Mo Ungil Okesiu el Uriul-klebesei el Santo
Ak meskemiu a beltkil a renguk ma klengeltengat, me bo mungil mosuub a tekingel a Rubak e moltirakl Osischeklel ra klengar er kemiu.
Tiang a tara kmal omekellomes e mocha ra reksi el ongdibel. Ng smiich a rengud el melatk ra ngarmedad. Kede mla modurch el mo meruul a ungil e mo ungil. A meang el klumech el mla medung er tial ongdibel ra re General Authorities ma re General Officers ma chelitakl a meral chedaol! Ak mengelechel er kemiu el mo mesuub aikal klumech, lomuchel er chelechal sandei.1 Aika ochotii a uldesuel ma soal a Rubak el kirir a Rechedal, er chelechal sils.
Sel beches el teletelel osisechakl ra blai, lokiu a ngesou ra Ikelesia a sebechel loreked a klisiich ra telungalek, sel sekum a bek el telungalek a blak a rengrir e kerekikl loltirakl el mo sumechokl a delengcheklir el mo meral basio ra klaumerang. Ak yaksok el kmo sel meral blak a rengmiu loureor el melisiich a rekeblimiu el mo ultuil ra omesubel ebangkelio, e a cherengelel a taem a Chedaol sils er kemiu a meral mo klebokel. A rengelekiu a mo semeriar el mesuub e oltirakl osischeklel Osobel, e a urerel a cherarou ra klengar er kemiu me a chelsel a delengchekliu a mo kekerei. A ngeldechel a telungalek er kemiu a mo klou e mesisiich.
Chelsel tial klou el ongdibel eng mla lmuut el mo mesisiich el mo oltaut a blakereng er kid el mengull ra Rubak el Jesus Kristo ra bek el taem el dousbech ra ngklel a Ikelesia er Ngii. Ak yaksok er kemiu el kmo a blakereng er kid el mo ousbech ra meral ngklel a Ikelesia ra Osobel ma rechedal a mo mekrolid el mo mesisiich a klaumera er kid el kirel a ngeiul a ngarbab el chedaol klisiich el kirir a rechedal a Ikelesia er Ngii.
Chelecha e ak mo mesaod el kirel a templo. Kede medengei el kmo ng klou a ultutelel a temed el ngara templo el kirel osebeled ma osebelel a telungalek er kid.
Sel dengai chedaol ruoll ra templo el kired e desiseb ra chedaol telbiil lobengkel a Dios, e a dersta er kid ousbech el melemolem el mesisiich ra chedaol tekoi lokiu omesuub el di sebechel mengai ra kmal di blil a Rubak. E a rebeldeked ousbech er kid el mo mesiou lomtechei er tir.
Momtab ra dmolech ma tabesul chubechub ra Dios, ra uchelel a beluulechad el mei, el kildmeklii a rael ra klengeltengat ra templo el mo er tirkel mla mad el dimlak el nguu a llomes ra ebangkelio. Aikal chedaol ruoll ra templo a di mla ngarngii ra irechar. A denguu er ngak e tial cheleuodel el teletael a mengasireng e tara olchotel a klemrang el kirel.2
Rodam ma rodos er ngak, a odechelakl ra cherarou a merael mo mesisiich, a klungel ma kakerous el teletelel.3 Kede lmuut el kmal ousbech el mo blechoel mora templo. A kulengit er kemiu me mluut el mo ngara nglunguuch e momes a teleteliu sel mousbech a temiu. Mongoit a temiu el kirel a ngarmedemiu el taem ma telungalek er kemiu. A lengarngii a techellem el mora templo, ak mengelechel er kemiu el mo blechoel ngarngii a temiu el kirel a Rubak—e mora chedaol Blil—e molemolem loltirakl a temiu el mong. Ak yaksok er kemiu el kmo a Rubak a mo ocholt a mengasireng el tekoi el Ngii a medengei el kmo komousbech sel sekum e kom chemoit a temiu el mesiou e ngara omengull ra chelsel a templo er Ngii.
Chelechal taem e ngarngii a 159 el mla moterekokl el templo. A ungil omengedmeklel me a ulekereuil a ikal templo a klou a ultutelel merkid. Sel lorael a taem el mong, ea templo a mo kired lomekbeches. Misei a uchul, a uldasu a mla mekedmokl el mo omekbeches e mengedmokl er a Salt Lake Temple me a bebir er a tmplo el mlo dechor er sera uchelel. A komakai lomesodel aikal ruoll a mo motobed sel me bo loruul.
Chelechal sils eng dmeu a rengmam louchais a okedecherul a lmuut el bebil ra templo. Aikal templo a mo mokedechor ra ikakid el basio: Mendoza, Argentina; Salvador, Brazil; Yuba City, California; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Philippines; San Juan, Puerto Rico; me a Washington County, Utah.
A okedecherul ma omengedmeklel a templo a locha diak el ngedechii a klengar kau, eng di sel mechoit a temem el ngara chelsel a templo a meral ngarngii a relii. Tirkel tir a meketeketang el diak el bora templo, ak mengelechel er kemiu el mo kudmeklemiu e mluut el mong er sel kot el rechediu. E dirrek lolengit er kemiu me bom ngara omengull e moluluuch el mo melchesuar a dmolech el beltkil a rengul Osobel el kiriu, ma dersta er kemiu bol nguu a mesisiich el klaumerang el kmo Ngii a omekrael er tial chedaol diak a ulebengelel ureor.4
Rodam ma rodos, ak mereng a suliu ra klaumerang ma blak el reng er kemiu lolengeseu. Ak meskemiu a beltkil a renguk ma klengeltengat, me bo mosuub a tekingel a Rubak e moltirakl Osischeklel ra klengar kemiu. Ak subedemiu el kmo a chedaol ocholt a melemolem ra chelsel a Ikelesia e melemolem el di merekmo “bol mekedmokl a moktek ra Dios, e ngii el Ngarbab el Jehovah bol du el kmo ng mereko ureor.”5
A kumengeltengat er kemiu me bol lobdois a klaumera er kemiu er Ngii ma chedaol Urerel, loba klaumerang ma kllouereng loutekangel ra ikel ringel ra klengar kemiu. A kumekngeltengat er kemiu el mo ungil okesiu el Uriul-klebesei el Santo. A kumekngeltengat er kemiu e ochotii a klaumera er ngak el kmo a Dios a ngar! A Jesus a Kristo! Tiaikid a Ikelesia er Ngii. Kid a Rechedal, el ngara ngklel a Jesus Kristo, amen.