Duruwi’iyed Gimed ko Thin rok’ Kristus
Duruwi’iyey ko thin rok’ Kristus e rayag ni nge buch ni demutrug e ngiyal’ nge demutrug ko ngan ni fa’an gadad ra fal’agin rogon gum’ircha’endad.
Gadaed ba t’uf rok’ e Chitamangdad nibay u Tharmiy. Fare gagiyeg Rok’ ni rib mangil e ngongliy ni fan ngodad ni nge yog ni ngad thapegned fapi tawa’ath Rok’. U lan e biney e yafos, kan piningdad ni gubin ni ngad bad ngak Kristus ngad thapegned fare gospel nikan fulweg rok’ Yesus Kristus nap’an nran tawfe, min thapeg fare tawa’ath ko fare Kan ni Thothup, min ul’ul’ ngan par ni yibe fol ko fare gospel. Nephi e weliy fare micheg rodad nap’an ni kad tawfe ni woed fare “pa’ i kanawo’ nib wu’in’in mab achig radan,” ma be pug oran ngodad ni ngad “pii’iyaen nge m’on u dakan Kristus, … ni gimed be duruwi’iyed gimed ko thin rok’ Kristus, mi gimed athamgil nge mada’ ko tomur,” ni ngayag ni ngan thapeg urngin fapi tawa’ath rok’ e Chitamangdad nibay u Tharmiy nike tay ni fan ngodad (2 Nephi 31:19–20).
Nephi e ul’ul ma be pugoran ngodad ni fa’an gadad ra “duruwi’iyed {gimed} ko thin rok’ Kristus,” yaed “e ra yoeg [ngodad] rogon gubin e pin’en ni [ngad] rin’ed” (2 Nephi 32:3) ma ra yib gelngiy ni ngan gel ngak fare “lumel nge sabaenbaen rok’ mo’oniyan’” (1 Nephi 15:24).
Mang e Duruwi’iy?
Nap’an ni gub pagal, kug lemnag ni duwuri’iy e be yipfan ni kemus ni ngan kay e komey, sushi, nge soyu’. Kug nang e chiney ni bin riyul’ i fan e duwuri’iy e gathi kemus ni ngan adag e ggan nib fel’ lamen. Bay ba falfalen’ nib gel, mab fel’ nga fithik i dowey, ma ba madnom, tu’ufeg, ni yibe dag ngak e chongin e tabinaew ni yad ba tu’uf, ni gadad be yog e magar ngak Got, u nap’an ni gadad be kay e ggan nib bo’or mab fel’ lamen. Mich u wun’ug ngay ni nap’an ni gadad ra duruw’iyed gadad ko thin rok Kristus, ma woed nib chuchugur rogon nap’an ni gadad be kay e ggan nib mangil mab bo’or. Duruwi’iyed gadad ko thin nib thothup e gathi kemus ni ngan be’eg. Susan nra fek e falfalen’ ngodad nib riyul’ me ga’nag e tha’ rodad ngak fare Tathapeg.
Biney e kan fil nib tamilang rogon lan fare Babyor ku Mormon. Lik’ay rok Lehi ni guy bake gak’iy “ni wa’amngin [e] ra yognag ngak’ bee’ e falfalaen’.” Biney e wa’amngin e be yipfan e tu’ufeg rok’ Got, ma nap’an ni ri’ lamen fare wa’amngin, “ni rib … athibthib, ko urngin mit ban’en ni [ke] ri’ lamen.” Ke “mar [ri] falfalaen’ ni rib gel” ma ba’dag ni nge kay chon e tabinaew rok’ boech (1 Nephi 8:10–12).
Nap’an ni gadad ra duruwi’iyed gadad, ni demtrug urngin fa mit i mang ggan e bay rodad ma woed ni dariy fan fa’an nib sug gum’ircha’dad ko magar. Chongin e tabinaew rok Lehi e kemus ni yigo’ ufin ked u lan wuru’ e binaw, me weliy Nephi gelngin fapi gafgow rorad, ni be ga’ar, “Rib yo’or e pi tawa’ath rok’ Somoel” ni pi “romaed … e yaed ba gel” ma yag ni ngar fakyed e bitir “ni dakur nonnon gaed.” (1 Nephi 17:1–2).
Duruwi’iyed e boech e ngiyal’ ma woed ni yibe rii’ lamen e ggan. Alma ke non marunga’agen e awoch nib riyul’ be paer ulan e gum’irch’dad Napan ni ngad sikengngadad ngak, ragnad nanged fare awoch ra mang “ni nge m’ag an’ug ngay” (see Alma 32:28–33).
Duruwi’iyed gimed ko Thin rok Kristus
Fapi tawa’ath nima yib nap’an nran duruwi’iyed gadad ko thin rok’ Kristus e ba gel bugwan ma ra thilyeg e yafos. Bay dalip ni rug ba’dag ni ngu pinngem ni ngam fek nga lan e yafos rom.
Somm’on, fapi thin ku Kristus rayog ni ngar ayuweg dad “gelnag rogon [rodad] ni ngad thapeg e thogthog” (Russell M. Nelson, “Revelation for the Church, Revelation for Our Lives,” Liahona, May 2018, 96) and safely guide us through our life. Mormon e fil ni fare thin rok’ Kristus e m’ug riy ni “wawliy fapi gdii’ ni ngar rin’ed [e] tin nib mat’aw,” ma bay gelngin nib gel ko gubin ban’en “fare sayden” nrayag ni nge rin’ (Alma 31:5). Woed ni kug gay e lowan’ rok’ Got ko ngiyal’ nibay e tin ni gube mo’owaer riy, gubin ngiyal’, ni kug gay rogon fare “machalbog ko fare thin rok Got,” (Alma 31:5) kug thamiy ni kan thog’thog nag ngog e n’en nib mangil ni ngu rrin’, subthiy e lumel, min tawa’ath nag e yafos rog me mon’og e mich rok ngak’ Kristus nge t’ufeg rog ngak e gidii’ nibay u chreg. Woed, fare profet rodad, nib ba’adag Russell M. Nelson, ke fil ngodad ni “pi rran rodad e chiney, momaw’ rogon ni ngan mon’og ko tin nib thothup ban’en ni fa’an nde mo’ fare Kan ni Thothup ni nge powi’iyey, me ayuwegdad ni gubin ngiyal” (“Revelation for the Church, Revelation for Our Lives,” 96). Yi’iy nib tu’uf e ra yib nap’an ni gadad be gay rogon fare “machalbog ko fare thin,” ma ra bugi thin nem e bay gelngin nib gel ko gubin ban’en ni gabe lamnag.
Bin l’agruw, nap’an ni gadad ra gafgow ko ya’andad fa tin ni de fel’ rodad, fare “thin rok’ Got nib gamog” (Jacob 2:8) ulan fare thin nib thothup era ayuwegdad ngad nanged ko gadad mini’ mara pii’ gelngin dad nib ga rodad. Nap’an nug nang mug guy ni gag reb e bitir rok’ Got iraram reb i ban’en ni rib mangil nike buch rog. Nap’an e kub fel’ yangreg, dan gu nang ban’en ni mornga’agen e machib rok’ fare Tathapeg. Somm’on nug be’eg fare thin ko bin Be’eg e M’ag, pi thin rok Kristus e ri fosag gum’ircha’eg nike gafgow. Kug nang ni gathi yigo’gag e gubay ma gag e bitir rok’ Got. Nap’an ni kug nang ko gag mini’ u p’owchen Got, ma kug nang fal’ngig u dakaen fare Bayul rok’ Kristus.
Enos e weliy salpen nge n’en ni buch ngak ko ngiyal’ ni kan tomilingan’ nag nap’an nran lemnag fapi thin rok’ Kristus. Nap’an ni pag fapi thin ma weliy e chitaman ngak ni monrga’agen e “yafos ni gubinfen, nge falfalaen’rok’ fapi saints, e ri [rich] nib to’aear nga lan gum’ircha’eg,” ma ya’el rok “e ri yibe bilig ngak’; [me] ragbug nga but’ u p’oewchen e Anisunmiyeg … mug yoeg ngak’ u dakaen e meybil” (Enos 1:3–4). Ko re meybil nem rok’ ke nang nibay fare Tathapeg me ke nang ni’ir bee’ nibay fa’an, mab tu’uf ma rayag ni ngan n’ag fan fapi denen rodad, ma ri gadad e pifak Got.
Bin dalip, rayag ni ngad chibiyed e gidii’ ngalang u dakan fapi thin rok’ Kristus. Woed Enos ni rin’ e biney u bang ni yag ni rich fare thin rok’ Kristus ngalan gum’ircha’en, fare Somoel e ra rrin’ e birok’ e murwel ni nge mad nga gum’ircha’en e pi cha’an ni yaed ba’dag ni ngar weriged e thin ni mornga’agen fare gospel. Bo’or i gadad nima kirbaen’ nap’an nra pinning bee’ ni nge yib ni nge motoyil ko fare gospel machane dani buch ni aram rogon ni gadad be lemnag. Demutrug ko mang e ra buch, Somoel e be pinning dad ni ngad binged langandad ngad weliyed fare thin ko gospel rok’ reb bee’.
L’agruw e duw kafram, Somol e math nga gum’ircha’en e chitinag, ni’ir e ayuweg nge dugliy ni nge thapeg fare m’ag ko tawfe. Kug soen nag e ra rran nem ninge buch gonpa’an 35 e duw. U mm’on nib tu’uf ni nge dugliy laniyaen’, bo’or gidii’en e Galasia ni pigpig ngak’ ni woed rogon nra rrin’ Kristus. Reb e Madnom riy, ke thamiy nib tu’uf ni nge yan nga galasia. Ere rrin’ ni aram rogon ni kan thogthog nag. Nap’an ni ke par nga but’ ko bin nga m’on e chia nibe soen nag fare sacrament ni nge tabab, bay bochi pagal ni aningeg e duw rok’ nib saki’iy nibay u powchen. Me sap ngak’ me siminmin. Me chuw fachi pagal nge sul nga tagil’ ko gin nibe par riy, ni’ir e bay nga barba’ ko ggin nibe par e chitinag riy. Me fak fachi pagal ban’en ko gin ba’aram nibe par riy me sul nge pii’ ngak e chitinag bake babyor ko tang maki sul nga tagil’. Ma ke guy e chitinag ni fapi babyor ko tang e bay ko chia nib thilthil thilin ulan fare chapel. Rayag rok’ ni nge fek reb ko reb e chia nib migid ngak’. Machane, kari gaa’ owchen ko n’en nike rinn’ e chi pagal ney ni rib gol, ni ban’en nike fil ulan e tabinaew rok’ nge lan e galasia. Ke munguy nag gum’ircha’en e ngiyal’ nem. Me thamiy nib gel ni Got e be pinning ni nge yib nge laek fare Tathapeg. Me thamiy nib tu’uf ni ngan tawfe nag. Chi pagal nem e dani yog ni ngan sap ko n’en nike rrin’, machane ke rrin’ e tin ni manang ni thin rok’ Got me tu’ufeg e bugili yoror rok’. Gol rok’ e thilyeg gum’ircha’en e chitinag.
Fapi thin rok Kristus e ra math nga gum’ircha’en e gidii’ ma ra bing owchenrad e pi cha’en ndawri guy Ir. U kanawo’ nga Emmaus, l’agruw i disciple ni yed be yaen Yesus. Kar kirbaen’ gow ma dawor nang fanew fare yam’ nike tay fare Tathapeg. Gelngin e kirbaen’ rorow, dar nangew ni fare Kristus nib fos e be un ngorow. Yesus “e yog ngorow e tin ni murnga’agen ni kan weliy u lan urngin kan e babyor nib thothup nibay ni mornga’agen,” ma darn ra poyew Ir ni’ir fare Tathapeg nibe fos ko yam’ nge mada’ ko ngiyal’ ni kar par nga tabel miyo t’ar fare flowa ni ngar ked. Ma fin aram fani puf “owcherow”. Ni woed gadad—fa pi fagar rodad, gidii’ nibay u charen dad, nge pi bugili yoror rodad—duruwi’iy min t’ar fare flowa Ngak’, ma owchendad e rran bing nge mab. Nap’an fagli disciple u Emmaus e ra sap gow ko fare ngiyal’ rorow ngak fare Tathapeg nike fos ko yam’, karognew ni kar thamiyew ni bod ba nifey ni be yik’ u lan ngorongran row ni fa’an i welthin ngorow u daken e kanawo’ me weliy fan fapi thin nu babyor nib thothup ngorow (muguy ko Luke 24:27–32). Biney e ra riyul’ ni fan ngodad ni gubin.
N’en ni ngan nang
U tomuren, gube micheg ni duruwi’iyey ko thin rok’ Kristus e rayag ni nge buch ni demutrug e ngiyal’ nge demutrug ko ngan, ni fa’an gadad ra fal’agin rogon gum’ircha’endad ni thad thapegned. Duruwi’iyed ko thin rok’ Kristus e re fek e yi’iy, ma ki micheg me dag ngodad ni gadad e bitir rok Got, me ra fek e pi tafagar rodad ngak Kristus nge fare yafos ni maenmus. Ngu tal’ ni gube yoeg fapi thin rok Nephi nap’an ni ga’ar: “Thingar mu pii’ed iyaen nga m’on u fithik’ e yul’yul’ romed ngak’ Kristus, nib machalbog laniyaen’med ko athap, nge t’ufeg rok’ Got ngak’ gubin e gidii’. Ere, fa’an gimed be duruwi’iyed gimed ko thin rok’ Kristus, mi gimed athamgil nge mada’ ko tomur, ma musap gaed, i ga’ar facha’ ni Chitamangiy: Rayog e yafos ngak ni gubinfen” (2 Nephi 31:20). U dakean fithngan Yesus Kristus, amen.