Iotebwa Timiti
Iroun Unimwaane Neil L. Andersen
Man te Kooram n te Tengaun ma Uoman n Abotoro
Iesu Kristo e rinea te mwane ae tabu, mwane ae etieti, bwa e na kabwanina Kaokan Ana euangkerio. E rinea Iotebwa Timiti
Ni moan rokona nakon te Burabeti Iotebwa Timiti n ana ririki 17, te anera e wetea Iotebwa n arana ao e tuangnga bwa ngaia, Moronai, bon te tia uarongorongo are e kanakoaki mai iroun te Atua ao te Atua anne iai ana mwakuri ibukina ae e na karaoia. Iangoia bwa tera n ana iango Iotebwa ngke te anera e tuangnga bwa arana “e na kinaaki n te raoiroi ao te buakaka irouia aba nako, reeti, neewe.”1 Bon te kubanrou ni matan Iotebwa ngke e a manga kaoka are e taekinna Moronai, bwa te raoiroi ao te buakaka e na taekinaki iai irouia aomata nako.2
Taetae aika raoiroi ibukin Iotebwa Timiti a roko ni karaurau; taekana ni kabuakakaki e a moana ni waaki. E koreia Iotebwa, “E bon rang kamimi aron te ataeinimwane aron kakawakina … e riai n iangoaki … bwa e rangi kakawaki ao ni butimwaea … te bwainikirinaki ma te kabuakakaki.”3
Ngkai tabeman a rikirake n tatangira Iotebwa, tabeman aomata a rikirake aia kairiribai nakoina. N ana ririki ae 38, e tiringaki irouia taan iowawa aika 150 mwane ake a karabai ubuia.4 E ngae ngke e waekoa n toki maiun te Burabeti, taekinana n te raoiroi ao te buakaka e a tibwa tabe ni waaki.
Ti riai ni kubanako ibukin te buakaka ake a taekinaki ibukina? Te Abotoro Bauro e aranaki bwa te aomata ae baba ao e mino.5 Ara Tia Kamaiu ae tangiraki, Natin te Atua, e aranaki bwa e buabeka ae te tia nim wain, ao e niniaki iroun te anti.6
Te Uea e tuanga Iotebwa tokin kawaina:
“Te Uea e tuanga Iotebwa tokin te aonaaba ana ukoukora arana, ao naake a nanobaba a na ngareakinna, ao moone e na un ni kaitara;
“Ao naake a itiaki nanoia, … aika wanawana, … ao aika raoiroi, a na ukoukori … kakabwaia n tainako mai iaan baina.”7
Bukin tera te Uea e kariaia te taetae n aki akaka ana kaai n airi ma te raoiroi? Teuana bukina bwa kaitaraan bwai aika kaoti ake a kaitarai bwaai ake e kaunga te Atua bwa aomata ake a ukoukora te koaua a na tataro ibukin te kaeka.8
Iotebwa Timiti bon te Burabeti ibukin Kaokan bwai. Ana mwakuri n te maiu n tamnei e waaki ma kaotin te Tama ao te Nati, n rimwiaki ni kakawarana aika mwaiti mai karawa. Bon tabonibain te Atua ni uotarake koroboki aika tabu, kabuai reirei ake a tia ni katukaki ao ni mwanuokinaki, ao manga kaokakin te nakoanibonga. Kakaawakin ana mwakuri Iotebwa e kainnanoa riki iangoana n te aro ni wanawana; e kainnanoa are ngaira, n aron Iotebwa, “butiia te Atua.”9 titiraki n te maiu n tamnei ni karekei kaeka n tamnei mai iroun te Atua
Mwaitiia naake a aki kakoaua te mwakuri n Kaokan bwai a bon aki kakoaua bwa kain karawa a taetae nakoia aomata iaon te aba. A taku bwa e kanganga bwa bwatua ake koora ake e anga te anera bwa a na rairaki ni mwaakan te Atua. Ibukin aia aki kakoaua, a waekoa n aki butimwaea ana koaua Iotebwa, ao tabeman a kawa ni kabaeaki iroun te riaboro n aki kakoaua maiun te Burabeti ao ni kakewekewe n anuana.
Ti na rang n nanokawaki riki ngkana temanna are e a tia ni karinea Iotebwa man rairakin neienne ke teuanne ao imwiina e manga kabuakaka te Burabeti.10
Ni kataia n reiakina taekan te Ekaretia n ongora irouia aomata ake a tia ni kiitana te Ekaretia,” e taekinna n te taina Unimwane Neal A. Maxwell, kanga ai aron titirakinan Iuta ngkana e ata Iesu. Taan kamwane n tainako a tuangiira riki aroia nakon te bootaki are a tia ni kiitanna. 11
E taku Iesu, “Kam na taetae ni kakabwaiaia akana karereanti ngkami, … tataro ibukiia akana a bukini ngkami.”12 Tina anga te akoi nakoia ake a kabuakaka Iotebwa Timiti, ao n ataakina inanora bwa ngaia bon ana burabeti te Atua, ao n karaui nano bwa ni kabane a tia ni kaman taekinaki iroun Moronai.
Ti na kanga ni kaeka nakon te aomata ae kan kakae are e raraoma n taeka ni kabuakaka are teuanne ke neienne e a tia n ongo ke ni wareka taekan te Burabeti Iotebwa Timiti? E koaua, n tainako ti butimwaei, titiraki aika tabangaki man koaua.
N titiraki ibukin anuan Iotebwa, ti na kona n tibwa aia taeka nga ake a kina n arona n aomata ao ake a anga maiuia ibukin mwakuri are a buokii ni katiai. John Taylor, are e katiiaki aua te tai irouia taan iowawa ake a tiringa Iotebwa, a na taekinna imwiina: “I kakoaua imatan te Atua, anera, ao aomata, bwa [Iotebwa] bon te aomata ae raoiroi, karineaki, [ao] te aomata ae tamaroa—…[ao] bwa arona ibon irouna ao imataia te botanaomata e itiaki—ao e maiu ao e mate bwa ana aomata te Atua.”13
Ti na kauringa te aomata are e rang kan ata taekan [te ekaretia] bwa rongorongo iaon te intanete aki raumeai rongorongo aika kairua. Tabeua rongorongo, n aki taraia bwa katekenanora taraakiia bon tiaki te koaua.
Ririki aika a nako I wareka te rongorongo iaon te Time maekatiin are e ribootinaki iai kuneakin te reta, kaanga angkoa e koreaki iroun Martin Harris, are e itabarara ma ana rongorongo Iotebwa Timiti ni kuneakin batua n Ana Boki Moomon.14
Tabeman membwa a kiitana te Ekaretia ibukin te rongorongo anne.15
Te kananokawaki, bwa a waekoa n nako. Namwakaina imwiina taan rabakau a kunea (ao te tia kewe e kaotia) bwa te reta bon akea koauana.16 Kam bon bae n ota ao n titiraki n te bwai are kam ongo iaon te kaongora, ma kona aki kakewea ana kakoaua ana burabeti te Atua.
Ti na kauringiia taan kakaae bwa tabeua rongorongon Iotebwa, e ngae ngke e koaua, a kona ni kaoti taeka aika kairua nakon te tai ao arona.
Unimwane Russell M. Nelson e kabwarabwara te iango aei. E taku: “I riki bwa te tia taboniwiia ana tautaeka te United States n ana Tienta ni Katoki Aoraki i Atlanta, Georgia. N te taina ngke I tataninga te taekitii bwa e na katokaai nakon te marae imwiin motirawan ara bowi, I kawenea rabwatau iaon te uteute ni mwengaraoi n abuen otan tai imwain ae e manga oki nakon … tain te kamwaitoro i Utah. … Imwina I karekea te tamnei n te meeri are e raweaki iroun te tia rawetamnei n te korobanna mai kiraroa, n rawea te aua ni motirawa iaon te uteute. Iaana bon taekana, ‘te tia taboniwia te tautaeka n te Naetino Tienta.’ Te tamnei e koaua, taekana e koaua, ma te koaua, are e kabonganaaki e katerea te iango ae kairua.”17 Ti aki katuka te bwai ae ti ataia bwa e koaua ibukin te bwai ae ti tuai n ataia.
Ti na kona ni kauringiia taan kakae bwa Iotebwa bon tiaki ti ngaia are a kawaria anera.
Taan kakoaua n ana Boki Moomon a koreia: “Ao ti kaotia naba ma te koaua, bwa e ruo ana anera te Atua mai karawa, ao e uoti ma ni kawenei taian bwaatua i matara, ao … ao ti noori taian koroboki ake iaoia.”18 Ti kona n taekin aia taeka naba ake tabeman.19
Te tia ukeuke ni koaua e riai n noora butanakon te euangkerio are kaokaki bwa mwiin ana mwakuri te Uea rinanon te Burabeti.
Iai ngkai e raka iaon 29, 000 taan taromauri ao 88,000 mitinare ake a reirei te euangkerio ni kabuta te aonaaba. Mirion aika Itiaki ni Boong Aika Kaitira a kakae n rimwiin Iesu Kristo, ni maiuakina te maiu ni karinerine, tararua ibukiia aika kainnano, ao n anga aia tai ao aia tarena ni buokiia tabeman.
E taku Iesu:
“E aki kona ni karika te ua ae buakaka te kai ae raoiroi, ao e aki kona ni karika te ua ae raoiroi te kai ae buakaka. …
“… Bwa ane kam na kinaia uakekei ni uaaia.”20
Kabwarabwara aikai a kona ni katika te nano, ma te tia ukeuke ni koaua e na aki katan iaon tii aikai ni katoka ana kakae teuanne ke neienne n kakae ibukin te koaua.
Taan kakoaua n tatabemaniia a kinnanoa te kamatoa n te maiu n tamnei n te mition mai karawa ao anuan te Burabeti ae Iotebwa Timiti. Aio e bon koaua ibukiia roro nako. Titiraki ni kaineti ma te maiu n tamnei e kainnanoa te kaeka mai iroun te Atua.
Bon taai aika tibwa nako ngke I mena n te aono are i Meangmainiku i Amerika, te mitinare ae tibwa oki e taetae nakoiu n taekina raraona ae minotaki n ana kakoaua n rongorongo ake e karekei are taekan te Burabeti Iotebwa Timiti. A tia n taekinna tabeua te tai, ao te mitinare are ea tibwa oki e tara n iai irouna te nanououa imwiin te maroro.
E ngae ngke I kantaningaia bwa e na kona ni kakorakora raraona, I namakina te raraoma n oin ana kakoaua. Tariu ao mwaneu, N na kauringii ngkami: ko na bon aki kona ni buokiia tabeman ngkana am onimaki e aki mwengaraoi ni nnena.
Tabeua te wiiki n nako I tokara te wanikiba n nako America Maiaki. Te tia ibuobuoki n te kiba e kaira matara nakon te witeo ni kamanomano. “E aki kantaningaki,” ti kauringaki, “bwa ngkana e bitaki te ea iaon te wanikiba, te kabwate i etan am kaintekateka e na uki, ni kaoti bwain te ubu ibukin te okititin. Ngkana e riki aei, teirake ao katika te ubu anne nakoim. Katoka te ubu iaon bwairim ao wiim. Karina te rabwa i etan atum ao kamwengaraoa te ubu ngkana e riai.” Imwin te kauring aei: “Kakoaua raoi bwa e mano ubum imwain ae ko buokiia tabeman.”
Bwaai aika buakaka ake a taekinaki ibukin te Burabeti Iotebwa Timiti e na rikirake ngkai ti waaki nakon te Kauaoki n Rokon te Tia Kamaiu. Taeka ni kewe ake akea raoi koauaia ao taekaia ni kakewekewe a na bon kerikaaki. A na iai kain te utu ao rao ake a kainnanoa am ibuobuoki. Ngkai bon te tai ni kaeta oin ubum n aokititin bwa ko aonga n tauraoi ni buokiia tabeman ake a ukoukora te koaua.21
Ana kakoaua te Burabeti Iotebwa Timiti e kona ni kakaokoro nakoira n tatabemaniira. E kona n roko ngkai ko kona n katorobubua n tataro, ni butiia te Atua ni kamatoa bwa bon te burabeti ni koaua. E kona n roko ngkai ko wareka rongorongon te Moan Kaotioti. Te kakoaua e kona n tiku inanom ngkai ko wareka ana Boki Moomon ni kaokiokia. E kona n roko ngkai ko kaota oin am kakoaua iroun te Burabeti ke ngkai ko tei n te tembora ao n ataia bwa rinanon Iotebwa Timiti te mwaaka ni kabaeaki ae tabu e kaokaki nakon aon te aba.22 Ma te onimaki n te koaua anne, am kakoaua iroun te Burabeti Iotebwa Timiti e na kakorakoraaki. Aomata ake a kataia ni kabua ana koaua ae matoatoa te aomata e kabotauaki nakon temanna are e kataia n tiringa te ai ma te ran ae uarereke, n aron are e kona n otinako man te kati te ran.
Nakoia te roronrikirake ake a ongora n te bong aei ke warekan taeka aikai ni bong aika imwaira, I angani ngkami te kakaewenako: Karekea oin am kakoaua iroun te Burabeti Iotebwa Timiti. Kariaia bwanaam bwa e na buoka kakoroan nanon ana taetae ni burabeti Moronai n taekina te Burabeti ae raoiroi. Aikai uoua iango: te Moan, kakaei koroboki aika tabu n ana Boki Moomon ake ko namakinna ao ko ataia bwa a bon koaua. Imwiina tibwaia ma am utu ke raraom n te kainutu n te tairiki, tieminarii, ao n am Bootaki n Ataenimwaane ke n Ataeinnaine, kaotia bwa Iotebwa bon ana tabonibai te Atua. Imwiina, wareka ana kakoaua te Burabeti Iotebwa Timiti n te Pearl of Great Price ke n te boki ae uarereke aei, ngkai inanon 158 taian taetae. Ko kona ni kunea iaon te rain n LDS.org ke irouia mitinare. Aio bon ana kakoaua Iotebwa n te bwai are e bon riki. Wawarekia n tainako. Iangoia n rawea ana kakoaua Iotebwa Timiti n oin bwanaam, n ongongora nako iai n tainako, ao n tibwaia ma raraom. Ongora nakon ana kakoaua te Burabeti n oin bwanaam e na buokiko ni karekea te kakoaua are ko ukoukoria.
Iai bong aika korakora man tamaroa imwaira. Beretitenti Thomas S. Monson e taekinna: “Te aro aei … e na reitinako ni waaki nako, ni bitii ao ni kakabwaiai maiu. … Akea te korakora n te aonaaba ae kona ni katoka ana mwakuri te Atua. N aki tarai bwaai ake a na kaoti, te aro aei e na reitinako ni waaki nako.”23
I anganingkami au kakoaua bwa Iesu bon te Kristo, ara Tia Kamaiu ao te Tia Kabooira. E rinea te mwane ae tabu, te aomata ae kokoaua, bwa e na kaira Kaokanbwai n bwaninin Ana euangkerio. E rinea Iotebwa Timiti.
I kakoaua bwa Iotebwa Timiti bon te aomata ae kokoaua ao e raoiroi, ana reirei te Uea Iesu Kristo. Te Atua te Tama ao Natina, Iesu Kristo a bon kaoti nakoina. E raira ana Boki Moomon man ana bwaintangira ao mwaakan te Atua.
Imwiina ngkana ti mate, ti na ota raoi n tabun te wewete ao te mition mai karawa iroun te Burabeti Iotebwa Timiti. Inanon te bong ae aki rang n raroa, ngai ao ngkoe ao “mirion [riki] a na manga ata ‘Te Tari Iotebwa.”24 N aran Iesu Kristo, amen.