Qalb Waħda
Biex aħna nkunu nistgħu nilħqu d-destin sublimi tagħna, aħna neħtieġu lil xulxin, u jeħtieġ li nkunu ħaġa waħda.
Wieħed mill-kreaturi l-aktar meraviljużi fid-dinja huwa l-farfett monarka. Waqt żjara fil-Messiku biex hemmhekk ngħaddu l-Milied mal-familja tar-raġel tiegħi, aħna morna nżuru santwarju tal-friefet, fejn miljuni ta’ friefet monarki jqattgħu x-xitwa tagħhom hemm. Kienet ħaġa verament affaxxinanti li tara dehra daqstant impressjonanti u l-ħin li aħna qattajna nirriflettu fuq l-eżempju ta’ għaqda u ubbidjenza lejn il-liġijiet divini li kienu qed juruna dawn il-ħlejjaq ta’ Alla.1
Il-friefet monarki huma navigaturi primi. Huma jużaw il-pożizzjoni tax-xemx biex isibu f’liema direzzjoni jridu jmorru. Kull meta jkun żmien ir-rebbiegħa, huma jivvjaġġaw eluf ta’ mili mill-Messiku sal-Kanada, u fil-ħarifa, huma jerġgħu lura lejn l-istess foresti taż-żnuber ġewwa l-Messiku.2 Huma jagħmlu dan sena wara sena, minkejja l-ġwienaħ żgħar li għandhom. Tul il-vjaġġ tagħhom, huma jinġabru flimkien billejl fuq is-siġar biex jipproteġu lilhom infushom mill-kesħa u mill-predaturi.3
Grupp ta’ friefet jissejjaħ kalejdoskopju.4 X’ dehra mill-isbaħ, hux veru? Kull farfett f’ kalejdoskopju huwa uniku u differenti, madankollu dawn il-ħlejjaq, li jidhru daqstant fraġli, ġew iddisinjati minn Ħallieq mimli mħabba bl-abbiltà li jibqgħu jgħixu, jivvjaġġaw, jitkattru u jxerrdu l-ħajja filwaqt li jgħaddu minn fuq fjura għall-oħra, ixerrdu l-polline. U minkejja li kull farfett huwa differenti, huma kollha jaħdmu flimkien biex jagħmlu d-dinja post aktar sabiħ u produttiv.
Bħall-friefet monarki, aħna ninsabu fuq vjaġġ lura lejn id-dar tagħna fis-smewwiet, fejn aħna ningħaqdu mill-ġdid mal-Ġenituri tagħna tas-Smewwiet.5 Bħall-friefet, aħna ġejna mogħtija ċerti kwalitajiet divini li jagħtuna ċ-ċans li ninnavigaw tul ħajjitna, sabiex inkunu nistgħu “nilħqu l-potenzjal tal-ħolqien tagħna.”6 Bħalhom, jekk aħna ngħaqqdu qlubna flimkien,7 il-Mulej jipproteġina “bħalma l-qroqqa tiġbor il-flieles taħt ġwenħajha”8 u huwa jagħmel minna kalejdoskopju mill-isbaħ.
Intom it-tfal, iż-żgħażagħ u l-aħwa kollha li qed tisimgħuni, aħna ninsabu nivvjaġġaw flimkien. Biex aħna nkunu nistgħu nilħqu d-destin sublimi tagħna, aħna neħtieġu lil xulxin, u jeħtieġ li nkunu ħaġa waħda. Il-Mulej talabna, “Kunu ħaġa waħda; u jekk m’intomx ħaġa waħda m’intomx tiegħi.”9
Ġesù Kristu huwa l-akbar eżempju ta’ għaqda ma’ Missieru. Huma ħaġa waħda fl-għan tagħhom, fl-imħabba u fil-ħidma tagħhom, għaliex “ir-rieda tal-Iben inbelgħet fir-rieda tal-Missier.”10
Aħna kif nistgħu nimxu wara l-eżempju perfett tal-Mulej, fl-għaqda Tiegħu ma’ Missieru, u nkunu aktar magħqudin Magħhom u bejnietna?
Mod ispirat kif dan jista’ jsir insibuh f’ Atti 1:14. Naqraw, “L-irġiel kollha qalb waħda kienu jitolbu flimkien man-nisa.”11
Jiena naħseb li hija ħaġa mill-aktar sinifikanti li l-frażi “qalb waħda” nsibuha diversi drabi fil-ktieb tal-Atti, fejn naqraw dwar dak li d-dixxipli ta’ Ġesù Kristu għamlu immedjatament wara li Huwa tela’ s-sema bħala bniedem imqajjem mill-imwiet, kif ukoll dwar il-barkiet li huma rċevew minħabba l-isforzi tagħhom.Hija ħaġa sinifikanti wkoll li aħna naraw li l-istess ġara fost il-fidili li kienu jgħixu fil-kontinent Amerikan, fiż-żmien li fih il-Mulej mar iżurhom u jamministra fosthom. “Qalb waħda” fid-deċiżjonijiet tagħna, fl-għaqda ta’ bejnietna, u lkoll flimkien.
Xi ħwejjeġ li l-Qaddisin fidili għamlu f’ għaqda, fiż-żewġ postijiet, huma li taw xhieda ta’ Ġesù Kristu, studjaw il-kelma ta’ Alla u amministraw lil xulxin f’ imħabba.12
Id-dixxipli tal-Mulej kienu ħaġa waħda fil-għan, fl-imħabba u fl-għemejjel tagħhom. Huma kienu jafu min huma verament, kienu jafu x’ kellhom jagħmlu u huma għamlu dan b’ imħabba lejn Alla u lejn xulxin. Huma kienu parti minn kalejdoskopju meraviljuż, jimxu ‘l quddiem f’ għaqda.
Xi wħud mill-barkiet li huma rċevew kienu li huma ntlew bl-Ispirtu s-Santu, li fosthom seħħew bosta mirakli, li l-Knisja kibret, li ma kien hemm l-ebda tilwim bejn in-nies u li l-Mulej berikhom f’ kollox.13
Aħna nistgħu nirraġunaw li r-raġuni għaliex huma kien daqstant ħaġa waħda kienet peress li huma kienu jafu personalment lill-Mulej. Huma kienu viċin Tiegħu, u huma kienu xhieda tal-missjoni divina Tiegħu, tal-mirakli li Huwa wettaq u tar-Resurrezzjoni Tiegħu. Huma raw u missu l-marki ta’ jdejh u riġlejh. Huma kienu jafu b’ ċertezza li Huwa kien il-Messija mwiegħed, il-Feddej tad-dinja. Huma kienu jafu li “Huwa s-sors ta’ kull fejqan, ta’ kull hena u kull progress etern.”14
Avolja jekk aħna ma rajniex lis-Salvatur tagħna bl-għajnejn fiżiċi tagħna, aħna nistgħu nkunu nafu li Huwa jgħix. Hekk kif aħna nersqu aktar viċin Tiegħu, hekk kif infittxu li niksbu xhieda personali permezz tal-Ispirtu s-Santu tal-missjoni divina Tiegħu, aħna jkollna għarfien akbar dwar il-veru għan tagħna; l-imħabba ta’ Alla tgħammar f’ qalbna;15 aħna jkollna d-determinazzjoni li nkunu ħaġa waħda fil-kalejdoskopju tal-familji tagħna u tal-oqsma u l-komunitajiet tagħna; u aħna namministraw lil xulxin “b’ mod aktar frisk u aħjar.”16
Il-mirakli jseħħu meta wlied Alla jaħdmu flimkien, iggwidati permezz tal-Ispirtu, biex jgħinu lil min hu fil-bżonn.
Aħna nisimgħu diversi stejjer ta’ mħabba lejn għajrna minn ħafna nies meta xi pajjiż jintlaqat minn katastrofi.Per eżempju, meta s-sena l-oħra l-belt ta’ Houston intlaqtet minn għargħar massiv, in-nies insew x’ kienu l-bżonnijiet personali tagħhom u marru jsalvaw lill-oħrajn. Wieħed president tal-kworum tal-presbiteri talab għall-għajnuna fil-komunità, u f’ kemm ili ngħidlek ġiet organizzata flotta ta’ 77 dgħajsa. Dawk li marru jagħtu s-salvataġġ marru madwar l-inħawi milquta u ttrasportaw familji sħaħ lejn id-djar tal-laqgħat tagħna, fejn hemmhekk huma rċevew refuġju kif ukoll l-għajnuna li tant kellhom bżonn. Kemm il-membri kif ukoll dawk mhux membri ħadmu flimkien għal għan wieħed.
Ġo Santiago, iċ-Ċili, waħda president tas-Soċjetà tal-Għajnuna kellha x-xewqa li tgħin l-immigranti fil-komunità tagħha li kienu waslu hemm mill-Ħaiti. Waqt li ddiskutiet flimkien mal-mexxejja tagħha tas-saċerdozju, hija u mexxejja oħra ħarġu bl-idea li joffru tagħlim tal-Ispanjol lil dawk l-immigranti ħalli jgħinuhom jintegraw aħjar fid-dar ġdida tagħhom. Kull nhar ta’ Sibt filgħodu, il-missjunarji kienu jinġabru flimkien mal-istudenti ħerqana tagħhom. Is-sentiment ta’ unità f’ dak il-bini kien eżempju li jispirak ta’ nies li ġejjin minn ambjent differenti tal-ħajja jaqdu lil xulxin b’ għan komuni.
Fil-Messiku, mijiet ta’ membri vjaġġaw għal sigħat sħaħ biex marru jgħinu lil dawk li kienu baqgħu ħajjin wara żewġ terrimoti kbar. Fil-vjaġġ tagħhom ħadu magħhom għodda, makkinarju u mħabba lejn għajrhom. Hekk kif il-voluntiera inġabru flimkien f’ waħda mid-djar tal-laqgħat jistennew ċerti struzzjonijiet, is-sindku tal-belt ta’ Ixhuatán infaqa’ jibki hekk kif huwa ra b’ għajnjejh manifestazzjoni ta’ “mħabba pura ta’ Kristu.”17
Issa l-Mulej qiegħed jagħtina l-opportunità li kull xahar aħna niddiskutu flimkien fil-kwora tagħna tas-saċerdozju u fis-Soċjetajiet tal-Għajnuna, ħalli aħna lkoll inkunu nistgħu nkunu parteċipanti aktar attivi fil-kalejdoskopju tal-qasam u tal-fergħa tagħna—post li fih aħna lkoll niffittjaw u fejn ilkoll aħna meħtieġa.
It-toroq tagħna huma kollha differenti, madankollu aħna nimxuhom flimkien. Fit-triq tagħna, l-aktar importanti mhuwiex dak li aħna għamilna jew fejn konna; l-aktar importanti hu ‘l fejn aħna sejrin u fiex qed nittrasformaw ruħna, f’ għaqda. Meta aħna niddiskutu flimkien waqt li nkunu ggwidati mill-Ispirtu s-Santu, aħna nkunu nistgħu naraw fejn aħna ninsabu bħalissa u fejn jeħtieġ inkunu. L-Ispirtu s-Santu jagħtina viżjoni li l-għajnejn naturali tagħna mhux kapaċi jaraw, għaliex “ir-rivelazzjoni tinsab mifruxa madwarna,”18 u meta aħna niġbru flimkien dik ir-rivelazzjoni, aħna nkunu nistgħu naraw aħjar.
Hekk kif aħna naħdmu f’ għaqda, l-għan tagħna għandu jkun li nfittxu u nagħmlu r-rieda ta’ Alla; l-inċentiv tagħna għandu jkun l-imħabba li aħna nħossu lejn Alla u lejn għajrna;19 u l-akbar xewqa tagħna għandha tkun li “naħdmu b’ diliġenza,”20 biex inkunu nistgħu nħejju t-triq għar-ritorn glorjuż tas-Salvatur tagħna.L-uniku mod kif aħna nistgħu nagħmlu dan hu “b’ qalb waħda.”
Bħall-friefet monarki, ejjew inkomplu fil-vjaġġ tagħna, ilkoll b’ għan komuni, kollha kemm aħna bil-kwalitajiet u l-kontribuzzjoni tagħna, naħdmu biex nagħmlu minn din id-dinja waħda aktar sabiħa u produttiva—pass wara l-ieħor u f’ armonija mal-kmandamenti ta’ Alla.
Il-Mulej tagħna Ġesù Kristu wegħedna li meta aħna ninġabru flimkien f’ ismu, Huwa jkun jinsab hemm f’ nofsna.21 Jiena nixhed li Huwa jgħix u li f’ għodwa mill-isbaħ tar-rebbiegħa bħalma hi llum Hu qam mill-mewt . Huwa hu l-Monark fuq kull monark ieħor, “is-Sultan tas-slaten, u s-Sid tas-sidien.”22
Jalla aħna nkunu ħaġa waħda fil-Missier u fl-Iben Imnissel Tiegħu, aħna u ninsabu ggwidati mill-Ispirtu s-Santu, hija t-talba umli tiegħi f’ isem Ġesù Kristu, amen.