Mesisiich e Diak el Mesim er a Klaumerang er a Kristo

Mla er a Elder D. Todd Christofferson

Er a Chelechad er a Teruich me a terung el Apostol

A dolemolem el mesisiich e diak demesim el ngara klaumera er a Kristo eng kirel a ebangkelio er a Jesus Kristo el mo otil a rengul me a bedengel a chad.

Ngara reksi er a Uodel Renged, e kede menguiu a ikel taem el rengalek ra Israel a mengull a telbilir lobengkel a Jehovah e oldanges er Ngii ma ikel taem el tir a diak loltirak er sel telbiil e mengull a bleob el chaus malechub a Baalim.¹

Sera temel omerredel ra Ahab a mle tara ikel taem el bosech ra chedaol tekoi a mla er ngii ra ongos ra Israel. A profet Eliajah ra tara taem a dilu ra King Ahab meng mengedibel ra rechad ra Israel ma dirrek a reprofet ma badrei ra Baal ra Mount Carmel. sera lemei a rechad, ea Elijah a dilu er tir, “Komomdasu aikal erul tekoi el mo oingerang? [a tara belkul tiang a kmo, “Oingerang e kom tibir ra rengmiu?”] alsekum a Rubak a Dios, moltirakl er ngii: e alsekum eng Baal, e bo er ngii. Ng dimlak longer er ngii tirka el chad.”² Ma Elijah mocha melekoi el kmo ngii ma profet ra Baal bol tekur a kekerei el kerebou e lenguu loia ra bebul a idungel er a ikel altar er tir engdi “diak lomkard a ngau ra cheungel.”³ E okor, e “Momekedong er a ngkel a chedum, e ngak a kumekedong ra ngklel a Rubak: e ngkel Chelid longer lokiu a ngau, bol ngii a Dios. Me a rokui el chad a ulenger e kmo, bo leuaisei.”⁴

Ko medengei el badrei ra Baal a uleldiu loleker er a chederir el betok el sikang el me oltengel ra ngau, engdi “dimlak a dital ngerel, malechub a nger, ma ngii di el ngeral el mlo er ngii.”⁵ E sera bochal temel a Elijah, eng toketekii el moungil a telemall el altar ra Rubak, e ngilai a idungel ma uldars el lochar bebul, e dilung mel subs ra ralm, el dimlak el dil tang, malechub el erung, ng bai mlo edei el taem. Ng diak el sebeched loumededenger el kmo ngii malechub a di klisichel a di chad a sebechel mekerdii a ngau.

“Sera bochal temel omelenget er a kebesengei, ea Elijah el profet e milrael mo kmeed, e dilu el kmo, Rubak el Dios er a Abraham, Isaac, me a Israel, bol mocholt er chelecha el sils el kmo kau a Dios er a Israel, me ngak a mesiungem, me ak milruul a ikang loeak a tekingem. …

“Seikid ea ngeuil a Rubak a mle riou, e ulkngemedii a uldars, ma idungel, ma bad, ma chebechab, e mekdirt a ralm el mlara dobu.

“Me sera lesenge rokui el chad, e te mle meterob: e millekoi el kmo, A Rubak, ngii a Dios; a Rubak, ngii a Dios.”⁶

Chelechal sils, e a Elijah sebechel kmo:

A Dios, el Demad el ngara Babeluades, a ngarngii, malechub eng diak, engdi alsekum eng ngarngii, mongull er Ngii.
A Jesus Krito a Ngelekel a Dios, el mla lmuut el me ngar el Osobelelir a rechad, malechub eng diak, eng di alsekum e Ngii a meral Osobeled, e moltirakl er Ngii.
A Babier er a Mormon a tekingel a Dios, malechub eng diak, ng di a lsekum eng tekingel, e “bo mkeed er a Dios el [mesuub e] moltirakl a osisecheklel.”⁷
A Joseph Smith a milsang e mengedecheduch er a Chedam me a Ngalek er sel sils er a 1820, malechub eng dimlak, ng di alsekum meng milsang, e a bail la ulaoch uldimukl a kisel a omerenged el ngak, el Elijah, e ngilai el msang.

Ngar tial mlo merek el klou el ongdibel, a President Russell M. Nelson a millekoi: “Lak bo moumededenger el kirel a kmo ngera klemerang [mesa Moroni 10:5]. Lak bo moumededenger el kirel a kmo ng techa moumera er ngii. Ngokiu a chedaol ocholt el merkau, eng sebechem el nguu a sioning er kau el kmo a Babier er a Mormon a tekingel a Dios, me a Joseph Smith a profet, e tiang a ngii a Ikelesia er a Rubak. Ng diak el iior er a lolekoi me a loruul a rebebil, le ng diak a ngii di el chad el sebechel choridii sel sioning el ngara rengum me a uldesuem el kirel a kmo ngera klemerang.”⁸

A Jakobus a mle yaksok el kmo a Dios “a mimokl lomesterir a rechad” tirke losiik ra llemesel,⁹ng dirrek el ulemeklatk:

“Ngii di lolengit loba klaumerang, e lak loumededenger. Le ngikel loumededenger a diua chedesaoch el eolt a omedechakl er ngii.

“Me kele lomdasu ngii el chad el kmo ng mo ngmai a kmong ngerang er a Rubak.

“A chad el telaod a uldesuel a diak lultebechel er a rokui el tekoi.”¹⁰

A Osobeled, sel de nguu er ngii, a kot lungil okesiul a ultebechel. Ng dilu el kmo, “A Chedam a dirkak el chitak; e le ak blechoel meruul aikel soal.”¹¹ Ka bo momes aikal losaod er a chedaol llechukl el kirir a rechad me a redil el, di mle uaia Osobel, el mesisiich e diak el mesim:

Te “ulebult el mora meral klechelid; e dimlak el bol cheroid er ngii, e le te mle mesisiich, e diak el mesim, e sorir e blak a rengrir, el oltirakl a llechul a Rubak.”¹²

Mle ulterekokl a udesuir, e millemolem el loumerang er a Dios.¹³

Mesang, kemiu a medengei, e le ko mla mesang, e le betok er tir el momedengelii a klemerang … a mesisiich e diak el mesim a klaumerang er tir, me tiaikid a rulleterir me te mimokl.¹⁴

Me te millemolem el diak el mesim er a osisecheklir a re apostol e kaukledem, e melai er a blauang, e ngara nglunguuch.¹⁵

A duchelreng el mesisiich e diak el mesim ra klaumerang er a Kristo a kirel a ebangkelio er a Jesus Kristo el soiseb er a regul ma bedengel a chad, el belkul a kmo ngdiak el dil cheteklii a chad, ng bai mo kot er a klengar er ngii ma teletelel. A Rubak a kmo:

“Ak mo meskau a beches el rengum, ma beches el reng meng mora chelsem: e nguu el oridii re kau a bad el rengum, e meskau a tech el chaidirngum.

“E meskau er reng er ngak, me ke moltirakl a llechuk, e oltirakl a llemalt, e meruul.

“E … kemiu a mo chedak, e ngak a mo Dios er kemou.”¹⁶

Tiakid sel telbiil el de ngiluu er sera denguu a techolbchelid ma chedaol ruoll ra templo. Eng di a rebebil a dirkak el nguu el rokir a ebangkelio er a Jesus Kristo el mora klengar er tir. Uaikel, dilu Paulus, te “mloduleb el ngara [Kristo] lokiu a techolb,” engdi dirkak el borngii tiakid er tir “el ua Kristo el milkiiis er a kodall … , maleuaisei e kid … a kired el merael er [a] beches el klengar.”¹⁷ A ebangkelio dirkak lomult er tir. Ng dirkak lolterekokl er tir el ngara Kristo. Te melililt a rengrir er a suobel me a llach loltirakl me a basio ma taem el tir a mo mesiou er a Ikelesia. Ng bai blitokl, ele ngokiu a otireklel tial rokir el telbiil e tirkel tir “a ngellitel lokiu a telbiil”¹⁸ a mo ikrii a chelbirukel e melemolem el mesisiich a klaumerang er tir er a Kristo.

Betok er kid a metik er kid er chelechal taem el melemolem el ngara delongelel a ngara ikeleia leng mla mo siukang er kid e sel kuk bitang, a kuk meral mla mo, Kristiano el blak a rengrir er a urungulel a Dios. Ngara delongelel a ikal erul teletael, e sel ungil chais er a ebangkelio er a Jesus Kristo soiseb er a rengud e meral mo kiei er a rengud. Ng locha diak el dil keberuul el mo er ngii, eng di kid a kired el rokui el merael el bedul tial lungil klengeltengat.

Ng meringel eng di klou a belkul el dolemolem el mesisiich e diak de mesim sel de betik er kid el lomiich er kid er a “chelsel ongarm,”¹⁹ el ngii a teletael el desiseb er ngii ruchei malechub a uriul er tial klengar. Sel lak a Dios, ea ikal ringel a soal mo omeksaul a reng, omekcharm, e olengasechereng. E sel lengarngii a Dios, ea ongelaod a mtechir a ringel, budech a mtechir a cheliekikt, e a oureng a mtechir a klengitelreng. A melemolem el mesisiich er a klaumerang er a Kristo a meskid a omelisiich el krasia ma ngelsuil.²⁰ Ngii a mo mult a ringel el mo klengeltengat, el uaia, tekingel a Isaiah el kmo, “a klungiaol … a mei ruriul er a ringel.”²¹

Me kuchais a kldei er a okesiu el ngii a kudengei:

Ngarngii a redil el smecher er a meringel, el diak bolak el rakt el di ngarngii ngii mesel lomkar er ngii, nguu a klengeltengat ra priesthood, lolsengerenger e loluluuch. Meng uaiei, ea klaumerang er ngii ra nglunguuch me a beltiklereng ra Dios el morrngii a diak el bolak. Meng melemolem ra bek el sils (e sel bebil eng bek el sikang) el mesiou er a ngerchelel ra Ikelesia e, tmak ngii ma bechil, el lomes er a dirk kkerei el telungalek er ngii, el klikmechur sel sebechel. A kle chubechubchad er ngii a dmolech, el blal nguu lokiu a ringel el ngarngii, e ngii a blechoel chemoit a temel el mesiou er a rebebil. E melemolem el diak el mesim, ma rechad a ungil a rengrir el ngar bita er ngii.

A tara chad a milukeroul er a Ikelesia, e mle misionari, e mlo bechil a ungil redil meng chilsir a rengul sera rebebil er ngii bocha longedecheduch lomtok ra Ikelesia ma Profet Joseph Smith. Uriul e te mlo cheroid ra Ikelesia e millasem el mengesuseu er ngii el moltirakl er tir. El uaikel blechoel el dubech ra osisiu el teletael, te uleltilech er ngii lokiu a llechukl, oderngesall, ma osongel loltobed a rumtok, el betok er tir a diak lungil a rengrir el mle chedal a Ikelesia. Tirka el rebebil er ngii a uleltuub ra klaumera er ngii, millekoi er ngii el kmong mechechetakl e mla mecheblad. Ng dimlak a nger er ngii el kirel a ikal luruul me er ngii, ma klaumera er ngii a mocha meririau er tial mekdekudem lultekengir. Ngulumdasu el locha mo diak el bora ikelesia. Ng milengedecheduch ra bechil. Ma rechad el loumera er tir. Ng miluluuch. Me sera longellakl lokiu a tial luldesuel ngara ringel, eng mildasu a klebesei el ngii a mlo melchesiu er a Chedaol Reng meng ngiluu a sioning er a klemerang lokiu a Reng. Ng mlo medengei, “Alsekum me ak merang, e ak kmu el uase a Chedaol Reng a mla rutechii a renguk el betok er a ta el taem e a sioning er a Reng a merang.” Ng ngiluu a beches el reng er a deulreng ma budech lobengkel a bechil me a rengelekel.

A chad ma bechil el mle blechoel e ungil a rengrir loltirakl osisechaklir a Rodam ra klengar er tir a mlo mekngit a rengrir eleng mle meringel er tir a mo oungalek. Te chiloit a betok ludoud lobengterir a remeduch e semong ra kar, ma uriul, e te mlo oungalek ra sechal. Ng meral mekngit, e le, uriul er a ta el rak, eng kal tolechoi a miltemall el diak el telmellel a kmong techang el ngii a mlo diak lodengelii a rengul, ng miltemall a noh ra btelul. Ngiluu a ungil lukeruul, eng di toktang a dimlak el sebechir louchais er a mo ngarmedal, Meng kal ngalek el blel meringel loureor e meluluuch el kirel me bol sebechel mera beluulechad a denguu er ngii eng ual blal mengai er tir, e diak lodengei el kmo ng sebecherir el muut el nguu. Te meringel er tir el mocha omes ra smecher el ngelekir e meruul a bebil ra ngerchelir. Ngar tial klou el chetituokel el taem, e te mlo chemau a Rubak. E ultuil er a “blauang ra klengar ra bek el sils” el mla er Ngii. E ngmai a ngesou ra re chubechub el sechelirir ma telungalek er tir e ngmai a klisiich er a klengeltengat ra priesthood. Te mla mengai el mo ta rengrir, ma deleuill er tir altang mla mo dmolech e cherrungel el locha dimlak el sebechel mouaisei lokiu tiang.

Sera July 23, 1837, e a Rubak a milkrolii a chocholt el mora mle-president er a Chelechad er a Teruich ma Terung el Apotol, Thomas B. Marsh. Ng mle uldimukl er ngii a ikang:

Moluluuch el kirir a re Teruich me a Terung. Mollach er tir el kirel a Rubak, e mollach er tir el kirel a kngterir, e bol blak a rengmiu el kirel a Rubak.

A Rubak a kmo a uriul er a ngibesereng, ma betok el ongarm, e a Rubak, a mo omelchesiu el kirir, me alsekum meng diak el lorcherecher a rengrir, a le nglerd a chiklir el kirel a Rubak, e tir a mo obult, e Ngii a mo omekungil er tir.²²

A kuumerang el osisechakl el ngara ikal bades a merkid el rokui. A ngibesereng ma ringel el bo desiseb er ngii, uldimukl a rokui el skeng el Rubak a soal lomeskid, a sebechel ngoikid el nguu a mui el obult ra rengud me a omekungil. Engdi tiang a duubech alsekum, alsekum, ng diak dolecherecher a rengud e dorerd a chikled el mo er Ngii. Alsekum me kede melemolem el mesisiich e diak de mesim, ngii dil ngera el mei, e kid a nguu a bult el Osobel a soal er sera lolekoi er a Petrus, “Sel bo mobult, e molisiich er a rodam er kau,”²³ ng bult el ngii a cherrungel meng diak el sebechel mengubet. Sel telbiil ra omekungil a sel omekbeches e mengikiid er a telemall-el klengit ra bedenged ma rengud, el rullid el mo klikiid.

Ng mekletkak er a osisecheklel a delemam: “Monga yasai; ngungil ra bedengem.” A re delad a medengei, ea domes er ngii er a diak el mesim el klaumerang, “a menga yasai” a blechoel el meluluuch, mesuub a chedaol llechukl ra bek el sils, mesiou e ngar omengull ra Ikelesia, klikiid el melai ra sakrament ra bek el sandei, oubeltikelreng ra ngarbita er kau, e nguu a kerus er kau el olngesenges ra Dios ra bek el sils.²⁴

Blechoel el melatk ra telbiil er a ungil tekoi a di mei, er chelechang ma uriul er tiang, mo er tirke el tir a mesisiich e diak el mesim er a klaumerang er a Kristo. Diak mobes, a diak a ulebengelel el klengar ma deulreng er a re santo.²⁵ Kemiu el rokui el klikiid a rengmiu, mokiis a bdelmiu e mngai a ungil tekingel a Dios, mnguu a beltikelreng er ngii; me bolsebechiu, alsekum me a uldesuiu a mesisiich, el mo cherechar.²⁶ El ngara ngkel a Jesus Kristo, amen.