Prepará pa Enkontrá ku Dios
Buskando responsabilidatnan divino apuntá ku rektitut, union, i igualdat lo prepará nos pa enkontrá Dios.
Eliza R. Snow, papiando di e dedikashon di e Tèmpel di Kirtland (kaminda ku e tambe tabata presente), a bisa: “E seremonianan di e dedikashon ei por tabata ensayá, pero ningun lenga mortal por deskribí e manifestashonnan selestial di e dia memorabel ei. Angelnan a paresé na sierto hendenan, miéntras ku un sentido di presensia divino a wòrdu sintí dor di tur ku tabata presente, i kada kurason tabata yená ku goso inekspresabel i yen di gloria.”1
E manifestashonnan divino ku a pasa den e Tèmpel di Kirtland tabata na fundeshi di e meta di e Iglesia di JesuhCristu restourá pa logra e salbashon i eksaltashon di nos Tata Selestial su yunan. 2 Segun nos ta prepará pa enkontrá ku Dios, nos por sa kiko nos responsabilidatnan divino apuntá ta dor di rekonsiderá e yabinan sagrado restourá den e Tèmpel di Kirtland.
Den e orashon dedikatorio, e Profeta José Smith humildementa a petishoná Señor “pa aseptá e kas aki ... di kual bo a manda nos pa traha.”3
Un siman despues, riba Djadumingu di Pasku di Resurekshon, Señor a paresé den un vishon magnífiko i a aseptá Su tèmpel. Esaki a pasa riba 3 di Aprel 1836, kasi eksaktamente 182 aña pasá for di e Djadumingu di Pasku di Resurekshon aki. Tabata tambe e temporada di Pasku (fiesta di Hudiu) — un di e tempunan raro kaminda Pasku di Resurekshon i e fiesta di Hudiu ta kai den e mesun temporada. Despues ku e vishon a kaba, tres profeta antiguo, Moisés, Elías, i Elías, a paresé i a konsagrá yabinan ku tabata esensial pa logra Señor su meta pa Su Iglesia restourá den e dispensashon aki. E meta ei a wòrdu definí simplemente, pero elegantemente komo e rekohementu di Israel, seyando nan komo famianan, i prepará mundu pa e Segunda Binida di Señor.4
Pa ámbos Elías i Moisés paresé tabata un “paralelo konspikuo ... [ku] tradishon hudiu, di akuerdo ku kaminda Moisés i Elías lo yega huntu na ‘final di tempu.’”5 Den nos doktrina, e aparensha aki ta alkansá e restourashon fundamental di sierto yabinan “duná ...pa e lastu dianan pa lastu biaha, di kual ta e dispensashon di kumplimentu di tur tempu.”6
E tèmpel di Kirtland, ámbos den lugá i grandura, tabata relativamente indistinto. Pero den kondishon di su signifikashon enorme pa ku humanidat, e tabata transformashon eterno . profetanan antiguo a restourá yabinan di saserdosio pa e ordenansanan salbatorio eterno di e evangelio di JesuhCristu. Esaki a resultá den un goso aplastante pa miembronan fiel.
E yabinan aki ta proveé e “poder di shelu”7 pa responsabilidatnan divino apuntá den e tempu ei i awó ta konstituí e meta prinsipal di e Iglesia.8 Riba e dia di Pasku di Resurekshon maravioso ei den e Tèmpel di Kirtland, tres yabi a wòrdu restourá:
Promé, Moisés a paresé i a konsagrá e yabinan di e rekohementu di Israel di e kuater partinan di tera, loke ta obra mishonal.9
Di dos, Elías a paresé i konsagrá e yabinan di e dispensashon di e evangelio di Abraham, di kual ta inkluí e restourashon di e kombenionan Abrahamiko.10 Presidente Russell .M. Nelson a siña ku e meta di e yabinan di kombenio ta pa prepará e miembronan pa e reino di Dios. E la bisa, “Nos sa ken nos ta i [nos sa] kiko Dios ta ekspektá di nos.”11
Di tres, Elías a paresé i konsagrá e yabinan di e poder di seyamentu den e dispensashon aki, kual ta obra di historia familiar i ordenansanan di tèmpel ku ta hasi e salbashon pa esnan bibu i esnan morto posibel.12
Tin, bou di direkshon di e Promé Presidensia i e Quorum di e Diesdosnan, tres konsehonan ehekutibo na e Sede General di Iglesia ku ta supervisá e tres responsabilidatnan divino apuntá aki basá riba e yabinan ku a wòrdu restourá den e Tèmpel di Kirtland. Nan ta e Konseho Ehekutibo Misional, e Konseho Ehekutibo di Saserdosio i Famia, i e Konseho Ehekutibo di Tèmpel i Historia Familiar.
Unda Nos Ta Pará Awendia den Realisá E Responsabilidatnan Divino Apuntá Aki?
Promé, ku rèspèt pa Moisés su restourashon di e yabinan di e rekohementu di Israel, awendia kasi 70.000 misioneronan ta plamá dor di henter mundu predikando Su evangelio pa rekohé su elegí. Esaki ta e kuminsamentu di e realisashon di e gran i maravioso obra Nefí a premirá entre ámbos e Gentilnan i e kas di Israel. Nefí a mira nos tempu ora ku e Santunan di Dios lo bin ta riba e fas di tera, pero nan kantidat lo ta chikitu dor di inikidat. No obstante, e la premirá ku nan lo ta “armá ku rektitut i ku e poder di Dios den gran gloria.”13 Ora ku wòrdu mirá dentro di e historia breve di e Iglesia restourá, e enfoke mishonal ta hopi remarkabel. Nos ta mirando e realisashon di Nefí su vishon. Ounke nos kantidat ta tiki, nos lo kontinuá nos enfoke i alkanse na esnan ku lo respondé riba e mensahe di e Salbador.
Di dos, Elías a paresé i konsagrá e dispensashon di e evangelio di Abraham, deklarando ku den nos i nos desendensia tur generashon despues di nos lo wòrdu bendishoná. Den e konferensha aki, guia signifikante a wòrdu presentá pa asistí den e perfekshoná e Santunan i prepará nan pa e reino di Dios.14 E anunsio den e seshon di saserdosio tokante e quorumnan di elders i sumo saserdotenan lo lòs poder i outoridat di saserdosio. Orientashon Familiar i Maestra Bishitante, awor “Sirbi” manera instruí asina elegante den e seshon aki, lo prepará Santunan di delaster dianan pa enkontrá ku Dios.
Di tres, Elías a konsagra e yabinan di seyamentu di e dispensashon aki. Pa esnan di nos ku ta bibu den e tempu aki, e oumento den e obra di tèmpel i historia familiar ta fenomenal. E spid aki lo kontinuá i aselerá te ku e Segunda Binida di e Salbador, pa evitá ku henter mundu “lo ta kompletamente ruiná na su binida.”15
Obra di historia familiar, bendishoná dor di shelu dor di teknologia, a krese dramátikamente den e lastu añanan. Nos lo ta insensato di bira komplasiente over di e responsabilidat divino apuntá aki i spera ku tanta Jane òf un otro famia ku ta dediká lo ta responsabel di dje. Laga mi kompartí Presidente José Fielding Smith su palabranan profundo: “Ningun ta eksonerá di e gran obligashon aki. E ta rekerí di e apòstel mes un kos ku di e elder òf ruman [muhé] di mas humilde. Lugá òf distinkshon, òf servisio largu den Iglesia ... no ta dunabo e derecho di menospresiá e salbashon di nos mortonan.”16
Nos tin awor tèmpelnan den henter mundu i e medionan di e fondo di asistensia di patrosinadó pa yuda esnan den nesesidat ku ta leu for di un tèmpel.
Komo individuonan, nos lo hasi bon di evaluá nos enfoke den ehekutá e obra misional i obra di tèmpel i historia familiar, i prepará pa enkontrá ku Dios.
Rektitut, Union, i Igualdat dilanti di Señor ta Sostené e Responsabilidatnan Sagrado aki
Ku rèspèt pa rektitut, e bida aki ta e tempu pa nos tur pa prepará nos mes pa enkontrá ku Dios.17 E Buki di Mormón ta proveé kantidat di ehèmpelnan di konsekuenshanan trágiko ora ku individuonan òf gruponan ta faya di tene e mandamentunan di Dios.18
Durante di mi bida, disputanan di mundu i prekupashonnan a move di un ekstremo pa otro—di persekushonnan frivóliko i trivial te na inmoralidat serio. Ta admirabel ku inmoralidat hororoso a wòrdu eksponé i repudiá.19 Inmoralidat hororoso asina ei ta kontra di e leinan di Dios i di sosiedat. Esnan ku ta komprondé Dios su plan tambe mester ta kontra inmoralidat komplasiente, ku tambe ta un piká. E proklamashon di famia pa mundu ta advertí “individuonan ku ta violá konvenionan di kastidat, ku ta abusá kasá òf yunan [òf di mesun manera, kualke otro hende] ... lo para responsabel dilanti Dios algun dia.”20
Sigun nos ta wak rònt di nos, nos ta mira e destrukshon ku inikidat i adikshon ta hasi tur kaminda. Si, komo individuonan, nos ta en bèrdat prekupá over di e huisio final di nos Salbador, nos lo mester buska arepentimentu. Mi tin miedu ku hopi hende no ta sinti nan mes responsabel mas na Dios i no ta bai den skritura òf serka e profetanan pa haña guia. Si nos, komo sosiedat, lo kontemplá e konsekuensianan di piká, lo tin un gran oposishon públiko kontra di pornografia i e husamentu di hende muhé.21 Manera Alma a bisa su yu hòmber Corianton den e Buki di Mormón, “Inikidat nunka tabata felisidat.”22
Konserní union, e Salbador a deklará, “Si boso no ta unu, boso no ta di mi.”23 Nos sa ku e spiritu di kontenshon ta di diabel.24
Den nos tempu, e nesesidat deskribí den skrituranan pa tin union, pa mayor parti ta wòrdu neglishá, i pa hopi hende e enfoke ta riba e manera di tribu,25 ku hopi biaha ta basá riba status, sekso, rasa, i rikesa. Den hopi pais, si no ta tur, hendenan ta profundamente dividí over di kon pa biba. Den Señor su Iglesia, e úniko kultura ku nos ta adherí na dje i ta instruí ta e kultura di e evangelio di JesuhCristu. E union ku nos ta buska ta pa ta unifiká huntu ku e Salbador i Su siñansanan.26
Sigun nos ta wak e metanan primario di Iglesia, nan tur ta basá riba igualdat dilanti di Señor27 i sigui e kultura di e evangelio di JesuhCristu. Ku rèspèt pa obra mishonal, e kualifikashonnan prinsipal pa boutisá ta pa ser humilde dilanti Dios i bin dilanti ku un kurason kibrá i un spiritu kontritu.28 Edukashon, rikesa, rasa, òf orígen no ta ni sikiera konsiderá.
Ademas, misioneronan humildemente ta sirbi kaminda nan wòrdu yamá. Nan no ta intentá di sirbi a base di stándart di mundu òf status òf preparashon pa kareranan di futuro. Nan ta sirbi ku henter nan kurason, poder, mente i forsa unda ku nan ta asigná. Nan no ta skohé nan kompañeronan di mishon, i nan ta buska ku ferbor pa desaroyá atributonan Christian,29 loke ta na base di e kultura di JesuhCristu.
E skrituranan ta duna guia pa nos relashonnan di mas importante. E Salbador a siña ku e promé mandamentu ta pa “stima Señor bo Dios.” I esun di dos ta pa “stima bo bisiña manera bo mes.”30
E Salbador ademas a splika ku tur hende ta nos bisiña.31 E Buki di Mormón ta mustra kla ku nos no mester tin niun tipo di —ites, tribunan, òf posishon.32 Nos mester ta uní i igual.
Ordenansanan sagrado i responsabilidatnan divino ta trahá riba esaki. Mi ta espektá ku bo mesun eksperensianan den tèmpel ta similar ku di mi. Ora mi laga mi dia di trabou atras na San Fransisko i yega na e Tèmpel di Oakland, mi ta sinti un sentimentu aplastante di amor i pas. Un gran parti di esei tabata sinti ku mi tabata mas serka di Dios i Su propósitonan. E ordenansanan salbatorio tabata mi enfoke prinsipal, pero un parti signifikante di e sentimentunan bunita ei tabata e igualdat i union ku ta penetrá e tèmpel. Tur hende ta bistí na blanku. No tin evidensia di rikesa, posishon, òf logro edukashonal; nos tur ta rumannan hòmber i muhé ku ta bini humildemente dilanti Dios.
Den e sagrado sala di seyamentu, ordenansanan di matrimonio eterno ta mesun kos pa un i tur. Mi ta stima e echo ku e pareha di e fondo di mas humilde i e pareha di e fondo di mas riku ta haña eksaktamente e mesun eksperensia. Nan ta bisti e mesun tipo di paña i ta hasi e mesun kombenionan enfrente di e mesun un altar. Tambe nan ta risibí e mesun un bendishonnan di saserdosio eterno. Esaki ta wòrdu lográ den un tèmpel presioso trahá por medio di e diesmo di e Santunan komo e kas sagrado di Señor.
Realisá responsabilidatnan divino apuntá, basá riba rektitut, union, i igualdat dilanti di Señor, ta trese goso personal i pas den e mundu aki i ta prepará nos pa bida eterno den e mundu benidero.33 E ta prepará nos pa enkontrá Dios.34
Nos ta hasi orashon ku kada unu di boso, no ta importá bo sirkunstansianan awor aki, lo papia ku bo obispu i ta digno di tin un rekomendashon di tèmpel.35
Nos ta gradesido ku hopi mas miembronan ta preparando pa bai tèmpel. Tabatin un oumentu signifikante den e kantidat di adulto digno poseedó di un rekomendashon di tèmpel pa hopi aña kaba. Rekomendashonnan di uso limitá pa hóbennan digno a krese dramátikamente den e lastu dos añanan. Klaramente e kurason di e miembresia fiel di Iglesia nunka no tabata mas fuerte.
Pa konkluí, por fabor ta sigur ku e lidernan di Iglesia mayó ku ta presidí riba propósitonan divino apuntá di Iglesia ta risibí asistensia divino. E guia aki ta bini for di e Spiritu i tin biaha direktamente di e Salbador. Ámbos tipo di guia spiritual ta wòrdu duná. Mi ta gradesí di tin un asistensia asina. Pero guia ta wòrdu duná den Señor su tempu, “liña riba liña i regla riba regla,”36 ora “un Señor sabio ta skohé pa instruí nos.”37 Guia pa Iglesia kompletu ta bini solamente na Su profeta.
Nos tur tabatin e privilegio di sostené Presidente Russell M. Nelson komo nos profeta i Presidente di E Iglesia di JesuhCristu di e Santunan di Delaster Dianan den e konferensha aki. E Diesdosnan komo grupo i individual, tabatin un eksperensia spiritual signifikante ora nos a pone nos man riba Presidente Nelson su kabes i Presidente Dallin H. Oaks, aktuando komo stèm, a ordená i apartá e komo Presidente di Iglesia. Mi ta duna testimonio ku e tabata preordená i a wòrdu prepará henter su bida pa ta Señor su profeta den nos dia. Den e nòmber di JesuCristu, amèn.