Amor puru: E Siñal Berdadero di Tur Berdadero Disipel di JesuCristu
E evangelio di JesuCristu ta sentrá riba e amor di e Tata i e Salbador i nos amor pa Nan i di unu na otro.
Nos ta stima i sinti falta di Presidente Thomas S. Monson, i nos ta stima i sostené Presidente Russell M. Nelson. Presidente Nelson tin un lugá spesial den mi kurason.
Tempu ku mi tabata un tata yòn, nos yu hòmber chikí, kende tabatin sinku [aña], a yega kas for di skol un dia i puntra su mama, “ki sorto di trabou tata ta hasi?” Despues el a spliká ku su kompañeronan nobo di klas a kuminsá debatí tokante trabou di nan tata. Un di nan a bisa ku su tata ta chef di e polis di e siudat, siendo un otro ta deklará ku su tata shèf di un kompania grandi.
Ora nan a puntr’é tokante su tata, mi yu a rospondé simplemente, “mi tata ta traha den un ofisina riba un kòmpiuter.” Ora ku el a nota ku su kontesta no a hasi masha impreshon riba e amigu chikitu nan di dje, el a agregá,”por sierto, mi tata ta shèf di universo.”
Mi ta kere ku esei tabata fin di e kombersashon.
Mi bisa mi kasa, “A bira tempu pa siñ’e mas tokante di e plan di salbashon i ta ken realmente ta na enkargo.”
Pero ora nos tabata siña nos yunan e plan di salbashon, nan amor pa Tata Selestial i pa e Salbador a krese ora nan a siña ku e ta un plan di amor. E evangelio di JesuCristu ta sentrá riba e amor di e Tata i e Salbador i nos amor pa Nan i pa unu na otro.
Elder Jeffrey R. Holland a bisa: “E promé granmandamentu di henter eternidat ta stima Dios ku hente rnos kurason, poder, mente, i forsa – esei ta e promé gran mandamentu. Pero e promé gran bèrdat di henter eternidat ta ku Dios stima nos ku henter Su kurason, poder, mente, i forsa. E amor ei ta e piedra di e fundeshi di eternidat, i e mester ta e piedra di e fundeshi di nos bida diario.”1
Siendo e piedra di fundeshi di nos bida diario, amor puru ta un rekisitu pa tur berdadero disipel di JesuCristu.
E profeta Mormon a siña, “Di manera ku, mi rumannan stimá, pidi e Tata ku henter e energia di kurason, pa boso por ta yen di e amor aki, ku e ta duna tur esnan ku ta segundonan berdadero di su Yu, JesuCristu.”2
Amor enbèrdat ta e berdadero siñal di tur e berdadero disipel di JesuCristu.
Berdadero disipelnan ta gusta sirbi. Nan sa ku servisio ta un ekspreshon di amor berdadero i ta un kombenio ku nan a serai na nan boutismo.3 Independiente di e yamamentu nan ku nan tin den Iglesia òf nan ròl den e komunidat, nan ta sinti un deseo inmenso pa stima i sirbi Señor i un na otro.
Berdadero disipelnan ta gusta pordoná. Nan sa ku e Ekspiashon di e Salbador ta kubri tur pika i fayonan di kada un di nos. Nan sa ku e preis ku el a paga ta un preis ku ta inkluí “tur kos”. Impuesto spiritual, honorarionan, komishonnan, i kargo relashoná ku pika, fayonan, i mal echo e ta kubrí tur. Berdadero disipelnan ta kla pa pordoná i kla pa pidi pordon.
Mi kerido rumannan, si bo ta luchando pa risibí forsa pa pordoná, no pensa riba lokual e otro a hasi ku bo, pero pensa lokual Señor a hasi pa bo, i lo bo haña pas den e bendishonnan di e redentor Su ekspiashon.
Berdadero disipelnan ta gusta someté nan mes na Señor ku pas den nan kurason. Nan ta humilde i sumiso pasó nan stimá’ E. Nan tin fe pa risibí Su boluntat kompletu, no solamente den lokual E ta hasi pero tambe kon i ki ora. Berdadero disipelnan sa ku bendishonnan real no ta lokual semper nan ke mas bien lokual Señor ke pa nan.
Berdadero disipelnan ta stima Señor mas ku e mundu i ta firme i ta inmovibel den nan fe. Nan ta keda fuerte i firme den un mundu yen kambio i konfushon. Berdadero disipelnan ta gusta skucha na e stèm di e Spiritu i di e profetanan i no ta konfundí pa stèmnan di e mundu. Berdadero disipelnan ta stima “pa ta na lugánan santu”4 i ta gusta hasi e lugánan kaminda nan ta santu. Unda ku nan bai, nan ta trese e amor di Señor i pas den e kurason di e otronan. Berdadero disipelnan gusta obedesé e mandamentunan di Señor, i nan ta obediente pasó nan ta stima Señor. Komo nan ta stima i warda nan kombenionan, nan kurason ta wòrdu renobá i nan karakter natural ta kambia.
Amor puru ta e siñal di tur berdadero disipel di JesuCristu.
Mi a siña tokante amor puru dor di mi mama. E no tabata miembro di Iglesia.
Un dia, hopi aña pasá, mi a bishita mi mama, kende tabata lucha ku kanser. Mi tabata sa ku e tabata bai muri, pero ami tabata preokupá ku su sufrimentu. Mi no a bisa nada, pero konosiendo mi bon, el a bisa, “mi ta mira ku bo ta preokupá.”
Pa mi sorpresá, el a puntra mi ku un stèm suak, “Ku mi por siñ’é kon ta hasi orashon? Mi ke hasi orashon p’abo. Mi sa ku bo ta kuminsá ku ‘Kerido Tata Selestial,’ pero despues kiko mi tin ku bisa?”
Ora mi a hinka rudia banda di su kama i el a hasi orashon pa mi, mi a sinti un amor ku nunka mi a sinti promé. E tabata simplemente, amor puru, di bèrdat. Anke e no tabata sa di e plan di salbashon, e tabata tin den su kurason su propio plan di amor, e plan di amor di un mama pa su yu. E tabata ku dòler, sinembargo e tabata luchando pa e por haña forsa pa hasi orashon. Ampèr mi por a skucha su stèm, pero seguramente mi a sinti su amor.
Mi ta kòrda pensando, “Kon porta ku hende ku ta den gran dòlò por hasi orashon pa un otro un hende? E ta esun ku ta den nesesidat.”
E ora ei mi mente a haña e kontesta klaramente: amor puru, e stima mi asina tantu ku el a lubidá su mes. Den su momentu mas kritiko, e stima mi mas ku su mes.
Awor, kerido rumannan, un ta esaki ta lokual Señor a hasi? Klaro, den un perspektiva eterno i mas amplio. Meimei di Su inmenso doló, den e hardin e anchi eie, E tabata esun ku tabatin mester di yudansa, sufriendo di un manera ku nos no por imaginá òf komprondé. Pero na final, el a lubidá Su mes i hasi orashon pa nos te ora ku el a paga e preis kompletu. Kon e tabata kapas pa hasi esei? Pa e amor puru ku E tin pa Tata, ku a mand’É, i pa nos. E stima e Tata i nos mas ku Su mes.
E la paga pa algu ku E no a hasi. El a paga pa pikanan ku E no a kometé. Dikon? Amor puru. Pagando e preis kompletu, E tabata den posishon pa ofresé nos e bendishonnan di lokual El a paga pe si nos ke arepentí. Dikon el a ofresé esaki? Atrobe, i pa semper, Amor puru.
Amor puru ta e siñal di tur berdadero disipel di JesuCristu.
Presidente Thomas S. Monson a bisa: “laga nos kuminsá awor aki, e dia aki, pa ekspresá amor na tur Dios su yunan, si nan ta nos famianan, nos amigunan, un simpel konosí, òf totalmente estranhero. Tur mainta ora nos lanta, laga nos determiná nos reakshon ku amor i kariño pa tur lokual ku nos en kontra riba nos kaminda.”5
Eumannan, e evangelio di JesuCristu ta un evangelio di amor. E gran mandamentu ta basa riba amor. Pa ami, ta trata aki di e amor. E amor di e Tata, ku a sakrifiká Su Yu pa nos. E amor di e Salbador, kende a sakrifiká pa nos tur. E amor di un mama òf un tata ku ta duna kualkier kos pa nan yunan. E amor di esnan ku ta sirbi den silensio i ku no ta konosí pa mayoria di nos pero si ta konosí pa Señor. E amor di esnan ku ta pordoná tur i pa semper. E amor di esunnan ku ta duna mas ku nan ta risibí.
Mi stima mi Tata Selestial, mi stima mi Salbador, mi stima e evangelio. Mi stima e Iglesia. Mi stima mi famia. Mi stima e bida maravioso aki. Pa mi, ta simplemente amor.
Ku e dia aki di konmemorashon di e resurekshon di e Salbador sea un dia di renovashon spiritual pa kada un di nos. Ku e dia aki lo ta e komienso di un bida yen di amor, “e piedra di e fundeshi di nos bida diario.”
Ku nos kurason por yena ku e amor puru di Cristu, e berdadero siñal di tur berdadero disipel di JesuCristu. Ta mi orashon den nòmber di JesuCristu, amèn.