Tang el Ngara Kristo
Betik er a renguk el kldemek er a urerel a Rubak, a kuumerang el kmo ng sebeched el rulii a lmuut lungil e kired el rulii a lmuut lungil sel do ngemedaol er a rebeches el sechelid el mera Ikelesia.
Ungil lita sils, e rodam me a rodos er ngak. A dolekoi er ngii el tekoi er a beluak el Brazilian Portuguese e ng, “Boa tarde!” Ak ngeltengat lobengkemiu el kldibel er tial kmal lungil klou longdibel er a Ikelesia er a Jesus Kritso er a Uriul-klebesei el Santo el ngara eungel a ongetikaik er a betik ra rengud el profet, President Russell M. Nelson. Ng mechas a renguk er tial techall el sebechel a derta er kid el mo orrengse er a ngerel a mesiungel a Rubak el ngar tial chutem er chelechal uriul klebesei el de ngara chelsel.
A beluak er a Brazila betok a ungil ra kerengsel. A imo er ngii a merael chisel Omeuachel er a Amazon, el tara kot el klou el omouachel er a beluulechad. Tiang a mokdubech er a teblo el kakerous el omeuachel, el ngii a Solimões me a Negro. Ng kora ngodech, e le a ika dmak omerolel lomaoch el morcheroid ruchei ra bol murachem, leng iior er a ikal omoachel el kakerous a uchelel, rretel, kleldelel, me a bedengel. Uriul er a telal mael, ea ikal ralm a mocha murachem, el rulii omouachel el ngodech er a sel di mla teletelel. Meng di merko ikal erul omeuachel bochal murachem ruriul, eng rulii tial Amazon River el meral mo mesisiich me sel bo ra Atlantic Ocean, eng odbechii a daob meng sebechel tial ralm el debetik er ngii el betok el mael er a chelsel a daob.
Ngokiu osisiu el teletael el ua Solimões me a Negro Rivers el dmak lomaoch el mo mekdebechii a mesisiich el Amazon River, ea rengelekel a Dios a mei el mo dmak er a mla moluut el Ikelesia er a Jesus Kritso el mla ra kakerous el teletael, blekeradel, siukang, el mekdebechii tial ungil belurir a re Santo er a Kristo. Mesel, de kasisiich, kaingeseu, e de kaubeltikelreng, e kede mo dmak el mesisiich el kirel a klungiaol er a beluulechad. Sel doltirakl er a Jesus Kristo, el dmak el di tang er tial lomouachel er a klungiaol, eng mo sebeched el mesterir sel “ungil ralm” er a ebangkelio el mora chedelreng er a beluulechad.
A Rubak a mla omekllomes er a re profet er Ngii el mo olsisechakl er kid el kmo ng mekera de kaingeseu e de kaubeltikelreng me bol sebeched el mo tang er a klaumerang me a moktek er kid el oltirakl er a Jesus Kristo. Paulus, el apostol er a Beches el Renged, ulsisechakl el kmo tirkel “mla nguu a techolb lokiu a Kristo e mla nguu a Kristo … : e le kemiu a rokui el di tang el ngara Kristo el Jesus.”1
Sera denguu a techolb chelid e de tibir el mo oltirakl er a Osobel, e kede sioning el mo ra Chedam el kmo ng souad el nguu a ngklel a Kristo el mo ngkled.2 Sel dolasem el mo uai Ngii er a klengar er kid, e kede mengodech, lokiu a Tngakireng er a Kristo el Rubak, ea beltkil a rengud el mora rokui el chad a di ngii el merael mo klou.3 Kede meral mo kerekikl er a klengar me a deulreng er a rokui. Kede mesa derta er kid el odam me a odos, el ngelekel a Dios el chedaol a ucheled, teleteled, me a techelled. Ng soad el mo omekerreu er a ta ma tang e mengol a chelngelel a ta me a tang.4
Tiakid sel lulsaod er ngii a Paulus, el kirel a dmolech el beltikelreng.5 A Mormon, el profet er a Babier er a Mormon, milsaod er ngii el “mechelins el beltikelreng er a Kristo,”6 el ngii a chelellakl, ngarbab, e mesisiich el bedengel a beltikelreng. A profet er kid er chelechang el, President Russell M. Nelson, a dirk silodii tial olechotel a mechelins el beltikelreng er a Kristo el omesiou, el ngii a imong el udelalem e chedaol el teletael er a oubeltikelreng e omekerreu er a rebebil er a re dertra el chad el ua ikel luruul a Osobel.7
Mei me bo domeser tiaikid el llechul a beltikelreng me a ulekerreu, el diua Osobel, lokiu a omelisiich, olngeseu, me a omelkakl er tirkel dirke mlo chedal a ikelesia me a tirkel sorir el mei er a Ikelesia.
Tirka el beches el sechelid sel beltobed er a beluulechad e lenguu a ebangkelio er a Jesus Kristo, e bel chedal a Ikelesia er Ngii, e te mo chedal, el mechell el beches lokiu Ngii.8 Te mo ikrii sel lodengelii el beluulechad e melilt el mo oltirakl er a Jesus Kristo, el meral ngara rengrir, el me soiseb er tial beches el “omouachel” el ua tial klou el Amazon River—el omouachel mesisiich er a klungiaol me a llemalt el ngii omaoch el mora lengarngii a Dios. A Apostol Peterus a milsaod er ngii “el ngellitel el telecheroll, el chedaol el priesthood, chedaol beluu, ngodech el bedengir a rechad.”9 Tirka el sechelid sel lesiseb er tial beches e diak el sau er ngii lomoachel, e te locha mo melchesiu er tir er a uchelel el telkib luriid. Tirka el beches el sechelid a mo metik er tir el mo murachem er tial omouachel el ngodech a teletelel, klekedelel, me a blekerdelel—el omouachel dimla ngarngii a loltirakl, siukang, me a tekingel. Tial beches el klengar el ngara Kristo a locha telkib el mo imis el mo er tir. Ka bom chelellakl el telkib e momdasu a lomelchesiu sel lorrenges a ikal tekoi el ua “FHE,” “BYC,” “olsengerenger er a kot el Sandei,” “techolb el kirir a re mla mad,” “Relief Society,” “Melchizedek Priesthood,” “kldei el uldak el chedaol llechukl,” me a lmuut el bebil.
Ng beok er kid lomes er tir el diak lomelchesiu el uldimukl. Chelsel tial teletael, e telocha di tir loker er tir, tiang ngarngii a basio er ngak er ngii? Ng sebechek el mosisiu ak ngar tial Ikelesia er a Jesus Kristo er a Uriul-klebesei el Santo? A Ikelesia ngousbech er ngak? Ak mo metik er a re beches el sechelik el sorir lolengeseu e melkakl er ngak?
Kemiu a resechelik, chelsel a uai tial taem, e kid el ngara kakerous el dauch er tial kemangel lomerael ra roltirakl a kired lodars a chim er a kaukledem el mor tirkal beches el sechelid, e ngoititerir er a ikel le ngrngii, ngosuterir, oubeltikelreng el mo er tir, e olsiseb er tir ra klengar er kid. Tirkal beches el sechelid a mekreos el ngelekel a Dios el sechal me a redil.10 Ng diak lungil merkid a lemechoit a kmal di imo er tir e leng, di uaia Amazon River el ultuil er a mekekerei el omouachel lomekmui er ngii, kid ousbech er tir el di ua tir el kmal ousbech er kid. Dil merko bo dedak e de mengodech el uaia Solimões me a Negro River, e kid a mo merael el mo mesisiich el kirel a klungiaol er a beluulechad.
Tirkal beches el sechelid olab a duch el mlara Dios, klemeriar reng, ma ungil lomeruul er a rengrir. A klemeriar reng er tir el kirel ebangkelio a bekoiuiuul, el ngosukid lokiis a klaumera er kid. Te dirrek el meskid a beches el ues me a klemedengei ra klengar me a ebangkelio. Uaikel kullekoi, ke dousbech er tir el di uaitir lousbech er kid el mo dochelir tial klou el omouachel el melemolem el omaoch el mora daob.
Ng meketeketa el de bla de mosisechakl el kmo kede mekera dolngeseu er a rebeches el sechelid el mo omelchesiu el soad a lemei, e nguu a beltikelreng er a mla moluut el Ikelesia era Jesus Kristo.Te ousbech a kldei el tekoi el melemolem el melisiich e blak rengrir ra chelsel a klengar er tir:
A kot, e teousbech er a rodam me a rodos er a Ikelesia el tir a meral kmo tir, meral sechelirir meng sebecherir el ultuil er tir, e oldubech e olngeseu er tir, e onger a kerrir. Sel de chedal a ikelesia e ngbai kired el blechoel di madeltmuil lomes a beches el mad sel de bora ikelesia, ngdiak el iior er a ngerachel, ureor, malechub a sebekreng el dolab. Ng sebeched el kudmokl a beot el tekoi el mo ngosuterir a rebeches el sechelid el mo omelchesiu el soad tir e soad a le mera Ikelesia, el onged er tir, mesterir a meral klim, dengchokl ra bita er tir el mengitakl e dmak loldanges, olecholt er tir el mora rebebil, ma lmuut el bebil. Me sel de bok a renugd el mor tirka el beches el sechelid lokiu a bebil er a ikal teletael, e kid a ngar omerellel a reng er a olmesiou. Sel dosiou er tir el uaia Osobel, eng mo diak el lomelchesiu el “ngodech el chad el ngara chelsel a ikelesia er kid.” Te mo omelchesiu el bebil rekid e mo sechelid, e a kot el klou a belkul, te me omelchesiu er a beltikelreng er a Osobel lokiu a meral ulekerreu.
Ongerung, a beches el sechelid a ousbech a ureor—el techall el mo mesiou er a rebebil. A omesiou a tara ngarbab luldsu er a Ikeleia er a Jesus Kristo er a Uriul-klebesei el Santo. Tiang a teletael el klaumera er kid a mukeroul. A bek el beches el sechelid a kirel nguu tial techall. A bisop me a ward council a oba ngerachel lomesterir a okedong ra mereched el taem ruriul er a le metechob, ngdi diak a tomer er kid, el chedal a ikelesia, el oleker er tir el me olngeseu er kid el mesiou er a rebebil malechub e kede dmak el mesiou el ngara omeruul.
Ongedei, a rebeches el sechelid a kired el “olisechakl er tir er a tekingel a Dios.”11 Ng sebeched el ngosuterir el mo sorir e medengei a chedaol llechukl sel donguiu e dosaod osisechakl lobengterir, olecholt a teletelel a cheldecheduch me a belkul a tekoi. Ng dirrek el sebeched el osisechekleterir el momeduch el melai a ulekrael el mo er tir lokiu a omengiuel a chedaol llechukl. A lmuut el tang, ng sebeched el oderisd el mortirka el beches el sechelid er a rekeblirir e olengit er tir el mera blid er aikel taem el diak el temel a miting ma omeruul er a Ikelesia, olngeseu er tir el mo urachem er a chelsel a mesisiich el omoachel el cherrengelelir a re Santo.
Mues aikel longituuk ma omelasem el ngarngii tirka el beches el sechelid el mo chedal a telungalek er a Dios, me chelechang e tir le odam e odos er kid, eng sebeched louchais er tir a teletael el kid a mlo mesisiich er a osisiu el omelasem er a klengar er kid. Tia ngosuterir el mo medengei el kmo ng diak el dil tir el tang me a Dios a mo omekngeltengat er tir sel louedikel el kirel a klaumerang er a ikel yaksok er Ngii.12
Sel bolmurachem aSolimões me a Negro Rivers, ea Amazon River a meral mo klou e mesisiich. Ngokiu osisiu el blekeradel, e kid me tirka el beches el sechelid sel de murachem, ea mla moluut el Ikelesia er a Jesus Kristo a meral mo mesisiich e diak el mesim. A betik ra renguk, el Rosana, me a ngak a meral loureng a saul el mo er tirkel ngilsukemam el mo urachem er tial beches el omouachel ra betok el rak ra mla memong, er sera kim nguu a ebangkelio er a Jesus Kristo er a belumam er a Brazil. Aikal betok el rak, e tirka el ungil chad a mle mesiou er kemam e ngosukemam el melemolem el omaoch er a llemalt. Ng ki meral mereng a sulir.
A re profet er a Western Hemisphere a mle ungil medengei el kmo ng mekera tirka el beches el sechelid a le dak lomaoch er a klaumerang el mora chelsel tial beches lomouachel el bedul a diak a ulebengelel el klengar. El ua tiang, te mla mesa sils er kid me te medengei a meringel el chelbengeled,13 me a Moroni a uldimukl a bebil er a meklou a beklul el bakes er a ikel ble loluches el ngara Babier er a Mormon:
“Ea uriul er a bla le metecholb e bla lenguu me le klidiid er a klisichel Chedaol Reng, e tir a mlo ulecherangel luldak er a rechad er a ikelesia er a Kristo; me a ngklir a milluches me lak lobes er tir e lolisiich er tir er a ungil tikingel a Dios lomtebechel er tir er a melemalt el rael, lomes er tir me le blechoel meluluuch, lultuil er a ditang el klisiichel a Kristo, el ngii a uchul e ulebengelel a klaumerang er tir.
“Me a ikelesia a blechoel el mo kldibel, el mo olsengerenger e mo meluluuch, e mengedecheduch er a ta me a ta er tir el kirel a rolel osebelel a delbengir.”14
Betik er a renguk el ombik er a urerel a Rubak, a kuumerang el kmo ng sebeched el rulii a lmuut lungil e kired el rulii a lmuut lungil sel do ngemedaol er a rebeches el sechelid el mera Ikelesia. A kulengit er kemiu me bo momes a sebeched el remuul me de meral mo ungil el ngoititerir, kongei, e ungil lolengeseu el mo er tir, lomuchel er tial merael mei el Sandei. Bom kerekikl me lak becherei a ngerchelem me bol tomer er kau el mengemedaol er tirkal beches el sechelid er a miting me a omeruul er a Ikelesia. A mera er ngii, a delbengir a mekreos er a medal a Dios el tir a lmuut el meklou a ultutelir er a rua prokuram me a omeruul. Alsekum mekede mesiou el mortirka el beches el sechelid el meral ngara rengud loba mechellins el beltikelreng el diua Osobel, e ak yaksok er kau, el ngra Ngkel, el kmo Ngii a mo ngosukid er a blak el reng er kid. Sel blak a rengud el ngara omesiou, el diua Osobel, ea rebeches el sechelid a nguu a ngesou el lousbech er ngii mete di mesisiich, e blak a rengrir, el mora ulebongel. Te me teloi er kid me kid a mo mesisiich el chedal a Dios e ngosukid el mesterir a ungil ralm a beluulechad el imis el lousbech er a ebangkelio er a Jesus Krito. Tirka el ngelekel a Dios a mo omelchesiu el “dikeal ngodech el chad ma kal chad ra tara beluu, e bai mla mo tal chad tir me a re santo.”15 Ak yaksok el tir a mo dongchii a Osobeled, el Jesus Kristo, er a Ikelesia er Ngii. Te mo melemolem el omaoch el merkid el diua omoachel el omaoch el mora madedok er a klungiaol dilmerko loberk a chimal a Rubak el Jesus Kristo el melai er tir; e rongesii a Chedam el kmo, “ke mo nguu a diak a ulebengelel klengar.”16
A kulengit er kemiu me bo mosiik a ngesou er a Rubak e moubeltikelreng er a rebebil el diuai Ngii a loubeltikelreng el merkau. Me de rokui el mo oltirakl er a osisechakl el bileskid a Moromon: “ Me a le uaiei e betik er a renguk lodam er ngak me a [rodos], moluluuch el mo er a Edam lolab a rokui el klisichel a rengum, me bo mui er a beltik el reng er ngii, el bla le besterir a rokui el merang el oltirakl er a Ngelekel Jesus Kristo.”17 Me a ikal klemerang, ak sioning loba ngklel a Jesus Kristo, amen.