Fel’ngin Got nib Papay
Nap’an ngad soengaed ni fan Somoel ufithik e gum’aen’, bay boech e tawa’th nira yib ngodaed nib papay.
Boech e duw u faram, e fakmow ni nel-e-duw rok keyib ngog me yoeg, “Papa’, Kug fil e ban’en. Guma nang fan chingyal’ ke n’uw nap’an rom.
Nap’an Somoel fa tapigpig rok ra yoeged e thin woed “Ma daki yo’or e rran” fa “Fare ngiyal’ inn’em e daki palog nga orel,” rayog ninge yaen ko ta’areb e yafas fa numpngin e nap’an.1 Ningyal’ Rok, arragon e ningyal’ Rok, ba thil ko ningyal’ rodad. Gum’aen’ nib t’uf. Fa’an dariy, dabiyoeg ningad gayed fa daged e mich ngak Got ni fan e yafas nge thapeg. Machane milwol daba’, nap’an ngad soengaed ni fan Somoel, bay boech e tawa’th nira yib ngodaed nib papay.
Nap’an Alma nge gidii’ rok kar kalbusgaed ko pi Lamanites, kar meybilgaed ko ayuw. Machane nap’an dabke thapraed e ayuw nib papay, kar soengaed nib gumaen’ ko thap, ma pii’ Somoel boech e tin fel’ Rok ko taw’ath nib papay. Ko sasun, Ke sumunguy e gum’rach’raed fapi Lamanite ni dar lii’raed ngar m’aed. Me ke gay gelngin ngak gidii’en Alma me chibiy tomalngin roared.2 Nap’an karthapgaed, kar milekagaed nga Zarahemla, kar weliy’ed e chepin roared ngak e gidii’ nibe motoyilgaed riy’. Ma bayay, napʼan fare Gidii’ nu Zarahemla nra lemniged falʼngin Got, nge gelingin ni chuweg Alma nge pi walagen u tanpaʼ fapi Lamanites ngu kalbus, mar meybil gaed ngakʼ mar oged e magaer ngakʼ Got.”3
Fal’ngin Got ra yaen ngak en ra fith Ngak udakaen e laniyaen’ nib yul’yul’ nge gum’racha’ nib gumaen’. Arragon e gidii’ nibe yoer ufithik to’orngin e kirebaen’, nap’an e puf mata’woy ba palog nge gafgow nib almarin, ra mang gaa’.
Amrogon ko e profet nib fel’ yangren ni ke gafgow nib almarin ulane kalbus ou’moon ke yoer: “O Got, biyu’uy gur? ... U nump’ngin ningam soen e pa’am … ? Arragon, O Somoel, u nump’ngin … ?”4 Ko fulweg, en Somoel dabki thapeg e Joseph nib papay, machane Ke pii’ e gapas ngok.5
Got ma pii’ e athap ko e thapeg u boron.4 Dariy’ fan e ningyal’, dariy’ fan e gin’en, ufithik Kristus ma udakaen Kristus bay e athap nima sminmin ko falflaen’ u poewchdaed.7 U poewchdaed ni gubin yal’.
Arragon, bay e micheg Rok ngodad: “Machane wurengaen’rog e dabi chuw romed.”8
Nib thabi gaa’fan, t’ufeg Got ra yib nib papay. Woed Paul, Gube pii’ e m’ag ni dariy’ e ban’en ninge “ni nge daregdad u rogon ni gadad ba t’uf rok Got nike yag ngodad u dakaen Kristus Yesus.”9 Pi denen rodad, yaedba chuwegdaed ko Ya’el Rok ko chingyal’, dabiyoeg ninge daregdaed ko ko t’ufeg Rok nibe thamgiliy.
Bayi boeche rogon ninge “Irma taw’athnog [daed].”10Chiney, ningad weliy’ed fapin’ney nib fel’rogon, Gube pii’ la’agruw e chepin e gidii’ nibe dag e tin fel’ ku Got.
Nap’an ke fel’ yangren, Emilie ke mae’waer ko substance abuse. Ta’ab e yay ke tabab e yalen, ni ke mang e m’ar nog ni ke gafgownag ko bo’or e duw, arragon bayi chingyal’ nap’an ke te’leg. Emilie ke mithaeg e magawon rok, arragon tomuren ke mang e le’engin nge nina’.
E chuweg ko m’arnog rok ke tabab nib almarin. Chingyal’, Emilie ke thapeg e medical exam, me bin magid, ke yaen nga ambulane nga hospital. Ke rus nap’an ke lemnog ninge chuweg ko bitir rok, mabgol rok, nge tabinaew rok.
Nap’an e naep nem, ulane singil nib milmor, Emilie ke paer nga bet rok me yoer nib almarin. Keb e murus nib almarin ngak, nge milmor nib gaa’ ulan fare singil nge ya’el rok, Emilie ke lemnog irra yim’ nap’an fare naep nem. Yigo’.
Amrogon, Emilie ke gay e gelngin ninge chuw ko bet rok me ragbug nga but. Dariy’ salapthin ni woed kafram ir e yang ko meybil rok, Emilie ke wenig ngak Somoel nap’an ke yoeg, “Got, Gube t’uf Nigem. Wenig ningam ayuwegeg. Dabug ningu go’ gag. Wening, ayuwegngeg ningu paer biney e naep.
U chingyal’, woed rogon Ke rrin’ ngak Peter, Yesus ke kii’ paa’ ngak me koel e ya’el rok nibe ligil.11 Keb Emilie ufithik e gapas, gel bugwaen, fel’ laniyaen’, nge t’ufeg. Fare singil dabki garbeb, Irma nang ni bay reb e bee’ ulangin, nge ko bin somm’on e yay ko e ningyal’ nap’an bay 14 e duw rok, Emilie ma nang nira fel’ rogon urning e ban’en. Nap’an ke “od ngak Got.”12 Emilie ke mol ufithik e gapas. Ere rayog ningad nanged fan ni “ere arame, faʼan gimed ra kalngaenʼ ma dab mu ʼelʼel niged e pi gumʼirchaʼ romed, ma rib gur ni yira fek fare woʼen e bayul iyib ngomed.”13
Golnag ko Emilie nge chuweg ke yaen ko bo’or e ningyal’—boech e pul ko golnag, fil, nge ayuw, nap’an fare ningyal’ nem ke ayuweg me chibiy ngak udakaen e fel’ngin Rok. Me thamgiiy e fel’ngin Rok ngak nap’an ke yaen ulane temple ko figirngin nge la’agruw e bitir rok ningar m’ag paa’raed uta’abang ko manemus. Boeth e gidii’ nu Zarahemla, Chiney Emilie ba yoer nap’an irra sul ngadakaen e fel’ngin rok Got nge gelngin ko thap ninge chuweg rok ko kalbus.
Chiney, ko reb e yafas ko e bee’ nib michaen’ ni gel bugwaen. U December 27, 2013, Alicia Schroeder ke thapeg la’agruwi fagar rok, Sean nge Sharla Chilcote, kar bow nga na’un rok ni dabki pinning. Sean, i’ir e bishop rok Alicia, ke pii’ e cell phone rok ngak me yoeg ufithik e kirebaen’, “Alicia, gur t’uf romow. Thingar ningam fulweg re call ney.”
Figirngin Alicia, Mario, ke non ko phone. Ke yaen nga wuru’ e binaw ko boech e bitir rorow ningar falfal ko snowmobile. Bay e dol’ nib almarin. Mario ke mad’ad nib almarin, nge fak row ni bay 10 e duw rok, Kaleb, ke yim’. Nap’an Mario ke yoeg ngak Alicia marungag’en ke yim Kaleb, ke waer ko kirebaen’ nib almarin. Ke aw nga but’. Dabyioeg ninge mith ko kirebaen’ nib almarin, Alicia dabiyoeg ninge non fa mith.
Bishop nge Siser Chilcote, kar milgow ngak, mar chibiyew ngak, mar koelgow ngak. Kar yoergaed mar kirebaen’gaed uta’abang ko boech e ningyal’. Nge Biship Chilcote ke fith ninge pii’ Alicia e taw’ath.
Bin magid ni ke buch ni dabiyoeg ningan nang fan fa’an dariy’ e lowaen’ marunga’agen fare Bayul ku Yesus Kristus nge fel’ngin Got. Bishop Chilcote ke tay paa’ nga dakaen loelgen Alicia, nge ke waer e lam, ke tabab ninge non. Alicia ke rung’ag la’agruw e ban’en, woed rogon ke yoeg thin Got Ngak. Bin somm’on, ke rung’ag e fithingan rok, Alicia Susan Schroeder. Nge bin magid ke rung’ag thin rok fare bishop ninge ngongoliy mata’awon rok Got ni Gubin Rayog Rok. Nap’an re ningyal’ nem—nap’an ke yoeg e fithingan nge gelngin Got—Alicia ke sug ko e gapas, t’ufeg, ayuw, nge u rrogon e falflaen’. Ma dabki chuw rok.
Chiney, arragon, Alicia, Mario, nge tabinaew rok yaedba kirebaen’ ni fan Kaleb. Ir e ba pining’aen. Nap’an Guma non ngak, ra maap luwan Alicia nap’an irra weliy’ ngog ni irba a’dag ma tawreng e fak rok. Maap luwan nap’an ke yoeg urrogon fare Tathapeg nib Gaa’ ke ayuweg ngak nap’an e sikeng rok, u somm’on ko tin fel’ Rok nap’an e to’orngin e kirebaen’ me yaen nga athap nib tamilang ko e sul, “nira yib nib papay.”
Gumanang e magawon ko yafas ra gay e kirebaen’ nge balyangaen’ ni dabi moem ningam thapeg fa nang fan e ayuw woed rogon ni ke yib ngak Emilie nge Alicia. Keb e ningyal’ nem ngog. Gube pii’ e m’ag rog ni, nap’an e ningyal’ nem, e thamgily rodad i’ir e pow ko sumunguy nge fel’ngin Got. Mu pugurran, Israel nu kakrom kan thapeg “ko ta’ab e Got ni ke thapraed”14 ni urngin e rran.
Gube pii’ e m’ag rog ni Yesus Kristus i’ir e Tathapeg nib Gaa’, nge udakaen Fithingan, Gube micheg ngomed nap’an mu chel Ngak udakane e magaen’ nib yul’yul nge gum’racha’ nib riyul’ ko gum’racha’, Irra thapmed ko urngin e ban’en nibe gay rogon ninge gathaynog e yafas romed fa falflaen’med. Biney e thapeg sana ra yaen nga nump’ngin e nap’an—sana urngin e yafas fa numpngin’ ko yafas. Ere, gube gay e sumunguy, ayuw, nge athap, ninge ayuwegmed ma gelnogmed mada’ ko fare rran ningan thapmed, Gube weliy’ mug pii’ e m’ag ngomed marunga’gen efel’ngin Got udakaen e fithingan ku Yesus Kristus, amen.