawm Yexus Khetos txoj Kev Theej Txhoj uas ntxuav peb thiab ua rau peb ua neeg zoo tag nrho.2 Tsuas yog kev ntseeg Yexus Khetos, kev hloov siab lees txim mus ntxiv, thiab kev ua raws li peb tej kev khi lus peb thiaj li yuav txais tau kev zoo siab kav ib txhis uas peb txhau tus xav muaj tas mus li.
Hnub no kuv thov kom kuv yuav txawj pab nej to taub tias kev zoo siab ntxiv yog los ntawm kev ua dawb huv ntxiv nej thiaj li yuav ua raws li nej ntseeg li ntawd. Ces kuv yuav qhia tias kuv paub dab tsi txog tej yam uas peb ua tau kom tsim nyog txais lub txiaj ntsim ua neeg dawb huv ntxiv.
Cov vaj lug kub qhia peb tias, peb yuav ua neeg dawb huv ntxiv thaum peb muab siab rau ntseeg Khetos,3 coj yam ntxwv uas qhia tias peb yuav mloog lus,4 hloov siab lees txim,5 ua kev txi rau Nws,6 txais cov kab ke dawb huv thiab ua raws li peb tej kev khi lus rau Nws.7 Yuav tsum txo hwj chim,8 ua siab mos siab muag,9 thiab ua siab ntev10 kom ua neeg tsim nyog txais lub txiaj ntsim ua dawb huv ntxiv.
Ib zaug thaum kuv xav ua neeg dawb huv ntxiv yog thaum kuv nyob hauv lub Tuam Tsev Salt Lake. Yog thawj zaug uas kuv nkag mus hauv lub tuam tsev es kuv tsuas kawm me ntsis xwb txog qhov uas yuav zoo li cas. Kuv twb pom tej lus uas kos rau lub tuam tsev: “Kev Dawb Huv rau tus Tswv” thiab “Tus Tswv lub Tsev.” Kuv cia siab ntsoov. Tiam sis kuv xav paub seb kuv puas npaj siab mus haud.
Kuv niam thiab txiv tau taug kev mus ua kuv ntej thaum peb nkag mus hauv lub tuam tsev. Peb yuav tsum muab peb cov ntawv tso cai rau neeg saib, qhia tias peb tsim nyog.
Kuv niam thiab txiv paub tus txiv neej nyob ntawm qhov chaw saib daim ntawv tso cai. Yog li ntawd nkawd tos me ntsis kom muaj sij hawm nrog nws tham. Kuv tau mus ua ntej rau ib qho chaw loj es txhua yam yog xim dawb. Kuv twb saib qab nthab siab heev zoo li yog lub ntuj uas qhib plho. Thaum lub sij hawm ntawd, kuv txais kev tshoov siab hais tias kuv twb nyob ntawd dhau los.
Ces kuv txawm hnov ib lub suab mos—uas tsis yog kuv li. Tej lus uas kuv hnov yog li no: “Koj tsis tau nyob no dhau los. Koj nco txog ib lub sij hawm ua ntej koj yug los. Koj twb nyob hauv ib qho chaw dawb huv zoo li no. Koj paub hauv koj lub siab tias tus Cawm Seej tab tom yuav los rau qhov chaw uas koj sawv ntawd. Thiab koj zoo siab vim koj xav pom Nws.”
Lub sij hawm hauv lub Tuam Tsev Salt Lake ntawd yeej yog ib me pliag xwb. Tiam sis thaum kuv nco txog ua rau kuv muaj kev kaj siab lug, kev xyiv fab, thiab kev zoo siab.
Hnub ntawd kuv tau kawm ntau yam. Ib yam yog qhov uas tus Vaj Ntsuj Plig Dawb Huv hais lus ua ib lub suab yau yau thiab me me. Kuv hnov tau Nws thaum twg muaj kev kaj siab lug. Nws ua rau kuv zoo siab thiab ua rau kuv paub thaum twg kuv hloov ua dawb huv ntxiv. Thiab qhov ntawd yeej ua rau kuv zoo siab ib yam li lub sij hawm thaum kuv nyob hauv Vajtswv lub tuam tsev ntawd.
Nej twb pom hauv nej lub neej thiab lwm tus lub neej txog qhov txuj ci tseem ceeb uas yog kev zoo siab los ntawm kev ua dawb huv ntxiv, hloov ua neeg zoo li tus Cawm Seej ntxiv. Tau ob peb lim tiam tas los, kuv twb nyob rau ntawm lub txaj ntawm tib neeg uas yuav tas sim neej nrog kev ntseeg tus Cawm Seej thiab kev zoo siab.
Ib tug yog ib tug txiv neej uas muaj tsev neeg nyob ib puag ncig nws. Nws thiab nws tus poj niam sib tham thaum kuv thiab kuv tus tub nkag los. Kuv twb paub nkawd ntau xyoo lawm. Kuv tau pom nkawd thiab nkawd tsev neeg muaj Yexus Khetos txoj Kev Theej Txhoj hauv lawv lub neej.
Nkawd twb txiav txim siab tias yuav tu kev kho mob kom nws nyob ntev zog. Muaj ib yam hauv peb lub siab thaum nws hais lus rau peb. Nws luag nyav thiab qhia tias nws ua Vajtswv tsaug rau txoj moo zoo thiab qhov uas txoj moo zoo tau ua rau nws thiab nws tsev neeg dawb huv. Nws tau hais txog ntau xyoo uas nws ua hauj lwm hauv lub tuam tsev. Tus txiv neej no thov, es kuv tus tub tau pleev roj rau nws lub taub hau. Kuv tau khi txoj kev pleev roj ntawd. Thaum kuv tau ua li ntawd, kuv tau txais kev tshoov siab qhia nws tias tsis ntev nws yuav pom nws tus Cawm Seej, tim ntsej tim muag.
Kuv cog lus rau nws tias nws yuav muaj kev zoo siab, kev hlub, thiab tus Cawm Seej txoj kev pom zoo. Nws luag nyav thaum wb tawm mus. Nws tej lus kawg rau kuv yog “Qhia Kathy tias kuv lub nws.” Tau ntau xyoo kuv tus poj niam, Kathleen, tau txhawb nqa nws tsev neeg kom los cuag tus Cawm Seej, ua raws li tej kev khi lus, thiab ua neeg tsim nyog txais kev zoo siab uas los ntawm kev ua dawb huv ntawd.
Ob peb teev tom qab ntawd nws tau tas sim neej no. Ob peb lim tiam tom qab nws tas sim neej, nws tus poj niam tau nqa ib khoom plig rau kuv tus poj niam thiab kuv. Nws luag nyav thaum peb sib tham. Nws hais tias, “Kuv xav tias kuv yuav tu siab thiab kho siab heev. Tiam sis kuv zoo siab kawg. Neb puas xav tias tsim nyog kuv xav li ntawd?”
Vim kuv paub tias nws hlub nws tus txiv npaum li cas thiab nkawd tau kawm los paub, hlub thiab ua hauj lwm rau tus Tswv, kuv qhia nws tias nws txoj kev zoo siab yog ib lub txiaj ntsim vim nws los ntawm txoj kev rau siab ntseeg ua hauj lwm, nws twb los ua neeg dawb huv ntxiv. Nws txoj kev ua dawb huv ua rau nws tsim nyog txais kev zoo siab li ntawd.
Ib txhia uas mloog kuv hais lus hnub no xav paub tias, “Vim li cas kuv tsis muaj kev kaj siab lug thiab kev zoo siab uas tus Tswv cog lus rau cov uas rau siab ntseeg? Kuv twb rau siab ntseeg dhau tej kev sim siab loj heev, tiam sis kuv tsis muaj kev zoo siab.”
Tus Yaj Saub Yauxej Xamiv kuj raug kev sim siab no. Nws tau thov Vajtswv pab nws thaum nws nyob hauv lub tsev raug kaw Liberty, Missouri. Nws twb rau siab ntseeg tus Tswv. Nws tau hloov ua dawb huv ntxiv. Tiam sis nws xav tias txwv tsis pub nws muaj kev zoo siab.
Tus Tswv tau qhia nws txog kev ua siab ntev uas peb txhua tus yuav tsum muaj, thiab tej lub sij hawm yuav tos ntev zog, thaum peb raug kev sim siab hauv lub ntiaj teb no. Nov yog tus Tswv zaj xov rau Nws tus yaj saub uas rau siab ntseeg thiab raug txom nyem:
“Thiab yog hais tias luag muab koj pov rau hauv lub qhov taub, los yog mus rau cov neeg tua neeg txhais tes, thiab raug luag txiav txim tuag rau koj; yog koj raug muab pov rau hauv dej tob; yog tej nthwv dej hiav txwv tuav hauv tawm tsam koj; yog tej cua daj cua dub hloov los ua koj tus yeeb ncuab; yog saum ntuj cia li tsaus tsaus, thiab yog txhua yam ntuj tsim koom siab los thaiv txoj kev; thiab tshaj txhua yam, yog hais tias ntuj txiag teb tsaus lub qhov ncauj kiag yuav qhib loj loj raws koj, koj yuav tsum paub, kuv tus tub, hais tias tag nrho tej yam no yuav muab kev kawm rau koj, thiab yuav zoo rau koj.
“Neeg Leej Tub tau nqis mus qis tshaj tag nrho tej ntawd. Koj puas tseem ceeb dua nws?
“Yog li ntawd, nyob raws nraim koj txoj kev, thiab lub pov thawj hwj yuav nyob nrog koj; vim twb teem ciaj ciam rau tej ntawd, tej ntawd yeej hla tsis tau. Twb paub koj yuav muaj pes tsawg hnub, thiab koj yuav muaj pes tsawg xyoo los yeej yuav tsis muaj tsawg dua; yog li ntawd, tsis txhob ntshai tej yam neeg ua tau, vim Vajtswv yuav nrog koj nyob mus ib txhiab thiab ib txhis li.”11
Zaj no yeej yog zaj uas tus Tswv qhia Yauj, uas twb them nqi loj heev kom cia txoj Kev Theej Txhoj ua rau nws hloov ua dawb huv ntxiv. Peb paub tias Yauj yog ib tug dawb huv, los ntawm zaj lus piav txog nws: “Muaj ib tug txiv neej npe hu ua Yauj nyob hauv lub teb chaws Uxes, nws hwm thiab muab siab npuab Vajtswv. Nws yog neeg zoo thiab tsis ua kev phem kev qias.”12
Ces Yauj cov nyiaj txiag, nws tsev neeg, thiab nws txoj kev noj qab nyob zoo twb ploj mus. Tej zaum nej nco ntsoov tias Yauj tsis ntseeg tias qhov uas nws ua dawb huv ntxiv, los ntawm qhov uas nws raug txom nyem ntxiv, tau ua rau nws tsim nyog muaj kev zoo siab ntxiv. Yauj xav tias kev ua dawb huv twb ua rau nws raug kev nyuaj siab xwb.
Tiam sis tus Tswv tau qhia Yauj tib zaj lus uas Nws qhia rau Yauxej Xamiv. Nws tau cia Yauj muaj qhov muag ntawm sab ntsuj plig pom nws tej xwm txheej nyuaj siab heev. Nws tias:
“Nim no koj cia li sawv khov kho ib yam li tus txiv neej yawg thiab cia li teb tej lus uas kuv yuav nug koj.
“Thaum kuv tsim lub ntiaj teb koj puas nyob ntawd? Yog koj paub txhij paub txhua, koj cia li qhia rau kuv saib.
“Leej twg yog tus uas hais tias yuav tsim lub ntiaj teb loj li cas? Leej twg yog tus muab hlua ntsuas lub ntiaj teb?
“Yam dab tsi tuav tej ncej uas txheem lub ntiaj teb no kom khov? Leej twg yog tus txhos tus ncej zeb uas txheem lub ntiaj teb?
“Hnub ntawd thaum kaj ntug txoog, tej hnub qub hu nkauj ua ke thiab tej tim tswv saum ntuj qw zoo siab.”13
Ces, tom qab Yauj hloov siab lees txim vim nws hais tias Vajtswv tsis ncaj, Yauj twb pom nws tej kev sim siab raws li ib txoj kev uas siab thiab dawb huv ntxiv. Nws tau hloov siab lees txim.
“Yauj teb tus Tswv hais tias,
“Tus Tswv, kuv paub hais tias koj yog tus uas muaj hwj chim loj kawg nkaus; koj xav ua dab tsi, koj yeej ua tau huv tib si.
Koj nug hais tias ua li cas kuv thiaj muaj siab tawv nrog koj sib cav? kuv yog neeg ruam, kuv hais txog tej uas kuv tsis to taub, thiab tej yam xav tsis thoob uas kuv tsis tau paub dua li xwb.
“Koj kom kuv mloog koj hais thiab teb koj tej lus.
“Yav tas los kuv tsuas paub raws li luag qhia kuv xwb, tiam sis nim no kuv qhov muag pom koj lawm tiag.
“Yog li ntawd kuv txaj muag kawg nkaus rau tej lus uas kuv hais, kuv thiaj mus zaum ntawm cub tshau thiab hauv av ris siab hlo tsis ua ntxiv li lawm.”14
Tom qab Yauj hloov siab lees txim thiab ua neeg dawb huv ntxiv, tus Tswv tau foom koob hmoov rau nws kom muaj ntau tshaj txhua yam uas ploj lawm. Tiam sis tej zaum txoj koob hmoov zoo tshaj rau Yauj yog qhov uas nws yog neeg dawb huv ntxiv los ntawm kev raug txom nyem thiab kev hloov siab lees txim. Nws yog neeg tsim nyog txais kev zoo siab ntxiv hauv lub caij nyoog uas tseem tshuav rau nws nyob tau.
Kev ua dawb huv ntxiv yuav tsis los ntawm qhov uas peb thov xwb. Yeej yuav los thaum peb ua raws li tej yam peb yuav tsum ua kom cia Vajtswv hloov peb lub siab.
Thawj Tswj Hwm Russell M. Nelson tau muab tej lus ntuas zoo tshaj txog qhov uas peb yuav ua li cas taug txoj kev ua raws li kev khi lus kom ua dawb huv ntxiv. Nws tau qhia li ntawd thaum nws hais tias:
“Cia li txais tau lub hwj chim uas ntxiv dag zog rau nej los ntawm kev hloov siab lees txim txhua hnub—ua zoo dua thiab ua neeg zoo dua txhua hnub.
“Thaum peb xaiv hloov siab lees txim, peb txiav txim siab tias peb yuav hloov! Peb cia tus Cawm Seej muab peb hloov los ua tus neeg zoo tshaj peb ua tau. Peb xaiv kom peb sab ntsuj plig loj tuaj thiab muaj kev xyiv fab—yog kev xyiv fab uas los ntawm Nws txoj kev txhiv dim. Thaum peb xaiv hloov siab lees txim, peb xaiv kev hloov los ua neeg zoo li Yexus Khetos ntxiv!”
Thawj Tswj Hwm Nelson twb hais lus txhawb peb lub siab thaum peb hloov ua neeg dawb huv ntxiv: “Tus Tswv tsis xav tias peb yuav ua neeg zoo tag nrho nyob rau lub sij hawm no. … Tiam sis Nws xav tias peb yuav ua neeg huv ntxiv zuj zus mus. Kev hloov siab lees txim txhua hnub yog txoj kev rau peb ua neeg huv.”15
Thawj Tswj Hwm Dallin H. Oaks, nyob hauv ib zaj lus hais hauv rooj sab laj dhau los, kuj tau pab kuv pom meej tias peb yuav ua li cas kom ua neeg dawb huv ntxiv thiab yuav ua li cas paub tias peb puas ua tiag tiag. Nws hais tias: “Peb yuav ua neeg ntawm sab ntsuj plig li cas? Peb yuav ua neeg dawb huv li cas kom txaus peb thiaj muaj tus Vaj Ntsuj Plig Dawb Huv nrog nraim peb nyob? Peb yuav ua li cas kom muaj lub zeem muag ntawm txoj sia nyob mus ib txhis thaum peb pom thiab tshuaj ntsuam tej yam ntawm lub ntiaj teb no?”16
Thawj Tswj Hwm Oaks hais kom peb muaj kev ntseeg Yexus Khetos ntxiv vim Nws yog peb tus Cawm Seej uas hlub peb. Qhov ntawd ua rau peb nrhiav kev zam txim txhua hnub thiab nco txog Nws txhua hnub thaum peb ua raws li Nws cov lus txib. Thaum peb kawm vaj lug kub txhua hnub ua rau peb muaj kev ntseeg Yexus Khetos ntxiv li ntawd.
Zaj nkauj qhuas Vajtswv hu ua “Pab Kuv Ua Dawb Huv Ntxiv” qhia txog ib txoj kev thov Vajtswv kom pab peb ua neeg dawb huv ntxiv. Tus uas sau zaj nkauj no qhia tias kev ua dawb huv yog ib lub txiaj ntsim los ntawm Vajtswv uas hlub peb, uas nws pub rau peb zuj zus, tom qab txhua yam peb ua tau. Nyaj nej nco qab nqe kawg uas hais tias:
Pab kuv muaj siab dawb ntxiv,
Muaj lub dag zog ntxiv,
Khiav tawm ntawm kev phem ntxiv,
Xav rov mus tsev ntxiv.
Npaj rau lub nceeg vaj ntxiv,
Ua nws tes num ntxiv,
Txais tau cov koob hmoov ntxiv—
Ua zoo li koj ntxiv.17
Txawm peb raug xwm txheej dab tsi los, txawm peb nyob qhov twg ntawm txoj kev ua raws li peb tej kev khi lus kom rov qab mus tsev, thov kom Vajtswv teb peb tej lus thov ua neeg dawb huv ntxiv. Kuv paub thaum Nws teb peb tej lus thov, peb txoj kev zoo siab yuav loj tuaj. Tej zaum yuav los zuj zus, tiam sis yeej yuav los. Kuv twb tau txais kev cog lus los ntawm Leej Txiv Saum Ntuj Ceeb Tsheej thiab Nws Leej Tub, Yexus Khetos uas hlub peb.
Kuv ua tim khawv tias Yauxej Xamiv yog Vajtswv ib tug yaj saub, thiab tias Thawj Tswj Hwm Russell M. Nelson yog peb tus yaj saub hauv hnub nyoog no. Vajtwv Leej Txiv muaj txoj sia nyob thiab hlub peb. Nws xav kom peb koom nrog peb tsev neeg rov qab los cuag Nws. Peb tus Cawm Seej hlub peb thiab caw peb coj raws li Nws thaum peb ua li ntawd. Nkawd twb npaj txoj kev ua li ntawd. Los ntawm Yexus Khetos lub npe dawb ceev, amees.