Rayag Ni Ngaed Ngongliyed Nib Mangil nge Fel’ ko Bin Th’abi Mangil
Mu tay ni ngu um kalngan’ ni gubin e rran u lane yafos rom ni rayag ni ngam murwel ko fare priesthood nib gel gelngin ko kafram.
Pi walageg, ri gub falfalen’ ni gube sap ko gubin e gidii’ nbay fare priesthood rok Somoel ko re mo’olung ney. Gimed e gidii’ ni ri gimed ba gel! Gimed ba tu’uf romaed. Gamaed be meybil ni fan med. Ma ri gamaed ba falfalen’ ngomed.
Kaffin gu pir’eg ni gube leam nag e thin rok Somol ngak fare Profet Joseph Smith: “Dariy ban’en ni ngam moeg ma kemus ni mornga’agen e kalngan’uy ko ngiyal’ ney.”1 Biney ni yibe chiyliy e bay ni yibe weliy nib yo’or yay ulan fapi thin nib thothup.2 Ni be fith ba duwer nib gga’fan: “Bay bee’ nib tu’uf ni nge kalngan’?” Fulweg riy e arrogon.
Oren e gidii’ e ma leam nag ni kalngan’ e ba gechig—ban’en ningan palog riy ni dabi buch reb e magawon. Machane biney e leam e ke yib rok Satan. Ma gay rogon ni nge taleg daed ni dabin yean ngak Yesus Kristus,3 niba’ pa’ nib puf,4 nibe athapeg ma ba adag ninge gol nigey, me n’ag fan e kireb, bi’ech nigey, pi’ gelngiy, ma’anga’ang, me thothup nag daed.
Reb e thin ko kalngan’uy ko thin nu Greek ko bin Bi’ech e M’ag e metanoeo. Re thin ni meta- e be yup’ fan ko “thil”. Re thin ni -noeo e be yup’ ko thin nu Greek nibe yup fan e “tafney”, “gonop,” “ya’el,” nge “pogfan.”5
Ere, napan ni yoeg Yesus ngom nge gag ni ngan “kalngan’uy,”,”6 Ma be pining daed ni ngad thilyeg e tafney rodaed, gonop rodaed, ya’el rodaed—nib mu’un e rogon e pogfan rodaed. Be yoeg ngodaed dni ngad thilyeg ned rogon ni gadaed be tu’ufeg e gidii’, leam, pigpig, rogon ni gadaed be paer, rogon ni gadaed be ayuweg e ppin rodaed, bitir rodaed ni gadaed be fil ban’en ngoraed, nib mu’un rogon ni gadaed be ayuweg e dowef rodaed.
Dariy ban’en ni rib pufpuf, ni rib ga’fan ko rogon daed, ni yibe kalngan’uy. Kalngan’uy e gathi ta’abochingiyal’ nima buch; ma buch ni gubin e ngiyal’. Iraram e kiy ko falfalen’ nge gapas ko tafney. Nap’an ra peth ko mich, kalngan’uy e ra bing wo’en daed ko fare Bayul rok Yesus Kristus.7
Demtrug ko gabe yan ko gin nib mat’aw, fa kam mul fa kam chuw ko wo’ nib mat’aw, fa daryag ni ngam guy e kanawo’ ko gin ni gabar riy e chiney, gube wenig nag ngom ngam kalngan’um. Mu nang gelngiy nima yib ni yibe kalngan’uy ni gubin e rran—ni yibe gay rogon ni ngan mangil boch’uw nge boch’uw ni gubin e rran.
Nap’an ni gadaed ra kalngan’, ma kad mel’eged ni ngan thil gaed! Gadaed ma pag fare Tathapeg ni nge thilyeg daed ngad mangil gaed. Gadaed ma mel’eg ni ngad gel gaed ni thothup man thapeg e falfalen’—falfalen’ ko bayul Rok.8 Nap’an ni gadaed ra kalngan’, ma gadaed be mel’eg ni ngad boeded boech Yesus Kristus!9
Pi walageg, ba tu’uf ni ngad rrin’ed nib mangil nge nib mangil ni bachan e gadaed bay ko mael. Fapi denen ni yibe cham nag e ba riyul’. Mo’oniyan’ e ribe gay rogon ni nge kireb nag e mich me taleg e murwel rok Somol. Yaed e pi’in nib mang ngak niba’ e talne murwel roraed ningar talegned daed ni dabi yag e falfalen’ nge tu’ufeg rok Somol ngodaed.10
Kalangan’uy e kiy ni ngan palog ko kirbaen’ nibe yib ko wup’ nibe ta’ mo’oniyan’. Gathi ri ba adag Somol ni dariy ban’en nib kireb rodaed ko ngiyal’ ney ni gadaed be muruwliy e yafos nib manemus. Ma gathi be leam nag ni ngarin ma’ang’ang gaed ko chingiyal’ ney. Kalngan’uy ni gubin e rran e kanawo’ iyan ko ma’ang’ang, ma ma’ang’ang e ma pi’ e gelngiy. Gadaed ni ngad ma’ang’ang gaed e rayag ni ngad manged e talne’ murwel rok Got nib gel. Kalngan’ rodaed—be’ech rodaed—e ra gel nag daed ni ngad ayuwegnaed I kunuy pi u Israel nga ta’abang.
Ke fil Somoel ngak fare Profet Joseph Smith “ni mat’won e priesthood e ba peth ko gelngin e tharmiy, ma gelngin e tharmiy e dabyog ni kemus ni ngan gafaliy ko tin mat’aw.”11
Gadaed manang ko mang e ra pi’ boech mat’won daed ko gelngin yu tharmiy. Ka gadaed manang ko mang e ra sag’al nag rogon—n’en nib tu’uf ni ngad taleged i rrin’ ni ngad thapeged gelngin e tharmiy. Pi walageg, meybil ni ngam nang ko mang e be paer ko wo’ rom ni ngam kalngan’. Mu poey ko n’en nibe taleg nem ko kalngan’. Ma arame, mag thil! Kalngan’! Gadaed gubin rayag ni ngaed ngongliyed nib mangil nge fel’ ko bin th’abi mangil ko kafram.12
Ba’ e kanawo’ ni rayog ni ngad mon’og gaed riy. Reb rogon ni gadaed be ayuweg e dowef rodaed. Gube paer u fithik e falfalen’ ko rogon e dowef rodaed. N’en nikan sunmeg ni rib falel’, ni rib ga’fan ngodaed ni ngad taw gaed ko gin nib mangil. Dabyag ni ngad murwel gaed ni fa’an ndariy. Nap’an nikan pi’ e dowef nib tawa’ath rodaed, ma ke pag Got daed ni ngad feked e wo’ ni ngad boeded Ir.
Manang fan Satan e biney. Dabun ni nap’an nike chuw u tharmiy ma dabyag e biney ngak, ere ke paer u fithik e awan’ nge domomow. Ere bukun, ara oren, e lumel nima ta’ e kanawo’ rodaed e nge kireb nag e dowef rodaed fa dowef rok bee’. Ya Satan e rib kirban’ ni dariy e dowef rok, ma ba adag ni ngad kirbaen’ gaed bachan rodaed.13
Dowef rom e tempel rom, nikan sunmiy ni nge mang e nu’un ko ya’el rom nib manemus.14 Tempel rom ni gabe ayuweg e baga’ fan. Chiney, gube fithem, pi walageg, gaba adag i chuw ko maad ni nge sap e fayleng ngom ko bin ninge falfalen’ Got ngom? Fulweg rom ko re duwer ney e be dag Ngak rogon e thamtham rom ko e tawa’ath Rok ngom. Dowef rodaed ni ngad tayed fan, pi walageg, ma gube leam nag ni rayag ni ngaed ngongliyed nib mangil nge fel’ ko bin th’abi mangil.
Reb e kanawo’ ni ku rayog ni ngad rrin’ed nib mangil nge fel’ ko bin th’abi mangil e rogon ni gadaed be tay fan e ppin u lane yafos rodaed, tabab ko ppin rodaed nge ppin ni faak daed, nina’ rodaed nge Walag daed ni ppin.15
Boech e pul kafram, mug runga’ag e thin nib kirbaen’ nike yib ko letter rok e walageg nib ppin. Ke yol ni ga’ar: “[Pi ppin ni fakag nge gag] e ku thamiyed ni gamad be gay rogon ninge sap e pumo’on romaed nge faak mad ni pagael ngomaed, ko pi gosgos ni gubin e rran, gosgos ko t.v., market, [nge] gosgos ni yibe fal’eg rogon ma yibe yaliy [gubin] e gosgos. Boed ni gamaed be palog ko pumo’on romaed nge pagael ni faak mad ni bachane gubin ngiyal’ ma yaed ma paer u m’on [ko gosgos].”16
Pi walageg, bin somm’on e murwel rom ni ba’ e priesthood rom e ngam tu’ufeg mag adag e ppin rom. Mu ta’areb nigem ngak. Mang e fagar rok. Mu moem nag ngak ni nge adag ni nge un ngom. Dariy ban’en u lane yafos ni nge m’on ngom ni ngam ngongliy rogon e tha’ rom ngak. Dariy ban’en ko t.v., dengwa, fa computer nib ga’fan ngak. Mu yoloey e n’en ni gama rrin’ nge gin ni gama ta’ gelngim ngay. Binem e ra yoeg ngom ko uw e ba’ e gumircha’em riy. Meybil ni nge ta’areb gumircha’em ngak gumircha’en e ppin rom. Gay rogon ni nge falfalen’. Mu ning e ayuw rok, mag motoyil. Thin rok e ra fal’eg rogon e tirom ban’en.
F’anra ba tu’uf ni ngam kalngan’ ni bachane rogon ni damur ayuweg e ppin rom, mu tabab e chiney. Mag tay u wun’um ni iraray e murwel rom ni ngam ayuweg e ppin u lane yafos rom ni nge thapeg e pi tawa’ath nima yib ko fare motochiyel rok Got ni nge ma’ang’ang e dowef rodaed. Dam mang e n’en ni nge taleg fare ppin ni nge thapeg fapi tawa’ath rok u lane tempel.
Pi walageg, gadaed gubin ma ba tu’uf ningad kalngan’ gaed. Ba tu’uf ni ngad chuw gaed u dakean e couch, ta’ e remote nga but, magdaed od u fithik e lumor. Iraray e ngiyal’ ni ngad ted fare maden Got ngeyag ni ngad rrin’ed e bin th’abi ga’fan e murwel u fayleng. Iraray e ngiyal’ ni ngad “murwel [gaed] ko talne murwel rodaed, ngad feked u fithik gelngin [daed], lanyan’ daed, nge gelngiy.”17 Gelngin e mo’oniyan’ e kari gel ko daba’ ko somm’on. Gadaed ni ta pigpig rok Somol, ma dabyag ni ngad moled nap’an e biney e mael.
Ba tu’uf rogon ningam gafaliy e tabinaew rom nge tu’ufeg roraed. Ulung rom nge pi’in u lane ward fa branch rom e ba tu’uf gelngim ngoraed. Ma gubin e pi’in nibe mada’ nigem e ba tu’uf ni nge nang ko rogon ya’an e bin riyul’ e gachalpen Somol nge rogon e ngongol rok.
Pi walageg, ke mel’eg nigem e Chitamangdaed ni ngam mub nga fayleng ko ngiyal’ ney nib ga’fan ni bachan rogom u lane bin somm’on e yafos. Gimed ba’ u fithik e tin th’abi gel, e pumo’on nib mangil nib yul’yul’ nike yib nga dakean e fayleng. Satan e manangem e chiney nge bin somm’on e yafos, ma manang fan fare murwel ni ngan rrin’ u m’on ni nge sul fare Tathapeg. Ma bukun e duw ni i fil rogon e baen, ma mo’oniyan’ e ke cheag ma rib kireb.
Fithik e falflaen’, ma priesthood ni gadaed be koel e rib gel ko tirok mo’oniyan’ ban’en. Gube wenig ngomed ni ngam manged e pumo’on nib tu’uf ku Somol ni ngam manged. Mu tay ni ngu um kalngan’ ni gubin e rran u lane yafos rom ni rayag ni ngam murwel ko fare priesthood nib gel gelngin ko kafram. Kemus ni iraray e kanawo’ ni gara tem nge tabinaew rom nib gel e kan thothup riy ni dabi m’ay ko rran nga m’on.
Ba tu’uf rok Somol e pumo’on nima tay e tin nib tu’uf ko boech e gidii’ nib m’on ko tirok. Ba tu’uf e pumo’on Rok nima murwel ninge yag ninge rung’ag laman fare Kan Nthothup nib tamilang. Ba tu’uf e pumo’on Rok ko Galasia ni yaed ma fol ko pi m’ag roraed u fithik e yul’yul’. Ba tu’uf e pumo’on rok ni ri yaed be athamgil ni ngar pired ni yaed ba be’ech—pumo’on nib yul’yul’ ni rayag ni ngan pining nib tumgin ni ngeyibliyey nib ma’ang’ang gumircha’en, nib be’ech e tafney rok, ma ba’ pa’ ni ba adag ni nge ayuw. Fare Somol e ba tu’uf e pumo’on ni yaed ba adag ni nge kalngan’—pumo’on ni ba’ mat’won ni nge pigpig me mang ko salthaw rok Somoel ni pi’in niba’ e priesthood rok.
Gube yibliyem ni ngam mang e pi pumo’on ney. Gube yibliyem ko athamgil ni ngam kalngan’ ni gubin e rran mag fil rogon I murwel ko urngin gelngin fare priesthood. Gube yibliyem ni ngam dag fare tu’ufeg rok fare Tathapeg ngak e ppin rom nge pifakam nge gubin e pi’in ni gamanang. Gube yibliyem ni ngam ngongliy nib mangil nge fel’ ko bin th’abi mangil. Ma gube yibliy med ni nap’an ni gimed ra athamgiliy e pinn’ey, ma gimed ra guy e ma’ang’ang u lane yafos rom.
Gadaed be un ko murwel rok fare Got ni Gubin ma Rayag Rok. Yesus e ir Kristus. Gadaed e pi ta pigpig Rok. Gube micheg u dakean fithngan Yesus Kristus, amen.