Diak el Mesubed a Reng el kirel Chedaol el Tekoi
A chedaol diak el mesubed a rengud a sebechel ngoikid el mo meruul a tekoi loba klaumerang, oltirakl ra ongtil Osobel el mo meruul a ungil, e ngmai a rengud el meriou el kirel.
Se er ak dirk ngara ngar er eou el skuul, aki milrael mo remei el okiu a chelades el rael el ngii a millemotem er a tkul a bukl. Ng mla er ngii a tara rael, el dimlak el chelades, el ulemekedong er ngii el kmo “ng rolir a resechal.” Tia el rolir a resechal a mle dechudech el rael el ngii a ulengasech er tia el bukl. Ng mle kedeb e ng di ng mle ngesachel e kedengelengel. Ngak el mle kekerei el redil, ak mle medengei el kmo ng sebechek el merael er tia el rael el ua tirka el sechal. Muut el klou a ultutelel, ak mle medengei el kmo ak kilei er a taem er a uriul el klebesei el kirek el meruul a meringel el tekoi, el ua ruchelel a ikelesia—e mle soak el kldmokl el kirel. Me se el oumesingd er a taem, e ak mekekokak el merael el okiu uellir a cheledebechel el resechelik er tia el chelades el rael, e nguubet a orecherek, e merael el di hadasi el olengasech er tia el rolir a resechal. Ak millasem el melisiich a ochik.
Tia el temek el ngalek el redil er a Primary, sei a mle uldesuek el kmo ng mekera e ak mengedmokl er ngak. Chelechang e ng ngodech a klaumedengei er ngak! Ak medengei el kmo ng sebechek el omeksau a ochik el merael er a telbiil el rael el okiu a omeruul el mengai er a ongetikaik er a Chedaol Reng er a bai kurael el di hadasi el olengasech er a ourois el rael. Ele Rubak, el okiu a profet er Ngii, a omekedong er a derta er kid el mo kiei e omekerreu el ngara ngar er bab e lmuut el chedaol el teletael” e mo “omakes el mo er bab.”1
Aika el ulaoch a oleker a omeruul, el obengkel se el otil a rengud el kmo ng sebeched el kudmokl a lmuut el betook, el bebil er a taem e kede muchelii a lomekedong er ngii a Elder Neal A. Maxwell el kmo “ng diak el mesubed a reng el kirel chedaol el tekoi.”2 A diak el mesubed el reng el kirel a chedaol el tekoi a mei se el sekum kede mengaisisiu er a kmo “kid kede ngerang [el] obengkel a kmo “ngera kede obang el klisiich el mo uaingii.”3 A derta er kid, a lsekum kede olecholt a klemerang, e kede mla melechesuar el kmo ngar er ngii a metetoech er a delongelel a kmo kede kirel ker e uangerang, me a kirel a kmo ng ker me a ngera a soad el mo uaingii. Ng urungulel a rengud el soad a bo doltekau a meklou e betok el tekoi. Kede melechesuar aikang e le kid a rengelekel a Dios, el mlechell el oba Llemesel a Kristo e uaisei el kiei er a chelsel a rebetel a beluulechad. Aika el omelechesuar a reng a sengk er a Dios e ngii a mekdebechii sel reng el mo kudmokl a ruoll el tekoi.
Ng kired el olechelch aike el omelechesiu er a diak el mesubed el reng el kirel a chedaol el tekoi el ngii a omekedong er kid el mora ngar er bab el rael, osisiu el taem e kede dongchii e mengeroid er kid er a ike el ongetikaik er a Diabelong—el ngii a moalech a rengud. Tia a techellel a Diabelong el mo melibas er kid e mengetikaik er kid. Ng sebeched el melilt el mo merael er a ngar er bab el rael el ngii a mekrolid el mo osiik er a Dios me a budech me a kerasia er Ngii, me a lechub e kede orrenges er a Diabelong, el ngii a melibas er kid el olab a klumech el kmo kid a di blechoel el mo ngesonges, diak bo de merau, me a lechub e kede mellomes, me a lechub e kede klebokel, ngidi el tekoi a di dengesonges er ngii. Se el reng er kid er a diak el mesubed a rengud er a chedaol el tekoi a sebechel mo mechedaol—me a lechub e ng mo chelitechetud.
Moruul lultuil er a Klaumerang
A tara rolel el sebechem el mo medengelii a klekakerous er a diak el mesubed el reng el kirel a chedaol el tekoi me a ongetikaik er a Diabelong a uase se el diak el mesubed a reng el kirel a chedaol tekoi a mo omekrael er kid el mora klaumerang el omeruul. A diak el mesubed el reng el kirel a chedaol el tekoi a diak el orrimel er kid el kiei er se el ngii a tabesul er kid, me a lechub e ng ngoikid el mora rrau el reng. Ak mla subii el kmo se el sekum e ak kulechelch a uldesuek er a chelitechut el tekoi el ngii a diak, kulab ng diak a rolel kumakes el mo ruchei, e ak dirrek el metik er ngii el kmo ng mo meringel er ngak a melechesuar e oltirakl er a Chedaol Reng.4
Se er a lengeasek el sechal, e a Joseph Smith a mlo medengei el kirel aike el ngelsengesel me a chelitechetul e mlo suebek a rengul kirel “A omengedmeklel a ngar el mora ulebongel el [delbengel].” Okiu a omelekingel, “a uldesuek a kmal mlo imis el mesaul, e le ngak el mlo melechesuar a klungel a berraod el kirel a kngtik, e … ulemesechiu er ngak el kmo ng kirek el ouuchel el kirel a kngtik me a dirrek el kngtil a beluulechad.”5 Tia a milkrolii el mo “meral omelebedebek me a dirrek el klou el sebekreng.”6 Tiang diak el kora de mla rongesii el tekoi? Kau ke suebek a rengum e mesaul a rengum el kirel a ngelsengesem me a chelitechetum?
Uaisei, a Joseph a rirelii a ta el tekoi. Ng uluuchais, “Ak blechoel el mengedecheduch er a renguk: Ngera a kirel kedmekill ?”7 A Joseph a mlo meruul er a tekoi el oba klaumerang. Ng ulbult el mora chedaol llechukl, e chiluii a siotai el mengai er a Jakobus 1:5, e mlora Dios el olengit a ngelsuil. Tia el ues er a ngar er medad el taem a mlo uchul a omekdebechel a Oltel. Ng kmal mereng a renguk el kirel a diak el mesubed el reng er a chedaol el tekoi er a Joseph, tia el temel er a sebekreng me a rrau el reng, el ngii a ulerrimel er ngii el mo meruul er a tekoi el oba klaumerang er ngii.
Moltirakl a Ongelulau el Mo Meruul a Ungil
A beluulechad a blechoel el ousbech er a diak el mesubed el reng el kirel a chedaol el tekoi el mo uchul a di omtab el kirel a tang, el omult a uldesued el kired me a tekoi er a mla memong e ultab er a di kmo ngak, ngera ike el diak er ngak, me aikel soak. A diak el mesubed el reng el kirel a chedaol tekoi a oldubech er kid el mo oltirakl a okesiul a Osobel, el ngii a “milrael el meruul a ungil.”8 Se el dorael el chad er a oltirakl, e kede mo ngmai a chedaol el omekllomes el mo odars chimad el mora rebebil.
A cheldecheduch el krirengesii er a rak er a mla memong a ngilsukak el mo medengei e meruul a ongelulau er a Chedaol Reng. A Sister Bonnie D. Parkin, el ngii a mle Merreder er a Cherrengelel a Chelchad er a Rolngeseu, a uluuchais er tiang:
“A Susan … a mle ungil chad er a omerasm. A President [Spencer W.] Kimball a kiliei er a ward elbla er [ngii]. A ta er a Sandei, e a Susan a tilab osengel el kmo ngii a mle beches a bilel. A demal a kmal dirk … milechar a kmal meringel el chad el memedel. A Susan a ulemdasu el kmo tia el mamed a sebechel rullii a kmal ungil el llechetel a cheiukl el mo obengkel tia el beches el bilel a President Kimball. Me a bocha el Kot el Ureor e ng rirellii tia el llechetel a cheiukl. Ng millilii er a babier e milrael el olengasech el mo er a blil a President Kimball.
“Omerollel el mora medal a tuangel, e ng mle stob e omdesua, ‘Ngak ak ngerang el meruul er a llechetel a cheiukl el mora profet? Ngii a locha olab a kmal betok.’ Ng rirellii er a rengul el kmo ng mle cheleuid, me ng ulbult el merael.
“E uaisei e a Sister Kimball a ngiluu a chesmerel a tuangel e kmo, ‘Achedil, e Susan!’
“El kmal chauateter, a Susan a melkinga, ‘Ak milsa President Kimball el oubail er a beches el bilel er sera Sandei. E a demak a kmal dirk milechar a beches el memedek er a New York … me ak rirellii a llechetel a chiklel.’
“A uchei er a Susan a lolemolem, e a Sister Kimball a milleb er ngii, ulereked a ongelngelel, e kmo: ‘Susan, kelem molechib er kau er a bekururau el uldasu.’”9
Ng kmal soak sei! “Kelem molechib er kau er a bekururau el uldasu.” Bebil er a taem se el ngar er ngii a uldesuek el mo meruul er a kmo ngerang el kirel a kmong techang, ak melebedebek el kmo seng mle ongelulau me a lechub e ng kuk di mle uldesuek. E ng di ak muleklatk “el kmo se el ngii a mlara Dios a oleker e mengesuseu er kid el mo meruul a ungil, e oubeltikelreng er a Dios, e mesiou er ngii, a ngii a omekllomes el mlara Dios.”10
Ng diak el ior er a kmo ng bleketakl el ongelulau me a lechub e ng kuk di mengelekel el mo olengeseu, a ungil omeruul a diak el bo lemechoit; e le “bliochel el beltik el reng a diak a rebetel”11—e diak a taem mele cheleuid el omeruul.
Oumesingd e a taem a diak el ungil besul, e kid a diak dungil medengei el kmo a mekekerei el omeruul er a omesiou ngerang kmal rullii. E ng di cherengel a taem, e kid a mo medengei el kmo kid e a dongu er a chimal a Dios e mo mereng a rengud el medengei el kmo se el Chedaol Reng el oureor er kid a olechotel a kengei er a Dios.
Rodos, kau me ngak a sebeched el olengit er a Chedaol Reng me ngolecholt er kid a “rokui el tekoi el [kid] a kired el meruul,”12 el dirrek el se elsekum e a blechebechel a tekoi el kedmekill a kmal betok. Se el bo domelechesiu, e ng sebeched el mechei a belatong er a nangas me a lechub e ng bebil er a tekoi el rechad a sorir kid a dekedmokl me ng mo uchul e ng sebeched el menguiu el mora kekerei el ngalek, oldingel er a ta el sechelei, omes er a rengelekir a tonari, me a lechub e kede mesiou er a chelsel a templo. Lak bom ngodech a rengum er ngak—ngak a chad el soak el meruul a blechebechel a tekoi el kedmekill, ng soak se el krellii a tekoi el mo merek. Ngdi a budech a mei se el dodengei el kmo se el dungil e ng diak el ior er a kmo kede meruul a lmuut el betok e meklou el tekoi. Onger el kirel a diak el mesubed el reng el kirel a chedaol tekoi el meluodou el mo oltirakl a ongelulau el ngii a ngodechii a uldesuek el kirel a “a temek,” e kumes er a rebebil, el diak el olibesongel, e le bai le moktek er a klengar er ngak.
A Chedaol Diak el Meubed el Reng a Mekrolid el Mora Kristo
A diak el mesubed el reng el kirel a chedaol tekoi a mo uchul a delemedemek el reng, diak el chotngakl el kirel a tang me a lechub e ng moalech el reng el mengai er a omengaisisiu a tekoi el ngii a kmo kede blechoel el mo kedeb. A oltirakl a telbiil el redil a kakerous el bedengel; el telungalek, lodengei, ma teletelir.
Uaisei, el kid er rokui a olngesonges er sel ngii a mo chedaol teleteled, ngarngii a klemerang ra tekoi el kmo a le dil kid e ke dolngesonges. Ngdi a ungil chais ra ebangkelio a kmo ngokiu a krasia ra Dios, e kid a sebeched. E oba ngelsouil a Kristo, eng sebeched a rokui el tekoi.13 A chedaol llechukl a yaksok el kmo kede mo “metik ra krasia to mo ngosukid sel dousbech a ngesou.”14
Sel mechas a rengud el ngii klemeranga kmo a chelitechetud a sebechel mo klengeltengat sel ngai a rengud el meriou e ngoikid el mora Kristo.15 A diak el mesubed el reng el kirel chedaol tekoi a mo chedaol se el sekum kid a ngmai a rengud el me riou e me duum er a Jesus Kristo el olab a kmo ngera soad, er a bai dorreked el oba bechechelingaol reng.
Ng klemerang, a ongasireng er a Jesus a blechoel el omuchel el oba klemedengei el kirel a ngera soal a reng, lousbech, rebetel, me a dirrek el ngelsonges. Ke medengei el kirel a blauang me a ngikel? A bek el milluches er a Ebangkelio a ouchais el kmo ng milekerang a Jesus e mle mengasireng el omeka er a re tela el telael el rechad el tir a ultirakl er Ngii.16 E ng di cheldecheduch a ulemuchel el roltirakl er ngii a mle medengei a diak er tir; te mle melechesuar el kmo ng di mle “kleim el derta el blauang, me a teluo el ngikel: e ng di te ngerang er a delongelir a re kmal betok?”17 Tirka el chad er a oltirakl a kmal mle medengei: te mle ngesonges a kelir, e ng di te ngilai el msa Jesus a rokui el mla er ngii er tir, e Ngii a miruul a mengasireng.
Ngar er ngii a taem el kau a milchesuar el kmo a duch me a sengk er kau a mle kekerei er a tekoi el ngii a ruoll? Ngak a mla ngar er ngii. E ng di kau me ngak a sebeched el msa Kristo a dolab, a Ngii a mo omekdois a tekoi el doruul. Se el ngera ngii a bo moldars er ngii a kmal bekord el ungil a idisel—osisiu el se el uldimukl er ngii a telitur er kau me a chelitechetum—a lsekum e kau a ultuil er a kerasia er a Dios.
A klemerang a kmo a derta er kid a ta el telecheroll el cheroid er a Chelid— dertang a ngelekel a Dios.18 E uaisei el uaike el bla Leruul el mora reteru el profet me a dirrek el di ua bek el sechal me a redil er rokui el telecheroll, e uaisei el Chedam er a Babeluades a urungulel el mo melodech er kid.
A C.S. Lewis a silodii a klisichel a Dios er a omelodech el ua tiang: “Momes er kau el ua om ngar el blai. A Dios a mei e muut el omekedechor er tia el blai. A kot, e ng uaisei, ke sebechem el medengei el kmo ngerang ng Meruul. Ng meruul a dengitech er a blai e melabek a chemars er a chado me a lemuut el bebil; ke medengei el kmo aika el ureor a kedmekill me kau a diak sal mechas a rengum. E a omerollel a taem e Ngii a mocha melengod er a chesmerel a blai el kirel meruul a betok el omelodech el ngii a kmal meringel a rellel. … [Kamosang] Ngii a omekedechor er a blai el ngii a ngodech er se el ble momdasu er ngii. … Ke omdasu el kmo ke mulkedechor el di kekerei el blai: e ng di Ngii a omekedechor er a blil a King. Ng ousbech el kmo ng mong e muut el mei e mo Kiei er ngii.”19
Ng okiu a omelenget el tngakireng er a Osobel, e kid a sebeched el remuul aike el tekoi el ruoll er a ngar medad. A re profet a mla olisechakl el kmo, se el dolemiakl er a rolel a chad el oltirakl, e ng sebeched el mo klikiid el okiu a kerasia er a Kristo. A diak el mesubed el reng el kirel a chedaol tekoi a sebechel mekrolid el mo meruul a tekoi el oba klaumerang, oltirakl er a ongetikaik er a Osobel el mo meruul a ungil, e ngmai a rengud el me er riou e nguu el Msang. El oba ngklel a Jesus Kristo, amen.