Esun Ku ta Perseverá ten a Final, e Mesun ei Lo Wòrdu Salbá

Dor di Elder Claudio D. Zivic

Di e Setenta

Laga nos ta fiel na loke nos a kere i sa.

Kerido rumannan, mi ta apresiá masha hopi e oportunidat di ekspresá na boso algun di mi sentimentunan.

Vários aña pasa, mi kasa i ami tabata presente na un seremonia inougural di un eksibishon interaktivo di mucha den e Museo di Historia di Iglesia na Siudat di Lago Salado. Na final di e seremonia, Presidente Thomas S. Monson a kana bin serka nos, i miéntras e ta duna nos man, e la bisa, “Perseverá, i lo bo triunfá” - un enseñansa profundo i un ku ta bèrdat, di mes, nos tur por afirmá.

JesuCristu a sigurá nos ku “esun ku perseverá te na final, e mesun ei lo wòrdu salba.”¹

Pa perseverá ta nifiká “pa mantené firme den un kompromiso di ta berdadero na e mandamentunan di Dios ounke tin tentashon, oposishon i atversidat.”²

Hasta esnan ku tabatin eksperensianan spiritual poderoso i a duna servisio fiel por kai na kaminda un dia òf bira ménos aktivo si nan no perseverá te na final. Ku semper i enfátiko nos mantené nos mente i kurason ku e frase “Esaki lo no pasa ku mi.”

Ora JesuCristu a siña na Capernaum, “hopi di su disípulonan a bira lomba, i no a kana ku ne mas.”

“E ora ei Jesusa bisa e Diesdos, Boso tambe lo bai?”³

Mi ta kere ku awendia, JesuCristu ta puntra nos tur ku a hasi un konvenio sagrado ku n’E. “Boso tambe lo bai?”

Mi orashon ta pa nos tur, ku reflekshon profundo tokante di kiko e eternidat ta enserá pa nos, por respondé manera Pedro Simon: “Señor, serka ken nos mester bai? Abo tin e palabranan di bida eterno.”⁴

Laga nos tur ta fiel na loke nos a kere i sa. Si nos no a bin ta biba di akuerdo ku nos konosementu, laga nos kambia. Pekadónan ku persistí den nan pikanan, i no arepentí, ta hundi mas profundo den shushi, te ora Satanas reklamá nan pa e mes, signifikantemente poniendo nan oportunidat di arepentí na peliger, pa wòrdu pordoná i pa wòrdu bendishoná ku tur e bendishonnan di eternidat.

Mi a skucha hopi hustifikashon for di esnan ku stòp di partisipá aktivamente den Iglesia i a pèrdè e vishon korekto di e propósito di e biahe riba e mundu aki. Mi ta eksorta nan pa reflehá i regresá, pasobra mi ta kere ningun hende lo por inventá esküs dilanti di Señor, JesuCristu.

Ora nos wòrdu boutisa, nos ta hasi konvenionan - no ku hende pero ku e Salbador, akordando di “tuma riba [nos mes] e nòmber di JesuCristu, teniendo un determinashon di sirbi e te na final.”⁵

Asistiendo na e reunionnan sakramental ta un di e maneranan primordial ku nos por evalua nos determinashon pa sirbi E, nos fortalesa spiritual, i e kresementu di nos fe den JesuCristu.

Partisipando di e sakramento ta e kos di mas importante ku nos por hasi riba e dia di Reposo. Señor a splika e ordenansa aki na Su Apòstelnan djis promé ku E la muri. E la hasi meskos na e kontinente Amerikano. E ta bisa nos ku si nos partisipá di e ordenansa aki, e lo ta un testimonio na e Tata ku semper nos lo kord’E, i E ta primintí, di akuerdo ku esaki, ku nos lo tin Si Spiritu huntu ku nos.⁶

Den e enseñansanan di Alma Yu na su yu Shiblon, nos ta haña konseho sabio i amonestashon ku ta yuda nos keda fiel na nos konvenionan:

“Wak pa bo no wòrdu lanta dor di orguyo; si, wak pa bo no ta presumí den bo propio sabiduria, ni tampoko den bo propio forsa.

“Usa forsa, pero no dominashon; i tambe wak pa bo frena tur bo pashon, pa bo por ta yená ku amor; wak pa bo apstené for di flohera.”⁷

Hopi aña pasa, durante un fakansi, mi ker a bai den rema den kayak pa promé bia. Mi a hur un kayak ku hopi entusiasmo, mi a bai den laman.

Despues di un par di minüt, un ola a bòltu e kayak. Ku un gran esfuerso, teniendo e chapaletanan den un man i e kayak den e otro, mi por a rekuperá mi ekilibrio.

Mi a purba rema mi kayak atrobe, pero djis algun minüt despues e kayak a bolbe bòltu. Ku kabes duru mi a keda purba, sin resultado, te ora un hende ku ta kompronde kon pa kayak a bisa mi ku mester tin un sker den e kayak ku mester a yena ku awa, poniendo ku e no ta stabil i imposibel pa kontrolá. Mi a lastra e kayak bai kantu i kita e tapa, i asina mes, foi dje a sali un kantidat grandi di awa.

Mi ta kere ku tin bia nos ta move dor di bida ku pikanan ku, meskos ku e sker den e kayak, ta impedí nos progreso spiritual.

Si nos persistí den nos pikanan, nos ta lubidá e konvenionan ku nos a hasi ku Señor, maske nos bòltu pa motibu di pèrdè balansa ku e pikanan ta krea den nos bida.

Manera e sker den mi kayak, e skernan den nos bida mester wòrdu atendé ku ne. Sin pikanan ku ta rekerí mas esfuerso ku otronan pa arepentí.

P’esei nos tin ku puntra nos mes: Na unda nos ta pa loke ta trata nos aktitut pa ku e Salbador i Su obra? Nos ta den e situashon di Pedro ora e la nenga JesuCristu? Or nos a avansá na e punto kaminda nos tin e aktitut i determinashon ku e ta tin despues di e “gran nombramentu” ku e la risibi di e Salbador?⁸

Nos mester lucha pa obedesé tur e mandamentunan i pone bon atenshon na esnan ku ta mas difísil pa nos warda. Señor lo ta den nos banda, yudando nos den tempunan di nesesidat i di debilidat, i si nos demonstrá un deseo sinsero i aktua korektamente, E lo hasi “kosnan debil bira fuerte.”⁹

Obediensia lo duna nos e fortalesa pa nos surpasá pika. Tambe nos mester komprondé e prueba di nos fe ta rekerí nos pa ta obediente, hopi bia sin sa e resultado.

Mi ta sugirí un formulá ku lo yuda nos perseverá te na final:

Diariamente, hasi orashon i lesa e eskrituranan.
Semanalmente, partisipá di e sakramentu ku un kurason kibra i un espíritu kontrito.
Paga bo diesmo i bo ofrenda di ayuno mensual.
Kada dos aña - kada aña pa e hóbennan - renobá bo rekomendashon di tèmpel.
Durante hinter nos bida, sirbi den e obra di Señor.

Ku e gran bèrdatnan di e evangelio stabilisá nos mente, i ku nos por mantené nos bida liber di e skernan ku ta impedí nos biahe sigur dor di e laman di nos bida.

Éksito den e manera di Señor tin un preis, i e úniko manera pa logra ta dor di paga e preis ei.

Kon agradesí mi ta ku nos Salbador a perseverá te na final, kompletando Su gran sakrifisio ekspiatorio.

E la sufri pa nos pikanan, dolónan, depreshonnan, angustianan, enfermedatnan, i miedunan, i p’esei E sa kon pa yuda nos, kon pa inspirá nos, kon pa konsolá nos, i kon pa fortalesé nos pa nos por perseverá i optené e korona ku ta reserva pa esnan ku no ta derotá.

Bida ta diferente pa kada un di nos. Nos tur tin un tempu di tribulashon, un tempu di felisidat, un tempu pa tuma desishon, un tempu pa superá opstákulo, i e tempu pa hasi uso di oportunidatnan.

Loke sea nos situashon personal por ta, mi ta testifiká ku nos Tata Selestial ta bisando konstantemente, “Mi stima bo, Mi ta sostené bo, i Mi ta ku bo. No entrega. Arepentí i perseverá den e kaminda ku mi a mustra bo. I mi ta sigurá bo ku nos lo mira otro atrobe den nos hogar selestial.” Den nòmber di JesuCristu, amèn.