E Profeta di Dios

April 2018 General Conference

The Prophet of God

Dor di Elder Neil L. Andersen

Di e Quorum di Diesdos Apòstelnan

Un profeta no ta para entre abo i e Salbador. Mas bien e ta para banda di bo i mustra bo e kaminda pa e Salbador.

Mi ta agregá mi bon bini na Elder Gerrit Gong i Elder Ulisses Soares na e hermandat sin paralelo di e Quorum di Diesdos.

Den sostené Presidente Russel M. Nelson komo e profeta di Señor i komo Presidente di E Iglesia di JesuCristu di e Santunan di Último dia, nos tabata parti di un asamblea solèm dekretá divino - solèm pasobra e eventonan di e ora ku a pasa a wòrdu antisipá den shelunan fo’i promé ku e mundu tabata. Señor JesuCristu, ken ta dirigí Su obra riba tera, pa medio di Presidente Eyring, presentá Su profeta, Su lider ungí, na nos. Su pueblo di konvenio, permitiendo nos públikamente pa manifestá nos deseo di sostené e i sigui su konseho.

Na e miónes di miembronan ku nos ta akinan huntu ku nos den e Sentro di Konferensia, mi ke pa bo sa ku e Espíritu di Señor den e edifisio aki durante e sostenementu di Presidente Nelson tabata eksaktamente manera bo a antisipá - yen di poder spiritual. Pero nos asamblea dirigí for di shelu no ta solamente den e Sentro di Konferensia aki pero rònt mundu - den kapianan na Asia, Afrika, i Nort Amérika; den hogarnan na Merka Sentral i Sur i Europa; riba pationan kubri den Pasífiko i e islanan den laman. E asamblea aki den kua parti di mundu ku bo p r ta, hasta si bo konekshon no ta mas ku e oudio di bo telefòn inteligente. Nos mannan alsa no a wòrdu konta dor di nos obispu, pero nan a wòrdu nota sigur den shelu, komo nos konvenio ku Dios, i nos akshon ta registrá den e buki di bida.

Señor ta Skohe Su Profeta

E selekshon di un profeta a wòrdu hasi dor di Señor Su mes. No tabata tin kampaña, ni debate, no ta postulá pa posishon, ni disenshon, ni deskonfiansa, konfushon, òf konmoshon. Mi, tambe, ta konfirmá ku e poder di shelu tabata ku nos den e kamber ariba den e tèmpel ora nos dor orashon a rondoná Presidente Nelson i a sinti e aprobashon ku no por wòrdu nenga di Señor riba dje.

Presidente Nelson su selekshon pa sirbi komo Dios su profeta a wòrdu hasi hopi ten pasa. Señor su palabranan na Jeremias tambe ta apliká pa Presidente Nelson: “Promé ku mi a forma bo den e barika mi a konosé bo; i promé ku bo a bin afó for di e vientre mi a santifiká bo, i mi a ordená bo un profeta na e nashonnan.”¹ Solamente tres aña pasa, Elder Nelson, na edat di 90, tabata e di kuater den edat, ku dos di e tres Apostlenan senior siendo mas hóben den edat ku e tabata. Señor, ku ta kontrolá bida i morto, ta selektá Su profeta. Presidente Nelson, na edat di 93, tin un salú asombroso. Nos ta spera ku e lo ta ku nos pa un òf dos dékada mas, pero pa aworakí nos ta purba na konvensé pa keda leu for di e pista di ski.

Miéntras nos ta reverensia e profeta komo e ungí di Señor, laga pa e ta kla ku nos ta alabá solamente Dios, nos Tata Selestial, i Su Yu divino. Ta pa medio di e mérito, miserikòrdia, i grasia di nos Salbador, JesuCristu, ku un dia por ta atrobe den Nan presensia.²

Dikon Nos ta Sigui e Profeta

Pero Hesus tambe a siña nos un bèrdat importante tokante e siervonan ku E ta manda pa nos. “Esun ku risibí abo,” E la bisa, “ta risibí ami, i esun ku risibí ami ta risibí esun ku a manda mi.”³

E ròl mas importante di Señor su profeta ta pa siña nos di e Salbador i guia nos na E.

Tin hopi rasonnan lógiko pa sigui Russel M. Nelson. Hasta e mundu lo yam’e briante. Manera Elder Stevenson a splika, e tabata un dòkter médiko for di edat di 22, un siruhano kardiako konosí, un pionero renombrá den e desaroyo di operashon di kurason habrí.

Mayoria lo rekonosé su sabiduria i huisio: nuebe dékada di enseñansa tokante bida, biba sin egoismo, stimando i siñando esnan den tur huki di mundu, i e eksperensia di madures di tin 10 yu, 57 ñetu i 118 bisa ñetu. (E number final aki ta kambia ku frekuensia; un bisa ñetu a nase djis djárason pasá.)

Imagen

Presidente Russel M. Nelson ku su bisa ñetu nobo.

Esnan ku konosé bon lo papia di Presidente Nelson enfrentando e difikultatnan di bida ku fe i kurashi. Ora kanser a tuma bida di su yu muhé di 37 aña, Emily, lagando un kasa amoroso i sinku yu chikí, mi a skuch’e bisa, “Mi tabata su tata, un dòkter médiko, i un Apòstel di Señor JesuCristu, pero mi mester a baha mi kabes i atmití, ‘No mi boluntat pero di bo wòrdu kumplí,’”⁴

Un Guardian riba e Toren

Maske nos ta atmirá tur e kualidatnan noble aki, nos ta sigui Presidente Russel M. Nelson pasobra Señor JesuCristu a yam’e komo su portabos riba mundu i Su guardian riba e toren.

Imagen

Carcasonne, Fransia

Carcassonnne ta un siudat remarkabel rondoná di un muraya na Fransia ku tei for di tempu medieval. Torennan haltu a sali bai ariba di e murayanan di protekshon, konstruí pa guardiannan ku a para riba e torennan ei dia i nochi, manteniendo nan atenshon klabá den distansia pa wak enemigu. Ora un guardian mira un enemigu aserkando, su bos di amonestashon ta protehé e hendenan di Carcassonne for di e peliger inminente ku nan no ta mira.

Un profeta ta un guardian riba e toren, protehiendo nos for di peligernan spiritual ku nos kisas no ta mira.

Señor a bisa na Ezekiel, “Mi a pone bo komo guardian pa e kas di Israel; p’esei lo bo skucha e palabra [for] di mi boka, i lo bo amonestá nan pa mi.”⁵

Hopi bia nos ta papia di nos nesesidat di sigui e profeta, pero konsiderá e karga pisá ku Señor ta pone riba Su profeta: “Si bo no papia pa amonestá e malbadonan pa sali for di e kaminda ku nan ta, [i] e malbado ei ... muri den su inikidat; ... su sanger lo mi rekerí for di bo man.”⁶

Un Testimonio Personal mas Grandi

Nos ta brasa Presidente Nelson manera nos lo a brasa Pedro of Moises si nos tabata na bida den nan tempu. Dios a bisa Moises, “Lo mi ta ku bo boka, i siña bo kiko bo tin ku bisa.”⁷ Nos ta skucha Señor su profeta ku e fe ku su palabranan ta “for di e boka di [Señor] mes.”⁸

Esaki ta fe siegu? No, e no ta. Kada un di nos tin un testimonio spiritual di e bèrdat di e Restourashon di e evangelio di JesuCristu. Pa medio di nos propio boluntat i eskoho, nos a lanta nos man awe mainta, deklarando nos deseo pa sostené Señor su profeta do di nos “konfiansa, fe, i orashon[nan]”⁹ i pa sigui su konseho. Nos tin e privilegio komo Santunan di Último dia pa risibí e konfirmashon personal ku Presidente Nelson su yamamentu ta di Dios. Miéntras mi kasa, Kathy, konosé Presidente Nelson personalmente pa kaso tres dékada i no tin duda den tu mantel divino, ora e la wòrdu apartá, e la kuminsá lesa su diskursonan di e lastu 34 añanan, hasiendo orashon pa un siguransa ainda mas profundo di su ròl profétiko. Mi ta primintí ku e testimonio aun mas grandi aki lo bin na bo si bo busk’e ku humildat i dignidat.

Dikon nos ta asina deseoso di sigui e bos di nos profeta? Pa esnan ku diligentemente ta buska bida eterna, e profeta su bos ta trese siguridat spiritual den un mundu hopi turbulento.

Nos ta biba riba un planeta ku gritunan di miónes di bos. E internèt, nos telefòn sabi, nos kahanan di entretenimentu yená ku kanalnan, tur ta pidi pa nos atenshon i pusha nan influensia riba nos, sperando ku nos lo kumpra nan produktonan i adoptá nan stèndertnan.

E variedat aparentemente interminabel di informashon i opinion ta rekordá nos wòrdu “benta di aki pa aya, i hibá unda ku ta,” ,”¹⁰ “bayendo ku e bientu,”¹¹ i wòrdu superá dor di e “mañanan maligno” di esnan ku “ta sinta einan ta warda pa engañá.”¹²

Ankrando nos alma na Señor JesuCristu ta rekerí pa nos skucha na esnan ku E a manda. Siguiendo e profeta den un mundu di konmoshon ta manera wòrdu lora den un ko’i tapa kayente i kómodo, riba un dia di hopi friu.

Nos ta biba den un mundu di rason, debate, argumento, lógika, i splikashon. Puntrando, “Dikon?” ta positivo den hopi aspekto di nos bida, permitiendo e poder di nos inteligensia pa guia e multitut di eskoho i desishonnan ku nos tin ku tuma tur dia.

Pero e bos di Señor hopi bia ta bin sin splikashon.¹³ Hopi promé ku akadémikonan a studia e impakto di infidelidat riba konfiansa den kasa i yunan, Señor a deklará “Abo lo no kometé adulterio.”¹⁴ Mas aleu ku inteligensia so, nos ta tesorá e regalo di e Espíritu Santu.

No Keda Sorprendí

Imagen

Noe predikando

E bos di e profeta, miéntras e ta papia suave, hopi bia lo ta un bos ku ta pidi nos pa kambia, pa arepentí, i regresá serka Señor. Ora korekshon ta nesesario, no laga nos tarda. I no alarmá ora e bos di amonestashon di e profeta ta bai kontra di opinionnan popular di awendia. Frekuentemente e balanan di kandelanan di esnan frustra ku no ta kere ta wòrdu tira na e momentu ku profeta kuminsá papia. Ora bo ta humilde den sigui e konseho i enseñansa di Señor su profeta, mi ta primintí bo bendishonnan agregá di siguridat i pas.

Imagen

Samuel e Lamanita ta profetisá

No keda sorprendí si bo propio punto di bisa no semper inisialmente ta den harmonia kompletu ku e enseñansa di Señor su profeta. Esakinan ta momentunan di enseñansa, di humildat, ora nos bai na rudia den orashon. Nos ta anda bai pa dilanti den fe, konfiando den Dios, sabiendo ku den tempu nos lo risibí mas klaridat spiritual for di nos Tata Selestial. Un profeta a deskribí e regalo inkomparabel di e Salbador komo “e boluntat di e Yu ta wòrdu apsorbé den e boluntat di e Tata.”¹⁵ Entregando nos boluntat na e boluntat di Dios ta, de echo, no ta entrega mes pero e komienso di un viktoria glorioso.

Algun lo trata na analisá di mas e palabranan di e profeta, luchando pa determiná kiko ta su bos profétiko i kiko ta su opinion personal.

Na 1982, dos aña promé ku mi a wòrdu yama komo Outoridat General, Ruman Russel M. Nelson a bisa: “Nunka mi ta puntra mi mes, ‘Ki ora e profeta ta papia komo un profeta i ki ora e no ta hasi esaki?’ mi interes tabata, ‘Kon mi por ta manera e?’” E la agregá,”Mi [filosofia ta pa] stòp di pone e símbolo di pregunta tras di kada deklarashon di e profeta i pone símbolo di sklamashon na su lugá.”¹⁶ Esaki ta kon un hòmber humilde i spiritual ta skohe pa ordená su bida. Awó, 36 aña despues, e ta Señor su profeta.

Kresiendo Bo Fe den Señor

Den mi bida persona, mi a haña ku ora mi studia bou di orashon e palabranan di e profeta di Dios i ku koutela, paso a paso, spiritualmente liñá mi boluntat na su enseñansa inspirá, mi fe den Señor JesuCristu semper ta krese.¹⁷ Si nos skohe pa pone su konseho un banda i determiná ku nos sa mihó, nos fe lo sufri i nos perspektiva eterno lo ta nubla. Mi ta primintí ku si bo permanesé fuerte den sigui e profeta, bo fe den e Salbador lo krese.

E Salbador a bisa, “Tur e profetanan ... a testifiká di mi.”¹⁸

Un profeta no ta para entre abo i e Salbador. Mas bien, e ta para banda di bo i mustra e kaminda pa e Salbador. Un profeta su responsabilidat mas grandi i regalo mas presioso pa nos ta su testimonio sigur, su konosementu sigur, ku Hesus ta e Kristu. Meskos ku Pedro di antaño, nos profeta ta deklará, “[E ta] e Kristu, e Yu di e Dios bibiente.”¹⁹

Den un dia futuro, mirando atras na nos mortalidat, nos lo regosiha ku nos a kana e tera den e tempu di un profeta bibiente. Riba e dia ei, ta mi orashon ku nos lo por bisa:

Nos ta skuch’é.

Nos ta ker’e.

Nos ta studia su palabranan ku pasenshi i fe.

Nos ta hasi orashon p’e.

Nos a para banda di dje.

Nos ta humilde sufisiente pa siguié.

Nos a stim’e.

Mi ta laga mi testimonio solèm ku Hesus ta e Kristu, nos Redentor i Salbador, i ku Presidente Russel M. Nelson ta Su profeta ungí riba tera. Den nòmber di JesuCristu, amèn.